痛定思痛
2017-01-25 12:46:06
(二十)
自從果日起,我就真係再無見過佢...
佢唔係消失左,亦唔係請假。所謂嘅「無見」係指我地再無任何交流,即使偶爾係學校撞到佢,我地都有意無意咁避開對方,形同陌路。
而佢亦再無返過宿舍,每日嘅晚上,只係剩返我自己一個面對住四幅牆。
你話,咁樣嘅生活,仲有意思咩?
每次當我好好好掛住佢嘅時候,我都會有方法見到佢。無錯,就係每次Charlie返工嘅日子我都會用接近一個鐘嘅時間偷偷地返去望佢。
但係,我每次見到嘅,都係佢同隔離同事有講有笑。而呢位同事,我係識得嘅。
佢叫林浩軒,係我同班同學。由唔知幾時開始,呢個人就開始搭上左Charlie,我幾乎每次去到7仔都會望到佢地一齊。甚至有時係學校,都會撞到佢地一齊行,久而久之,我就懷疑佢地到底係咩關係。
我承認我個心係好妒忌,好痛。
點解...你同我之間嘅距離好似愈黎愈遠。
遠到好似大家都再唔認識大家一樣,到底你諗緊咩?乜你唔係都鐘意我架咩?點解可以話變就變...點解...
一件事情未解決就已經再有千千萬萬個點解壓住我...
我地...好似未開始..就已經結束左,我唔甘心,我唔抵得...
我鐘意你...係唔會變
但係你呢?你仲係唔係鐘意我?
我諗,你都鐘意我嘅...
係咪?
但係,你同左我講一句,為我好。
Kenny係Whatsapp到講得啱…
我...無左你...真係會過得好咩?
呢句係我每日都會問自己嘅一個問題。
【望夠喇,又要夠鐘返去喇。】我同自己講。
都已經係春天時份,但天氣明顯仲未回暖…
又或者溫暖已經唔再屬於我……