痛定思痛
2017-01-16 00:03:41
(十五)
【…..】我有啲奇怪望住Kenny,到底佢想同我講咩?
【黎啦,我地去食飯先,一陣再你講。】Kenny摸一摸我個頭。
好快咁,我地一行四人已經黎左位於觀塘一間日本餐廳,準備搭升降機。
【喂Keith,Charlie師兄佢唔黎啊?】李婉婷問。
【ER….係啊…佢要返工。】我有啲失望同佢講。
【哎呀,咁真係可惜,難得我BB咁闊佬請食飯。】
【咪係囉,平時我想叫佢幫我買LUNCH都要計我車馬費。】呀駿和應。
【邊有啊?寡人平時不知對你地幾好,今日就當係報答返你地班平民嘅恩情。】Kenny笑笑咁望住李婉婷講。
【哇哇哇,咁真係謝主隆恩喇。】李婉婷講完又緊緊捉住Kenny隻手。
叮~「九樓,Ninth Floor」我地已經到達左,講真,呢啲餐廳加埋一最少要二百幾起跳,平時嘅我一定唔會揀呢到食飯。更何況身邊無我最想見嘅人。
【駿,你同婷婷去拎定野食先,我同Keith拎個靚位。】
【好。】呀駿同李婷婉異口同聲咁答。
呢個時候,我已經察覺到Kenny似乎有野要同我講,我第六感一向都好強。但其實,我真係又期待但係又好驚,我好驚Kenny會叫我離開Charlie,因為佢…始於都係一個正常人,我可能一陣要面對嘅係一個破碎嘅幻想。我諗,無一個人都鐘意自己嘅幻想破滅,但係,我地敵得過現實咩?我地又可以改變到現實咩?
Kenny特登要求坐窗口位,一來可以望到出面環境,二來更方便我地傾計。
【Keith...】
【...】我望住Kenny無講野。
【你對Charlie係咩感覺?】Kenny一語中的。
【佢…佢係一個對我好好嘅師兄。】
【真係咁簡單?】Kenny開始質疑我。
【我...】
【你而家個樣同兩年前嘅佢簡直一模一樣。】
【兩年前…?】
【你想唔想知到底Charlie心入面係點諗你?】
【我唔想知…我…唔夠膽知..】我開始低下頭。
【咁..我都唔強逼你喇。不過,當你想知嘅時候,你可以偷偷地..咁望一望佢Whatsapp,到時你就明發生緊咩事。】Kenny細細聲同我講。
【偷睇...?】我望一望Kenny。
【有咩要幫手隨時搵我啊。】佢拍一拍心口講。
【…多謝你】我似乎明白左啲野。
呢個時候,呀駿同李婉婷抱住大盤食物返黎。
【哇,你地洗唔洗拎到成座山返黎啊? 】Kenny有啲驚訝講。
【緊係啦,任食喎,仲唔食盡佢咩。】李婉婷已經流晒口水。
【Keith,啲野啱唔啱你食啊?唔啱就再去拎喇。】呀駿好心問我。
我諗,而家嘅我都無咩心情食野。Charlie嘅手機?到底入面有咩秘密?
淡淡嘅風,淡淡嘅雲。
我望住窗外穿梭係鐵道之間嘅地鐵,迷茫了。