「離開……本來我早就可以離開。」他撫著渺渺頭靠牆看我，「返去我個間桌遊Café。」
「咦，你本身係老板？」
「我本身係律師，專做刑事辯護。但……話說話係專業人士，但都只係表面風光。所謂刑事辯護，就係明知就係班仆街客做，但收佢幾個臭錢就幫佢地打甩條罪，後來頂唔順轉行，走去旺角開桌遊Café，以為自己本身鐘意，做律師又搵到錢就覺得自己叻仔，創業一定會成功……結果連本都蝕埋，哈。」
難怪他的談吐和聰慧都給人一種非池中物的感覺。
「本身諗緊做唔做返本行，埋沒良心多一次，突然間就同你地一樣咁嚟到呢度。」
「你被鈴兒變成完成品前，已經決定好返常……返現世？」
「當然。」他說，「辯護都有好多種，法援辯護，義務律師……雖然賺得一定無之前咁多，但係還清債，再開一次桌遊Café應該唔成問題，最重要係食得安，訓得落。」
「咁就好，準備返去未？」
他看看我身後的鈴兒。
「既然你依加係唯一職員……」他把視線縮回，與我四目交投，「我可以信多你一次，阿柏，見係你。」
也就是說他完全不信任鈴兒。
但也沒辦法呢，但至少能讓他離開這兒。
「大家都喺樓下等緊。」
全靠渺渺使他冷靜下來，我們總算使所有住客明白現在阡迴旅館正身處崩潰的前夕。為了使他安心，我著鈴兒走在最前，我走在中間隔開二人，而阿倫走在最後，同時確保他視野內能看到鈴兒。
樓下大堂一片昏暗，阡迴旅館關燈後只剩下零星的燈籠在角落裡散發著幽光，外頭的常夜風暴之上也有微弱的月光依窗照射而進，直到我帶著風鈴來到眾人眼中才看清彼此。
「阿柏！鈴兒！」愛莉站起來說。
「大家無事？」我說。
「嗯，無人受傷。」
「咁就好，渺渺，依加點樣送大家返去？」我抱起渺渺到額前問。
「喵！」
牠再次以額頭撞向我眉心。
沸騰的常夜風暴，穿過荒野的小徑，現世的光，解鈴鳥居……
而且還有雲梯之樹。
……果然沒辦法嗎。
「大家跟我出嚟。」
「嘎——」
我推開阡迴旅館大門，常夜風暴正在鬼城外張牙舞爪，旋動的風捲起塵埃萬丈，間中有雷光閃爍鑽過，低沉的「隆隆」聲使其如甚麼巨獸般格外嚇人。
「首先係小月。」我說，「你係解鈴人，一定要再次穿過解鈴鳥居返去現世，咁你就會返去同一個時間點。」
我晃動風鈴，循著回音找出附近打開了的解鈴鳥居。
「但阿力佢……」
「阿力同其他住客一樣會自己返去，你地係常世再會合。」
「但又話離開後就會無咗呢度嘅記憶，咁咪即係重置返入嚟之前咁？」小月清晰地反駁。
「失去嘅只係記憶，但呢度得到嘅啟悟同方向唔會消失。」鈴兒說。
「咁我下定決心……阿力，我會嚟搵你。你係邊度都好，我記唔記得呢度都好，我都一定會嚟搵你。」
阿力連忙回答：「我都係，我都會嚟搵你，小月。」
小月高興地點點頭，然後向我們揮手：「多謝你地呢段日子係阡迴旅館照顧阿力，有緣再見。」
「好好保重，好好同阿力相處啦，小月。」我說。
她放在正揮著的手，然後回首再看一眼阡迴旅館，再看一眼阿力，接著步進解鈴鳥居之中。
「叮鈴～」
鳥居內傳來一下風鈴聲，她沒有出現在鳥居的另一側，而是穿過鳥居消失。
回到了現世之中。
「咁我行先啦！小月……小月等緊我！」
「等陣，你唔係行鳥居個邊！」我叫住阿力說，「住客普通咁離開阡迴旅館就得！」
「普通咁……？」
阿力，愛鈴，阿倫三人抬頭，天空中翻騰著的常夜風暴就在頭上，比起剛才還要更近，已經把半個鬼域淹沒，那些無人廢墟消失在風暴之中，如同從未存在過。
「即使係咁，阡迴旅館唔會拒絕你地離開，你地諗住自己要返去嘅地方就可以。」
「諗住自己要返去嘅地方，然後一嘢衝落去？」阿力看著眼前的風暴壁吞吞口水說，「阿柏，雖然我知道你唔會呃我地，但係……你肯定？」
渺渺點點頭：「喵嗚！」
「嘁，為咗小月，死就死……」阿力握緊拳頭，似乎下定決心。
「鈴兒，多謝你。」愛莉卻是拍拍鈴兒肩膊。
「我……你唔應該多謝我，愛莉，係我搞成咁，我無面目再……」鈴兒內疚地說。
「但呢段時間你照顧我地，陪我地都係事實。」愛鈴搖搖頭安慰她。
「你真係咁諗？」
「你始終係我好姊妹，鈴兒，我知道你係點嘅人，咁就夠。」愛莉說。
「就算我，就算我，就算我……」
「係，你夏鈴兒，係我愛莉一生之中最重要嘅好姊妹。」愛鈴抱緊她說。
「……我好唔捨得你，我真係好唔捨得你地每一個！」鈴兒擁回去哭著說。
她對時間輪迴有多執著，代表有多不捨這些陪伴著她的朋友們。
鈴兒只是懼怕再次被扔下而已。
但即使是這樣——
「我都係，鈴兒，但係……人總要向前行，向前望架嘛。以後阿柏同呢度就交俾你喇，阿柏，你都係，鈴兒就交俾你喇。」
我只是點點頭微笑，沒回應甚麼。
因為我的確沒法有任何回應。
「拜拜喇，鈴兒，阿柏。」
阿力與愛鈴都回首面對著風暴，似乎在等阿倫一起出發。
「阿柏，辛苦晒你。」阿倫說，「可惜出返去就會唔記得晒呢度，唔係請你嚟我間鋪玩Game食飯。」
「我代鈴兒再次向你道歉。」
「……我無辦法原諒佢，但見在你份上，我就無謂再對佢惡言相向。」
「多謝你。」
考慮到鈴兒對他做出的事，阿倫已經是相當大方。
「我地同佢兩個出發喇。阿柏，好好保重。」阿倫回首，三人站在阡迴旅館樓梯的最頂端，眼前的常夜風暴就在面前不到一百米處。
三人看著風暴深呼吸，然後看看在這兒結識到的彼此。
「有緣係度識到你地，真係好。」阿力說。
「仲有鈴兒同阿柏，啊，仲有渺渺，最可愛最乖嘅渺渺。」愛莉說。
「大家返去現世就唔好再迷茫，要記得係度得到過嘅啟發，下定過嘅決心，有緣再見。」阿倫說。
就畢，三人互相點頭揮手道別，然後走下樓梯。
風暴的低吟聲之間泛起陣陣風鈴聲，他們一開始還走在一起，但漸漸地分別往左中右方向各自前進，或拐過轉角，或走到樹後，或消失在沙塵中。
最終消失在這異世之中，回到各自本來的時間上。
「再見，大家……多謝你地，對唔住。」鈴兒低聲說。
至此，阡迴旅館所有住客都回歸現世。
這兒剩下我與鈴兒二人。
還有渺渺。
「鈴兒，你都要返去。」
「你都……等陣，阿柏，你想做乜？」
被察覺了嗎？
「……無乜。」
「咁你返去先，我最後一個走。」
「我係職員，當然最後一個走，你返去先。」
「但我返得去邊？」
「……」
「我本來就係因為曦明嘅死而嚟到呢度……如果我再無埋你，我同當日有咩分別？我同你來自唔同時代，計返曦明捐心俾你個時你仲係小朋友，我地就算見返面，我都已經四，五十歲……」
「你一定會搵返自己方向，就算唔喺呢度都好，鈴兒，你無需要留係度同阡迴旅館一齊死。」
「咁你呢！？」
「……」
「你根本無打算走係唔係？！」
我忍痛推開她：「鈴兒，快走。」
「你到底想做咩？你諗緊咩啊溫年柏？！」
「鈴兒，要忘記你嘅人生，我唔需要。」
「但咁樣嘅話……」
「我會留喺度同阡迴旅館一齊回歸常夜，呢個就係我溫年柏同阡迴旅館嘅結局。」
我的歸宿就在這兒。
就在阡迴旅館之中。
第十七章：迷失在崩潰前夕
完
第十八章：迷失在阡迴旅館
（本故事沒有第十九章）
