sor for太激動可能會1999。
事源係咁嘅，今日我阿媽放假我陪佢去行街，晏晝三點左右，經過葵芳盛芳街，見到成條街嘅中藥舖，我諗起我阿媽前個星期就話頸痛（已經睇過醫生話係淋巴發炎 食埋消炎藥），咁我就叫我阿媽不如試下執中藥嚟煲啦。
咁我哋就入咗一間比較多人睇同出名d嘅中藥舖啦，見到佢都有話自己係30年嘅註冊中醫師，等咗差唔多成個鐘先有得睇（因為個醫生以為我哋兩個坐喺度等 但係唔係嚟睇醫生嘅所以冇嗌我哋）咁我阿媽坐低就話自己頸痛啦，個醫生摸咗下我阿媽條頸就話：一定要針灸先得呀，唔針灸好難好返㗎。我阿媽就從來都冇做過針灸嘅，所以佢有d驚啦，但係個醫生咁樣講佢都冇辦法，唯有試下囉。
四點左右，個醫生就落針，落咗四針係我阿媽條頸度，同埋兩隻手臂各一針，total六針。啱啱吉落去都冇事，過咗15分鐘左右，我見到我阿媽合埋對眼一句嘢都冇講，我就以為佢閉目養神啦，我問下佢痛唔痛呀？佢都冇理我，然後佢俾個手勢我，係掹針嘅手勢，我問佢係咪要掹針呀？唔舒服呀？佢都係一句都答唔到我。
我見到佢好唔妥，即刻同個醫生講要掹針！個醫生仲要唔嗲唔吊，話得啦得啦，然後都冇諗住行過嚟掹針。我即刻睇下我阿媽，佢突然間就冇乜意識、出晒成身汗，我大聲叫個醫生即刻嚟掹針呀，我阿媽暈呀，個醫生先行過嚟掹。
掹曬針我發覺我阿媽已經接近休克，我即刻話要打999，個醫生仲話有d人針灸完都係咁，唔使打999，冇事嘅，話俾杯水我阿媽飲就冇事㗎啦，我冇理到佢即刻就打電話，我打緊999嘅時候，佢仲要夾硬餵水俾我阿媽飲，我即刻大叫佢唔好餵呀，999 d人聽到我大叫都叫我千祈唔好俾我阿媽飲食。
等緊救護車嚟嘅途中，個醫生仲要喺我隔離係咁話使乜打999，我話我阿媽暈咗，出晒汗仲要面青口唇白冇意識，點樣唔使打999呀？佢仲話出汗係排毒係件好事……到救護員嚟咗，我阿媽已經講唔到嘢，救護員問佢野，我阿媽都淨係可以微微點頭同擰頭，同埋最緊要嘅係佢左邊身體冇知覺郁唔到！救護員好快就將我阿媽送上車，咁我跟喺佢哋後邊啦，個醫生仲要叫我唔好走啊要我俾針灸費，因為嗰時候我已經好慌張所以嗱嗱臨俾錢跟上救護車度，去到醫院入咗急症室，醫生話我阿媽可能中風或者拮到d神經，入咗醫院之後我阿媽慢慢清醒返，宜家佢入咗院等後續檢查。
葵芳盛芳街27-29號德仁藥房嘅醫生
真係希望你高抬貴手，唔識針灸就唔好針，針到人哋d神經同血管真係多X謝曬你，差d搞出人命仲叫我唔好打999，見到人哋暈低成間鋪d職員同埋所謂嘅醫生都冇打算call 999，真係唔知佢嘅註冊中醫師牌係真定流？急急腳上白車都仲要叫我俾返$310針灸費同$160藥費，咁我係唔係要問你收返我阿媽d醫藥費賠陪返個阿媽俾我呀？錢唔係問題，搞出人命先係問題，仲要語言上制止我唔好打999，我都希望你暈低嘅時候唔好打999呀自己暈住爬過去醫院啦
各位真係唔好去呢間藥房睇病/執藥，葵芳盛芳街27-29號德仁藥房，都唔知個執業牌真定流，同埋我一個學生仔，睇住自己阿媽咁樣真係好驚好無助，有冇人可以同我講我有d咩可以做到？例如點樣投訴？
