[足球/穿越]重來一次的足球人生（9）準備出書！

都唔會係嚟緊哩場啦，如果一星期就下場嘅話正常好少會加名

文

主角s 可以咁細就踢港隊係因為有海外磨練
職業都未踢果d 其實無可能勁過現役
諗多左

公道講梁博豪踢西乙青年軍畀盡都係而家米高水平

所以上面講果個小朋友更加無可能上大枱

重記得個名 伍思明
唔知係咪已經一蹶不振

之前講過入咗港青 踢得唔錯

依件當係香港美斯

Push

呢期比較忙
呢話要凌晨先更到

五十一、


蕭智堯母親在客廳掃著地，偶爾會聽到房間裡傳出零碎的說話聲音。上次余仁海來家中，在她感覺好像只是幾個月前的事情，但已從之前上來打機，變成了現在躲在房間裡一起鑽研戰術。

由於越南整體實力明顯比香港強，身材關係又特別偏好地面戰，所以港隊上場的控球率只有三成多，余仁海在左路持球進攻的次數也不算太多。

不知道教練組有什麼打算，不過蕭智堯跟余仁海都留意到，在為數不多的進攻機會中，對方的防守表現其實只稱得上一般。

換句話說，撇除港隊右路進攻力不足這一點，光是幾次進攻本身，便可以再做得好一點。

「呢個位，你唔係練咗右腳斬波咩，」蕭智堯按下鍵盤的空白鍵，然後指著電腦螢幕說道。「其實呢度我覺得你可以試下推入中間用右腳斬畀大鴻。」

「……坦白講，我右腳斬波唔係太準，呢啲比賽進攻機會唔多嘅時候，我唔係太想浪費。」余仁海搔著臉頰，面有難色地答道。「不過對面有備而來防我左腳，係麻煩少少。」

「啊真係唔似你，你以前唔係會串對面Mark你左腳都無用之類㗎咩。」蕭智堯看了他一眼，笑道。

「放心，下場我就收佢哋皮，三個嚟都無用。」

「但下場……」蕭智堯忽然將身子仰後，頗沉重地嘆了一聲。「唔知會唔會被逼打防反。」

「禿頭佬好似一向都係死要進攻㗎喎，」余仁海應道。「以佢性格應該唔會啦。」

「但上頭可能會有Order㗎嘛，上場咁樣俾人反Cup，其實都幾多人嘈，雖然打反擊應該都係留你喺前面。」

仍年輕的余仁海不明白，國際賽關乎政界面子，不僅是競技層面的事情－這在球會層面也適用，但當然那是商業考慮，又是另一回事了。

「話說，上一場好幾次俾人進攻緊嗰陣我都諗：如果阿名都同我哋一齊踢就好。」余仁海突然說道。「就算喺韓國，我都會成日掛住佢啲斬波，同埋佢成隻鴨咁嘅動作。」

「……都無辦法，」蕭智堯看了他一眼，低下頭聳肩答道。「人各有志，不過其實我都成日有一樣諗法。」

「咁不如一齊勸下佢？」

「算罷啦，係勸到嘅話晨早就勸到啦，記唔記得嗰晚佢講咩啊，佢話佢要打機唔得閒睇直播啊。」

「嗯……」余仁海盤起手，一副正在思考什麼的模樣。「其實我有個諗法。」

……

勝出當晚，阮文康其實已到了還劍湖一趟。來這裡固然是為了還願，理論上雙手合十，閉上眼在心裡默唸幾句便能完事，但他還是依依不捨地繞著湖邊走了一圈。

明天球隊便會飛往香港，為數天後的作客賽事作準備。

上場反勝，場面上越南佔據絕對優勢，牌面上也是有利，對於那些沒看比賽的人來說，可能會覺得這三分來得合理，但阮文康知道，這支港隊比想像中難對付，不然他也不會在分組賽首輪開始之前，便特地來這裡向神龜祈願。

這晚幾乎所有親朋戚友都有到場支持，球隊勝出後，整個球場陷入一片歡欣之中，他也暫時放下心頭大石，為這場反勝慶祝。只是外婆行動不便，向來不喜歡到人多地方，因此像上屆般沒能到場觀戰，這讓阮文康悵然若失。

剛走完一圈時，褲袋的電話震動，耳機提示是教練杜德才打來。

「喂，教練？」

「成班人一齊慶緊功，爭你一個啊，真係唔嚟？」

「唔啦，你知我唔鍾意飲酒，你哋玩得開心啲。」阮文康看向湖心的龜塔，在心裡默默道別，同時轉身準備離去。

「你身為隊長都唔到場嘅話，點凝聚球隊士氣？」電話另一頭的杜德才說道。「你唔係好想贏香港隊嘅咩？」

聽到後面這句，阮文康停下了腳步，並沉默數秒沒有說話。

球隊的慶功場所選在市中心一間頂級酒店的最高層，阮文康到達時，看到有一兩名隊友已經醉倒在沙發或床上，正呼呼大睡，不過絕大部分仍在歡樂地唱著歌，或是玩著要喝酒的遊戲。

「喂喂喂！隊長到場！拎杯酒嚟！」

「飲返杯先啦！咁遲先嚟！」

阮文康微笑著接過隊友遞上來的子彈杯，將那燒著火的龍舌蘭一飲而盡。他不喜歡這種聲色犬馬的場所，但其實酒量很好，過了大概一個多小時後，又有一批隊友醉倒，他卻還是面不改色地坐著。

「你真係好鬼飲得，班細嘅咁樣狂隊你都無事。」副隊長范國勇笑道。

「呢條友，當年啱啱入隊嗰陣，整個剷青頭，得個頂一大堆金毛，仲誇過後生嗰陣嘅尼馬。然後每次一贏完波，球隊話要去飲酒慶功呢，佢就會追住裴克明嚟隊㗎啦。」杜德才指著阮文康笑道。「你哋以前個隊長都算飲得㗎啦，但次次都俾佢隊到啤啤夫咁滯。」

「咁多年前嘅嘢就唔好講啦。」阮文康不好意思地笑道。

「嘩真係，眨下眼就十年有多，」杜德才抬起頭，笑著嘆了口氣。「嗰陣都無諗過呢條金毛仔，日後竟然會係國家隊隊長。」

年少無知，曾經阮文康因為髮型、位置、踢法相似而被本地媒體稱作越南尼馬，出道前幾年他喜歡英雄主義踢法，頻頻不顧一切獨闖龍潭，花巧動作層出不窮，也有過挑釁對手被報復、衝突等場面。然而經歷過兩三次國際賽的洗禮後，看過前輩們出局後的眼淚，還有遺憾引退的失落，這些都能讓一名張狂的少年迅速變得穩重。

如今他為了承擔更多進攻責任，主動移入中路，甚至回後幫助組織，只是希望讓球隊勝算變大。若將這個舉動告訴當年的阮文康，那個金髮小子恐怕也會報以冷笑。

「下場你會唔會想試下踢返左路？」杜德才突然問道。

「……點解咁問？」

「我相信下場港隊應該都差唔多技窮，」這名教頭搖晃著手中那盛著圓形冰塊與上好威士忌的玻璃杯，胸有成竹地笑道。「擺你去返自己擅長嘅左路應該問題不大。」

「我覺得教練你……都係唔好睇小香港比較好。」阮文康喝了口酒，冷冷說道。

「你好似真係對佢哋幾高評價咁。」

「有啲嘢，只係球員之間先會感受到，」阮文康朝杜德才看去，此時范國勇亦已在不知不覺中睡去，甚至傳來呼嚕聲。「我嘅建議就係：唔好對余仁海同蕭智堯有鬆懈之心。」

……

推

港隊的同組對手是阿聯酋、越南及吉爾吉斯，第一個是不用想了，後兩隊實力差距其實差不多，若是被越南雙殺，對吉爾吉斯的結果恐怕也相似。

然而上場比賽後，港隊的底牌可說都被看穿，幾名在海外效力的小將，優點缺點都在一場比賽中表露無遺，越南這場完全可以後發制人。

陳召禧與團隊開了數小時的會，還是沒能想到理想的方法，來緩解余仁海這個最大得分點的壓力。

「如果將柏真奴推上去踢右翼呢？踢4-3-3。」

「防守會完全唔夠人，柏真奴上咗去就唔會落返嚟，上場講明叫佢唔好上咁多就話啫。」

「如果係龜縮打防反呢？」想到余仁海的反擊能力，馬志誠不禁捏著下巴說道。

「唔會，打阿聯酋都或者有可能，」未等其他人回應，聽到龜縮二字，陳召禧便馬上開口道。「但對越南，我唔諗住縮。」

「但要點樣解決右路進攻嘅問題……？」

「既然進攻唔平衡……」陳召禧看著白板上那已被畫得亂糟糟的陣型圖，語氣平靜地回答道。「咁乾脆堆晒去左邊。」
___________________________________________________
恭喜江旻憓奪金！

文

Push

左路overload
差個伍思明放右邊就陣已最

其實伍思明係踢左邊

係喎
主角做單防右閘
但側身錯方向

無錯

嗱
話左太多二打六無人記得