痛定思痛
2017-02-17 02:56:11
(二十一)
踏入三月,我嘅大二生活差唔多又過左一大半。
而Kenny佢地,下年亦都要畢業喇...
Charlie...你知唔知...係呢段時間
為我好呢三隻字...
已經係我腦海入面一次又一次咁出現..
甚至出現到我有啲排斥佢嘅存在。
係學校,每日都可以見到Charlie同林浩軒行埋一齊,究竟佢地係咩關係?
Charlie,你係咪唔要我喇?即使你唔再愛我,可唔可以唔好比我死得不明不白呢?而家我地嘅關係,真係令我好難受…好難受…
三月中嘅其中一個夜晚,時間八點。
【Keith仔你黎左喇?】Kenny似乎每日都同我重覆呢句說話。
【係啊,我自己一個一間房真係好悶啊。】
其實,一個人瞓已經係我每日嘅生活,所以我呢排成日都過隔離房搵佢地玩。
【Keith,點解而家咁少見Charlie係房嘅?】呀駿問。
【我…】我諗我而家嘅情況好難同呀駿解釋。
呢個時候,或者得Kenny先睇得出我嘅心事。
【你唔知咩?佢屋企好似有啲事啊,要返去住一排啊。】Kenny連忙幫我解圍。
【喔~你同Charlie咁Friend,突然間無得一齊HEHE…咁都真係幾悶下喎。】呀駿笑笑咁講。
【哈,咪係囉,等Charlie返黎一定要佢好好咁補償下Keith仔先得。】Kenny摸一摸我個頭。
HEHE…?無錯,我係一個HEHE…但似乎Charlie另一個HE已經唔屬於我,而係林浩軒。
「I believe I can fly~I believe I can touch the sky~」
突然Kenny部電話響起。
【喂..婷婷?】原來係李婉婷打黎。
【我問一問佢地先…喂喂,你地兩個一唔一齊出去食糖水啊?】Kenny一邊講電話一邊問我地。
【而家先八點幾,都okay嘅。Keith仔都一齊去啦!】我地學校門禁係11點。
【嗯,好啊~不過我怕我地兩個會做左電燈膽咋。】
【頂你地啊~而家本王要外出當然要有幾個侍衛一齊喇。】Kenny語氣有啲得戚。
【好啦,我地而家落HALL門口等喇。】Kenny對李婉婷真係好溫柔,我好羨慕佢地咁恩愛。
基本上,Kenny、呀駿同埋李婉婷已經係我大學生活入面最重要嘅朋友。呢一年黎,真係多得佢地陪伴住我,如果無左佢地,我嘅世界都唔知會變成點。
係去糖水鋪途中,李婉婷一直拉住呀駿係前面係咁分享啲媾女心得比佢,話要點點點樣做啊、點打扮啊咩都講一餐。明明我一開始識佢果陣仲係一個咩都唔識剩係識睇AV嘅奇怪女人,一拍拖之後就成個變晒,變左鄺仔咁。而唔知係咪DRY得太耐嘅緣故,呀駿竟然聽得津津入味,差再無用紙筆寫低。
【喂喂Keith仔,老老豆豆,你同Charlie果晚究竟咩事?果晚我已經幫你地鋪好晒路架啦喎。】
我同Kenny行係後面,佢突然問起我。