[hehe]我屋企附近開左間7仔

新手上路，文筆唔好請見諒
(一)
我屋企呢邊有一間新開嘅7仔便利店,入面有個大哥哥店員,真係...好靚仔...好靚仔.....

我叫 Keith,由細就係九龍東區長大,亦即係話,九龍是我的出生地。因為屋企無咩錢,所以只可以住係又窄又細嘅公屋入面。終於有一次,我阿爸做嘅生意仔有起息,做左單大生意,生活終於穩定左落黎,阿爸就買左棟私樓係南區果頭,間屋雖然唔係好大,但是比起係東區嘅公屋細單位真係好太多喇。

唔知由咩時候開始,大概係小學掛,我對男仔就特別有興趣,到左中學,我就更加確定自己鐘意嘅係男仔,當時嘅我仲係傻更更,咩都唔識,讀男校果陣班靚仔只係有時欣賞下。今年春天,為左要準備萬惡嘅DSE,可以話係每日沉溺係學校圖書館到溫書,真係好悶。

【Keith,今日你會唔會留低溫書呀?】我同學係放學果陣問我。

【應該會啊...我再唔溫書會死得好難睇。】

雖然唔係話考得好理想,但係係今年夏天,我考上左一間香港幾出名嘅大學。

【喂阿仔,你考到無雷公咁遠嘅學校,你要點返學呀?老豆我總唔可以日日車你架嘛..】老豆望住我張入學通知書,無奈咁講。

【會咩?只不過係對面海咋嘛,邊怕遠啊?】

當我講完老豆好嬲咁行返房,因為我知道老豆希望我讀嘅係律師,而唔係醫科。

【無所謂啦,又咪一樣係專業行業。】我心入面成日都係咁諗。老豆想我讀律師係因為想我畢業之後入佢間公司到做野,子承父業咁樣。但係我真係對律師無咩興趣。

甜唔該

留名

(二)
開學日
啊頂...大鍋~~,唔會開學第一日就遲到呀嘛?我即刻換衫去學校果個乜野迎新日定開學日,連老媽子同我準備嘅早餐都無食,一開門就跑。

【啊仔,做咩唔食早餐啊?】老媽子問。

【趕唔切呀!!!!做咩唔叫醒我啊!!!!!】

我用最快嘅速度跑到我屋企附近嘅車站。好險,架車咁啱比我趕到。

開左學無耐,好快咁我同班同學都打成一片。我地學校比較注重嘅係"師兄師姐制度"。(開學日果陣就係佢地帶新仔介紹學校啊宿舍啊等等,據聞已有女同學被抄牌)所以係學校見到師兄師姐都要打聲招呼。講就咁講,我次次見到同系嘅師兄師姐都會扮睇唔到,一係就等佢叫我先傾兩句。

【喂喂,Keith 覺唔覺我地系到有一個師姐勁靚女!!!!】我同學咸咸濕濕對住我講。

【ER.....,係嘅,的確生得唔錯.....】我無奈咁應佢...。

醫學系班師姐因為抵受唔住條狗公嘅瘋狂追求,無耐就同左佢係埋一齊,我只可以企埋一邊恭喜佢。畢竟,我鐘意嘅係男仔,偏偏我地學校男仔同女仔的比例係3:7...(大約啦)。學校開左學無耐,我比同學拉埋一齊去"上莊",班上嘅同學好多都組隊去JOIN埋一份(但其實我無咩興趣,一來唔想讀書分心,比老豆睇死。二來"上莊"又咪比你地班狗公用黎媾女,當然我無講出黎)半推半就之下,我就加入左佢地。

其實我放左學都無咩好去做,唯一可以做嘅就係JOIN班友一齊去開會搞活動。因為佢地差唔多7點先放人走,亦即係話,當我搭車返到屋企嘅時候,已經差唔多係晚上8點半左右。
【好肚餓啊,去買啲野食墊下底先。】我行入我屋企附近呢間新開嘅7仔,隨隨便便揀左啲零食,之後到櫃台比錢。

【先生,一共35蚊。】

我係銀包拎出一百元比佢找散紙果陣,我抬頭一望。哇頂...又高又靚仔,戴住粗框眼鏡,頭髮又GEL晒係後邊,但係又無比比鳥頭咁誇張,真係好掂。睇到他心口掛住個職員牌,上面寫住"店員-Charlie"。唔知係我睇得太入神定點.....

【先生...您嘅單同錢...先生...先生...】

【啊...對唔住...】

我塊臉突然變得好熱,拿拿聲拎左錢同單之後,即刻就衝出門口,仲要唔小心,自動門都仲未開就撞到塊玻璃。

【哇頂,好痛。】我感覺到佢係後面會心一笑。

雖然好樣衰,但我都係好開心。唔知點解,今晚瞓覺嘅時候我係張床到典黎典去,就係瞓唔到,心入面好似有小鹿亂撞嘅感覺。從果件事發生之後,我每日落堂之後都會去幫襯果間7仔,至少都會買支6蚊嘅雪條食下。為嘅係咩?當然只係為左望下個靚仔店員一眼。每日佢嘅笑容總係震撼到我,真係好希望果刻時間可以暫停。我幾希望我身邊有隻叮噹,幫我暫停時間,等我可以望多佢一兩眼。

hehe，唔係太想睇
BUT照留名

留名

(三)
日子一日一日咁過。好快咁,我升上左大二。因為大一我參加埋啲無聊學生會。到左大二,好想試下啲新鮮野。

最後我選擇左"游泳社"。

【訓導處報告,請聽日參加社團嘅同學,記得攜帶所需嘅用具去到相關社團集合】係喎,聽日係星期三,終於要去泳社,我內心真係又緊張又期待。

好快咁到左聽日...今個學年度第一次社團要開始喇,我帶住興奮嘅心情,換上泳褲,戴上泳鏡。開始做熱身操之前果陣,有一個人由更衣室走左出來。

【大家好,我係設計系大三嘅Charlie,係呢一個學期嘅社長,有問題可以隨時黎搵我,而家開始做暖身操...】

唔...唔係掛...Cha...Charlie.....我有無聽錯.....

文呢

(四)
【老媽子,我好想住學校宿舍啊】

【死仔包,你諗緊乜野,日日返屋企住唔好咩?做乜咁鐘意住出面?】

呢樣大概係每日晚上我返到屋企同父母嘅對話,由細到大屋企就係管得我好嚴,就連啱啱升上中四果陣,都係被逼去補習。而家咁辛苦升上大二,緊係想過得輕鬆啲。

不過好彩,屋企係在我每天返屋企嘅"奪命連環要求"之下,總算肯比我住學校嘅宿舍。

今日晚上,開完無聊嘅學生會走人,途中依然睇到果位黑黑實實嘅Charlie係7仔返工。
不過我就無再入去幫襯佢,覺得可以每日望下佢已經好足夠,再加上而家逢星期三都可以同佢一齊"鴛鴦戲水", 真係諗起都興奮。

【係時侯執行李喇,聽日就要住學校宿舍Lu...】我好開心咁自言自語。

【係喎,聽日係星期三...】

「一個人的夜晚總是給我一種孤寂的感覺。」

無論幾多次都係一樣,係我屋企窗口向遠方眺望,總係會睇到間7仔嘅霓虹燈。我所望到嘅是一片漆黑中帶著一點光,不自覺體會左一種落差嘅感覺。雖然間7仔係我眼中發緊光,但我內心不其然地增加了一點孤單。等到我察覺唔對路嘅時候,已經係凌晨一點幾喇。

【唉,夠鐘瞓喇。】

(五)
【Keith啊,你最近做乜成日上堂發吽哣呀?哦~係咪偷偷地媾左條女無同兄弟講先。】

【邊...邊有喎...我...】我比同學逼問到講唔出野。

【喂Keith,其實...你係咪GAY?】隔離個女同學帶住挑逗語氣同我講。

【係囉,你明明係我地呢班算生得唔錯架喎,但係又無女朋友。】女同學身旁嘅朋友附和著。

我扮到好嬲咁跑出課室,課室嘅同學都傻左咁望住我跑走左,我知道而家呢個社會大家仲未接受到同性戀,但係..我..只可以默認。.

【啊,係喎,我唔返班房,可以去邊?】

其實呢個學校都算係幾大嘅,係我大一第一次返呢間學校果陣,我仲因為學校太大盪失左路。

【不如去游泳池睇下喇,反正今日晏就都要上社團。】係不知不覺間,我行到左游泳池,無諗過竟然撞到係到游緊水嘅Charlie師兄。

【Hi,成日黎買雪條食嘅師弟。】佢一上水就即刻望到我,雖然已經唔係第一次見識過佢身材,但我個心依然都係"呯呯"咁跳。

爽朗而濕透嘅髮型比佢梳晒去後面,黝黑嘅身材一覽無遺,結實嘅肌肉平均地分佈係佢嘅身體之間,係一個極具張力嘅身驅,猶如一隻等待爆發嘅野獸。

【ER...師..師兄你好啊,中午唔食飯黎游水嘅?】我仲沉醉緊佢吸引嘅身體,不過佢好快咁拎左條大毛巾包住自己,擦拭自己濕透嘅肌膚。

【係啊,我平常中午都會係到練習,通常都係遊完水先去食飯。】十分燦爛又帶住種傻氣嘅笑容真係...好正...

【喔...係阿.....】我有啲無言以對。

【喂師弟你邊班架,介紹一下自己喇。】佢稍稍烏低個身,眼睛放大望住問我。畢竟以佢180以上嘅身高同一個170出頭嘅人講野,真係有啲困難。

【我...我...係醫科大二嘅Keith...】我感覺到自己塊臉開始紅

【相信你應該知道我咩名字喇?係社團第一堂我已經有自我介紹過喇。】

【嗯...我知道啊...Charlie師兄】

【Keith,你中午食左未啊?不如等我換好衫一起去學校小食部食丫?】

【哦...好...】估..估唔到佢會約我一齊食飯,佢竟然係咁親切,再加埋副殺死人嘅笑容真係無懈可擊,佢同我平時係7仔見到認真返工嘅佢真係判若兩人。

【喂你在發咩吽哣啊?走喇。】

【哦...好...】佢好順手咁搭住我膊頭就一齊行去小食部。

-------------------------------------------------------------------
【Keith你要食咩?師兄我請!】

【唔...唔洗啦,我自己比就得喇。】

【你快啲揀啦,一齊比埋錢唔洗煩。】

【喔...】迫不得已只可以乖乖接受師兄嘅好意,其實內心不斷暗爽緊。

Charlie真係好靚仔,係我發吽哣果陣,佢拍一拍我膊膀。

【喂!野食拎得喇,乜你咁鐘意發吽哣架。】

【哦哦...】

【..........】面對住佢,我個心跳真係無正常過。

【喂Keith你好靜啊,都唔講野嘅,係咪我太熱情嚇親你?Sorry啊,我份人係咁架喇,你唔好介意啊】佢有啲擔憂咁問我,呢個時候嘅佢,真係好傻好天真。

其實我係唔知講咩好,好驚我講嘅野唔啱佢胃口,到時對我無興趣咪大獲?再加上我真係好緊張,只可以不斷傻笑,因為我真係唔知要講咩好。畢竟我同佢啱啱先真正認識。呢個時候唔會係白居易嘅琵琶行所講「此時無聲勝有聲」掛!?

【學長...】不過有一個問題我真係好想知。

【.....?】

【好似你呢啲咁靚仔又咁好嘅人,呢間學校又咁多靚女,一定有女朋友喇?】

(六)
【哈哈,好似我呢啲情場騙子,邊有人敢鐘意我啊。】佢一貫嘅傻氣表情答我。

呢個時候,佢地班嘅人就從小食部門口走左入黎。

【媾女王,你LOCKER嘅情信啊,唉好煩,日日都有人要我比信你。】佢同學講完就將封信交比Charlie。

【ER...邊...邊有】佢尷尷尬尬接過封信,望左兩眼就將佢袋入褲袋。

我呆左咁坐埋一邊聽住兩位師兄講野。

【唉~游泳社社長果然係唔同啲,三日唔埋兩日就收到一堆師姐師妹嘅情信。】

【Kenny仔,唔好講喇...師弟係隔離架。】

Kenny師兄係佢嘅同班同學,身材同Charlie差唔多,一樣係高高瘦瘦又有啲肌肉咁,唯一唔同嘅,係Kenny師兄無戴眼鏡,而Charlie有。
究竟呢間學校咩事,周圍都係靚仔嘅?

【HELLO!師弟你叫咩名?】Kenny師兄問。

【我...我叫Keith,多多指教。】面對住兩位靚仔師兄,我又開始口窒。

【哦~,師弟你係咪都係游泳社架?,咁咪同我我同一個社團囉?】

【係..係啊師兄,以後多多指教喇!】

【Keith仔,千其唔好跟Charlie咁多啊,會學壞架,佢都唔知係呢間學校傷過幾多少女嘅心架。】佢略為大聲咁扮同我咬耳仔。

【喂你...】Charlie想即刻制止kenny師兄,但又無言以對。

【Charlie啊,一陣上堂咪遲到啊,唔好唔記得係女魔頭嘅堂。】

【哦...知喇】

【你睇下你,夜晚就返7仔,中午上親堂都瞓教,小心你比女魔頭針對你。】

【死人Kenny,合埋你個烏鴉口...】

【哈,Charlie社長我走先啦,同你個Keith仔慢慢食喇。】

【死Kenny,一陣先對付你。】

【走先啦,Keith仔記得我講嘅野啊,哈哈哈】

【Kenny師兄掰掰...】

真係兩個好搞笑嘅師兄,人生有時就係正正需要呢種朋友去支持自己。係架,佢地把口係好衰,互相串下大家,開口埋口都係講衰野。但係男人嘅友情,係靠個心去維繫,唔需要表達出黎,因為,我地明架嘛。

諗諗下野,我又開始發夢。

【Keith,Keith...】

【啊...?】

【我要返去上堂喇,我地個老師好恐怖架。】佢擺出一副好恐怖但又好抵死嘅表情。

【咁好啦,我都要返班房喇。】

【嗯,一陣社團見啦。】

【好,Charlie師兄掰掰。】

呢一堂課入面,唔知點解我成日心不在焉,只係覺得心情好亂,好亂...

【Charlie,唔知你而家上堂上成點呢?】我一邊上課一邊諗住佢。

【喂Keith,做咩發吽哣呀?講緊考試範圍喇!】我隔離位個死黨拍一拍我。

【吓...喔...知喇...唔該你】

我撓一撓個頭,繼續傻笑.....

加速

留名

(七)
【認真啲唔好發夢!!準備自由式來回2次,開始!】Charlie面對住泳池入面各位社員大叫。

救命,呢個係咩世界。Charlie點解呢個時候又會變到咁惡。

【咦,Keith仔,你做咩傻左企係到?】

【啊...Kenny師兄】我無意間比Kenny嚇左一跳。

其實Kenny人真係幾好,成日都比人一種好親切嘅感覺。

【你係咪比Charlie個樣嚇親?Charlie佢係大一果陣已經係呢間學校嘅超級新星黎,出親去比賽都一定會拎頭三返黎,係佢中學果陣已經係學校游水校隊隊長黎架啦。】Kenny滔滔不絕咁讚佢。

【哇...真係勁】唔怪得佢副計咁勁啦。諗諗下又係到幻想緊佢迷人嘅身材。

【佢要擔起社長嘅責任啊,所以先會惡左少少,你就唔好見怪喇。】

【Kenny仔,咪掛住同人傾計,快啲去游你果2個圈!!】Charlie對住我地呢邊大叫。

【哈哈,Keith仔你睇,係咪好有社長嘅架式?我從大一加入泳社到而家已經有2年幾Lu,你睇,我副BODY係咪都OK呢?我去游先喇,廢事又比佢鬧。】

講完,Kenny就係我身邊消失左,等到我回過神果陣,佢已經游到對面喇。

我望一望泳池門口,果然有一堆Charlie嘅 "FANS"係出邊昅住佢,一眼望過去大概都係啲大一、大二嘅學生妹。

【哇,師兄真係好受歡迎。】我望到呢個情景,又不其然係到發夢。

【喂Keith仔,又係到發吽哣呀?】Charlie唔知幾時已經係我隔離,一手又搭住我膊頭。

【哈...無啊】我傻笑。

【笑乜野?唔好以為我會放過你啊,快啲去游。】

【唉..知喇..】

救命,估唔到游水係咁攰,我來回左2、3次已經頂唔順。

【背泳預備!】

Charlie揸住哨子對住大家叫。呢個時候嘅佢真係好Man,好有男人風範。

當然,我都照著佢嘅意思,努力咁游緊背泳。
突然"碰"一聲,我個頭唔知撞到乜野,只係知道接下來一句

【哇頂,好痛啊!】

【喂明明係你阻住我條線。】我摸一摸自己個頭,理直氣壯咁同佢講。

【咦,你係咪同我一樣係大一呀?之前未見過你嘅?】

我回過神,發現眼前係一位妙齡少女,眼大大但係又粗粗魯魯咁,係一個十分吸引嘅女性。

推

(八)
【鬼同你一樣啊,我已經大二架喇!!】面對住呢位無乜禮貌嘅師妹,我都無同佢客氣。

【哼,既然係師兄我就大方啲唔同你計啦!!】

【吓...?】本身仲以為佢會好巴渣咁同我嘈一大輪。

佢係社工大一嘅李婉婷,佢份人好古靈精怪,成日都係班到搞爛GAG,聽講佢個興趣係睇AV,我聽完之後當場呆左,唉好好地一個靚女,呢啲都係之後Kenny話比我聽。

終於,社團結束喇,睇住大家都拖著疲憊嘅身軀離開,泳池入邊得番好少人,用兩隻手指數得晒。

【Keith仔,今日點啊,仲慣唔慣啊?】Kenny問我。

【OK啦。】我向兩位師兄道別之後,就自己一個人行出泳池。

【喂,Keith師兄。】一個熟悉嘅聲音叫住我。我回頭一望竟然係李婉婷。

【做咩?】我十萬個問號望住佢。

【師兄,你今日係咪唔洗去開學生會?】佢LOOK大隻眼問我。

【哇,你跟蹤我啊?點知架?】

【因為,我早一兩個月都入左SU呀嘛哈哈哈】

【哈..哈,係咩,我都好似無見過你。】

【廢話,我啱啱先入SU,你點會見過我。】

我心諗呢條女洗唔洗咁串呀?

【哦...係咩。】我強顏歡笑的看著學妹。

【師兄你係咪住HALL?】

【係啊,學校個HALL今日先開,我準備執行李搬入去架喇,你都係啊?】

【係啊,你係咪而家返HALL啊?】

【嗯,不過要我要去一去拎行李先。】

【咁丫,不如一齊行啦,反正都順路。】

【嗯,好喇。】

救命,我竟然識左個奇奇怪怪嘅師妹。而且我仲要應承同佢一齊行,唉...算啦,當係多個伴。呢位師妹長髮飄逸,睇起黎似有離子燙,頭先游水都唔覺佢頭髮咁長。

【哎頂,好似有沙入眼!!】佢突然大叫。

【我睇睇...咦,你係咪有帶CON?】我好奇咁問。

【點算好啊...嗚...】

【你除左副CON先啦,我幫你吹走佢。】點解女人永遠都可以咁麻煩。

佢好熟手咁除左副CON,我再幫佢吹走粒沙,有得幫靚女吹沙其實係一件好幸福嘅事,弊就弊在佢個性格完全唔符合佢個樣,真係....唉。

【唔該晒你啊,估唔到你個樣咁毒竟然會有咁細心嘅一面喎。】佢一路行一路笑我。

呢個究竟係咩生物黎?恩將仇報都有嘅,不過我呢個A0真係無言以對。

【食屎啦,你呢個AV妹。】我一時無經大腦講左呢句說話出黎。

大獲,我係咪講錯野?佢望住我幾秒。

【你點知架?近排我睇左套劇情片真心好正,我遲啲SEND條LINK比你好無?】佢個樣就好似搵到同道中人咁興奮。

【唔洗呀頂你。宿舍到喇。】我真係無佢咁好氣。

【喂喂,一陣一齊食飯好無啊?】

【ER...好...好啦..見係你。】

我同李婉婷放好自己個袋同埋行李返宿舍之後,就搭地鐵去搵野食,佢都真係好奇怪,一般呢啲港女通常都想食西餐廳呀,板長果啲無幾百蚊落唔到樓嘅野。點知佢竟然答我去打邊爐,我呆左。同佢食左差唔多個半鐘,就發現而家已經夜晚七點幾喇。我同佢幾乎行晒成個西九龍咁濟。直到夠鐘要返宿舍,兩個白痴大學生先慢條斯理行返去。

【喂李婉婷...】

【.....?】

【我問你一條好認真嘅問題...】

【頂你,有屁就放啦!】佢好粗魯咁同我講。

【鐘意一個人係咩感覺?】呢個時候,我又諗起佢。

【你問我做乜喎?我又唔係情聖,又唔係男人,教唔到你媾女呀。】

【如果我鐘意左一個唔應該鐘意嘅人,仲要係比好多人嫌棄嘅愛情呢?】

【廢話,緊係去馬啦。而家係你拍拖定人地拍拖呀?】

佢咁講又好似好啱咁,駁唔到...但係...

【但係...】

【但你個屎忽啦!!!】佢再次好粗魯咁同我講。

【我...】

【我咩我,拿,我而家命令你對住個空大叫,我要追到你。】

呢刻,唔知點解,我乖乖咁向住個天大叫"我要追到你"。可能係發現自己壓抑得太耐,再加上SEM尾逼得我好緊。

「我要追到你」呢五個字,劃破左整個南區夜空。我更加唔知道我自己而家係到做乜咩傻事。

入左大學呢一年幾以黎,我都係無改變過我鐘意Charlie嘅心意。我衷心好希望佢而家可以聽到我呢一句話。

我希望我心入面個冬天,唔會太長,亦唔會太凍,靜靜咁去等待春天嘅出現,帶比我陽光,帶比我溫暖。

我知道,而家嘅我,其實係好想沖去學校搵Charlie。揮之不去嘅影子,不過我知道,Charlie佢....係一個正常人。

諗下諗下,不知不覺竟然喊左出黎。究竟我有幾耐無喊過呢?我唔知...

(九)
【喂...男人老狗做咩流馬尿啊?係咪我講野太過份?】似乎李婉婷比我嚇親。

【唔係...傻女,你無錯。好開心今日你陪我食飯。】

【咁你唔好再喊啦,黎啦,笑返。】佢伸出手,將我兩邊嘅嘴角拉起。

【知喇知喇...】我笑一笑抹乾眼淚。

【時間唔早喇,要加快腳步。】佢望一望左手嘅手錶。

【嗯,時間都差唔多....】

我同佢好快咁急急腳行到宿舍。

【多謝你今日陪我啊,下次再一齊食飯啦。】我笑住同佢講。

【唔洗客氣,時間唔早喇,入去啦。掰掰Keith!!】

【掰掰啦,AV妹。】

【__ __ __ __!】佢用口型對住我講左句四字粗口。

返到宿舍,發現間房無人,無理由架,明明應該仲有一個室友架。我好奇行到隔離房去望,發現房門上貼住"506號,林文傑、陳駿奇"

【咦,林文傑?咪即係Kenny?原來佢住我係隔離。】

我敲一敲門,出來迎接我嘅係Kenny。

【咦? Keith仔,你點解係到嘅?】Kenny滿頭疑問。

【我住505號房架,但係點解我間房無門牌嘅?】我而家先發現每間房都有一個門牌,寫住邊個人係到住。

【哦,原來係咁,你要落去同個樓下個宿舍伯伯拎架。】

【明白晒,唔該Kenny師兄。】

【又唔洗多謝嘅哈哈,以後你直接叫我Kenny就得喇。】

【唔.....我都係鐘意加埋"師兄"啊,一來親切啲,二來又有禮貌啲呀嘛!】我傻笑住。

【ER...咁是但你啦,你開心就得,哈哈,咁Keith仔你得閒就黎打搞下我啦,我隨時歡迎你架。】Kenny露出同Charlie一樣好好睇嘅笑容。

【嗯...多謝你先】

講完我就落左樓,去搵宿舍伯伯,拎左我間房個門牌。無諗過我睇到嘅係..

"505號房,李錫瀚、劉智偉"

李錫瀚係我個名。而另一個劉智偉.....係Charlie..

文呢

加速

文呀

文呢？
重甜！

留名

留名加甜

正啊喂
留名