[重開再更新] 中亞東歐風情畫 - 畢業遊

放心唔識俄文去中亞死唔去既
不過我係去土烏哈
至少兩個唔係寫西里爾字母

不過我依家都學緊俄文喇
等開關去埋樓主依家個吉 同埋個塔

因為身體咁樣嘅情況
我唯有的起心肝搵多啲纖維食

去左一間叫Lagman бери食晚飯
呢間嘅形式同之前一樣
都係IKEA運作方式 - you pay what you take

Beef Stroganoff 俄國牛柳絲配飯
同香港唔同，香港應該係用金寶忌廉湯
而正宗做法係用到Sour cream溝洋蔥
呢間餐廳加埋九層塔去炒但係食起上來又唔係好覺
不過都算係正常飯 155SOM 18蚊左右
另外蔬菜搵到了，竟然係椰菜花同埋西蘭花正
唔知點解好似好多人特別抗拒西蘭花

另外烤雞肉串 куриный шашлык
唔係好食嘅野
係雞胸肉配三色椒 上面再搽泰式辣醬(雞醬)
好鞋無味道 收緊我75SOM 10蚊串

是但啦 終於有一餐食到有番咁上下纖維嘅蔬菜

留喺Bishkek其實好過嗎？Not at all
個屎忽嘅痛楚盡最大努力消除左我周圍走嘅慾望
個腦好多Plans要全部on hold或者取消
我果一刻真係有打算 不如之後都9 hea曬佢就算
不過其實都諗 應該係暫時性架姐死忍啦
日日塞住藥同自己講 好快好

早前話過 哈薩克個個都好勤力唔會咁得閒蒲公園
因為 吉爾吉斯啲人對比之下真係
好 撚 得 閒 咁 款
抑或 其實吉爾吉斯啲環境 真係太舒服
高大嘅樹木 帶來一大片樹蔭
無論訓喺草地又好，坐喺長凳又好
都係一個絕佳嘅休憩 / 睇書 / 聽歌 / 散步 ... you name it
隔離塞曬車嘅路
對比行人路寥寥可數嘅人 鮮明到一個點
集合半發展城市同埋公園於一身嘅環境
如果我屎忽唔痛 I can do this all day




WORLD NOMAD GAMES 世界遊牧運動會
顧名思義係同遊牧族群有關嘅運動會
運動競賽包括
賽馬
摔跤
箭術 etc
參與國家除左前蘇聯國家例如中亞、俄羅斯以外
土耳其、蒙古、美國都有參與其中
幾乎每年都會喺吉爾吉斯Cholpon-Ata舉行
不過聽講土耳其準備2022年做第4屆舉辦國
通常舉辦時間都係9月頭
我當時距離運動會開始時間仲有成50日
所以 無緣了

吉爾吉斯國家藝術博物館
Кыргызский Национальный Музей
Изобразительных Искусств имени Гапара Айтиева

40SOM 入場劵
收錄嘅畫主要描繪草原生活
以及當時遊牧民族嘅衣著
中亞地區甚至新疆 都鍾意喺草原彈著樂器唱歌
果個樂器好似琵琶mix二胡嘅樣 叫做冬不拉 Dombra
因為佢重量輕，方便攜帶，孭喺後面騎個馬
馳騁草原到攰，彈首歌，真係好寫意脫離世俗煩囂











另外佢都有個細細地嘅Area用來做pop-up gallery
今次係韓國書法，見到嘅都係漢文字書法:

出處係 행록 3장 49절 譯名係使徒行傳
處世柔爲貴 剛強是禍基
發言常欲訥 臨事當如癡
急地尙思緩 安時不忘危
一生從此計 眞皆好男兒

佢第一句散發左道家"守柔處弱"
處事當以柔為貴
全文意思大約係:
處事應以柔靜態度面對
處事剛強係禍根
說話要謹慎 遇事做白癡 (?????)
臨危不急不亂 有條不紊
安逸時不忘小心潛在危險
如果一生人都跟住呢個做人方向
他就係一個"真正的好男兒"

原諒我中文造詣唔好以我了解+翻譯就係咁意思
因為原本係佢係韓文

我以前都係一個臨危即亂嘅人
成日覺得遇到難題一定收皮
而家慢慢自己成熟咗少少
就發覺其實冷靜處事 處變不驚
會令到件事更加容易處理
你都發覺其實睇返轉頭
其實好多野以前自己以為係世界末日
但係都唔係好大件事姐

已經學緊德文，早排試緊西班牙文
我頂唔順了
我覺得好似樓主咁識啲基礎語言再去感覺真係差好遠

兩種語言一齊學真係攪唔掂
要分開學會好少少

我德文去到B2-C1，但係其他就完全未開過咁濟
西里爾字母仲好似要另外學過啲字母點寫

俄文有少少似德文
西里爾字母認到就好快曉讀

lm

唔洗驚嘅
其實宜家有google translate方便好多喇
有咩事上網translate比佢囉
同埋你真係驚就學小小果啲旅行必備嘅用語
例如 廁所係邊啊 幫我影相啊 點去XXX (<--呢個有啲商榷，因為人地講完你都未必聽得明)

因為如果真係要行中亞嘅話
起碼你要識烏茲別克/維吾爾語、哈薩克/吉爾吉斯語(兩種語言好互通)
英文都夠做架喇 用多啲國際語言 - 手勢

去旅行，想去就去

Площадь Победы 勝利廣場
白羅斯Minsk, 烏克蘭Kiev, 俄羅斯Saint-Peterburg都有
吉爾吉斯嘅呢個
用紅色花崗岩建造而成嘅紀念碑
造成一個蒙古包 Yurt 嘅形狀
用作紀念二戰英勇嘅戰士
中間嘅圈有啲似偷光嘅作用
照射成個monument嘅中央

中間有位穿著住傳統服飾嘅婦女雕像
等待身為戰士嘅愛人平安凱旋歸來

中間有個不滅之火 - 長明燈
以作紀念為戰爭犧牲嘅士兵






因為都真係幾多中國人嚟呢度做基建
貫徹一帶一路嘅原則
所以亦都有睇準機會嘅商人
過嚟呢度開中國餐廳
你唔好話，佢哋都真係幾好生意


2021年 阿富汗塔利班因為美軍逐漸撤離
士氣逐漸高漲並且擴大勢力範圍
頻繁同政府軍激戰
甚至逼近巴基斯坦邊境

緬甸內戰逐漸升溫
當初反軍閥政府嘅民眾已經組織成抗戰武裝部隊
仲有數之不盡例如以巴衝突 etc

世界和平嘅夢想
似乎更像一個夢

點去xxx，呢個真係人地講你知點去你都聽唔明

西蘭花椰菜花我勁鍾意食

去旅行印像中無食過中餐

巴打gogogo... btw依加有無方法去俄羅斯hea下？

真，有錢係手個人就定

我果陣係學咗左同右同直行嘅文
開住個google map 話比佢聽
我地喺呢條街，叫咩名，宜家係要點行

因為吉爾吉斯Shymkent間民宿太難去
好多小路，去到小路之間定位唔準
我真係靠直行同左右呢3樣野
成功問人同埋摸到方向點去

識食一定係蒜茸爆西蘭花加埋帶子肉仲正

如無意外
俄羅斯宜家應該仲係block左香港人
解封左大劣人 但係就無話香港得

外國Lipton係好似FUZETEA咁出好多款茶
自己比較鍾意嘅係Lipton檸檬茶同埋蜜桃茶
因為真係做到果種夠澀嘅口感
加上佢個糖唔多 (好似6g左右，點都少過垃圾維他)
所以幾平幾抵飲
價錢大約25-30SOM 3-4蚊一支
Акция 解作Discount或者優惠
呢度姐係比多左50ml比我當係優惠
Лимон Lemon 檸檬 直譯嘅 西方借用詞

去到商場見到一間叫Pro Coffee嘅take-away coffee shop
見到menu寫著 любое блюдо или напиток 60SOM
意思姐係任何單點菜式或者飲品都係60SOM
7蚊一件蛋糕 7蚊一杯啡 7蚊一杯凍檸茶
任君選擇
Лимонад lemonade 但係呢度唔係真係完全解lemonade
通常都係講緊用lemonade做base再加其他材料
例如第二個 Киви-апельсин 奇異果-橙
第三個 Гранат-грейпфрут 紅石榴-西柚
所以見到lemonade嘅menu嘅話
你可以當佢係fruit punch咁嗌就OK~

Холодные напитки 凍飲
例如ice latte, ice black tea, milk shake

выпечка, торты, сэндвичи 麵包蛋糕三文治




貫徹始終 我係叫左Medovik蜂蜜蛋糕
同埋一杯熱latte過一個舒服暖心嘅下午
真係好寫意 坐係個長凳度食
時不時有人會望住我通常都係好奇
可能好奇點解我要生痔瘡
不過大家都要小心個人財物
有句說話 財不可露眼 係真嘅
因為日後去到烏茲別克就犯左呢個大錯... FML

中亞啲cafe都相對地好貴
可能真係預你坐成日

飲完個靚咖啡
心血來潮 想整啲野慰勞下host同埋個俄羅斯佬
當係佢地好心教我俄文
同埋幫我打電話問大使館簽證

3年前嘅我真係唔知有咩好煮
因為果陣自己一個住 成日求其hea煮
就算係決定煮一樣送都唔會特別去研究點煮
e.g. 豆豉蒸排骨 我係唔醃同埋唔上生粉就蒸
蒸到出來一碟水都算 啲排骨又老又無味
宜家煮嘅野終於正常同好味
宜家呀媽開始嫌我煮野搞咁耐
做咁多步驟先食得其實都feel到
佢開始懶落來 以前煮飯佢都好有心整好耐
係開始老開始攰
所以宜家我盡量有咩自己買 想煮自己煮
就算佢買翻來之後我都叫佢行出廚房
等我來煮

所以如果大家有時間嘅 兩老健在/尚在
有得孝敬就學下煮飯啦
impress下你啲父母都好
起碼佢地知道你係餓唔死可以自理膳食
成日在外嘅打工仔女
得閒就翻屋企食餐飯啦
係無出面整到咁誇張咁好食架喇
你食嘅係屋企嘅味道
係屋企嘅感覺

人生無常，愛要及時做出來

買野嘅地方 梗係去Osh Bazaar
早前都有講過 你諗到嘅野都可以喺Osh Bazaar買到
所以買送去呢到就一定無錯啦




再再再提一提大家
吉爾吉斯都係偏穆斯林國家
所以係無豬肉架嗚嗚嗚嗚嗚嗚嗚嗚嗚嗚
不過呢到興食馬牛羊肉
所以周街都係肉檔
海鮮來講 我自己就唔係特別敢食
因為真係好腥臭 唔係個人唔喜
而係真係唔新鮮，運到過來又唔喺張檯到鋪冰
搞到好似魚類亂葬崗咁




諗到整咩之後就去採購
唯一一樣嘅肉 - 馬肉腸
真係好好好好食 一條腸有齊馬肉同埋馬脂肪
肉同脂肪大約1:1 或者 6:4 睇個人喜好啦
將馬肉同埋脂肪甚至孖筋包入腸衣醃好之後風乾
食起上來因為有脂肪喺隔離
所以食落一啲都唔柴 淡淡鹹香 真係好好送飯
價錢大約60蚊1kg 你可以同佢講要邊條，要幾多
一條通常都一節手臂咁長咁大
因為3個人食唔洗太多 我就要左半碌大肉腸
收左我280SOM
買齊野就返屋企啦~

你唔使返工？可以日頭出post

今晚要煮嘅野係！

番茄炒蛋pasta配馬肉腸
sorry真係 3年前真係唔係特別識煮野
果陣已經覺得番茄炒蛋看似簡單但其實唔係容易
因為真係睇得太多大劣食堂整埋啲番茄炒烚蛋
啱啱重要睇到 哇屌你
車厘茄炒烚蛋母雞下蛋 現場直擊


好啦 要買嘅野 唔算多
番茄 蛋 蔥 pasta 同埋 馬肉
因為佢地做開碟頭麵 (lagman)
所以我今次都用翻呢個做法(簡單嘛烚完就得)
發覺佢個hostel得鹽 所以連油我都係自己買
幫佢地添置下




我諗番茄炒蛋最煩嘅應該係落蛋嘅時間
我以前以為等得蛋熟嘅時間落番茄就差唔多一齊熟
which is 異想天開
因為我鍾意番茄炒蛋嘅質地係
煮到出汁煮到番茄軟
咁樣先可以好送飯，撈汁一流
我會一開始落小小蒜頭爆爆個鍋
然後先再落番茄同埋糖調好個味
想番茄味香啲可以落茄膏 啲汁會特別濃郁
我就偏向食材料味多啲 所以就無買
留意翻 唔係個個番茄都可以煮到好香番茄味
你宜家落一轉街市
全部番茄應該都係山東大肉茄
雖說好多人煮番茄炒蛋都鍾意用肉茄+茄膏
貪佢無乜水 同埋形狀都firm啲
不過肉茄通常冇乜味道
所以好多人會加茄膏
不過我就鍾意呢到啲番茄 - 水茄類
摸上手唔結實 偏稔 煮出來釋放茄水較多
我就通常煮耐啲蒸發多少水分，令茄水味更加濃郁
香港應該比較難買，可能走轉CDsuper或者一填會有
如果個鍋夠大就將番茄撥埋一邊用作炒蛋
最後一齊兜兩兜 落小小鹽調味
撒上蔥花起鍋，完成
10min dish 完成


馬肉腸拖拖水 2分鐘都得 因為本身都可以即食
純粹去除外層污糟野
pasta 加鹽淥5-8分鐘 視乎個人喜好口感調節
因為pasta瓊乾水之後就會癡埋一舊
最好過一下冷河 保持分明同埋沖走多餘表皮澱粉
上碟











我真係估唔到煮埋呢啲劣食比個host同埋俄佬
其實好驚比佢笑 咁樣就交貨？
本身得host係客廳 我一早同左佢單聲叫佢準備食飯
但係唔見俄佬 我問host去左邊
佢話佢攤係床訓教於是叫host叫醒佢食飯

佢地第一句係話 "識野喎買馬肉腸，我地好鍾意食"
言下之意係咪姐係話除左馬肉腸之外其他都係垃圾
我同佢講係中菜 Китайская кухня
不過佢地食落都話好食嘅
因為吉爾吉斯啲野通常都鹹多
無咩甜嘅菜式
所以佢地都覺得咁樣配搭又幾好
番茄炒蛋世一

梗係要啦 唔返工邊有錢去旅行
冒着俾人收皮嘅風險update個post
個扮工mode好好用

煮飯嘅日子係星期日
終於好辛苦咁過左一個好癡線嘅禮拜
食飽飯大約8點半左右
由hostel嘅窗望出去 清楚見到日落晚霞
好舒服 一齊坐係到望住夕陽西下










日日出唔到遠門好辛苦
以前就係係咁睇連登 搵人傾計
吉爾吉斯同香港時差2小時
所以傾到吉爾吉斯11點
香港時間1點之後就無人可以傾計
除左痛楚影響睡眠之外
因為當下心態都仲未重拾到周圍去嘅衝勁
所以好頹廢訓唔著諗起覺得自己點解會咁fail
旅行先黎有情緒真係喊三聲 身邊無咩人安慰你
好想駁個輪 打比親愛嘅額娘
"媽呀我好痛呀訓唔著呀"
但係又怕佢會擔心 所以都係無咁做
忍下好快過大個仔小小痛就搵老母有啲弱

原諒我只係得一部iPhone SE
一到黑夜 影起上來就有無窮無盡嘅雜訊
不過都睇到好有feel
我真係好掛住去旅行呀！

樓豬痔瘡好番未？