得彼船
2019-12-24 02:41:08
望住依隻阻斷咗我逃生路線嘅怪物,我用力握緊手入面嘅斧頭,冷靜,我再一次同自己講,集中精神,衝過去,一斧劈落佢個頭,然後將捉住刀疤叔嘅細怪物一腳踼開,再逃出生天。
完美。我深深咁吸咗啖氣,雙眼同怪物對視,佢幾對尖腳輕輕咁刮過地下,昆蟲複眼一樣嘅眼睛死死咁望住我,人類對佢嚟講只係識移動嘅養份,我甚至係到諗,可以生長到咁大隻,佢到底要食幾多「移動嘅養份」先做到。
舉起斧頭,我義無反顧咁衝向佢。
斧頭由上而下咁劈向怪物個頭,斧刃劈開空氣,發出一聲又沉又短嘅悶響,之後係一聲水果被重物壓爛咁嘅聲音,怪物成個頭比斧頭一分為二,四肢無力咁係地下攤開伸直,墨綠色嘅汁液係整齊切開嘅傷口到噴出,灑咗一地,散發出肉類腐爛後嘅氣味。
計劃順利到我自己都呆咗呆,啲汁液彈到我隻手上,黏滑而且冰冷,完全唔似係從生物身上流出嚟,幾乎同係雪櫃到啱啱拎出嚟嘅溫度一樣咁凍。
我鬆咗口氣,正想抽返把斧頭出嚟,原本趴咗係地下到唔郁嘅怪物突然彈起,我只係大叫咗一聲,就成個人向後飛跌,一瞬間我甚至以為自己再一次比部七人車撞中,成個人幾乎失去意識,但好快心口傳嚟嘅劇痛將我拉返返嚟。
我一打開眼,就發現手上嘅斧頭旋轉住咁飛向隔離嘅貨架下面,而我自己就已經比隻怪物壓咗係地,怪物腹部下面隱藏嘅大口張開,露出好似大白鯊咁嘅密集尖牙--但唔知係好彩定唔好彩,依隻怪物體型太大,唔能夠好似撲跌刀疤叔個隻咁樣,將啲尖腳緊緊咁包住我個頭。
同一時間,怪物將腹部嘅大口向下壓,一陣腥臭味撲面,我心臟狂跳,一瞬間連心口嘅劇痛都唔記得咗,即刻係向右手邊轆咗一下。
怪物一野咬唔中,幾隻尖腳又噠噠噠咁跟住我向右邊走,我再向右轆一下,怪物繼續噠噠噠咁跟住嚟,好快我右手邊已經得返貨架,冇得再避,望住眼前慢慢迫近嘅血盆大口,我只係覺得頭皮發麻,成身都係冷汗--突然間,我發現自己可能會死係依到。
電影裡面嘅英雄唔會死,但現實冇英雄,有時只係好少嘅失誤,就足夠令人萬劫不復。
不過,唔會係今日。
下一刻,係原始嘅求生欲望之下,我係喉嚨到發出一種野性未馴,刻係DNA到嘅嘶啞咆哮,青筋凸起嘅左手一野頂住怪物嘅上顎,然後另一隻伸向貨架下面係咁摸。
怪物嘅力量比我想像中仲要大,我有種自己正係到同電梯門對抗嘅感覺,不過係眨眼之間,怪物就已經將我隻左手壓到伸唔直,帶住腥臭嘅口水慢慢咁滴落我塊面到,我嘅氣管好似燃燒緊咁,但貨架下面嘅右手除咗冰冷嘅地板,咩都摸唔到。
快!快!快!快!快!我將隻手越仲越入,但依然咩都摸唔到。
就係我幾乎可以數到尖牙上面有幾多條肉絲嘅時候,右手終於摸到一樣帶住黏液嘅野。
我緊緊捉住木柄,一野將佢從貨架下面抽出嚟,由下而上咁插入怪物個血盆大口,依把劈到斧刃都凹凹凸凸嘅斧頭順利咁切開怪物口腔嘅軟肉,墨綠色嘅汁液立即大量噴出,濺到我嘅身上。
隻怪物就好似受傷嘅貓咁發出悲鳴,唔再壓住我,而係時左時右咁亂走。趁怪物發狂咁亂郁,我係佈滿黏液嘅地下到爬返起身,究竟係點樣行向隻怪物,我已經冇印象,只係記得自己雙手握住斧柄,然後一野劈落怪物嘅腹部。
「屌你老母!」我對住怪物大叫,然後又一斧。
得彼船
2019-12-28 00:05:51
當斧刃一野劈開怪物腹部嘅時候,怪物攤係地下到嘅尖腳噠噠噠咁嘗試離開我,但我係上面一腳踩住佢,然後又一斧劈落去。
大量墨綠色嘅液體流到周圍都係,我握住斧柄,手掌好似比火燒緊咁痛,我將斧柄向後拉,想扯返佢出嚟,斧刃卻只係郁咗少少,唔知道係因為斧頭卡住咗,定係斧柄太滑嘅原故。
「屌你老母……」我用手背抹走彈落塊面到嘅汁液,再次舉起斧頭。
「喂仲劈咩啊!死咗喇!」大隻仔嘅聲音係我身後傳嚟,我立即轉頭望過去,發現原本走到門口嘅大隻仔走返入嚟,正嘗試將捉住刀疤叔嘅怪物整開,佢面上全都係汗,抬頭望向我,「我唔夠力啊,幫手喇!」
我立即衝上去,同大隻仔一人捉住一邊嘅尖腳,然後用力一扯,啪嘅一聲之後,隻怪物發出悲鳴,然後跌落地下,我伸腳一野踩住,好似再自然不過咁,斧頭帶住腥風一野劈開佢嘅腹部。熟悉嘅汁液即刻噴出,流到一地都係,我望都冇望,一腳將佢踼開。
再望向坐係地下到嘅刀疤叔,佢成塊面都係黏液,但反而見唔到啲咩表面傷痕,正係到大口喘氣。
「仲跑唔跑到?」大隻仔將刀疤叔係地下扶起身,我正諗住行埋去幫手,遠處嘅短髮OL突然大叫咗一聲:「睇住後面!」
我即刻轉身望向後面,又一隻怪物係天花板到跌落嚟,幾隻尖腳迅速吉向我,我今次冇跌低,但擋住攻擊嘅斧頭成把飛咗出去,好似把石中劍咁插係地板。我忍住心口嘅悶痛向後退,而怪物再次向我迫近--斧頭,我要拎返把斧頭!
「快啲跑!」
我唔知啊媽係女人咩,我望住從四方八面包向我嘅怪物,慢慢咁向後退,係執起插係地下嘅斧頭之後,我作勢要衝向怪物,見個啲怪物即刻噠噠噠咁迅速向後退,我諗都冇諗就轉身狂跑。