《徘徊在似直又攣之間》

推

雖然圓圓依家變左Lesbian，但我地都繼續好似普通情侶咁一得閒就出嚟見下面、食下飯。

不過同一般情侶唔一樣嘅係，我地幾乎無任何親密行為，就連身體接觸都好少。

其實，喺呢段期間佢去左睇唔同醫生，接受左各種治療，但都係無法變返原來嘅性取向。

隨住時間一日一日咁過，正如圓圓所講嘅，佢對我嘅愛正逐點流逝，相反，我嘅愛就好似越嚟越濃烈，我幾乎無時無刻都係諗緊佢，每次見到佢我個心都仲係怦怦怦咁跳個不停，而且好渴望同佢做愛，想同佢達至靈與慾嘅結合。

無奈現在我地兩個嘅愛無法同步，所以也無法結合。

依家我唯有等邱比特出現，等佢幫手諗辦法，條友好耐都無蒲頭，我仲驚佢會唔會以後都唔出現，點知琴日就俾我巧遇佢。

琴日我同圓圓去某間西餐廳度撐檯腳，咁啱就撞到Linda同佢一名男性朋友喺度。相請不如偶遇，既然難得碰見，我地四個於是就一齊共進晚餐。

Linda嗰位男伴係黑髮碧眼年約五十左右嘅鬼佬，我第一眼望佢就覺得有啲面善，望多幾眼就認出對方正是邱比特，而佢亦都無隱瞞身份。

趁兩位女士去洗手間補妝得返我地兩個嗰陣，佢就用廣東話問我：「喂，你用左我俾你嗰個吸光避孕套未？」

「邱比特，果然係你，我都知係你架啦，點解你個頭黑左咁多嘅？」

「無呀，出嚟同網友見面，咪執返後生個樣囖。」

「你同Linda係喺上網識嘅？你堂堂一個神父，又係天神，咁樣周圍溝女好似唔係咁好wor。」

「唔係我溝女，係Linda溝我。我早排上網寫書評，Linda喺下面留言，讚我文學見解獨到，又不斷約我出嚟，話想同我面對面討論下十九世紀嘅英國文學作品。如果唔係佢多番邀請，我都唔想出嚟。」

「寫書評？睇嚟你唔單止係發明家，而且仲係文學評論家添wor。」

「我都係得閒睇完本書求其上網寫幾句姐。喂，你仲未答我呀，你用左個condom未呀？」

「唉，用左啦，你唔見依家我下面得返一道光咩？」

邱比特探頭望一望我褲浪，「係wor，你家陣只係淨返一道紫光，證明我個吸光condom係有用架啦。」

「唉，係就係有用，只不過…」

「不過咩呀？」邱比特剛問完，圓圓同Linda行返埋位，佢就即刻轉返tone講英文。

Linda望住邱比特嗰陣，雙眼發光，好似好冧佢咁。

散席嗰陣，我靜靜行過去，叫邱比特送完Linda之後就嚟我屋企搵我，我話遇到麻煩嘢要佢幫手解決。

但係，琴晚佢無出現，直至到今日下晝佢先蒲頭。

「你琴晚去左邊呀？我叫你送完Linda返屋企就過嚟架嘛。」我問。

「Sorry，一時唔記得左。」

「唔記得？真定假呀？定係琴晚同Linda有其他嘢做呀？」

「真係唔記得呀，講返正題啦，你遇到咩麻煩嘢要我幫手呀？」

我將安全套穿左同圓圓中左「同志之光」嘅事一一話俾佢聽，並求佢諗辦法將圓圓拗返直。

佢聽完之後，問：「唔係掛？我個套啲用料咁好，無理由會穿架wor。」

我歎一口氣，「係圓圓佢整穿嘅。」

「下？點解佢要整穿個套？」

「呢個遲啲先解釋你聽，你有無方法拗返直圓圓？」

「Er…呢個…好似難啲wor…」

「你之前都發明左個吸光condom吸走我體內嘅光，咁照計你都有辦法整走圓圓體內度光？」

「你要俾啲時間我研究一下。」

「好，無問題，不過最好就快啲。」

「盡量啦。」

跟住嗰兩個星期，邱比特發明左好幾樣嘢嚟嘗試將圓圓拗返直，但無一樣嘢係奏效。

其中有樣嘢叫「電流蛋」，係一個類似震蛋咁嘅物體，邱比特話當電流同「同志之光」融合，就有機會變成「直陽之光」，結果不但唔成功，仲電親圓圓，搞到佢嬲鬼左我，話我搞埋曬啲怪力亂神嘅嘢。

邱比特話自己已經無曬辦法，實在諗唔到點樣將圓圓變返原來咁樣。

「呢鋪我可能真係幫唔到你，sorry。」邱比特坦言。

「唔會嘅，你再諗下啦，一定有辦法嘅。」

「嗰道光去左佢子宮度，吸都吸唔走，而‘電流蛋’已經係我最後一招，依家我真係無曬計啦。」

「咁點算呀？即係圓圓以後都係gay，以後都唔會鐘意男人？」

「睇怕係啦。」

「你再諗下辦法啦，我唔想失去佢呀！」

「如果你真係好鐘意圓圓，好想以後都同佢一齊，其實都仲有一個辦法。」

「仲有咩辦法呀？」

「圓圓變左Lesbian佢依家鐘意女人，如果你變成女人，咁你咪可以同佢一齊囖。」

「下？」

「你諗下自己願唔願意為左鐘意嘅人變性啦。」

「我相信仲會其他辦法嘅。」

「唔知呀，我再幫你諗下啦，不過你都唔好抱太大期望。」

雖然邱比特咁講，我心入面仲尚存一絲冀望，寄望佢能諗到方法將圓圓變返做異性戀者。

而圓圓都嬲左我好幾日，最近都唔聽我電話又唔覆message，見佢好似仲未下啖氣，於是我諗住送扎花俾佢tum返佢。

晚頭黑我收左工，走去花店買花，我揀左一束艷麗嘅紅玫瑰，俾完錢我就拎住扎花行出門口。

一行出嚟我睄到圓圓喺對面街，佢同一個疑似TomBoy嘅女子走埋一齊，二人有講有笑，好似好熟絡咁。

我偷偷地跟住佢地尾，睇下佢地去邊。個TB同圓圓行得好埋，而且仲對圓圓毛手毛腳，睇到我眼火爆。

我一路跟到佢地返屋企，個TB仲想上埋圓圓屋企，但圓圓話唔方便婉拒對方。

同時間，眼利嘅圓圓亦都發現左我喺後面偷偷跟蹤佢。

Live

都話 LGB 都講完就講 T 㗎啦！

可唔可以圓圓係同女人有野，而唔係同tb有野啊?

都得既，不過tb其實都係女人黎

推

等…

推

等TB離開後，我拎住扎花行上前，「啱先個Tomboy邊個嚟架？」

「你做乜跟蹤我呀？」圓圓反問。

「我唔係跟蹤你，我係特登嚟搵你，只不過咁啱撞到你同個TB一齊姐。」

「你手上扎花係送俾我架？」

「係，呢扎花係送俾你架，你唔好再嬲我啦。」我遞給花束。

圓圓望我一眼，又望一望扎花，臉上擠出笑容，「多謝。」

「咁你係咪唔嬲我啦？」

「有乜好嬲呀，你搞咁多古靈精怪嘢都係想我變返之前咁。要嬲都係我自己啦，唔係我咁傻吉穿個condom，我都唔會搞攣自己。」圓圓從我手上接過玫瑰花。

「唉，唔好咁講啦，嗰日我唔應該用個吸光套。只但係，既然你都無嬲我，咁點解最近都唔覆機嘅？」

「因為我個電話壞左呀嘛，早幾日拎左去整，今日先拎返部機，啱先嗰個阿玲咪就係我整電話嗰陣識架囖。」

「阿玲？你話啱先個TB？條友正仆街嚟，你地識左無幾日，佢就摸身摸勢，猛咁抽你水。」

「一般身體接觸姐，都唔算係抽水啦。」

「總之無乜嘢你都唔好同佢見面啦。」

「得啦得啦，食左飯未呀？唔好講啦，我地一齊去食飯啦……」

然而，圓圓的確遵守承諾，無再搵個TB，但嗰個TB就不斷嚟纏繞佢，幾乎日日都去搵圓圓。

圓圓依家係女同性戀，我驚佢俾個TB tum兩tum就把持唔住鐘意左人。

我唔想俾個男唔男女唔女嘅TB撬墻腳，我一定要諗辦法趕走佢。

而最直接嘅方法就係搵佢出嚟，喺佢面前宣示主權。我特登去TB阿玲返工嗰間手機鋪搵佢，並用圓圓男朋友嘅身份當面警告佢唔好再騷擾圓圓。

點知條八婆串柒柒咁款，完全唔放我在眼內，講到明要從我手上搶走圓圓。

「先生，圓圓擺明就係鐘意女人，我贏硬你架，你收皮啦。」TB阿玲話。

「你收皮啦，想搶走我嘅女人，無咁易呀！」

「哈哈，我已經feel到最近圓圓對我開始產生好感，我相信佢好快就會愛上我，哈哈哈！」

「哼！放心啦，我係唔會俾條八婆得逞嘅！」

「哈哈哈，睇下點！」

「好！就睇下點！」我離開手機鋪，心情極之不爽，同時間心入面又有陣強烈嘅不安，我擔心圓圓真係會俾呢條八婆TB搶走。

最衰係邱比特佢束手無策，諗唔到方法拗返直圓圓，如果再係咁落去圓圓真係有可能俾個TB溝走。

我唔可以俾呢件事發生，但係，我又唔知用咩方法擊退個TB。

呢日放假，我留喺屋企諗辦法，而八卦嘅舞子飄過嚟問：「Dickson，你煩緊咩呀？」

「諗緊辦法點樣整走圓圓身邊隻死TB！」

「有人想同你爭圓圓？」

「係呀，係條男人婆Tomboy嚟，你快啲一齊幫手諗下點樣趕走條友。」

「咁樣呀...」舞子單手托頭，陷入思考。

呢刻我留意到佢手腕上好似多左一條白色嘅手帶，我問：「你手上條帶咩係嚟架？」

「下？你依家先發現呀？呢條叫做『索魂帶』。」

「有咩用架？」

「輪到我投胎嗰陣，呢條帶就會變紅色，而且會牽引我去地府投胎。」

「投胎？你地返日本投胎呀？」

舞子搖搖頭，「唔洗返日本，就喺呢度投胎。」

「嗯？但你之前唔係話香港地府唔俾你地日本鬼喺度投胎咩？」

「係呀，不過依家時勢唔同左啦。」

「有咩唔同呀？」

「大灣區融合呀嘛。」舞子話。

「咩呀？大灣區融合關你地咩事呀？」

「呢度嘅地府都因應香港同廣東省大灣區融合，於是都作出左合拼，原本香港嘅閻羅王被降左一級，依家話事嗰個叫『粵港澳大灣區閻羅王』，咁啱呢個新嘅閻羅王願意開放俾外來鬼投胎，大發慈悲咁允許我地做未來嘅大灣區人。」

「所以你同鐵男好快就要去投胎？」

「係呀。」

「但係鐵男放得低Anna走去投胎咩？」

「唉，鐵男佢又寫信，又變成靚仔，仲用左好多錢去追Anna，但都係唔成功，佢已經心灰意冷，放棄左架啦。」

「佢鐘意左Anna咁耐，就咁就放棄？」

「呢個我都唔清楚呀，可能佢係諗通左掛。」

「算啦，唔好講呢筆住啦，你有無方法幫我趕走圓圓身邊個TB呀？」我問。

「有，有呀，你俾我諗多陣，我就嚟諗到架啦…」

故事開始進入收官階段

樓主加油

希望更新速度快返啲，追咁耐驚爛尾

Live咗 個故好鳩但又幾好睇
可唔可以good end 基唔基我都ok
利申非gay

樓又話tb其實都係女人，轉個頭又話唔男唔女

一時間諗唔到用咩形容tb，所以就話唔男唔女