（心郁郁又想浸）日本各地溫泉旅館 (7)

1001 回覆

11 Like 3 Dislike

第 1 頁第 2 頁第 3 頁第 4 頁第 5 頁第 6 頁第 7 頁第 8 頁第 9 頁第 10 頁第 11 頁第 12 頁第 13 頁第 14 頁第 15 頁第 16 頁第 17 頁第 18 頁第 19 頁第 20 頁第 21 頁第 22 頁第 23 頁第 24 頁第 25 頁第 26 頁第 27 頁第 28 頁第 29 頁第 30 頁第 31 頁第 32 頁第 33 頁第 34 頁第 35 頁第 36 頁第 37 頁第 38 頁第 39 頁第 40 頁第 41 頁

Iroha 2022-12-16 19:36:06

大部分去日本嘅友人，都會問我呢個去浸過幾次溫泉嘅人，住邊度住邊間等等問題。
加埋連登各巴絲嘅問題，有時答得幾次，至發現原來都好多人對溫泉同旅館有一堆疑問。
第一次去日本嘅朋友，你會唔會對傳統一泊兩食有憧憬，但又驚唔識同仲居溝通？
未浸過溫泉嘅朋友，會唔會擔心你以為浸緊嘅係溫泉，但其實只係熱水？

呢個post主要整理各種溫泉知識，同各地溫泉旅館評價。
歡迎提問，亦歡迎住過旅館嘅留番些少評價等其他巴絲可以參考（最好緊係有幾張靚相啦）。

日本有超過3000個溫泉區，27000個泉眼，40000間溫泉旅館。
所以有時唔係唔想推薦，而係太多唔知點推薦。
求推薦時盡可能提供多啲詳情，諸如日期、泊數、地點偏好、設施偏好、筆直等等，會方便一眾巴絲幫你揾到比較啱心水嘅旅館。
比如「求大阪附近旅館推薦」同「12月中玩京阪和歌山，唔自駕，想揾有馬/白濱唔駛行咁多路，筆直4萬/人樓下嘅旅館」個分別，我諗大家都明。
如果自己做下功課先就更好。

前Po
1：https://lihkg.com/thread/271537/
2：https://lihkg.com/thread/470303/
3：https://lihkg.com/thread/844078/
4：https://lihkg.com/thread/1420823/
5：https://lihkg.com/thread/3155696/
6：https://lihkg.com/thread/3179296/

相關資料

連登溫泉repo，前po資料太多，正式整理成Google Sheet方便查詢
https://docs.google.com/spreadsheets/d/1FfnO84_UcottfC5JOhsbHWFuJB2uhKXXFM9JFncWGxE/edit?usp=sharing

觀光經濟新聞社にっぽんの温泉100選 (2021)：
https://www.kankokeizai.com/100sen_35/

旅行新聞新社第47回「プロが選ぶ日本のホテル・旅館100選」(2022) 同選考審査委員特別賞「日本の小宿」2022：
http://ryokan100.com/ja/ranking100/
https://www.ryoko-net.co.jp/?page_id=69

日本溫泉FAQ

Q：點樣訂溫泉旅館最好/最平/最方便/最多選擇？
A：當然唔會有一個最好方法，唔係就執淨一間啦。唔同嘅訂房方法，整理如下：
1. 住宿設施官網
好處：
不經代理手，可以話係最穩陣嘅方法。部分旅館官網會提供限定plan，亦有機會比代理平。重點——官網放房永遠係最快。
壞處：
以小弟經驗多數plan都比代理貴，每個網站個book房設計都唔同，亦未必有多語言，有啲甚至落後到連改資料/取消都要電郵/電話聯絡。
（附注：官網方面要留意大多都會有中英日韓語言選擇，最多優惠 plan 一定係日語。）--credit to 黨指揮娼巴打

2. 住宿設施電話
好處：
基本上日本乜旅館/民宿都book得到，尤其好多隱世旅館/民宿係只有電話book呢個方法。
壞處：
要求一定日文能力，因為能夠外語溝通嘅宿，絕大部分都可以用其他方法訂到。
至於前身為Visa白金秘書嘅Visa Concierge，制度已經唔同，暫未見有可以直接俾旅館資料代訂嘅方法，所以暫不作推薦。

3. 日本旅遊代理網站（Jalan/樂天/一休/JTB/Rurubu等等）
好處：
地頭蟲，絕大部分旅館都一定依附其中一個或以上嘅網站。作為旅遊代理網站經常會推出優惠plan同supersales，同時可以儲分同雙倍ana里數，肯俾時間去格價同等sales嘅話，慳番嘅錢係可以幾萬yen計。
另外網站提供嘅plan，會寫得好清楚你住嘅係咩房，食嘅係咩，有咩特典附送，比下邊國際網站清楚太多。
個別同時提供中文版網站。
壞處：
中文版網站選擇較少，價錢較貴。
日文版網站真係全日文，就算Google Translate都需要有少少理解能力先用到。

4. 國際旅遊代理網站（Japanican,agoda,booking,hotels,expedia等等）
好處：
用慣用熟，而且競爭大，所以大家價錢基本都壓到好低，唔需要點格價。
壞處：
溫泉旅館數量最少，而且多數係大型溫泉酒店，比較少正宗「旅館」選擇。
網站大多不會詳細列出酒店設備，尤其針對溫泉旅館嘅資料（溫泉，房內風呂，二食等）資料更少，訂房時需要小心。
(附注：Japanican個book房系統已經整合到Agoda，JTB只係提供少部分合作plan俾Japanican，所以唔再分開推介Japanican)

5. 其他網站
因各式各樣有特別要求嘅人而設嘅網站，預約系統、方法各有不同，所以好處壞處難以一概而論。舉下例子：

※專門高檔住宿設施：Relux (https://rlx.jp/)
設施除酒店旅館亦包括渡假村、租借別墅、營地等等。
佢個評分系統係網站專人去住完俾嘅客觀評級，我個人認為非常準確。
而用得呢個網站都係對住好有要求嘅人，所以評分亦相當嚴謹。
舉少少例子，評級係 Museum>3星>2星>1星>Casual
季の湯雪月花：Casual
草津季の庭：1星
有馬温泉兵衛向陽閣：1星
強羅花扇：2星
鄙の座/碧の座：3星
ふふ熱海：3星
軽井沢御代田：Museum

※專門豪華溫泉旅館：Ryokan Collection (https://www.ryokancollection.com/)
只有極致豪華嘅溫泉旅館先可以加入，例如富二代大小姐去過嘅強羅花扇、媒體強吹嘅箱根吟遊、黨巴心郁郁想試嘅ふふ系列等等
可以話係絕對無伏，只有買貴，沒有買錯

※秘湯愛好者指定官網：秘湯守護協會 (https://www.hitou.or.jp/)
包括連登一致好評嘅槍見館、俾香港人淹沒嘅ホテル祖谷温泉都係會員。經協會訂秘湯宿可以儲印並有10送1優惠（部分優惠plan除外）。

Q：溫泉咪即係熱水？
A：雖然東西方都將浸溫泉視作醫療活動，但其實科學界並無一致認同，溫泉水嘅獨特成分有確實醫療效果。
比如促進血液循環，浸熱水已經有一定效果，含鐵泉並唔一定比較好。
當然反過嚟講亦無足夠證據證實浸熱水同浸溫泉功效一樣。
個人認為，浸溫泉風呂時，環境，心態配合，心理上嘅治療效果可能強於喺浴缸浸水，所以喺日本呢個好鐘意玩marketing嘅地方，佢話個溫泉有咩咩療效，聽咗就算。實際你體驗到咩就係咩，放鬆心情先係治療良藥。

Q：成日見酒店網站寫個溫泉加水、加溫，係咪唔好？
A：我嘗試整理一下常見嘅額外描述同佢個作用：
加水——加水好多時直接作用係降溫，因為好多溫泉源頭水溫太高，根本無可能直接浸，於是需要另外加凍水降溫。當然唔排除有啲係本身唔夠溫泉水用，需要溝水頂檔。
加溫——就係凍得濟要加番熱。
循環ろ過——將浸泉水過濾雜質及細菌後重複使用。
一般嚟講，以上三樣都係被認為會破壞溫泉有效成分。

源泉かけ流し——中文簡稱掛流，普遍定義係溫泉水直接倒入浴池使用，用完直接倒走。而「日本源泉かけ流し温泉協会」認為，為咗令溫泉水適合浸浴，泉水最少量嘅加水（不超過20%）同加溫係可以接受稱為源泉かけ流し，而完全無加水加溫嘅，可以叫做「源泉100％かけ流し」(天然温泉100%)。
にごり湯——濁湯，溫泉水含有嘅特別成份成泉水混濁，常見例如登別、草津、有馬、黑川等都有濁湯。日本人普遍相信濁湯治療效果比較好。又係嗰句，無實質證明。

Q：咁有加溫過既泉水係咪冇咁好？
A：日本人自己比較注重「天然」，所以認為所有人工方法都會影響水質。但從科學角度睇，除非你煲滾佢，否則加溫其實唔會有明顯影響。

Iroha 2022-12-16 19:36:14

Q：點知我浸緊嘅係真溫泉？
A：日本有溫泉法明確定義叫得溫泉就必須含有溫泉水，溫泉水點定義可以自己google下。日本旅遊業發展多年，以前各種「黑店」，唔好話用熱水頂替，就算係走法律罅溝少少溫泉水當溫泉嘅，而家絕少存在。
要避免浸錯熱水，首先必須望實「溫泉」兩字，風呂可以係熱水可以係溫泉，但溫泉風呂就一定係溫泉。
同理，一間房如果寫「風呂付」，就算佢本身係溫泉旅館，都唔代表房出嘅係溫泉水，呢個時候就要去望下旅館網站，有無寫明。例如「客室露天風呂は温泉ではございません。」、「部屋は普通のお湯（沸かし湯）でございます。」之類，呢啲就代表係出普通熱水。
仲有更複雜嘅情況，例如深山櫻庵，佢有啲房有寫：※お部屋のお風呂は『沸かし湯』となっております。 (即係熱水)
但有啲房就寫≪源泉かけ流し≫
佢FAQ就咁解釋：https://www.jalan.net/yad308347/qa/0000806405.html
※お部屋のお風呂が温泉の場合は沸かし湯のお部屋よりも料金が上がっております。
總之佢有幾隻房型，大部分嘅房都係熱水，但有少部分係溫泉，book嗰陣可以指定要溫泉，但會貴啲

Q：風呂前面一堆屬性，有咩分別？
A：整理一下：
露天風呂：同外邊2-4邊通風嘅風呂就叫露天。請注意係通風，向上都係一邊，所以佢有無頂蓋係無關係，與之相反嘅通常就係「大浴場」。
半露天風呂：得一邊可以開窗，或者浴池得一忽露咗出去，都可以算半露天。
展望風呂：最少有一邊係可以眺望遠景。
野天風呂：文字上可視為同露天風呂同義，實際上如果標示一個風呂係野天，我哋會期望個風呂係5邊通風，浴池比較大，形狀比較自然，身處自然環境而非建築物中，擁有當中複數屬性。順帶，混浴池多數為野天風呂。

Q：見人成日狂推混浴，係咪真係咁正？
A：你以為混浴會好似戀愛喜劇咁，或者可以唔小心見到唔著衫嘅美少女？現實係只會有一堆大媽喺度視姦你

同埋而家多人會浸嘅混浴，多數係係折衷版，即係要男女著浴衣/紙泳裝落水。
有啲偏僻地區嘅古老旅館有可能仲維持唔著衫最多只有毛巾嘅傳統混浴，但你放心，異性見有人浸就會自動迴避。
體驗下混浴緊張感都可以，但唔駛懷住咩邪惡心態去，因為你啲幻想並不會實現。

Q：好多旅館都唔受一個人玩，可以點算？
A：首先糾正一個誤會，因為一個人去旅館會想自殺，所以旅館唔受，呢個其實係富士山嗰邊有好多單人住一晚然後去樹海吊頸，所以引起關注。實際現今旅館除咗自殺勝地附近，幾乎都唔會有咁嘅自我規制。
旅館主要係兩個人入住，所以一個人住嘅成本會好高。你可以想象兩個人一泊兩食，比如一人收費2萬yen，當中可能係2萬yen係房租，萬4係兩個人兩餐，6千係其他諸如溫泉、人力成本。如果一個人住，只係慳咗一個人兩餐~7000yen，理論上旅館要收3萬3千yen先合理，但如果要俾到3萬幾，又驚住客會有過高嘅期望。呢啲矛盾先係大多旅館唔受一個人玩嘅原因。
現代獨遊已經係一種常態，接受單人玩嘅大有旅館在，各網站都有不同搜尋獨遊plan嘅方法，比如：
Jalan：https://www.jalan.net/theme/hitoritabi/hitoritabi_index.html
樂天：https://travel.rakuten.co.jp/onsen/oneself/
Rurubu：https://www.rurubu.travel/theme/hitoritabi/?cid=1839115

當然旅館都係生意為上，旺季時好多都唔受一個人入住。如果願意俾兩人份嘅錢，亦可以發電郵/打電話問，有時旅館無擺一人plan上網俾人訂，但可以直接聯絡訂的，價錢亦未必需要double。

Q：有紋身可唔可以去浸溫泉？
A：舊時好多旅館的確明文禁止有紋身嘅人入公眾浴池，原因自己google唔多講。但現代人普遍能夠理解接受裝飾性紋身，所以規則亦都有放鬆。
有一種係直接開放，例如別府溫泉宣傳網站Enjoy Onsen就列出區內接受紋身嘅旅館 (https://enjoyonsen.city.beppu-jp.com/onsen/100tattoo-friendly_beppuonsen_japan/)
城崎溫泉亦表明紋身者都可以隨便進入七外湯 (https://visitkinosaki.com/tc/visitor-info/tattoo-friendly-onsen/)

另外就係有條件容許，包括：
-以膠布遮蓋後容許進入（有啲旅館係不提供膠布，而有啲係只能用旅館提供嘅膠布，所以無辦法事先確認下，請先自備膠布）
-只容許小面積的紋身
-只容許有紋身的外國人
-只容許使用部分公共浴場/貸切風呂

當然最後就係訂有私人風呂嘅房，自己浸想點都得。

順便介紹一個整理咩旅館可以俾紋身入嘅網站：https://tattoo-friendly.jp/ja/
雖然資料唔算update，但參考下都好。

Q：房內風呂/貸切風呂係咪比較好？
A：私人風呂對於有私隱同特殊需要嘅人嚟講的確係必需，尤其房內風呂加埋房內用餐，可以話足不出戶就可以享受到全套服務，真係諗起都流晒口水。
優點我諗真係大把人講，所以喺度講下缺點：
1. 房內風呂通常比較細，甚至可能只係一個浴缸仔，多個人浸都迫到乜。
2. 再甚者，浴缸出嘅可能只係熱水而非溫泉。
3. 帶風呂嘅房通常貴一大截，如果要浴池靚，又有溫泉掛流，又露天又展望乜乜物物，就更加係倍數式增加。
4. 貸切要要同人爭，有啲並非免費。
當然只係一般論，比如槍見館啲房內同免費貸切都靚到震，價錢又唔貴嘅大有館在。
如果你單純只係擔心裸體示眾，不妨當成溫泉體驗嘅一部分。
旅館對大浴場通常都好重視，可以嘅話去欣賞一下。

Q：住溫泉旅館有咩禮儀要留意？
A：嗰啲內容農場cop嚟pas去，旅館大大隻字寫住嘅唔多講，喺度講啲少人知嘅：
1. 浴衣記住三個字：左撘右，就唔會著錯。到時真係唔記得，就望下其他住客啦。
2. 浴衣綁帶時，裡襟要拉緊貼身先綁帶，另外身體唔好大幅度郁動，咁就無咁易著著下鬆開。
3. 浴衣打底最好唔好喺心口位露出嚟，比如大家好興入面著件高領恤然後鬆開件浴衣，日本人認為呢種著法非常老套。
4. 浴衣只係方便你浸溫泉同休息嘅裝束，無規定一定要著/長期著住，所以大家按自己喜好就得。
5. check in時同/或晚飯後，女將會同你約下一餐嘅時間，請記得按需要約好，而且敬請準時。唔止係禮貌，會席料理嘅食材係按時間準備好，連你進食嘅時間都預算埋，遲到太多會造成店方困擾。
6. 有時會席料理用嘅餐具可能仲貴過你個餐，所以唔需要幫手疊起啲碗碟，仲居佢哋識點執碗的。
7. 如果大浴場無沖身嘅地方，有3個可能性——(1)你喺房沖咗先 (2)你喺有得沖涼嘅另一個浴場沖咗先 (3)都無嘅即係無要求你沖涼先，但請你喺旁邊畢啲溫泉水，沖乾淨個身先入去。絕對唔會有就咁可以行入入去嘅浴池。
8. 溫泉水性質複雜，所以避免戴任何額外嘅嘢入去，尤其金屬飾品，浸完硫酸泉溶咗就無謂。
9. 同樣溫泉水性質複雜，好多時避免物質停留造成皮膚敏感，上水後建議沖身，尤其硫酸泉、硫磺泉呢啲高刺激性嘅。但有啲美肌湯主打泉水就好似lotion咁，反而唔需要沖身都得。
10. 唔好帶任何貴重財物入更衣室，防人之心不可無。
11. 但可以帶少少散紙，浸完後有嘅話嚟番支冰凍牛奶真係不得鳥。

大雄殿小智將 2022-12-16 21:48:56