[歷史短篇][多圖有字]由比利時嘅斷掌朱古力講起Remixed

高質post lm 之前高登係咪post過

喺1890年英國羅士德搶先派咗隊探險隊
帶埋禮物去說服Msiri同佢地簽和平協議
不過個生番土王帝好醒
收哂啲禮物後就打發咗佢地走
然後佢放聲氣話想同自由邦政府談判諗住重施故技
收到情報後利奧波德二世喺1891年6月
派咗兩隊武裝探險隊總共三百幾人
其中百幾人係僱傭兵
帶住當時最先進嘅來福槍同手槍
去"接觸"呢個生番土王帝
兩隊人用咗差唔多半年行去嗰度
唔知係天意定係乜呢
就係咁啱呢半年間Msiri王國南方發生叛亂
佢嘅主力軍隊去咗平叛
所以佢身處嘅村莊防衛唔算好森嚴


條村出面同啲圍欄頂有好多戰俘嘅頭做裝飾
好快就會加多一個㗎喇...

探險隊隊長帶咗十幾人入村同個土王帝傾
王帝身邊大概有三百幾人左右
最初佢都好客氣
但當開始傾到自由邦要喺度建立哨站同簽合作協議時
個生番王帝就發哂老脾好似想開拖
探險隊個副官見勢色唔對
就掹手槍一槍打爆咗佢個頭
跟住就係一輪槍戰...

喺呢度要講講佢地支槍嘅分別
探險隊用嘅來福槍同手槍係入子彈嘅後膛設計
射完一飛，掹雞，再射
同埋因為槍管有來福線
所以射擊速度快之餘準繩度仲好高
而啲生番就仲用緊前膛設計嘅火槍
即係要喺前面塞火藥再入鋼珠再通一通櫃先射到
所以嗰輪槍戰嘅情況係當大家射完第一輪後
啲生番就一路通櫃一路食子彈
加上喺第一輪槍戰中王帝同佢個仔都戰死咗
冇咗話事人啲未死嘅生番就鳥獸散喇
村外面大概一百個隊員聽到槍聲就沖入嚟幫拖
跟住落嚟嘅都唔係叫戰鬥而係大屠殺

佢地屠完條村後
就用呢個生番王國最傳統嘅方法宣示勝利:
切咗王帝個頭落嚟再用棍插喺村口
第二日佢另外個仔帶埋其餘啲部下嚟到
見到大勢已去就接受咗個合作協議喇

利奧波德二世收到份協議後
就開始一連串嘅外交操作
首先佢用喺英國嘅說客說服議會承認份協議
跟住佢聯絡英國南非公司嘅老闆羅德士
應承畀佢加丹加地區嘅採礦權
只需要佢交番稅就得喇

英國佬個縱斷非洲計劃主要都係起鐵路
連接南非開普敦同尼羅河上游
要起鐵路喺地勢平坦嘅東非草原
點都易過喺剛果盆地嘅原始森林啩
最初佢想攞加丹加都係因為啲鑽石礦啫
既然而家都有得開礦咯
交少少保護費都好過打生打死仲要唔知贏定輸吖
就咁英國政府就聯絡羅德士
叫佢接受利奧波德二世嘅提議唔好搞咁多嘢喇

對利奧波德二世嚟講
同英國佬分享利潤總好過同佢作對
de beers嘅開採經驗亦都幫到佢發展加丹加嘅礦業
而喺英國佬嘅經營下
加丹加地區慢慢成為全球主要嘅產鑽區之一
而之後喺剛果自由邦其他地方發生嘅慘事
喺呢度幾乎冇咩發生
自此剛果自由邦南方就慢慢穩定落嚟喇

本身以為遊記, 點知睇睇下睇晒

以個個時代黎講佢都算好聰明喎, 事實上所有野係佢自己諗定有官員幫手諗

你當利奧波德二世係啲跨國企業嘅CEO
就會明白㗎喇

又要留名 追完隔離羅馬post，又追完依個，以前真係好撚正好多可能性

南邊冇事又東邊嚟料喇
1890年東部總督阿Tib退休返鄉下養老
佢個大仔Sefu接手佢喺剛果嘅業務
咁就出事喇...
其實自從剛果自由邦成立之後
區內阿拉伯勢力同邦政府嘅關係一路都唔係幾好
呢個區域不嬲都係呢啲阿拉伯奴隸主嘅控制範圍
不過歐洲人不斷干涉佢地嘅奴隸生意
又同佢地爭奪象牙資源
所以一路都有啲衝突
其中最嚴重嘅一次係喺1886年
阿Tib返咗鄉下嗰時佢有個手下
因為一個女奴嘅問題同自由邦據點嘅長官爭執
最後演變到兩邊武裝衝突
阿拉伯人攻陷咗個據點
收到消息後阿Tib即刻趕到佢鄉下
即係桑吉巴嘅比利時大使館
同個領事解釋呢個係一場誤會嚟嘅
佢咁緊張係因為佢知道剛果個場冇得玩㗎喇


桑吉巴地處東非沿岸,十九世紀嘅探險隊如果要入中非內陸,多數都會由桑吉巴出發
(包括史丹利最著名嗰兩次探險)


桑吉巴同印度之間嘅季候風令奴隸同象牙嘅運輸變得更快捷

明明玩得好地地
而家仲攻陷埋自由邦嘅據點
點解會話冇得玩嘅呢又
其實自十八世紀起
西方世界開始對奴隸制度有所反思
到柏林會議後
各國加強打擊奴隸貿易
各殖民地宗主國開始禁止出口同使用奴隸
喺需求減少下阿Tib嘅奴隸生意開始愈嚟愈難做
加上啲大笨象畀阿拉伯人同歐洲人搞到就嚟絕種
象牙產出愈嚟愈少
佢意識到佢嘅生意要轉型
先可以喺呢個歐洲人主導嘅世界生存
所以佢一路將剛果地區嘅生意收檔
一路擴大佢喺鄉下嘅香料種植園
剛果東部有亂局嘅話對佢嘅部署係非常不利


而家睇返佢呢個決定真係好有遠見
桑吉巴而家係世界其中一個最主要嘅丁香產地

而嗰時自由邦先啱啱成立
利奧波德二世未有咁多資源去反擊阿拉伯勢力
咁啱史丹利又因為要進行一次救援探險
而提議畀阿Tib做東部總督
以換取佢嘅支援
所以先至會促成嗰次嘅任命

後來史丹利嗰次探險喺英國做成咗一次醜聞
(佢隊探險隊喺剛果四處破壞
有個副官仲買咗個細路女
送畀食人族"享用"仲一路睇一路晝晝做紀錄 )
佢將責任推哂畀阿Tib
仲向桑吉巴個蘇丹告狀話阿Tib違反協議
咁阿Tib就返去桑吉巴處理,順手退埋休
剛果啲手尾就留返畀佢個大仔Sefu
臨走前佢忠告個仔絕對唔可以同歐洲人有衝突

留名
巴打寫得好睇 加油呀

睇過
可以係到bookmark遲d翻睇

留明

好好睇，支持巴打

但係一個咁有國際視野嘅老豆
唔知點解會生咗個咁大中華阿拉伯膠嘅仔嘅呢
Sefu認為剛果係阿拉伯人自古以來固有領土
係神聖不可侵犯唔容許外國勢力入侵嘅
於是喺1892年4月佢同區內其他阿拉伯勢力結盟
開始一齊光復剛果喇
最初佢地憑住人數優勢喺東部打劫啲象牙商人
佔據咗啲自由邦嘅據點
邦政府軍節節敗退
阿拉伯聯盟軍形勢似乎唔錯

但係而家嘅自由邦已經唔同哂㗎喇
之前未企穩陣腳就話同你妥協啫
而家利奧波德二世已經建立咗支私人軍隊(Force Publique, FP)
呢支由歐洲人領導嘅僱傭兵團
無論裝備，紀律同戰術
都同阿拉伯聯盟班烏合之眾完全唔同
喺1892年10月FP開始反攻
阿拉伯聯盟軍毫無戰略各自為政一盤散沙
有個本來同阿拉伯人結盟嘅剛果軍閥仲倒戈埋
佢地逐個畀FP擊破
到1893年初一場決定性嘅城市爭奪戰中
經過一個半月嘅守城
阿拉伯聯盟慘敗

FP勢如破竹
到10月已經收復大半嘅東部城市
Sefu同佢老表仲有好多盟友嘅話事人
仲喺10月一場戰鬥中陣亡
死嘅死，走嘅走，投降嘅投降
而家群龍無首嘅"阿拉伯聯盟"已經唔可以叫聯盟咯
1894年1月9日阿拉伯聯盟最後一座城市陷落
戰爭以自由邦大勝結束

喺講啲黑鬼點畀利奧波德二世迫害之前
首先要講講佢地係過緊點嘅生活
其實佢地唔係一般人想像中咁原始㗎
喺剛果河下游至河口一帶
因為河道較闊
葡萄牙人都入到去探索
當地嘅土人接觸得多西方文明
生活水平同知識相對於內陸係高啲嘅
佢地會種啲粟米呀豆呀做主糧
(係葡萄牙十六十七世紀時引入嘅)
基本上已經唔係原始嘅漁獵社會
佢地亦都會同內陸嘅部落
以物易物咁換啲象牙同橡膠出嚟賣畀葡萄牙人
攞到錢就買啲西方產物
當年史丹利喺河口係簽唔到協議乜濟
就係因為嗰度嘅人水平較高唔中計
所以剛果河下游自由邦係佔得好少地
(河嘅北岸已經係法屬剛果，南邊就係葡屬安哥拉)

至於中游嘅部落就相對原始好多喇
因為剛果河中段係由一系列嘅急流同瀑布組成
船係行唔到入去嘅
交通非常唔方便
各個部落亦都分得好散
好多部落第一次見到嘅白人就係史丹利
所以先畀佢有機可乘
而呢啲部落主要都係捉吓魚呀，食吓猩猩呀咁維生
一般人眼中嘅非洲原始人就係呢啲喇

上游近大湖區嘅部落多數都係畀阿拉伯人控制嘅
不過啲阿拉伯人唔係真係咁殘暴嘅
因為佢地主要係捉啲人攞去賣吓
同要脅吓啲村民幫佢地搵象牙嘅啫
佢地要長做長有所以唔會搞到啲村民太慘
始終啲人身體唔好又點賣到好價錢呢?
大屠殺對佢地嘅生意冇好處
而啲村民多數都係捉魚為生
(嗰系列嘅大湖係全非洲水產最豐富嘅地區)

而南邊嘅熱帶草原地帶就係最富庶嘅
嗰度嘅部落有種嘢嘅又有放牧嘅
但係最賺錢嘅係採礦
剛果南部加丹加地區喺正非洲中部嘅大
礦帶
喺嗰度嘅部族領袖多數都係靠賣銅畀歐洲人致富
生番土王帝Msiri就係其中最強大嘅


剛果地形大概係由東部高地一路斜向西邊
北面係雨林南邊就草原
咁大個國家得一個出海口(佢海岸線得卅七公里,香港都有七百幾公里啦 )

高質post lm 之前高登係咪post過

係 但係好似爛左尾頂唔知我冇追到

如果利奧波德二世可以慢慢發展
跟據唔同地方嘅情況去計劃開發嘅方向嘅話
一塊資源咁豐富嘅地方係可以有好大嘅潛力
由農業採礦開始
再慢慢發展工業
有人力又有資源其實係最理想嘅
不過佢冇時間咁做
而家呢一刻嘅利奧波德二世
可以話係揹到成身街數
佢唔不惜一切咁搵錢填氹嘅話
唔好話發展呀
連佢自己都會搞到債主臨門一身蟻
咁點先可以最快速咁喺殖民地攞到錢呢

剛果唔似南美印加帝國咁有咁多金畀西班牙佬去搶
要喺度攞錢最快嘅方法就係變賣資源
剛果最值錢嘅就係南部嘅礦產同雨林入面嘅象牙同橡膠
喺自由邦成立前啲土人係隨意去攞嘅
再經自由貿易賣畀歐洲人
利奧波德二世如果要變賣資源賺錢
佢首先要壟斷呢啲資源嘅擁有權
但係本身喺自由邦入面做緊生意嘅歐洲商人一定會反對fuck  
佢要用啲冇咁顯眼嘅方法去做