[重開再更新] 中亞東歐風情畫 - 畢業遊

真係好正好想去，不過呢啲地方對我來講都係打大佬，要好好計劃

見到樓主食啲嘢成日好擔心你便秘

綠衫阿姐真係好嫌棄舊炸物
應該話佢地真係真性情，唔扮野。

所以有時去旅行，得閒要行下local market/supermarket買生果食

推

樓主搭火車去Urgench再去Khiva 舒服過
直接搭Share Taxi

睇左部份 好似去左旅行咁 我自己好鍾意旅行

Khiva 沙城
Khiva個名嘅由來有啲特別
傳說有個國王穿過呢到挖左一口井
飲完水話 Хей вак!
hey wak 意思係 正呀喂
之後慢慢就改左個名叫做Khiva

唯一一個景點 應該話景點群
就係Ichan Kala
作為中亞嘅第一個世界遺產
Ichan Kala 係一座城堡
城堡內以前係好似一個城鎮咁
大約個feel就好似宜家北京咁
有城牆圍住



Ichan Kala城堡內有15個景點
收費係計入Ichan Kala嘅門票
有1日 2日 1星期計算
景點可以只睇1次 2次 或者無限睇
買好飛之後 張飛係每次入景點都要出示
好似check-in咁 工作人員會記錄低
我買左2日票 各景點入1次
盛惠100蚊港紙



大部分景點我就唔多詳述
一來同之前比較類同
二來真係真係太多太多
自己已經唔記得7788
放過我啦大家睇圖！

喺Ichan Kala 最矚目嘅
就係高44.6米嘅Islam Khodja Minaret
係一座修長嘅尖塔
有種吉爾吉斯Burana Tower嘅
進化版、地獄版
正準備上樓梯 佢同我講要收費
再收8蚊一個人
我直接將張飛遞俾佢 點知佢話
呢個係額外景點 係要再收費
我準備轉身走 但係佢話
"信我 上左去你就唔會後悔"
結果我翻轉頭 真係交低左8蚊就上去









呢座塔內部樓梯比Burana Tower再斜多啲
姐係點？
我只會注視著正前方
上面同下面都唔會望 因為太斜
下面唔望原因好簡單姐 畏高囉
上面唔望又點解？因為太斜
想象到自己腳底下面可以輕鬆跌死 所以都係畏高

爬左大約5分鐘 感覺好似過左15分鐘咁
沿路都有一啲窿仔 負責通風同埋俾我望出去
周邊建築開始縮細嘅感覺好特別

上到最高點望出去
終於將成個Khiva盡收眼簾內
沙城呢個名真係無改錯
就咁望落去 真係沙一般顏色
感覺就好似樓盤示範果啲模型圖咁
細細件 好得意
呢個就係我中亞最後一個歷史景點了









開始感覺到 中亞此行即將完結了
因為後日就會已經踏足俄羅斯同白羅斯嘅國土
正式進入東歐
以此完結 足矣

呢8蚊畀得抵. 如果你有拍條片轉一圈就更抵.

你擔心得太多
我差唔多三日肚屙一次
肉+奶 輕鬆腹瀉

有冇飲駱駝奶

可以代表到Khiva沙城嘅食物
就應該係Shivit Oshi
姐係Green Lagman喇
香港我地有菠菜麵
而烏茲別克就有Green Lagman
咁佢green係邊呢 原來佢係用Dill
我之前都有講過咩係Dill
Dill可以稱得上係俄羅斯國民香草
香港食咩都加2滴美極
而去過俄羅斯嘅朋友都知道
真係乜柒送都會有呢種香草嘅存在
我講過我好憎而今次純粹為左體驗文化
所以死忍都要試喇

Khiva嘅Shivit Oshi標準配搭係
麵過冷河之後上 所以算涼食
上面有堆燜薯仔紅蘿蔔牛肉嘅Puree
隔離再有一堆Yogurt
比你撈埋黎食 盛惠25蚊




其實幾貴 不過始終遊客區 算啦比佢
食落去真係有淡淡嘅Dill味
好在麵味大過佢 都忍得住
而果堆肉嘅濃度
就好似銀咖喱嘅咖喱汁咁稠
所以撈埋就好好入口
夏天食嘅話真係有小小消暑
(唔係真係凍，起碼唔係咁熱)
另外再配左個東歐嘅湯 結束！
呢間餐廳嘅景幾靚 因為時值日落
所以坐係呢到好chill



今天不小心把心愛的水杯裝了八分滿
事後我用了十五分鐘去細心欣賞
發現裝了八分滿的水杯
竟然比起平日那個形態更美
然後我再用了十分鐘去買單
再為其拍照
這短短的三十分鐘
算是今天我思緒最安穩的時間
八分滿的水杯
是我今天看過最美好的東西
而那水滴進杯嘀嗒聲
是聽過最美好的聲音
原來人生覺得最爛的事情
也未必是最糟
因為最糟的
可能一直就在眼前而未曾發現
又或者根本就是自己
我想我找到了答案

係時候要歌頌一下呢間Hostel嘅主人
我唔記得佢叫咩名
我每一間都會問點稱呼
但係住左10幾間 點會記得HAHA
呢間Hostel叫做Laliopa
算係Khiva入口附近5分鐘步程

我認為係成個Grad Trip最佳Host
首先甫到步 已經係行出來迎接我
快步上前幫我攞行李
又話辛苦喇 搵左間房係成間都無人嘅
我知道都有大約1-2個guests嘅
但係佢唔嫌打掃多1間
所以俾左間無人嘅俾我 隨便揀床
之後借單車+單車鎖俾我 免費！
有間單車真係唔同啲 始終沙城嘅交通
就只有電車來往Urgench
個個出入都係靠車或者單車
我成個月無踩過 真係好懷念
佢重要係鳳凰牌單車
有種慢遊鄉郊小徑嘅feel圖文不符
好舒服 好似瞬間帶我翻去80年代咁
到夜晚 我喺Bishkek洗嘅衫已經用得7788
今晚係一定要洗 聽朝一定要乾
而且我差唔多10點先問host
佢同我講洗衣機壞左
我果下係心諗 玩完
因為我真係講緊剩翻最後一套衫
我聽日係Nukus-->Tashkent凌晨機飛莫斯科
所以今晚一定要洗到
佢就話可以借洗面盤+洗衣粉+刷俾我
著我用手洗 洗完搭係出面啲檯同凳
於是我就好努力咁洗刷每件衫每條褲
過左幾次水 發覺啲水暖暖地
先發覺 仆街 唔小心開錯熱水
尷尬到 佢都走左出來話 economy water
真係 即刻熄翻 快啲過埋水就晾衫
發覺佢啲凳同檯+佢啲長石板凳
加埋曬先僅僅夠我晾
姐係我霸曬佢成個dining area
我都無多想 因為洗完已經11點半
快啲訓教好過 其實自己最擔心反而係
乾唔切就玩完 因為11點半先開始
得7個鐘 唔知得唔得 希望得啦
(佢無乾衣機，我手扭完天然晾)
因為今日真係做左好多野
搭車+踩單車+周圍行跑景點+洗衫
所以一上床 鬧鐘都無較好就訓著左

再醒已經係8點半
突然醒起 我啲衫好似仲搭左係食飯檯
GG 即刻衝出去發覺食飯檯已經清空
已經有guest食緊早餐
而我堆衫褲已經放左喺一邊
摺 好 曬
哇 勁唔好意思 個host見到我之後
仲同我講good morning
端住我嗰份早餐俾我 哇warm到癲
我唔知我算唔算西客
因為真係好似麻煩得佢太多
而佢嘅好客之道真係MAX左
早餐係極度豐富
雖然同其他hostel一樣都有麵包/饢
但係佢主碟係3送
荷包蛋 薯仔煎餅 炒茄子 藜麥飯
雖然分量唔算好多 但係每樣都好出色
我真係有小小想厚臉皮食多份
真係全中亞食過最正嘅Hostel早餐
再加超甜蜜瓜做飯後果
真係元氣滿滿！真心多謝呢個host







我都特登第一次喺平台留左10分滿分
寫左幾百字多謝佢嘅款待
希望佢可以一直咁樣 保證吸客吸到傻
另外臨走佢都教埋我點樣去Nukus
因為呢到去Nukus嘅話
用火車通常都係凌晨到Urgench
又或者好夜先到Nukus
我果班機係下午5點半
所以只得一個選擇 Shared Taxi
佢教埋我用Maps.me
留意翻2018年 2GIS喺烏茲別克係無數據
而Google Map記錄嘅地方都好少
所以Maps.me就係最好用嘅野
佢教埋我點去Nukus嘅Shared Taxi位
因為真係好Random咁
我要好認真聽佢講同埋記低先得

好唔捨得呢個Hostel
雖然住左1日咁多
但係可以話係享受緊呢間Hostel
好舒服 好客到癡線 辛苦曬Host照顧我

高質post留名

laliopia真係好正，我係出面行左兩日都無乜時間係留係hostel欣賞出面風景
仲記得佢個早餐，煎蛋薯餅真係咁多年無變

Urgench要搵Nukus嘅shared taxi
如果唔係有host幫手
根本唔會搵到 因為係一條街中間嘅一棵樹
而樹下啲人係喺到食緊煙
見到我都唔會主動講野 （唔係大牌，純粹我拖緊喼）
我問佢地係咪Nukus佢地先答我Да

btw Nukus唔係讀 new cuz ，而係讀noo goos
收費40000SOM
俄文好特別 除左40之外 20-90詞語組成都係X 十
40 係сорок 梳勒k

好多司機都係粗渣私家車
始終都只係搵食工具
所以好多野壞左都唔會修理 最緊要架車行得就得
你見到擋風玻璃咁大條裂痕都未打算維修
都真係佩服佢地嘅勇氣
重要唔只一條

咁大條裂痕容乜易揸揸吓車突然間爆玻璃

我好驚 瞬間碎左就大家一齊入廠

Lm

Nukus 行程來講係0
因為我真係完全無打算plan
到達Nukus嘅時候已經2點 起飛時間7點
所以5個鐘可以做得啲咩？真係無的
而且2018年Nukus仍然喺到鋪緊路
所以成個城市翻新緊嘅時候係無野好行

我唯一嘅嗜好都係行Bazaar市集
今次終於有機會認真買一個蜜瓜！
講左咁耐 都未真正獨享一個
成日都係食得一階咁少
今次去到一個專門賣瓜嘅地
有各式各樣嘅瓜 西瓜 哈密瓜 蜜瓜
個個都好大個好圓咕碌



我搵到一檔睇落好Nice嘅哥哥仔
點解揀佢？唔只係因為佢好nice
而且佢係有把刀仔！
相信大家都估到我想點
於是我行埋去問佢幾錢 佢答我2蚊1kg
我叫佢揀個最細嘅俾我 盛惠7蚊雞
7蚊一個蜜瓜 邊度搵？
佢個Size係俾夕張蜜瓜再大啲
我問左佢借果把刀 示意話想即食
2018年嘅我 淨係得一個concept
就係起碼菜刀先可以夠大把來切瓜
佢見到我喇手唔盛世之後
就行埋來幫我 仲幫我切好曬
真係超感動 喺果刻
我覺得自己好似殘廢咁
要人服伺我 想喊
同埋我好衰 我唔記得唱錢 直接俾左50蚊佢
結果佢找左43張1蚊俾我 超厚



講翻個瓜 其實真係唔洗check
佢幫得你揀嘅 絕對係上等瓜
劏開果下 蜜瓜嘅香氣撲鼻而來
見到每劏一下 啲糖水順著裂痕流
一啖咬落去 成個口頓時充滿香濃嘅蜜瓜汁
幾乎係唔洗咬 因為熟透嘅蜜瓜
果肉係超軟 一壓落去已經標曬汁
我食左大半個就停手
原因係真係太飽 好似飲左好多水咁
二來就係真係太甜 再食落去真係急性糖尿病
於是叫左哥哥仔來 同佢講佢可以一齊食
撫摸我個肚 表示好撚飽
再鞠個躬多謝佢嘅款待 真係太好客喇大佬

下面係哥哥仔劏瓜俾我嘅片對唔住我把爛聲係幾難聽
https://vimeo.com/626118642

食完瓜就攞住疊錢走人
因為真係好大疊 所以係度打卡
影左呢張相果刻覺得自己好rich




點知就爭啲出事

突然迎面有兩個人係度同我打招呼
係咁係度Hello Hello
問我Nukus good?
我話good good good
然後就地係個石級坐低
係度話food good?
我唔知頭唔知路 咪話Good
心諗係咪好客到咁咁樣坐低
突然佢問我識唔識講俄文 我話識小小啦
突然佢用俄文問我有無錢 我即刻知咩料
一定係自己頭先錢財露眼 招人耳目
馬上開始扮唔識 佢再用隻2隻手指開始捽 示意錢
我話не понимаю（唔明你講乜春）然後起身走人
佢地仲爭啲想繼續留住我佢Partner就阻止左佢
話曬係喺正市集正中心 所以可能佢地先無咁夠膽亂來
我真係有小小驚 分分鐘如果佢地真係aggressive小小
我都真係無曬錢都唔出奇
自此之後我就好aware自己啲錢要keep好
真係 財不可露眼



因為都差唔多4點 快快趣趣食個飯就去機場
求其入左間有冷氣嘅餐廳
冷氣真係好緊要 Nukus都有40度高溫
有得cool down就盡量去呢啲地方
始終自己唔係係呢度長大 除非長住
否則要適應呢啲天氣唔係一朝一夕嘅事
而且 炎熱夏天都要好好保護自己啦係咪？
除左要盡量避免暴曬同熱天氣之外
一定要抹汗飲水 費事中暑發燒就好麻煩
好狼死嘅餐廳 我諗都係Nukus算係超貴嘅餐廳
一個飯成30蚊 茶都要1.5先一碗
再加埋15%服務費 真係超貴

唔好以為市中心就唔搶你, 就算成街人都照搶遊客. 因為d遊客無時間去報警, 某d地方嘅差佬仲特hea9 d遊客.

樓主執番條命仔

食完飯之後就差唔多要去機場啦
因為我真係唔知有啲咩交通
所以我索性徒步行過去
路程2.5公里 大約行半個鐘左右
係咁炎熱嘅天氣底下如果我係啱啱到烏茲別克
我一定會差唔多死咁滯
但係經過10日嘅洗禮
我已經習慣咗呢度嘅濕度同氣溫
基本上行起上嚟都唔會特別出汗
身體已經適應晒
而且成個人已經曬到黑
同阿媽傾視像通話 佢都話黑咗好多

一路行去機場
發覺喺樹底下乘涼嘅婦女
抱住佢哋個仔沖出嚟 問我攞錢
我睇佢哋嘅身體語言
應該係表示緊 佢哋好耐冇餵過個仔食嘢
講緊係一條500米嘅路已經有五六個衝出嚟我面前
其實我一直都有少少唔明
生小朋友之前唔係應該要有規劃咩
要衡量下自己能力
究竟可唔可以一直養落去
成日覺得生完之後對佢哋唔負責
其實某程度上害左佢哋
因為唔係一兩個出嚟
而係成條街都有阿媽同個仔或者女
坐喺樹底下咩都唔做 好似等緊人施捨咁樣

當下我真係冇俾錢
因為啱啱自己弱智招人耳目
搞到唔敢亂攞啲錢出嚟
但係依家諗返發覺
其實真係盡一點綿力姐
咁對於自己來講幾蚊可能跌左都唔覺
對佢哋來講
可能已經係幾日嘅支出
希望佢地今時今日可以渡過難關
亦希望佢地嘅子女都可以健康快樂成長

終於到機場
最後一個城市 Nukus 完成✅



我覺得Nukus係有幾深嘅體會
明顯比其他地方更加窮 更加落後
因為比我感覺係 周圍都係沙塵
路況差 除左機場條路岩岩開始鋪路之外
其他全部泥路 生活水平都真係幾低
Bazaar唔係建築 而係真係全部地攤
周圍都係窮人 好似得不到照護/幫助
部分人富起來呢樣嘢
係烏茲別克嘅數目 我估真係10%左右

呢個應該係我見過最細嘅機場
講緊就咁睇到佢咁細嘅建築
已經有分埋國內同國際Terminal
主要負責國際線
通常都係塔什干飛完呢度之後再出去俄羅斯
因為呢度其實已經係烏茲別克最西北嘅城市
再向西北移動已經係俄羅斯領土同埋哈薩克領土


當你以為check-in櫃檯嘅資訊係實時更新
咁就錯喇

因為突然間有個工作人員
揸住個遙控行過嚟
撳咗個設定換過第二張相
係換相例如佢而家就換咗張去聖彼得堡嘅相
我估應該係一日得一班去聖彼得堡嘅機
或者嗰一刻去聖彼得堡嘅基本上係得嗰一班機

而我嘅塔什干機都係
即時轉相
轉好左張相之後 地勤就開始幫人check-in




本身我架機係HY 14 1900起飛
點知check-in果下先發現
頭先條友轉嘅相係HY58
原來HY14 改為 HY58
時間亦改為2130
而且 佢重要經停Bukhara
一共delay 4個鐘 搞錯
我於是問下個地勤
我話我第二日4點起飛
係咪可以唔洗去Hostel住一晚
（之前有同大家介紹過，每一晚都要有住宿證明）
點知個地勤答到1999
“When you arrive at the airport, You have to be very careful about your situation.”
我聽左佢重複左3次 咁姐係得定係唔得？
因為如果得 我就cancel我嘅住宿
如果唔得 我就去住2個鐘
佢都係答我唔到 而我都發現依家cancel都會收我錢
算啦 我直接去住2個鐘 唔想再煩



坐左真係幾個鐘 終於可以走人
佢同柬埔寨暹羅機場一樣 無任何登機橋
亦無任何接駁車 而係直接徒步行出去等機
對唔住 當時我大鄉里 第一次見 覺得好神奇








因為9點上機
9點就係黃昏時刻
呢個景色完結烏茲別克 真係完美句號
好開心可以來到一個生活咁樸素 景點咁靚
當地人咁熱情好客嘅一個國家感恩