《徘徊在似直又攣之間》
bedGeroge
550
回覆
120 Like
14 Dislike
第 1 頁
第 2 頁
第 3 頁
第 4 頁
第 5 頁
第 6 頁
第 7 頁
第 8 頁
第 9 頁
第 10 頁
第 11 頁
第 12 頁
第 13 頁
第 14 頁
第 15 頁
第 16 頁
第 17 頁
第 18 頁
第 19 頁
第 20 頁
第 21 頁
第 22 頁
智利黑提
2019-06-04 05:50:34
Pish
專業格劍家
2019-06-04 14:29:27
LM....個故好撚癲好撚正
毒自上高登
2019-06-04 17:50:20
黑子贏五目半!
三ml春江水
2019-06-04 19:24:21
我有個問題,主角體內有直陽之光,佢變左女人之後係咪會變成鍾意男人?
bedGeroge
2019-06-04 20:02:49
邏輯上好似係
二寶糖
2019-06-05 04:44:38
圓圓生個仔,吸返到光咪得囉
八哥眼凸凸
2019-06-05 10:29:46
你玩晒啦 搞番掂佢先好走啊你
Freelikerip
2019-06-07 00:04:37
推
Freelikerip
2019-06-07 00:05:04
唔怕等 只要唔好爛尾就得
Freelikerip
2019-06-08 01:27:28
推
bedGeroge
2019-06-08 02:23:57
舞子左諗右諗,最後都係做返佢最擅長嘅嘢,扮厲鬼嚇條TB。
個TB去到邊佢就跟到邊,用盡辦法搞到對方雞犬不寧,到左夜晚仲入夢警告個TB唔好再接近圓圓,否則就會繼續搞佢。
只不過個TB一啲都唔驚,仲搵左道士嚟捉鬼,舞子差啲就俾人收服左。
無計可施之下我諗到一條仆街「橋」,就係上網唱衰個TB。現在啲網民最憎就係溝人條女嘅「狗公」同「TB」,而阿玲咁啱兩樣都中曬,我就將佢flirt圓圓嘅對話cap出嚟,再po埋佢個樣出嚟,跟住我再加鹽加醋將阿玲有咁衰就講到咁衰。
結果正義嘅網民真係為我抱不平,喺網上對佢口誅筆伐,兼且仲有唔少人狂喺ig inbox阿玲屌鳩佢。
雖然將個人私怨擺上網呢種做法係十分卑劣,但阿玲俾人鬧一鬧好似真係收斂左,加上要忙住應付網民,佢慢慢都搵少左圓圓。
只可惜一雞死一雞鳴,我擊退左一個TB阿玲,但圓圓身邊好快又出現左第二個女人。
嗰條女聲稱係圓圓嘅催眠治療師,佢地兩個行得好埋,我試過好幾次上圓圓屋企嗰陣都碰見嗰條女在場。
我開初都覺得佢地兩個只係醫生同病人嘅關係,但呢段時間我約親圓圓佢都話係要做催眠治療所以唔得閒出嚟,我開始懷疑佢地嘅關係並非想象中咁簡單。
呢日我好唔容易先約到圓圓出嚟食飯,我就趁機會問清楚究竟佢同個女催眠治療師係咩關係。
而圓圓堅持話同對方毫無關係,並解釋佢最近真係忙住做催眠治療所以先唔得閒出嚟。
雖然圓圓努力解釋,但我仲係唔相信佢,「一個禮拜做三次治療?有無咁多呀?你老老實實話我聽,你係咪鐘意左嗰條女?」
「頂,我話左我同佢無嘢囖,你依家係咪唔信我呀?」
「你最近見佢多過見我,你要我點信你呀?」
「你信又好唔信又好,總之一句到尾我同佢一啲嘢都無。」
「好,既然係咁,咁下次我跟埋嚟陪你一齊做催眠都無問題啦?」
「對唔住,唔得呀,陳醫生話催眠期間要隔絕所有來自外界嘅影響,所以過程中除左我同佢,唔允許第三者在場。」圓圓話。
「咁你講曬啦,我話佢根本就係借治療之名嚟溝你,而你又受溝,你地根本唔係做咩催眠咩治療,而係去幽會!」
「Dickson,你唔好再打橫嚟講,都係嗰句,你信就信唔信就算,我唔想再同你拗,呢餐飯我睇都係食唔落去,我有啲攰,我走先。」圓圓擺低兩百蚊,拎起手袋離開餐廳。
我都無胃口繼續食,埋左張單就返左屋企。
呢一刻我心情鬱悶,反復諗緊自己係咪應該相信圓圓。或者佢同個治療師真係無嘢,但就算佢地係有嘢我都阻止唔到,無論圓圓之前有幾咁鐘意我,依家變左同性戀嘅佢都無可能真心喜歡一個男人。
儘管我唔想失去佢,但如果情況繼續,遲早佢都會離我而去。
然而,最近鐵男總係悶悶不樂,一日到黑都淨係識飲酒,心情低落嘅我就走上天台搵佢一齊飲酒,互相取暖。
迷濛
2019-06-08 12:50:20
推
逼血劍
2019-06-08 12:55:53
有文要推
bedGeroge
2019-06-09 01:39:33
「你上嚟做乜呀?」鐵男手上拎住一瓶大啤,背靠在欄杆上。
「無,見你日日一個人喺度飲悶酒,咪上嚟陪下你囖。」
鐵男苦笑,飲一啖啤酒,然後遞一支啤酒俾我。
我接過啤酒,飲左一大啖,「咦,啲啤酒好似唔係好夠棟wor。」
「凍唔凍飲落去都係差唔多姐。」
「啤酒唔凍邊度好飲架。」
「咁你咪落去拎啲冰上嚟再雪凍佢囖。」
「咁麻煩,都係飲埋呢支先啦。」我大啖咁再飲一啖啤酒。
鐵男望住我大口大口咁灌酒,問:「睇你個衰樣,你好似有心事咁wor。」
「都唔係咩心事,只不過有啲嘢煩緊姐。」我歎一口氣,「唔知點解個天要玩鳩我,係都唔俾我同我鐘意嘅人喺埋一齊。當我同Sam愛得熾熱嗰陣,偏偏俾我遇到你地兩個,因為你地嘅惡作劇令到我又直又攣,最後被迫要同Sam分開。當我已經疊埋心水諗住完全變做一個直男同圓圓一齊,點知圓圓又中左『同志之光』,搞到我地明明相愛但又難以相愛。」
「可能係你條命生得唔好。」
「係掛,咁你呢,你同Anna點呀?你係咪已經放棄左佢?」我問。
鐵男搖搖頭,苦笑一聲,「要做嘅我都做曬啦,佢到最後都唔接受我我都無辦法。」
「有時有啲嘢真係無法強求。」
「佢話佢年少嘅時候俾個賤男呃過一次,從此就對男女之間嘅感情徹底失去信心,佢覺得男人都係信唔過,就算表面上對自己幾好,到最後都係會呃曬你所有嘢然後一走了之。」
我記得Anna同我講過,佢大學嗰陣俾個男人呃過感情同金錢,可能就係咁令佢產生左心理陰影。
鐵男嘅眼神流露著淡淡悲傷,停頓幾秒後,佢繼續講:「或者,佢唔係唔鐘意我,只係因為信唔過男人先唔敢接受我。諗深一層,其實我都已經賺左啦,我得唔到佢嘅心,但好歹都得到過佢嘅身體,雖然只有四十五分鐘…」
「原來你兩條友匿埋左喺呢度,靜靜雞喺度飲酒又預埋我!」舞子飄埋嚟打斷我地嘅對話。
「喂,你細路女學咩人飲酒?係啦,我地啲啤酒唔夠凍呀,不如你落去幫手拎啲冰上嚟?」我同舞子講。
「你有手有腳點解唔自己拎?」舞子問。
「我行樓梯慢呀嘛,你穿過地板飄落去快我好多。」
「我幫你拎,但你要俾我飲酒。」
「咁呀?」我諗左諗,然後話:「得得得,我俾你飲小小啦。」
「哈哈,好嘢。」
跟住,舞子幫手拎左一盒冰上嚟,然後我就好似祭祀敬酒咁倒啲啤=酒落地下,幾秒後舞子手上就多左一杯充滿氣嘅啤酒。
「搞錯呀,得咁少?」舞子有啲不滿。
「細路女飲咁多夠啦。」
「講左幾多次呀,都話我唔係細路女囖!」
「係啦係啦,知你好成熟啦。」
圓圓嘗一口啤酒,「話時話,Dickson,遲啲我同鐵男去投胎,間屋得返你一個,你會唔會覺得好寂寞呀?」
「你地唔喺度我樂得清靜啦。」我把口係咁講,但個心其實有小小唔捨得兩隻小鬼。
「唔係掛?仲以為你會唔捨得我地添。」舞子話。
「呢條友扮嘢姐,我就話佢心入面肯定唔得我地走。」鐵男加把嘴。
「傻嘅,我點會唔捨得呀,不過你地知唔知自己大概幾時會去投胎呀?」
「唔知呀,可能聽日又可能係下個禮拜,總之一個月之內應該輪到我地投胎架啦。」舞子笑住講,「等左咁耐,終於可以投胎做人啦,哈哈!」
「你下世唔好咁百厭,唔好咁曳周圍搗亂啦。」
「得啦得啦...」舞子品嘗緊佢手上嘅啤酒,無乜理我講嘢。
至於鐵男就望住樓下街景,自言自語咁講:「唔知我下世會唔會再見到佢呢…」
「就算會再見,你都唔會記得佢啦。」我同佢講。
鐵男只顧苦笑,無回應我。
「我地唔記得,你記得我地咪得囖,哈哈...」舞子飲左小小酒就已經醉到暈坨坨。
我心諗你地兩個改變左我嘅人生,想唔記得都難啦。
呢晚我同鐵男都飲左唔少酒,第二日訓醒由於宿醉嘅緣故,我個頭赤赤痛。
我睜開眼就見到鐵男同舞子訓左喺我隔離,眼角睄到佢地手上嘅手帶從白色變成左紅色。
睇嚟佢地係時候要離開了。
給你一兜膠
2019-06-09 04:47:07
Dickson好慘,好孤零零
熱狗好食
2019-06-11 00:36:05
推
莫山山
2019-06-12 01:13:40
推
bedGeroge
2019-06-12 02:17:38
我刷完牙出嚟就見到鐵男同舞子兩個都醒左,舞子飄埋嚟話:「條手帶已經變左紅色,我地要走啦。」
只見二人手上嘅手帶越發鮮紅。
「天下無不散之筵席,係時候要講再見啦。」鐵男行埋嚟遞給我一張光碟,「早排我燒左幾隻碟,送一隻俾你做留念,入面有我以前寫過舞台劇錄影,你得閒無嘢做就開嚟欣賞下。」
「咁犀利,咁真係要睇下啦。」我接過光碟。
「Dickson,我都有嘢俾你呀。」舞子從身後拎出一支錄音筆,「我錄左首日本嘅搖籃曲俾你,你訓唔著嗰陣就開嚟聽下啦。不過入面把聲同我原本把聲有啲出入,因為係我上人造人公仔身嚟用佢把聲錄嘅。」
「下?你又趁我唔為意嗰陣上個公仔身?」
「哈哈,都係一次半次姐。」
「不過既然係你唱嘅,我諗應該都唔會太難聽嘅。」我從舞子手上接過錄音筆。
「咁梗係啦。」
呢個時候,佢地二人手中嘅手帶突然幻化成兩點小紅光,漂浮於空中。
「睇嚟係時候要走啦。」Dickson望著面前那點小紅光。
「鐵男,投胎之前你要唔要落去同Anna講聲再見?」我問。
鐵男搖搖頭,「唔啦,呢個鐘數佢應該仲訓緊覺,唔好阻佢休息啦。」
「咁都係嘅。」
兩點小紅光喺二人頭頂上方來回旋轉,二人慢慢俾道光牽引往上升。
「Dickson,我地要去投胎啦。」舞子揮手講再見。
「鐵男、舞子,再見。」我望住佢地慢慢升高。
「Dickson,有機會我地再見啦,byebye…」舞子笑住咁跟我道別。
二人升到天花板之後就好似肥皂泡咁,「卜」一聲咁爆開,之後就徹底消失不見了。
呢刻,喺呢間唔夠一百呎嘅劏房裡面,只剩低我一人。我手上拎住一隻碟同錄音筆,視線略過檯面上嗰個人造人公仔,忽然面對如此安靜嘅環境,我感到有啲不慣。
呢兩個影響左我人生嘅小鬼,就咁輕描淡寫咁離開左。
以後都唔洗陪舞子睇笑波子,唔洗再幫鐵男諗辦法溝Anna,亦唔洗擔心佢兩個周圍闖禍。
但係,呢間屋以後就剩返我一個,以前三個人吵吵鬧鬧嘅日子從此一去不返。
一諗到呢度,我就有種莫名嘅孤獨感。
我打開錄音筆,反復咁聽舞子唱嘅搖籃曲,然後又拎鐵男張碟嚟睇一睇,無諗到平時鹹鹹濕濕嘅佢寫嘅舞台劇都幾有文藝氣息。
佢話過佢將自己幻想同Anna一齊嘅情景全都寫入去故事裡面,而虛構嘅故事情節最終都無成為現實,佢始終都追唔到Anna。
正當我投入緊鐵男幻想世界嘅時候,邱比特突然唔知從邊到彈左出嚟。
「HI!」
「頂你,做咩唔敲門,失驚無神走出嚟,嚇到我個心離一離。」
「咦?你係度睇緊咩呀?」佢問。
「無,呢個係鐵男寫嘅舞台劇。」
「舞台劇?好似幾好睇wor。但嗰兩隻小鬼呢?唔見佢地嘅?」
「走左啦,佢地已經去左投胎。係啦,你係咪諗到辦法拗返直圓圓?」
邱比特搖搖頭,「無呀,我嚟係話俾你聽,我絞盡腦汁都諗唔到辦法拗返直佢。」
「下,唔係掛,你真係無辦法?」
「無,呢次我真係都束手無策。」
「咁點算呀?係咪上天整定左我同圓圓唔可以喺埋一齊?」
「都唔係嘅,我之前都講過啦,如果你死都要同到佢一齊,你可以變性做女人。」
「就算我肯變做女人,但係我體內有道『直陽之光』,咁變完之後我咪會鐘意男人?」
邱比特托頭思考左一陣,「原則上係,但嗰道『直陽之光』係喺你個春袋入面,而你要做女人就必須切左個春袋,所以道光都會離開你個體內。等你變左女人之後我再將『同志之光』射入去你身體度,咁你就會鐘意女人,你同圓圓就可以相親相愛,依家問題就係你肯唔肯為左一個女人而捨棄男人嘅身份?」
bedGeroge
2019-06-14 02:52:31
願唔願意為左圓圓而變成女人,其實我心中已經有左答案。
之前每當我遇到咩唔開心或者困難,圓圓都係第一時間行出嚟幫我,佢總係默默咁守護住我,雖然佢依家鐘意嘅係女人,但我知道喺佢內心深處肯定依然保留住對我嘅一份愛。
呢份愛仍然深厚,只係無法釋放而已。
我知道日後人生嘅旅途中,我仲會遇到各種困難,我想有人會喺隔離支持同幫助我,而嗰個人我希望係圓圓,我希望可以佢一齊度過以後嘅人生。
所以,我決定捨棄男人嘅身份,變性做女人。
「我願意為左圓圓去變成女人。」我對住邱比特講。
「真係?」
「係,你係咪有方法將我變成女人?」
「有,但我要準備一下。」
「要準備幾耐?」
邱比特思考數秒,回答:「三日,三日之後我幫你做呢次‘性別大改造’。」
「好,一言為定。」
就係咁,我地約定三日後進行性別改造。
邱比特離開後,我繼續睇鐵男留俾我嘅碟,間唔中又text下圓圓搵佢傾計,但佢回覆嘅速度比較慢,可能佢有嘢忙緊所以唔得閒回覆。
到左中午,我落樓下附近茶餐廳食飯,跟住就去返工,家陣我做sales要輪更,唔同以前日日返九放五。
每間茶餐廳都會有一部電視,而電視開住嘅頻道永遠都係TVB。
TVB被市民戲稱為CCTVB,原因係佢地新聞報道嘅內容十分偏頗,毫不中立,只幫政府講說話,完全就係政府嘅喉舌。
無奈大部分茶餐廳最鐘意就播TVB,有時你唔想睇都要焗住要睇。
依家,新聞報道緊話有個青山精神病院有病人偷走左,目前警方正追蹤佢嘅下落。
我認得呢個青山病人嘅樣,佢就係Dickson。
原來佢真係入左精神病院。Sam嘅死真係令佢思憶成狂,導致佢精神出現左問題。
睇完呢則消息,我個心都有啲唔舒服,我求其食左幾啖飯就無胃口食落去,然後就埋單走人。
返工期間我喺度摺下衫發下呆,仍然悶悶不樂。
呢個時候,店入面突然嚟左一個衣衫凌亂嘅白衫男子,我一眼就認出佢係Dickson。
Dickson目光呆滯,雙眼佈滿紅筋,佢行埋嚟用低沉嘅聲線問我:「呢位先生,你有無見過Sam呀?我好掛住佢呀,但又搵極都搵佢唔到,請問你有無見過佢呀?」
「Dickson?係我呀,你唔記得我啦?」
Dickson打量左我一陣,「哦,原來係你,我記得你,你都係叫Dickson,你仲係Sam以前個男朋友。咁你知唔知Sam依家喺邊呀?你係咪收埋左佢?你快啲俾我見佢啦,我掛住佢呀!」
「Dickson,你唔好咁啦,Sam佢已經走左架啦。」
「哈哈!Sam,原來你喺度,終於俾我搵到你啦!」Dickson無視左我,慢慢行去攬住店入面個其中一個假人公仔。
佢一臉癡迷咁攬住個假人,我行過去拉開佢,點知佢一手推開我,激動咁話:「你走開呀!Sam係屬於我架,你唔可以分開我地!」
見到Dickson咁樣,我好傷心。而我啲同事睇見Dickson係度搞搞震,不斷想趕佢走,但被我出手制止。
我仍由Dickson攬住「Sam」,俾佢同「Sam」好好依偎一會。
跟住我就偷偷打電話俾醫院,叫佢地嚟接走Dickson。
Dickson攬左一陣,忽然用力推開個假人,並開口大罵,「你係邊個?你做咩攬住我?下?咩話?你係Sam?無可能!你唔係佢!Sam唔係咁嘅樣架?你唔好行埋嚟,你究竟係邊個?」
Dickson一腳踢開個假人,佢指罵一輪後,然後又周圍問人Sam喺邊。
我啲同事俾佢嚇親,走左去更衣室度避。
大約五分鐘後,醫院嗰邊嘅人嚟到,佢地一行幾人合力夾走Dickson,拉佢上車,準備帶佢返醫院。
望住Dickson離開時嘅背影,我心入面諗到一個方法,呢個方法能夠俾佢搵返「Sam」。
bedGeroge
2019-06-14 02:55:54
呢個星期日前完故 & 香港加油
bedGeroge
2019-06-15 18:21:36
收工返到屋企,我喺櫃桶搵返個人造人公仔出嚟,打算將呢個人造人整成Sam嘅樣,然後送俾Dickson。
解鈴還須繫鈴人,可能只有「Sam」先可以舒解Dickson內心嘅傷痛。
我花左一晚時間將人造人嘅容貌換上Sam嘅樣子,第二朝就拎住佢去青山醫院。
我嚟到醫院搵Dickson,佢喺醫院花園度來回踱步,身邊有位姑娘陪住佢。
「Dickson,你睇下邊個嚟左?」我帶住人造人公仔走到Dickson面前。
「S…Sam?」Dickson目不轉睛咁望住呢個「Sam」,「Sam...你終於…返嚟啦…」
「係呀,Dickson,我返嚟搵你啦,我好掛住你。」人造人開口講嘢,琴晚我用左成晚時間教佢講嘢。
Dickson按捺唔住,衝過嚟攬實「Sam」,「你去左邊呀,你知唔知我好掛住你呀?」
Dickson情緒激動,眼角滲出淚水。
「Dickson,我返嚟搵你啦,我好掛住你。」人造人重複之前嗰句。
「衰人,你以後都唔準離開我,知唔知呀?」
「Dickson,我愛你。」
「我都愛你...」Dickson無限依戀地依偎在人造人嘅心口上。
我同隔離姑娘解釋,話呢個人形公仔可能對Dickson病情有幫助,懇請佢批准呢個公仔繼續陪住Dickson。
佢就帶我一齊去請示院長同醫生,我曬左好多唇舌最後先說服到佢地相信呢個係一個人造人模型並且願意俾佢呢個留低陪Dickson。
可能 Dickson以後都唔會康復,但只要Sam能夠留喺佢身邊,至少能填補佢內心一點空虛。
時間離性別改造仲有兩日,依家嘅我要抓緊時間道別。
變性之後嘅我除左性別改變就連外貌都會變得截然不同,香港雖然係一個思想開放嘅社會,但對於變性呢件事,大眾顯然仲未能完全接受,我唔打算同身邊朋友講我要變性做女人,我選擇用「男人Dickson」呢個身份同佢地道別,等變性完之後或者我再用一個新嘅身份去認識佢地。
然而,唯一我要知會嘅人只有圓圓。我打電話約佢出嚟,但佢都卻話要做催眠治療所以唔得閒見面。
我唔知佢真係去做催眠定係同嗰個女醫生鬼混,無論點都好,我相信等我變成女人之後,圓圓會重回我嘅懷抱。
而我第一個呀同佢地講再見嘅係阿威同Kelly。
「Dickson,好耐無見,做乜咁突然嚟探我地?」阿威帶我到大廳。
「無,有啲嘢想同你地講姐…」
「咦,Dickson你嚟左呀?」Kelly陀住個肚慢慢走過嚟,數數手指,佢已經差唔多懷孕五個幾月,個肚變得越嚟越大。
「無端端有嘢同我地講?有咩想講呀?」阿威問。
「我呢就…遲啲可能要離開香港…我今日係嚟同你地say個goodbye。」
「下,咁突然?你要去邊呀?」Kelly問。
「出國囖,可能有一段長時間都見唔面啦。」
「出國?之前無聽你提過嘅?」阿威問。
「咁坊間家陣好興嗰啲working holiday呀嘛,咁我咪試下申請去澳洲見識下囖。」
「哦~原來係咁,但你幾時出發呀?」阿威問。
「後日。」
「但係你同圓圓唔係……佢同你一齊去...?」Kelly問。
「我自己一個人去,圓圓會留喺香港。」
「咁你自己一個去到嗰邊要萬事小心呀。」阿威叮囑。」
「知架啦。」
「係啦,我地仲未諗到BB改咩中文名好,你係BB個契爺,你俾啲意見呀,我同Kelly拗左好耐都唔知叫邊個名好,同埋你今晚留喺度過夜一齊飲下酒等我地farewell呀...」
「好呀,咁你地目前諗到有啲咩名呀?」
「暫時就諗到有浩名、天眾…….」
同阿威、Kelly講完再見之後,我就去左搵Linda。
見佢好似無精打采,我問佢咩事,佢就答我佢最近失戀,俾嗰個鬼佬飛左。
唔洗講都知佢口中嘅鬼佬就係我識嘅嗰個邱比特。
細個睇希臘神話故事都知道,啲天神鐘意亂搞男女關係架啦,幸好Linda都算堅強,我相信佢好快就會move on。
同過身邊嘅朋友、同事逐一道別後,依家嘅我準備迎接一個全新嘅身份。
只可惜,最重要嗰個人都仲係無時間同我見一面。
我打電話俾佢,但佢無聽電話,淨係短信留言話佢做緊治療唔方便聽電話。
既然係咁我只能夠先斬後奏,諗諗下其實我變左女人之後再去搵佢都一樣姐,雖然我性別同外貌變左,但內裡嘅靈魂唔會改變,我相信佢到時一定會認得我。
bedGeroge
2019-06-15 18:36:27
呢日係我同邱比特嘅約定之日,我一大早就起身左等對方出現。
呢個係我一生中最大嘅決定,而我呢刻心情十分緊張好同忐忑。
來到下午時分,門外才傳來敲門聲。
我打開門,請邱比特入嚟。
「點呀?你係咪做好曬心理準備,真係決定要變性做女人呀?」
我堅定咁點點頭,「係。」
「事先聲明,你變左女人之後就永遠都變唔返男人,你肯定你唔會後悔?」
‘’
「唔後悔。」我回答。
「好,咁就嚟啦。」邱比特輕輕咁彈一彈我嘅額頭,然後我就雙眼一黑,迷迷糊糊咁暈低左。
昏迷嘅時候我發左個夢,夢見自己變成女人,同圓圓喺夕陽之下擁吻。
然而,當我再醒嚟嘅時候,自己已不是男兒之身。
「你醒啦?你依家已經係女人啦,而且係一個同性戀嘅女人,你行去鏡嗰度望下。’」
我行到鏡前面,仔細打量呢個全新嘅自己。同時間我feel胯下係空蕩蕩一片,嗰條伴我走過二十四個年頭嘅陽具已經唔存在。
現在嘅我擁有一張細緻嘅臉孔,纖細嘅四肢同一對豐滿嘅乳房,還有一把溫柔嘅聲線。
我不折不扣咁變成一個女人。我好肯定圓圓會好鐘意我依家呢個樣,佢會重新接受我。
我即刻換左見連身裙走去搵圓圓,點知我一落到樓下就遇見佢,但佢卻直行直過好似無認得出我。
佢手上拎住個電話,打緊俾我。
「叮鈴鈴——」我褲袋中嘅電話響起,圓圓擰轉頭望我一眼。
圓圓眼定定咁打量住我,「你…」
我行到去佢面前接聽佢個電話,「圓圓,係我呀。」
圓圓碌大對眼,露出十分驚訝嘅神情,對住電話問「你係…Dick…Dickson?」
我點點頭,回答:「係呀,我知你一定認得我架」
「點解…你變…變左個...女...女人?」
「因為我鐘意你,我好想同你一齊,但命運嘅作弄令我地無法喺埋一齊,你中左『同志之光』變左同性戀,要你鐘意一個男人幾乎係無可能,所以我為左你我決定變性做一個女人,只要咁我地先可以繼續相親相愛。」
圓圓眼角滲淚,細細聲咁講:「點解你…點解你…」
我行過去拖住圓圓隻手,「圓圓,你願唔願意接受依家呢個我呀?」
圓圓抹掉眼淚,用無奈嘅眼神望住我講:「陳...陳醫生嘅催眠治療最後成功左…我依家...我變返…變返直……」
聽見佢咁講,我內心頓時崩潰,「你話…咩…咩話…無可能架…你中左嗰道光…無可能就咁拗返直…」
「Dickson,我同陳醫生日日夜夜咁嘗試各種催眠方法,最後俾我地誤打誤撞催眠成功,我依家的確變返做之前嗰個我。」
我腦海一片空白,唔知點反應好,「你係講真?」
淚珠劃過圓圓嘅面頰,佢點點頭答:「係...我依家係直唔係攣...」
我係咪前世做錯啲咩,所以個天要咁樣玩我?
我已經返唔到轉頭,唔可以再變返男人,依家唯一可以做嘅就係令圓圓變返做同性戀。
但圓圓話:「陳醫生話我接受催眠嘅次數太多,潛意識變得好薄弱,再繼續做落去我可能會進入長期催眠狀態,從此會一睡不起。」
我立即搵邱比特幫手,要佢即場射兩道光嘗試拗返攣圓圓,可惜始終都係唔奏效。
圓圓鐘意返男人,而我已經唔再係男人。
原來有啲嘢真係整定,我地兩個兜兜轉轉、來來回回始終到最後都係無法達至心意相通。
夕陽徐徐落下,餘暉映照在我地身上。日落每日都有,但唔係每日都有人陪你一齊睇。唔知下一個日落我同圓圓會唔會再一齊望住夕陽下山?
(全文完)
bedGeroge
2019-06-15 18:38:52
故事結束,多謝大家
616上街反送中!
キノコ
2019-06-15 18:56:09
最後可唔可以俾翻個good end dickson
唐樓養唐狗
2019-06-15 19:23:14
第 1 頁
第 2 頁
第 3 頁
第 4 頁
第 5 頁
第 6 頁
第 7 頁
第 8 頁
第 9 頁
第 10 頁
第 11 頁
第 12 頁
第 13 頁
第 14 頁
第 15 頁
第 16 頁
第 17 頁
第 18 頁
第 19 頁
第 20 頁
第 21 頁
第 22 頁
吹水台
自選台
熱 門
最 新
手機台
時事台
政事台
World
體育台
娛樂台
動漫台
Apps台
遊戲台
影視台
講故台
健康台
感情台
家庭台
潮流台
美容台
上班台
財經台
房屋台
飲食台
旅遊台
學術台
校園台
汽車台
音樂台
創意台
硬件台
電器台
攝影台
玩具台
寵物台
軟件台
活動台
電訊台
直播台
站務台
黑 洞