[歷史短篇][多圖有字]由比利時嘅斷掌朱古力講起Remixed

喺講第二代屠龍者之前
要先講講第一代係點解會失敗
威廉斯嘅失敗
首先在於佢未能夠引起足夠嘅輿論壓力畀各國政府
佢嗰兩封公開信嘅用詞係好精準同嚴謹
作為官式文件係相當合適嘅
但係呢兩封信嘅受眾唔只係啲官仲有普羅大眾
而"群眾係愚蠢"呢句說話真係千古名言
冗長而沉悶嘅文章只會換嚟“Too Long Can't Read”
而佢嘅對手係“利用傳媒嚟引導民意”嘅高手利奧波德二世
面對鋪天蓋地嘅指控,簡單易明嘅市井式言語
威廉斯先失人和

而至於地利方面
如果係而家嘅話
佢選擇喺非洲腹地發表呢封公開信其實係相當唔錯
最少畀到人呢啲係第一手資料嘅感覺
不過十九世紀係冇高登冇Facebook嘅
佢係冇辦法好快咁反駁對手對佢嘅人身攻擊
一般人見唔到佢回應就自自然然相信㗎啦
到佢返到歐洲想還擊嗰時
普遍人對佢嘅成見只會令佢事倍功半
咁又輸蝕多樣喇

最後到天時喇
正所謂時勢造英雄
威廉斯呢個悲劇英雄
係咩時勢造成嘅呢
咁就要講少少1890年代嘅國際形勢...
正如前文所述
各列強因為種種原因先對中非剛果盆地冇乜興趣
不過唔代表佢地唔知利奧波德二世嘅野心
喺史丹利第二次剛果探險期間
各國都加緊步伐限制利奧波德二世嘅擴張
例如法國喺1882年經西非操入剛果河北岸建立法屬剛果
英國就支持葡萄牙喺東非莫桑比克嘅勢力
延伸到剛果盆地嘅東邊
阻止國際剛果協會攞到印度洋嘅出海口
佢地嘅行動好明確咁話畀利奧波德二世聽
"塊爛地你要飽佢，但係唔好阻住我地玩過三關 "
咁利奧波德二世當然都好識做
極力避免同列強喺非洲有正面領土沖突

到柏林會議後
各國都由自己分到嘅非洲領地開始擴張
法國由西非向東，英國由南非向北
但喺中非佢地嘅著墨係非常有限
以法屬剛果為例，法國將嗰度分租畀卅幾間租界公司
形式基本上同剛果自由邦嘅係一樣
不過法國冇派部隊去嗰度
完全由得啲租界公司自己管理
因為冇軍事上嘅援助所以啲公司多數都係蝕本收場
(但係對啲黑鬼殘暴嘅程度同剛果自由邦比其實係不遑多讓)


法屬剛果

到咗1890年左右
呢盤非洲過三關開始進入白熱化階段
英國喺非洲收咗葡萄牙皮之後
開始研究點樣吞併南非東北嗰兩個波爾人國家
(波爾人係指喺南非土生土長嘅荷蘭人後代
英國喺1880年尾嘅第一次波爾戰爭中意外慘敗
跟住嗰兩個波爾人國家分別喺1885年左右發現大金礦
自此英國佬就時時刻刻都想覆桌)
法國亦都佔領咗西非大部份沿海地區
謀求進一步逼近仲未係英國控制範圍嘅尼羅河上游
兩個國家嘅重點(無論政府抑或民間)
都係關於點樣喺呢場過三關中攞到優勢


第二次波爾戰爭時英國囚禁波爾女人同細路嘅集中營(啲男嘅畀英國佬拖哂去印度)

呢個時候威廉斯爆單咁嘅嘢出嚟
雖然佢嘅指控英法兩國政府都知係屬實
而跟據柏林協議
基本上都夠哂料去鋤死利奧波德二世
不過一來威廉斯冇辦法引起大眾廣泛關注
啲官冇壓力就自然唔做嘢㗎啦
二來英法兩國都唔希望因為咁而趕狗入窮巷
佢地都唔想逼到利奧波德二世黐埋去對方嗰邊
從而減少自己嘅優勢
...始終死嘅都係啲黑鬼啫咪按兵不動睇吓個民意走向先囉
咁喺非洲揸莊嗰兩個國家都冇行動嘅話
其他各國都唔會有反應㗎啦
再加上威廉斯早死
呢個悲劇英雄真係時不利兮喇

今日劇情冇咩進展，眨眼眼就睇晒，頂唔順

留名聽故仔

利奧波德二世呢段時期應該相當愜意
威廉斯嘅失敗係一個好好嘅機會
展示畀啲唔識相嘅人
特別係自由邦內嗰啲傳教士睇
一個人喺國家機器面前係幾咁無力
啲傳教士喺睇到威廉斯點樣變得身敗名裂後
個個都唔敢再出聲
有啲選擇深耕細作幫助啲剛果人
就算有異議嘅都喺邦政府威逼利誘下封口
加上自由邦喺1894年討伐阿拉伯奴隸主嘅戰爭中大勝
西方世界主流嘅媒體都對利奧波德二世有讚冇彈
利奧波德二世可以話係聲譽日隆
另外嗰時自由邦開始見到營利前景
佢登基時嘅夢想終於可以實現
比利時終於有一個可以畀佢發展(剝削)嘅殖民地喇

但正當呢條惡龍意氣風發之際
命運之神已經將屠龍嘅責任
交付咗畀一個英國嘅少年
呢個少年將會繼承威廉斯嘅遺志
以筆作劍
去挑戰利奧波德二世嗰個建築喺大話上嘅邪惡帝國

埃特蒙‧提納‧莫雷(Edmund Dene Morel)
1873年7月10日喺巴黎出世
佢個法國人老豆喺佢四歲未夠時就去咗賣咸鴨蛋
淨低佢個英國人阿媽同佢相依為命
為咗畀佢好啲嘅教育
喺莫雷八歲嗰時佢阿媽就送咗佢去英國讀寄宿學校
自己就留係巴黎做英文老師
死慳死抵去供莫雷讀書
不過佢讀到十五歲佢阿媽就捱病咗
佢就被逼輟學返巴黎照顧佢阿媽喇
咁冇書讀囉咪唯有出嚟做嘢養家啦
最初佢喺間美資銀行度做office boy
不過可能喺英國住慣咗啦
佢同佢阿媽都想返英國生活
最後喺1890年佢地搬到去港口城市利物浦
莫雷喺一間船務公司(Elder Dempster) 搵到份文員嚟做
再喺利物浦市郊租咗間房
佢地就咁安頓咗落嚟喇
呢一年佢十七歲


Elder Dempster Lines,莫雷人生嘅轉捩點
(呢間公司一路運作到2000年先畀人收購)

一個一窮二白，毛都未生齊嘅英國船公司文員仔
究竟係點樣擊倒老練狡猾嘅比利時國王㗎呢?
相信佢自己都冇諗過
佢嗰時應該連利奧波德二世係乜水都未知
佢只係知道要盡力賺多啲錢去改善生活
不過單靠做文員一年嗰60英鎊人工係好勉強嘅
佢要搵啲外快先夠維皮
嗰時佢做嗰間公司主要經營來往歐洲同
非洲嘅客貨運航線
咁啱喺莫雷入職冇幾耐
Elder Dempster攞到安特衛普至剛果自由邦嘅航運合約
利物浦總公司呢邊就開咗個新部門專責營運
因為莫雷識法文方便同安特衛普分公司嗰邊聯絡
所以佢就畀人調咗去新部門幫手喇

喺公司佢接觸到好多由唔同西非殖民地返嚟嘅水手同船長
咁有時冇嘢做咪同佢地圍埋吹吓水囉
就咁樣莫雷知道咗好多關於唔同殖民地發展嘅第一手資料
譬如邊度起緊新嘅鐵路呀
邊度有新嘅關稅呀
各地唔同嘅風土人情呀咁
佢會對應番個地圖去記低呢啲資料
初時都係貪得意嘅啫
慢慢佢發覺呢個興趣可以幫佢搵到啲外快㗎喎

當時英國社會瀰漫住同法國爭非洲主導權嘅氣氛
非洲尤其是西非嘅局勢成為一般人茶餘飯後嘅話題
(西非係法國喺非洲嘅主要跟據地)
不過普遍報紙都好少報導嗰邊嘅情況
多數人都係從啲探險家寫嘅書去了解非洲
但咁樣嘅資料唔夠即時
而且自1890年史丹利嗰次探險引發嘅醜聞後
英國同類型嘅探險都停哂
市場上關於非洲嘅資訊就更加少啦
莫雷睇準呢個空缺
1893年12月佢開始投稿到唔同報紙
去介紹西非嘅現況嚟賺稿費喇


二十歲嘅莫雷

留精不留名

今日仲好長，樓主繼續更

live咗(我都)

因為莫雷寫嘅資料準確
文筆通俗易明得嚟感覺又唔會粗鄙
佢維護土著人權同自由貿易嘅立場
又得到普遍人嘅共鳴
所以好多報紙嘅編輯都鍾意刊登佢嘅文章
而其中一份報紙令佢喺英國中上流社會中聲名鵲起
呢份係一份叫Pall Mall Gazette嘅晚報

Pall Mall係倫敦一條街名嚟
喺十九世紀開始有好多紳士會所進駐嗰度
呢啲會所主要係提供個聚腳點
畀啲中上流階層嘅男人夜晚坐底飲吓嘢吹吓水呀咁
(同一般酒吧唔同嘅係啲會所行會員制
裡面品流冇咁複雜)


喺會所門口叫賣Pall Mall Gazette嘅細路

佢地多數都會買份晚報去啲會所度睇吓
所以呢啲紳士有好多機會睇到莫雷嘅文章
佢地一般都想了解多啲西非發展嘅現況
而呢啲文章正正提供咗一個方便，易明而又準確嘅途徑
漸漸莫雷就成為呢啲紳士以致一般市民眼中嘅西非專家喇

就係咁莫雷以做正職攞返嚟嘅資料去支撐佢呢份秘撈
而秘撈所賺取到嘅名氣亦幫助到佢得到老闆嘅注意
加上佢喺公司真係做得嘢
喺1895年老闆就升咗佢做專責剛果航線嘅部門主管喇
呢個升遷係莫雷人生中其中一個最重要嘅轉變嚟嘅
自此佢就開始踏上討伐利奧波德二世之路喇
其實喺佢升職之前佢對剛果自由邦係冇乜反感嘅
甚至有時會認同佢嘅做法
例如喺1894年2月佢寫過篇文
讚揚剛果自由邦喺同阿拉伯奴隸主嘅戰爭中
採用正確嘅策略而得到大勝
但喺佢升咗之後
佢對利奧波德二世嘅睇法就慢慢有咗改變...

因為工作嘅關係
1897年起佢要成日過去布魯塞爾同安特衛普嗰邊
同剛果自由邦啲官呀，租界公司啲人呀咁開會
佢仲要管埋船隻裝卸貨物條數都幾忙㗎
不過漸漸佢喺呢條數度發現咗啲古怪嘢

喺剛果自由邦運返嚟嘅
一律都係象牙呀橡膠呀呢啲貴價嘢
但係由安特衛普上船嘅
全部係槍，子彈同其他軍需品
完全無其他有價值，可以同當地人交易嘅產品
咁啲貴重資源係點得嚟㗎呢
另外一般國家攞到個殖民地之後
都要投放大量金錢去發展嗰度嘅基建
所以初期入不敷支係正常嘅
但係剛果自由邦個收入竟然多過支出成倍有多

呢個莫雷所做喺1899至1902年間各殖民地收入同支出嘅對比圖表

🈶️更新了

種種跡象顯示
呢啲資源根本就唔係透過正常貿易交換返嚟
而係自由邦當局用槍炮嚟威逼奴役啲土著所奪取嘅
...就好似威廉斯講嘅一樣呀
於是喺1898年
佢開始暗中聯絡嗰啲返咗嚟歐洲嘅傳教士
收集關於剛果自由邦暴行嘅証據
同時透過佢地遊說喺自由邦嘅傳教士
進一步記錄各種壓迫同奴役
一切都係低調咁進行
主要係因為佢未夠料砌阿利奧波德二世
咁快揚咗嘅話好易畀佢反咬一口
另外當時歐洲社會氣氛同國際形勢
都唔容許佢篤爆利奧波德二世住
因為嗰時喺非洲發生咗兩件事
令英國以致成個歐洲
都籠罩喺戰爭嘅陰影...

之前都有追個post
好好睇

好正，雖然一開始好似有d亂

好正，雖然一開始好似有d亂

一開始唔熟路炒車
慢慢學緊慢慢學緊

mark 已book

留名

好正 唔覺唔覺追晒