警世！！葵芳無良中醫！！因為我阿媽針灸中咗風入院！！

可能樓主自己中左風先亂咁講野

重複再詳細地講述一下事件的經過。
醫生幫我阿媽摸脈的時候，敘述一下周圍環境，我阿媽距離唔夠 20cm 就坐住上一位針灸仍插住幾支針嘅女士，我媽媽甚至在見醫生過程中仍需要起身讓出空間俾藥房嘅人搬貨行過。
醫生摸過我媽媽的頸后即刻就話:要針灸先得呀，唔針灸好難好返啊。
本意睇中醫都只係想執返劑藥，但醫生都講到咁，第一反應唯有相信他的專業，接受針灸。

四點左右，醫生就為我阿媽針灸，醫生拎出一塊細到得尾指指蓋嘅棉花為我阿媽消毒，醫生并沒有戴手套，佢事前有冇消毒雙手我都不能得知。尾指指蓋大細嘅棉花擦過了我媽媽的雙臂内和頸部，一共施 6 針，需要消毒 6 處皮膚，指甲蓋大小的棉花就算浸透酒精，夠用嗎?一共施 6 針，雙臂各 1 針，頸部比較密集地施了 4 針。

我媽媽施針約五分鐘，執藥的職員就叫我過去付款藥費，期間職員問我需要在藥房煲藥還是自己煲，我回過頭問我媽媽要點樣處理,她都并沒有出聲回應我，佢合埋雙眼輕輕地指向自己，即是示意自己煲。
付款後，我坐在我媽媽身旁，見佢一直都是合埋雙眼不出聲，我以爲她閉目養神就沒有打擾佢，再過幾分鐘，我好奇針灸痛不痛，就問:媽咪，痛唔痛呀?佢并沒有作答，語言上沒有，動作上沒有，我就開始細心留意佢，驚佢覺得痛。

然後我發覺不對路，佢右手緩緩舉起做出了掹針的動作，我即刻明白佢想拔針，我問 佢：媽咪你唔舒服?係咪要掹針?我媽沒有回應我，但是我即刻大聲叫個醫生拔針，我話:要掹針呀唔該，佢唔舒服呀。醫生聼到後話:得啦得啦。然後手上仲做緊其他野，并沒有行過來的意欲。此時，喺我隔籬嘅阿媽已經滿頭大汗而且意識渙散，並抽搐了一下。我好驚，我大叫:快 d 掹針啦！佢暈左啦! 個醫生先施施然行過來，仲話:有人針灸完係咁樣。然後附近藥房職員見到咁，就話俾我飲啲水，個醫生和議:係呀係呀飲 d 水就無事。

掹針后，我見到我媽媽無意識，不能説話，不能回應，出好多好多汗， 我即刻話打 999，醫生係我隔離叫我唔好打 999，話等一陣就無事，我冇理他，第一時間打 999，我與 999 接綫員溝通過程中，醫生還喂我媽媽喝水， 因爲我專注著電話與接綫員溝通地址并沒有第一時間發現醫生强行喂我沒有意識的媽媽飲水，當我見到時，我即刻大聲喝止他，接綫員在電話中聼到我大叫都同我講:千其唔好喂食呀！

我與同999 溝通完，醫生仲一直不斷係我身邊話我:都話唔使打 999，好多人都係咁。重複又重複呢d説話，等待救護車過程中，突然我阿媽右手食指輕輕伸起指著佢左脚，我問她:媽咪你係咪無力?我阿媽好細聲好細聲講:我郁唔到。
等到救護員，救護員做完第一時間檢查后推我媽媽上救護車，我當然跟隨在後，醫生還叫停我:診金你未比呀，針灸費呀。果時我一心緊張已經被推出去的媽媽，就即刻問他幾錢並付了 310 蚊，他仍在講風涼話話我打 999 多餘的，我忍無可忍話他:我阿媽出曬冷汗，講唔到野暈左呀，點樣無使打 999 呀?他說:出汗咪好事黎，排毒咪有用咯。我無理他直接冲走追上救護車。
到醫院，入急症室，未照 ct 前，醫生有同我講初步懷疑中風或者針到神經， 然後我媽吸氧慢慢清醒返，可以活動到，去照 ct 然後上病房。

後續（今日）我媽嘅情況，已經清醒，都活動到，但未落床行，我媽wts我，醫生同佢針到神經線。
上述就是事件的經過。
我媽冇長期疾病，無烟無酒無敏感歷史，平時中氣十足，感冒發燒一年都冇一次，今次係她第一次針灸，針灸之前兩個鐘佢有食嘢有飲水心情愉快。

（上面嘅嘢係我send俾中醫委員會投訴，所以比較多書面語，我已經盡量轉返口語化）

對於該名中醫嘅醫術我不予置評，鬧我標題黨又好點都好，如果鬧我，我阿媽可以健康嘅話，你地繼續啦。同埋事件中嘅藥房並冇問我後續。尋日出呢個post嘅時候醫生未確診到乜問題，中風係其中一個大可能性，因為佢半邊身無法活動、講唔到嘢、無乜意識、出咗好多汗，係我call 999上咗救護車吸左氧氣佢先慢慢有好轉，如果再遲啲嘅話我唔知會發生啲咩。
我媽咪先44歲，一入到急症室d醫生姑娘都好緊張🙏好多謝佢地，醫者父母心，呢d先係真正嘅德仁，順便喺呢度對香港嘅醫護講聲多謝同加油！
都在此呼籲大家喺街上面見到陌生人暈低，一定要幫手打999，唔好拖唔好等，更加唔好信人哋話冇事嘅，你幫手打一個電話，就已經可能救到一個人一個家庭。因為到宜家我都無辦法想像，如果當初我冇打999，我阿媽冇即刻吸氧氣，會發生d咩後果。
感激所有為我提供建議嘅人🙏

即係樓主屈鳩人針到中風啦

德仁啲夥記都係幾閪
日日返工吹水 同班熟客係咁吹 吹到唔理人
同其他生客講多兩句都唔耐煩

講真條友好無醫德
未見過中醫講野係咁輕挑，咁對病人

我係樓主你就搵東張西望，幫佢出下名
再搵人係佢附近貼街招，話差d醫死人

但係個中醫嘅醫德同反應都有問題

不嬲都唔信針灸

依個po啲留言痴線架

推

呢啲藥房買吓日用品就得
正正經經去中醫診所好鬼過啦

樓主做法正確
唔駛理班打手

個幾個打手仲開多另一個post繼續撐個庸醫

睇中醫當交智商稅

標題係有誤導有誇大 但樓主行為上無錯
大家係到屌係咪有中風 係咪有中風
咁事實係有中風症狀。個焦點講個中醫態度問題多於中風啦⋯⋯
如果結果係中風大家先會屌中醫 而唔屌樓主呢

未必係誤導
醫院醫生臨床診症都懷疑係中風
而且TIA事後照CT未必睇到

短暫性腦缺血發作（Transient Ischemic Attack，英文簡稱為TIA）這名稱聽起來很複雜，但其實症狀就很像中風，讓人突然手腳無力，或突然說不出話、臉歪嘴斜，只是短暫性腦缺血發作導致的症狀僅僅維持數分鐘，不會導致永久性的傷害，被俗稱為「小中風」。

好在伯母清醒番

祝佢快啲好番

建議樓主報東張西望，再民事向個中醫索償。

我明白…..但針對個班見到中風就如獲至寶來講就係誤導

我媽咪上救護車嘅時候 救護員有蚊低佢嘅口罩睇 佢真係嘴咩左少少 個救護員仲問我佢平時係咪咁樣 我話唔係呀 然後佢哋就好緊張

你阿媽係頸痛先睇醫生
個中醫有無講頸痛原因？
你有無同西醫提過針灸前有頸痛？

未check 清楚最好冷靜少少
出post 公審人唔差在一時三刻

https://www.cmchk.org.hk/cmp/pdf/complaint_procedures_c.pdf&ved=2ahUKEwiKx7X9ia_5AhUQxosBHU0UDvQQFnoECEQQAQ&usg=AOvVaw3VMn9D8cL7LdFnO9SQxdO4
仲可以向香港中醫藥管理委員會投訴