[重開再更新] 中亞東歐風情畫 - 畢業遊

一路再上車開去Pripyat
真正嘅災區
導遊繼續喺車上面話當年

當年嘅消防隊伍係咁射化學物料
唔係救火咁簡單
而係希望核輻射唔再擴散
並且為現場降溫，防止再將災區重輻射嘅粒子往外擴散
其實當時半年間
由烏克蘭慢慢擴散到其他東歐
甚至西歐國家，遠至西班牙





天空係煙幕瀰漫 不分晝夜
Inferno 煉獄<--導遊對當時環境嘅形容

啱啱講話道路/泥土都無點作大嘅翻動/更新
就係因為 當時就係利用從天/噴槍
噴射/淋灑化學物料
減低核輻射擴散，並控制輻射只會入到地下
所以 宜家嘅Chernobyl看似好安全
但處處嘅地面都係核輻射地雷
導遊亦警告 一陣會睇到好多插喺地下嘅核輻射警告牌
代表果度嘅地下有頗強嘅核輻射
如果你翻鬆個度嘅泥
咁就 God bless you, Rest in peace.

千奇唔好將自己身體同泥土接觸。



而且係出發嘅時候
導遊都建議 一入Pripyat地區
就要著翻長袖衫褲
做好防護
部機喺呢度亦開始響…

下一個目的地:

不要走 大鐘即使敲響 你別放開手
成年後 什麼都不可再 有成人遷就
不要走 前去在人群內 會磨鍊到夠
可見將來 日子總會有 順逆流
不過此時 獲得的愛顧 無私愛顧 未夠

應該係烏克蘭少數仲係度既列寧像

如果頭先首歌大家未聽過
對唔住我真係有啲老😂依家應該係00後嘅年華

幼稚園
相信大家對幼稚園嘅回憶應該好美好
每日玩下遊戲 牙牙學語 食下點心
咁又一日

共產嘅幼稚園都一樣
佢地有午睡時間
訓碌架床

導遊曾經咨詢我地嘅意見
問我地究竟想唔想入去
因為始終所有大廈都係保留落來
換句話講 姐係零修葺零安全
有咩事自己承擔

嚴格來講係禁止進入任何Ruins
但係有得邊個報呢啲團純粹係外圍參觀呀
所以大家好似啲小學生咁乖乖地遵守紀律
安靜 小心翼翼咁進入第一所遺跡 幼稚園

40幾年後我地來到 畫面仍然係一片狼藉
公仔，書本，散滿一地





牆身油漆已經逐漸剝落
周圍都係牆身剝落嘅碎片
其實當時講緊係撤離
所以無點帶走過任何物品
至於如果大家問 點解好似書都唔多本
咁係因為 幾十年來 都總係有所謂嘅冒險家
獨闖禁區來冒險
有傳動植物因為輻射 改變左基因
類似係好幾隻腳嘅老虎
五顏六色嘅兔仔etc etc
好似果啲靈探咁作死

有時候又帶走遺跡遺下嘅任何物品
出去賣埋一百幾十
所以場面有小小似搜刮過咁
真係好缺德





遺下落來個公仔都幾得人驚
特別係棉公仔 吸塵到傻
慢慢變成灰黑色

呢個幾禮拜 唔知用咩心情去面對
屋企人中招 然後宜家Post緊嘅切爾諾貝爾
俾俄軍佔領緊 甚至琴日著火
聽講如果火勢失控
將會有10倍切爾諾貝爾事件威力
烏克蘭已經全國烽火連天

我諗切爾諾貝爾未來重開俾遊客嘅日子
應該數以年計了...
大家盡睇啦 睇得幾多得幾多！

願榮耀歸烏克蘭 Слава Україні !


其實所有嘅遺物 總係覺得好恐怖
成個場景好似係Haunted咁
所以亦難怪有人會闖入呢個區
靈探 / 探險 等等嘅活動





我嘅輻射探測器Keep住係咁響啊響
靠近泥土嘅時候探測到讀數高達6.78
要知道，你去醫院做一次X光掃描
受到嘅輻射大約係1咁多，ONLY
我唔希望出左呢個區之後自己生多2隻手臂




鐵路路軌仍然係可以運行
不過都係作貨運用途










可能有人問，其實宜家反應堆係咪純粹做維護？
答案係：否
仍然有反應堆係正常運作同受到維護
每日都有工人來往核工廠工作
呢架就係佢地嘅Shuttle bus
配啲70年代嘅顏色真係無乜違和感

都多謝佢地嘅付出同埋即時嘅應對反應
令其他反應堆得以保存 見到核工廠都好企理










20周年紀念碑 (2006)
我反而覺得係警示碑多啲
等大家都知道 工作之危險性
唔希望悲劇再重演

我嗰陣去係冬天
有講過話要夏天去多次 睇多啲
點知宜家就

搭左咁耐車同埋行左1-2個地方之後
我地都係時候去食飯喇！
我地會去佢地平時食飯嘅飯堂食
但係因為飯堂本身都係俾工人食
工人又容易接觸核反應物
怕佢地身上/本身自身嘅輻射指數高
有機會影響飯堂衛生/安全
所以入飯堂前有部人體輻射探測機

好似入機場要安檢咁
呢部機係個人企係上面
然後雙手按住圖入面咁
等機器探測下你個人身上有無過量輻射物質
如果無就會著綠燈
代表可以入飯堂喇~



飯菜其實已經準備好 無得揀
三餸一湯一杯野飲
冷盤係醃蔬菜、連椰菜都係酸酸地
頭盤係乳酪布林餅 呢個大家都見左好多次
唔需要再再再介紹喇
主菜係炒青椒同埋煎雞胸肉
佢地炸粉似係上有調味嘅生粉漿
但係始終係雞胸肉
加上係炸 所以唔好旨意佢好食得去邊
雜菜湯...er...
連KOMPOT都係好普通
總之 成餐可以用狗飯來形容



食飽之後 唔知點解個肚開始有啲痛
為左唔會影響行程
我即刻衝去廁所 但係痾唔出
其實我好驚 如果之後行程無啦啦急屎
我可以喺邊度痾

有死頂 希望腸胃乖乖地大步攬過
所以奉勸大家 腸胃唔好呢
真係常備止瀉/肚痛藥
啲咩喇叭啊保濟啊記得跟身

20k 真係夠？

本身仲想去鳥克蘭

唔係講笑，到最後真係夠
中亞大約$100至$200一日
特別係吉爾吉斯一晚先5 USD
儲埋嘅quota可以喺歐洲度食得舒服啲
平均計返就真係差唔多$300一日

咁如果唔住hostel，住airbnb（一個女仔），大概一個trip幾多錢？ 30k夠唔夠去曬中亞？

幾多唔同嘅使費要計

淨係計最普通嘅衣食住行
BNB大約$100至$300一晚 取中間數 $200
我當你$200一日基本消費
即係一日食飯、當地交通、瞓覺
平均$400一日

中度遊，每個國家10-15日
一共有五個 預計70日左右
基本開支已經28K

未計機票，三萬蚊應該係唔夠
不過30K來講
我覺得40-50日/2-3個國家
應該完全無問題、可以做大富豪

呢幾個國家入邊一啲高難度嘅景點
例如想去中亞瑞士Karakol
當地啲團費同埋紮營費
塔吉克嘅帕米爾高原組團、租車、通行證
土庫曼嘅地獄之門
然後再諗吓土庫曼你係想過境簽證定係旅遊簽證
(過境簽證嘅洗費大約係旅遊簽證嘅20分之一)
呢啲都係佔使費最多嘅嘢

女仔係真係難搞啲
始終安全係首要考慮
最好可能搵多一個人一齊share衣食住行嘅洗費

其實中亞嘅門檻高在
第一 進入中亞嘅超貴機票
無論你飛到北京/新疆、伊斯坦堡/莫斯科轉機
都大約$4000-5000來回，走唔甩

第二 時間安排
Aka就係點樣去plan中亞嘅走法
雖然佢哋全部都黐埋一齊
但係佢哋好多路都係蜿蜒曲折
Bishkek-Osh 搭車12個鐘，塔吉克更甚
分分鐘為咗景點而洗多咗通勤時間
過關都有機會因為車龍同埋人龍
而需要花分分鐘半日
烏茲別克同哈薩克好大
唔搭飛機搭火車慳咗錢但係洗多好多時間
要好認真咁畫一條唔走回頭路嘅路線
想當年我諗中亞都諗咗好耐點樣行
真係plan到以為自己萬無一失
點知烏茲別克個簽證唔批得切
直接喺我中亞嘅行程硬加咗七日

亦都曾經有人因為由土庫曼搭船過去高加索地區
但係因為船期延遲
搭到過去之後土庫曼過境簽證過期
會搞好麻煩
所以去中亞亦都要唔怕麻煩
特別係你諗住一次過打通中亞五國

最後一樣就應該係錢
又係錢？
因為唔係個個國家都有得撳錢
應該而家都仲係得哈薩克同埋吉爾吉斯有得撳錢
其他個三個…要帶美金入去換
按照你嘅情況
隨時袋住一兩萬現金真係唔出奇
咁又要再加倍留神

克服晒以上嘅困難應該就真係冇乜
中亞真係一個好客、好靚嘅地方
我每次睇返自己嘅遊記
都同自己講四個字

不枉此行

食完飯之後我哋又係時候出發
首先去左打卡位 呢個牌應該Google一搵就有
寫住Pripyat 係慘痛嘅標記
對於2022年嘅呢個區來講
同樣地都係慘痛經歷



四周圍都係呢啲核幅射警告牌
我哋每個人就好似小學生去旅行咁樣
一見到呢啲點就隊部機落地下
啲啲啲嘅聲音響起 個個好似發現寶藏咁
係度OMG OMG
對我地來講 呢刻單純係歷奇探險




以往嘅民居宿舍
導遊解釋，因為樓宇結構10分唔安全
所以我哋冇入到呢一棟樓
只不過喺出邊影相
同時都有亦都俾咗當年嘅景象我哋睇
可以見到其實我哋身處嘅地方係繁榮嘅大街
因為核輻射，人類離棄左呢座城市
但現在，由大自然重新接管呢個地方










電話亭
我諗香港依家都已經絕跡
唔見左電話嘅你
分分鐘打個電話都難

最近有則新聞
話俄羅斯軍隊毫無防護穿越紅樹林
等同自殺正傻仔？

切爾諾貝爾個紅樹林
命名原因係因為當年為左撲滅同減低輻射水平
利用直升機喺上面大量灑水降溫滅火etc
同埋減低空中輻射水平
結果啲幅射就落入呢片樹林
幾乎所有樹都中曬嚴重輻射而死亡 啡紅色咁款
所以呢片area淨係空氣輻射指數都10幾20幾



我既然join得呢個團
旅遊車都有穿越呢個區域
我都無保護裝置/設施

所以我地架旅遊巴係極高速衝過呢片區域



講緊時速100-120
你咪同我講平時吐公都係咁上下
話曬人地呢條唔係公路OK？

我就覺得坦克同裝甲車應該50都無喇
佢地鬼知咩叫紅樹林咩

就黎打完你都未講完 核電廠

無限拖延症真係好攞命 我盡快我盡快

Учиться, учиться, учиться
-列寧大哥

中文翻譯就係學習，學習，學習
呢所係名為Palace of Culture Energetik嘅展館
好可惜 又係一所唔可以再入去嘅地方
拿 唔係導遊昆水
基於安全問題
導遊其實係唔可以俾任何人進入任何建築物架
而且佢叫得邊度完全唔得
基本上 你唔會唔聽
呢度你熟啲定係佢熟啲呀拿？



藝術品以及以前嘅標語都散落一地
好似地震完咁 加上四周一片安靜
成個感覺好似災難現場咁
好地地一個新市鎮
講緊當年仲致力建設緊周邊嘅設施
一個意外搞成咁





不得不讚嘆下呢幅壁畫
真係栩栩如生
起碼我自己比到盡淨係識圓圈加一點

每一日 切爾諾貝爾都喺度恢復緊生機
慢慢仲出咗斯拉夫地帶嘅蘋果
曾經我喺哈薩克都講過
呢啲蘋果係好撚酸
所以唔建議食用
因為佢酸到你面容扭曲
再加上有核輻射嘅BUFF
真正做到面容扭曲嘅效果






係遊樂場呀！

真正嘅商業悲劇 Pripyat Amusement Park
原訂於1986年5月1號開張
想順著勞動節一同慶祝
點知就係4月26號
核電廠發生爆炸
整座城市馬上啟動撤離計畫
而公園亦被迫「延遲」開放日子

曾經佢地喺27號短暫開放過
不過開放嘅日子亦成為關門嘅日子
應該係世紀最悲劇且開幕時間最短嘅大型遊樂場
36 Years and continuing


就咁睇相 本能以為
曾經係一個充滿競技廝殺嘅碰碰車大戰
「攔腰撞佢啦！」
「睇住左邊嘅飛仔啊！佢瞄住我地呀！」
「呀仔呢度撞車好啦，第時大個咁撞幾副身家都唔夠賠呀。」

你點會估到
佢地從未正式開放過俾觀眾？











令人最為矚目嘅
一定係豎立於遊樂場正中間
偌大嘅摩天輪
或者令死難者嘅靈魂
流連係呢片淒慘之地
高26米嘅摩天輪
我自己企埋去都覺得真係好高好高
80年代 蘇聯經濟唔算發達嘅地方
咁洗本起一個巨型遊樂設施
就知道蘇聯當時係真係建造緊一個新城市
可惜事與願違

全城人民撤出Pripyat
留底嘅就只有伶仃嘅
為人民帶來快樂嘅
裝置

岩岩去完中亞
會唔會繼續寫

屌我又係 寄左兩個月都收唔到

終於發生左
但都好彩烏克蘭人意志堅強

嗚呀
我會呀我對自己唔住呀咁耐都未寫

好似已經推唔郁 可以開過個新post

再開就係開第三次會唔會好柒

寫唔晒先柒 寫晒係型