痛定思痛
2017-01-09 12:50:58
(十)
我捽下隻眼再望,無錯啊,門牌的確寫住505號房,李錫瀚、劉智偉。但係當我返房果陣,就無發現Charlie嘅蹤跡。
【都夜晚9點幾架啦喎,唔知Charlie去左邊呢,況且Kenny都已經返左房,照計佢都應該唔會出街丫...】我一邊整理房間一邊自言自語。
【呼,搞店,總算乾乾淨淨。】我一邊擦汗一邊繼續同自己講野。我雖然稱唔上有潔癖,但絕對唔容許自己間房七角咁亂。
【好無聊啊,去睇下Kenny間房有咩好玩先,嘻...】
於是我就行左去隔離房,敲一敲門。
【師兄師兄~】過左幾秒Kenny就好快開左門。
【Keith仔,乜Charlie仲未返房咩?】Kenny問。
【係啊,間房得我一個,好無聊啊。】
【佢可能仲未收工啊,不如你入黎傾下計丫?】
【呀,係喎!我都唔記得左Charlie係7仔返工添。】
我真係大懵,連Charlie係7仔返工都唔記得左添。講開都幾奇怪,間7仔離學校都有一段距離,點解佢唔辭左份工專心讀書呢。
【無辦法啦,Charlie其實係單親家庭黎,多多少少都要打份工幫補下。】
【哇...師兄,你識讀心架?】我有啲唔好意思。
【哈,我睇人好準架,你趷起條尾就知你想點喇。】Kenny擺出一副淘氣樣。
【咁...】
【我知你要問乜,你係咪想知點解佢要揀份咁遠,人工又唔高嘅工?】
【...係啊...】我不得不佩服佢讀心嘅能力。
【其實好簡單姐,因為佢屋企係附近囉,你得閒可以去睇下啊。】
【哈..係咩...】我又開始傻笑。
【喂...細路...】Kenny突然用一種好奇怪嘅眼神稍左我一眼。
【師...師兄...做..做咩...?】我比Kenny突然一句細路嚇一嚇。
【我睇得出。】
【做..做咩?我有咩唔妥?】我開始緊張起黎。
【Keith,你知唔知咩叫珍惜?】佢問我。
【我.....】我滿腦疑問。
Kenny呼出一口氣。
【你遲啲就會明。】佢用手摸一摸我個頭。
正當我仲諗緊Kenny個問題果陣,浴室道門突然打開。
【喂Kenny仔,到你沖喇。】一位上身赤裸嘅男性對住Kenny講。
佢,叫陳駿奇。係設計系大三嘅同學,係同Kenny、Charlie同班,亦都係Kenny個室友。
【哦...好,你同啊駿傾下計喇,佢份人都好NICE架。】Kenny拎起佢啲衫,二話不說就行入浴室入面。
【HELLO,我係佢同班同學,你叫我呀駿得架啦。】
【HI,我係讀醫科嘅Keith,今年大二。】我微笑同佢握一握手。
係Kenny沖緊涼果陣,我竟然同呀駿傾得好開心,因為佢同Kenny一樣,都係啲好搞笑嘅人,成日搞爛GAG,呢啲大概就係所謂嘅"物以類聚"掛。
突然,個天落大雨。嘩啦嘩啦嘅雨聲瞬間充滿整個房間。
【奇怪,明明頭先仲係好好天,點會...】我略為奇怪。
【係囉,呢種天氣最黑人憎...】
唔知Charlie有無帶遮呢?萬一感冒咪大獲。我都唔知點解落雨嘅第一反應就係諗起佢。
【係喎,同你同房果個係咪Charlie啊?】呀駿問。
【係啊,佢真係好好人,成日都照顧我架。】
一提起佢,語調不知不覺輕快起黎。
【哦...係呀.....咁就太好喇。】
【做咩事啊?】我用奇怪嘅眼神望著呀駿。我而家剩係知,佢心情唔太好。
聽左呀駿講嘅心事,我先知原來佢鐘意果個師妹,就鐘意左高高大大嘅Charlie。我原本仲以為呀駿鐘意嘅係Charlie添,哈,我諗太多啦。
【點都好啦,佢都係個好人黎嘅,有人鐘意佢都好正常,係我唔夠人好。】呀駿無奈咁講。
【ER...唔好咁講啦,師兄你都係個好人,我相信你都好快遇到啱你嘅人。】我連忙安慰。
呢個時候浴室對門再次打開,出現嘅係一位著住背心,胸肌若隱若現嘅陽光男孩企係我地面前。
【唔,你地做乜眼甘甘望住我?】Kenny用奇怪嘅眼光望住我地。
【哇,啲人好大隻呀。】呀駿講。
【係架,Kenny師兄不知對自己個BODY幾滿意,年中都唔知殺死幾多少女。】我和應住呀駿。
【夠喇,你地兩個一唱一和算點先!】
我係第一次睇到Kenny咁怕羞,望到佢個樣其實都幾得意。
就係咁,我同佢地傾左好耐計,轉眼間已經凌晨12點喇,我諗Charlie都差唔多返黎喇,但係出面仲落緊好大雨。
【多謝你地啊,我今日傾得好開心。】我都夠鐘要返房。
【哈哈,得閒再黎傾計喇。】
【快啲去瞓啦,聽日唔好遲到喇。】呀駿講。
【知喇,掰掰。】
我一個人返到房間,一個人思考緊Kenny同我講嘅野。
【我睇得出。】
Kenny到底睇得出乜野...?
【你遲啲就會明。】
我到底會明咩野...?