[重開再更新] 中亞東歐風情畫 - 畢業遊

呢啲西方嘢喺中亞係畀中產去
平民或者窮撚可以去返俄式大飯堂stolovaya
不過其實咩地方都可以坐成日
只要佢地唔收鋪 幾乎所有餐廳都永遠有位

我頹廢嘅呢啲日子 (應該3日左右)
我親愛嘅小學同學已經玩完Song-kul
佢準備計劃下一步 - 塔吉克柏米爾高原
塔吉克簽證係可以陸路入境做落地簽
所以佢地唔洗特別計劃
通常入塔吉克同我入烏茲別克都一樣
要由吉爾吉斯南部Osh出發
同其他旅行者組隊租一架4WD同司機包車去

要去Osh就要係Bishkek出發
所以佢地會翻來先 問我有咩hostel推薦
咁梗係翻來搵下我啦大佬
所以佢地就同我一齊住左係同一間hostel

第二日起身 真係好肚餓
但係我地都真係暫時fed up with 中亞牛羊菜
所以我fd就話帶我去食蘭州牛肉麵
其實唔係講笑 你日日食差唔多嘅野
加上唔係近似你屋企口味 真係會唔慣
既然佢極力推介 咁就去啦！





大約20分鐘車程帶左我黎拉麵館
以我所知 老闆係中國人
都係來呢到開餐館做生意嘅
請嘅人反而唔係自己友 而係本地吉爾吉斯人
佢地都好nice 同埋佢地都識小小中文

蘭州牛肉麵 講求湯底同埋麵
湯底雖然偏鹹，但係用料唔少
飲落去有種五味雜陳嘅feel但係係好香
再加小小油潑辣子 - 一啲用辣椒做嘅醬，但係又唔係特別辣嘅野吊下味
麵唔求爽口，小小單牙唔洗林曬就已經好OK
佢呢到用牛腩粒來做牛肉
相比2個禮拜前喺吐魯番朝早食果碗麵真係爭太遠體積大幾倍
重點係多蔥食蔥聰明呀






我fd話呢到上次個老闆推薦茶葉蛋
但係今次老闆唔係到 淨係得吉爾吉斯人
佢叫我問一問佢
我果刻唔記得蛋叫咩 Яйцо (夜易梳)
膽粗粗用俄文問佢 識唔識講中文
結果佢用普通話講 "我會一點點"
即刻一人兩隻 中菜真係好好屌
隔左咁耐終於食翻一次中餐

食完飯就去買生果同埋買送煮飯



今日有個好消息
就係我地再再再委託host打去大使館問簽證
話我地3個嘅簽證已經process好
聽日可以去攞終於搞掂
我即刻上網買聽日去OSH嘅機票
雖然係貴左小小 之前睇1750SOM
宜家買要2300SOM 貴左三分一
不過總好過買完飛唔到無得退啦
同埋我終於真係confirm可以走
至於痔瘡問題... 我係仲未好翻曬
不過勤加塞藥入去就無咩事
所以我即刻都去藥房買翻pack肛塞藥袋落袋
以防烏茲別克無因為烏茲別克仲窮過吉爾吉斯
唔肯定醫療水平如何 有備無患啦

不過今日就因為太早塞藥
半日嘅時間已經用完曬藥效
開始feel到乾左 乾左會點？
就係會增加摩擦 姐係好撚痛
個形容就係 都無曬水 你又唔落KY
又要係咁係到想強插 咪痛囉
我死頂到街市買送然後反屋企大家唔好亂試

呢到嘅生果都無咩纖維
都係水多 例如西瓜蜜瓜蜜桃
西瓜1蚊1公斤 今日揀左個9公斤重
另外因為自己真係好鍾意食桃
吉爾吉斯桃嘅產量似乎比哈薩克重要再多
呢到嘅桃有2蚊至6蚊一公斤不等
視乎完好程度/大細判定
既然都唔係爭太遠 幾大都買最貴！










今次食到有一粒桃 竟然上面有桃膠
以我所知，桃膠係樹皮分泌出來嘅樹膠
但係今次連果實表面都有 真係第一次見
我貪玩咬左下 無味正常嘅不過

多謝關心樓豬健康
我去到烏茲別克嘅第一日塞完
之後就無塞過歷時7日終於消腫

講起痔瘡, 我同事老豆上個月走去割咗. 割完第一日麻醉未過覺得easy輕鬆. 第二日開始黎料, 日日屌鬼叫救命

吚，原來Гуляш係匈牙利燴牛肉飯？

Yeah exactly
匈牙利正宗做法應該係有落蕃茄同埋Basil
但係呢個應該無咁重料
所以煮出嚟有浸好渾濁嘅肉味

好想去匈牙利呀之前買咗機票冇得飛
好想去嗰度係咁食鵝肝

見油麻地間liberty coffee and wine有得食下次去先

抱歉大家 最近有小小心煩
耽誤左出post今日出多啲賠罪

最後係Bishkek嘅晚餐
再度揀左去食中菜食上癮
真係好懷念果種鍋氣
今日去嘅呢間叫做 "華人餐廳"
Well 睇個名都知一定係食中菜
所以諗都唔洗諗 衝左入去
有啲似街坊茶樓咁 佢地有小菜套餐
一碟送 一個飯 茶水任飲
300SOM + 50SOM 茶錢



今日叫左個應該有鍋氣嘅菜
青椒辣椒炒雞絲再度重申 無豬肉
師傅落左唔少油 令青椒喺大火環境下保持鮮綠
雞絲有小小生粉喺面 咁就唔洗太過驚炒炒下變鞋
加上應該係北方人炒，所以碟送偏鹹
好好送飯
食啖飯 飲啖茶 解油膩好不寫意






唔知大家有無夜晚散步嘅習慣
我自己好鍾意夜晚散步、坐喺海傍長凳
無論係熱鬧大街例如 彌敦道、軒尼詩道
定係夜闌人靜海傍例如 田灣海傍、堅尼地城海傍
或獨自散步、或結伴談心
一種可以令我沉澱或者反思自己嘅活動
好多回憶不論好壞湧上心頭
諗起啲尷尬野會想搵窿捐
諗起搞笑野會行行下好似個傻佬咁自己笑
諗起自己曾經做錯嘅野會默默歎一口氣
甚至諗起唔開心嘅野仲會眼濕濕
喺吉爾吉斯嘅呢一刻
食完飯行左好耐先返屋企
即使係首都，街燈都係寥寥可數
散著微弱嘅燈光
為黑夜再增添幾分寂靜同傷感
諗起自己獨自做Grad Trip呢個決定
(的確，額娘頗反對，因為佢真係好擔心我)
諗起之前對人唔好、講錯野
諗起自己唔理人感受 （果陣分左手無耐）
諗到好多錯誤嘅決定
自己就會係度諗 喺平行時空嘅我
可能無痔瘡宜家已經騎緊馬
可能同ex仲好開心甚至係一齊去呢趟旅行
好多自己胡思亂想諗出來嘅無限結果
好似Doctor Strange咁
好想問一問彼方嘅每一位平行時空嘅"施詩"們
你地過得好嗎係咪過得好過我
係咪我做嘅決定係錯




最近就係差唔多咁嘅感覺
好似自己就係不如意嘅事嘅始作俑者咁
點解會做埋啲咁嘅決定
依家想挽救都挽救唔到

最近先開始諗通
既然我都係其中一個時空入面嘅”施詩“
我應該要做嘅就係係呢個時空入面
做好自己、盡力做而無悔
可以控制嘅野有限，係人都會做錯野
做錯咗就認錯 唔好吝嗇道歉
盡力做返好好比人睇
始終自己係一個普通人

就算結果未必如意，起碼自己已經盡我所能
有做錯野會唔開心會灰
但係更加重要嘅係整理好思緒
唔好俾負面氛圍繫繞太耐
唔開心後悔都要有個期限

But don’t look back in anger,
I heard you say.

From Ocean - Don’t look back in anger




















今晚係留喺Bishkek嘅最後一晚
聽日就去攞VISA+飛去OSH (如無意外)
心情回復到當初香港屋企出發嘅感覺
忐忑不安 因為唔知前路係點
唔知聽日攞唔攞到VISA
飛到去點過關、過完點去Tashkent、上網點搞etc
畢竟喺吉爾吉斯因為身體抱恙
冷卻左當初旅行嘅熱情
宜家要重燃翻起，顯得有啲難度
不過人生不如意事 十常八九
從容積極面對各種困難先係重要
頂硬上埋呢2日就可以真正重啟旅程喇

有咩事心煩, 講出黎等大家開心分擔下

20180718星期二 天晴炎熱
重要嘅日子終於來臨！
就係再三拜訪烏茲別克駐吉爾吉斯大使館
今日終於係去攞VISA(掛?)
好辛苦啊大佬
如果大家有留意我之前有個post
係post左大使館工作時間
就係得星期二至五 十至一 三個鐘做野
所以為避免耽誤時間
我地朝早早餐都未食 九點幾就去到大使館門口
只不過已經聚集左大量吉爾吉斯大媽

10點搭正大使館外門正式開放俾人入去
純粹係counter個櫃面未開
我地年輕力壯行得快 排頭位
但係好可惜吉爾吉斯大媽根本就唔理
完全無打算排隊一個跟一個
瘋狂堆喺個counter面前
全部都係肥婆 而且啲衫又多
我企個位置係對正佢counter嘅窗口嘅正中心
所以佢地左右開弓兩邊夾過來
而我個friend同佢條女就做我嘅左右護法
一左一右咁擋住佢哋海量夾擊
我一直都只可以微笑唔係點呀打鳩佢呀？



有個夾我夾得好狼死
係咁好似想將我推離個窗口中心
我就來夾扁 終於俾左一個凌厲嘅眼神佢
呢個眼神 直接將佢英文能力嘅潛能爆發
笑笑口對住我講左句 "After you"

屌 我即刻忍唔住笑左出聲
夾我夾得咁爽又同我講after you
我遞完咪你遞囉夾我有分加？

突然之間 個俄籍工作人員打開左窗
一瞬間 我身邊嘅壓力突然增加左幾倍
喺我眼前出現左好多對手
同埋好多揸住左嘅護照係咁係到隊啊隊
務求自己係第一個
啱啱同我講after you嘅阿豬媽
隻手隊左喺我面前
我申下條就已經掂到佢本passport
過程中嘈到拆天 果到先15個人左右
我淨係記得條俄姐係咁講
罷噠殊知姐！罷噠殊知姐！罷噠殊知姐！
俄文來 Подождите 姐係 Wait 等等
因為場面完全可以用chaotic來形容

中間重要發生左一啲事
就係我個fd條女同人地鬥夾期間
懷疑有個呀嬸爭唔贏打鳩佢一兩拳
即刻喊出來 結果釀成小衝突
我自己都呆左

All of a sudden 大使館嘅啊頭出左來
我以為係主持大局，叫人排好啦
立即不由分說 將除左吉爾吉斯人之外
其他任何國籍嘅人趕曬出來係所有
當中包括英國，美國，法國，香港 (我地)
然後山埋左道門
咁宜家姐係點

我排得好地地 重要講曬俄文
呢度3本護照 of 香港, please
вот это 3 паспорта гонконгы , пожалуйста
咁都要趕我出來WTF
我上網都有睇
無咩事唔好去哈薩克同埋吉爾吉斯嘅烏茲別克大使館
因為果度啲人真係串過馬撚唔憂做
所以我本身都已經好恭恭敬敬咁
唔該前唔該後 好好禮貌
點知都俾人烹出來
你吹佢唔漲 因為呢到佢先係老闆
結果 我地幾個係出面吹水
我fd同條女俾緊幾個人安慰
而我就同另外啲人吹水分享行程
一邊講一邊等佢開門

其實我個心情開始崩潰
畢竟我呢個禮拜都經歷左咁多
如果你宜家咁樣作狀 turn down 我
我真係灰一世呀大佬


過左大約20-30分鐘左右
石Q終於再次打開門
原來入面已經處理好曬啲麻煩大媽屌你老母
之後我先可以遞交我地本護照check
佢攞左入去之後山埋左窗
跟住點？當下無人知 佢唔講 唔識俄文只可以乾等
如是者已經差唔多11點
跟住佢出翻來 手渣一張張入數紙
然後讀名嗌人攞去交錢
因為烏茲別克VISA係按日子批嘅
有14日或者30日 佢係睇你行程俾日子
所以suppose我plan左10日左右
佢grant到我至少14日
讀啊讀 終於讀到我個fd同佢條女
然後 就沒有然後無我份
跟住我走埋去問佢
: I don't have one, why?
: What is your name?
: see see
: When you submit to me?
: last last Thursday 5th July
(不發一言 走去摷佢疊application form)
我發覺佢只不過係將application forms 按順序排好
根本無(應該係)所謂嘅一個禮拜process

: (found it) When you go Uzbekistan?
: (已經有啲火氣) Tomorrow!
oh...wait

跟住佢又山窗走左 過左5分鐘
終於出翻來 遞左張入數紙俾我
: yours




屌你老味 九成之前打比你果陣
根本就miss左我果張
知唔知我等得幾辛苦啊
知唔知浪費曬我啲時間
不過算啦你肯比我就已經好好

果下真係好想喊


交錢過程好簡單 就係去KICB銀行
用55USD 繳費 收美金唔收SOM
但係收20SOM手續費
入完數攞翻入數紙翻去
就可以攞翻癡好左VISA嘅護照喇




翻到去遞入數紙都係多人到傻
又係度爭啊爭 所以我索性佛系
等佢地遞曬我先遞 反正我今日都會有






佢逐個讀名 讀到我 攞翻本護照睇到貼好嘅VISA
呢個VISA真係難過取西經 千呼萬喚始出來
我終於可以離開吉爾吉斯喇屌你
仲要係批咗30日不過其實10日都差唔多
因為仲有行程要趕
早前已經一早買好左飛
八月中芬蘭返香港
所以唔可以耽誤時間

好多人唔知
其實肛門係滿佈神經線
好簡單 你腸胃炎痾到損咗
其實傷口好細 但係
每一下出力 你都會痛到撕心裂肺
更何況你同事老豆動刀祝佢早日康復

你個fd條女真係遭殃, 真係畢生難忘.
印像中, 中亞d肥師奶著到花哩碌, 又包住個頭.

幾好笑

夠鐘走人啦~

所以盡食盡試自己未食過未做過嘅野

其中一樣我最抗拒嘅
就係一直以來俾人彈到飛起嘅Квас
一種利用黑麥麵包發酵而成嘅碳酸低酒精飲料
一直都比人話難飲程度可以同沙士媲美
當然一切都係從網上面啲人嘅評論得知
我自己實質就未試過 聽完已經好淆
不過諗諗下 又大麥又發酵又有氣
咁咪姐係其實同啤酒無咩分別？
我啤酒都無問題咁Kvass都無問題啦！

呢種飲料其實喺東歐同埋中亞國家已經存在左好耐
首次出現講緊係公元989年
邊度有得買？基本上所有超級市場、雜貨店、同埋最常見就係街上面推車仔
今次喺吉爾吉斯，我就係路邊見到
呢個Шоро 嘅牌子喺吉爾吉斯係好出名嘅飲料品牌
賣緊幾十種唔同嘅飲料 甚至有啲係佢地自己研發

通常都係一個大媽然後開個檔口
抱著呢3大桶野賣
有200ml 400ml 同埋 1L嘅選擇
3款唔同價錢 大約係15 25 60SOM咁樣


我都係抱著一試嘅心態去買左杯200ml嘅
顏色似好濃嘅凍檸茶 好正佢重要係凍嘅
見到唔少人買 夏天飲翻杯 消暑必備
飲落去屌呢個咪啤酒
不過比啤酒唔同嘅係 佢有小小甜
同埋真係好香麥味
Kvass理應係有一絲酸味 因為發酵
不過因為冷凍左嘅關係減弱左酸味
飲起上來更加容易入口正呀喂

話咁快 就已經下午5點
我已經買好左1945嘅飛機
係時候要離開Bishkek
一個禮拜嘅時間要過去喇
再次同我fd講拜拜不過應該就唔會再見
因為大家路向唔同 佢去完塔吉克再去烏茲別克果陣
可能我都已經走佬 加上我係一路向西北
從Tashkent一直去到Nukus
所以今次一別 就係香港再見
願祝大家旅途愉快

從Bishkek市中心去機場 有架380嘅巴士
收費40SOM 姐係5蚊左右
距離市中心大約26公里 都只係5蚊車程
好平同埋成車得3個人連埋司機
一路都無咩紅綠燈 長驅直入機場
30分鐘就已經開到

今次係我第一次去旅行搭內陸機
果陣仲係鄉下仔 唔知流程係點
加上喺呢啲山卡拉地方 第一次咁樣俾左佢
不過好在都醒目 都同個司機講Domestic, Ош
因為國內同國際兩邊分得幾開
司機好好人 會揸到埋站再幫你抽件行李出來
而唔係打開行李箱你自己動手
點解可以咁好人








第一次搭內陸機 企喺counter面前
去到起飛前一個鐘佢都未開放check-in
開始心諗 會唔會係我自己去錯counter或者點
果陣又怕醜 又唔敢上前問
因為俄文半桶水都無
離起飛50分鐘 終於開counter
排滿曬人喇已經 每個人都一大堆行李
而我就慣常做法 大箱裝細箱裝衣物
一件過

Bishkek機場IATA個code係FRU而唔係BIS之類
一個原因係BIS比美國Bismarck用左
另外就係...其實Bishkek以前個名叫做Фрунзе
中文譯名好型 伏龍芝英文翻譯就係Frunze
所以FRU就係咁樣得翻來



因為呢啲細機仔 加上呢個機場真係細
唔係好多登機橋
所以都係要搭接駁巴士去停機坪上機
大家一眼見曬 佢係得2條登機橋





今日搭嘅係TEZ JET
機型BAE146 上網查一查原來已經飛左24.8年
對唔住我真係唔識 但係咁多年service
比我嘅感覺就係 叫啊爺揹你過河咁款 相當吃力
不過佢嘅上漆嘅呢個Pattern好靚
開始有啲伊斯蘭feel係咪迎接我進入烏茲別克







成架機無論係座椅定係行李架
只要有郁佢 就會發出啲it it聲
俾我嘅感覺好唔穩陣 好想快啲落機
今次呢架機滿座 隔離坐住一個吉爾吉斯族大肥佬
逼得我好緊就來郁唔到




今次自己又做左啲犯賤野
事關之前都講過 我係每日都隨身帶備至少1L水
今日我帶左1.5L 全日飲左都唔夠300
剩翻1200左右
突然唔知點解個腦係咪short撚左
上機前覺得dispose會好浪費水資源
竟然直接喺過檢查果陣 成支 飲 撚 曬
條友睇到我呆左因為一口氣灌曬成支水
我當時個腦靜係覺得好佩服自己 咁健康飲咁多水
大家都係呀 最近夏天炎熱 見字飲水
好喇 咁我自己臨上機之前都去左一次廁所
費事急尿啦係咪

點知 我真係正一戇鳩鳩
1200ml 水飲完 架機Taxi我就已經開始好急尿
起飛未到安全位置就已經隱隱作痛
本身自己都覺得 忍下啦好快落機姐
以往慣常飛行時間係25-35分鐘姐嘛！
點會忍唔到！
5分鐘之後...
法官大人，我忍唔到我真係要爆
見到安全指示燈熄滅 即刻叫個肥佬借借
我講曬俄文唔該唔該我要去廁所
佢一臉疑惑地望住我半個鐘都要去?
對唔住我係垃圾 真係要去
呢個故事教訓大家 搭車搭船搭飛機前
除左記得去廁所之外 重要唔好做傻事飲咁多水
如果全程都著住seat belt燈我應該即場瀨尿

去完即刻舒服曬
之後見到空姐推野出來派
屌你又係派水比人飲
我即刻耍手擰頭 唔洗啦見過鬼怕黑



1952起飛 當地時間2029
抵達吉爾吉斯南部城市Osh

抵達Osh嘅時間成8點半
太陽都已經落曬山 半個鐘內一定成個天都黑曬
一落機第一時間 - 再去廁所
真係太低估1200毫升水嘅威力
因為長期 hydrated 所以1200毫升裡面
基本上8成都當係多餘水分






出到來機場 所有機場巴士喺7點就已經尾班車
8半根本無車 所以只有Share Taxi呢個option
我見到隔離有1對加拿大情侶
就同佢地講 Hey I'm going to Osh guesthouse see if we can share the taxi? 因為佢地係backpacker所以我估佢地都係去hostel而唔係去hotel

點知佢地真係"同路人" 就一齊去bargain架車翻來
初初話3個人300SOM 個加拿大姐姐真心勁
企硬250價位 對方都唔讓步 結果佢用左一招高招
就係徑直走向另一架車條的士佬突然180度轉變即刻話okok
睇來我講價嘅造詣重要再高啲
之後仲約埋一齊食個晚飯
都係講下大家點行
不出所料佢地都係去塔吉克嘅勇士
柏米爾高原 由於高海拔
所以都容易有高山反應
唔係咁容易征服嘅地方
是日晚餐 羊肉塊+薯條 290SOM
劣食 不予置評唔鹹無味道




今晚喺Osh就純粹訓個教
第二朝啟程去Tashkent
去到間Hostel 竟然無冷氣
淨係得3把風扇吹曬成個dorm我就知今晚好難受
雖則係男女shared dorm
但係全部男人女人都除剩最底果件來訓
我都頂唔順 凌晨係咁熱醒
電話差電都差到水滾咁
訓得好差好差 朝早7點起身沖涼
去到8點離開hostel精神差到一個點

無冷氣 vs 好勁暖氣

好鍾意飲沙士，但好唔鍾意飲忌廉。
我之前俄羅斯轉機返香港，坐中間排櫈俾兩父子逼埋一邊。兩件又肥又高大，米9都有。佢地一望個位，未起飛已經問空姐有無得調位，空姐唔俾佢地調，佢地坐低個膝頭都頂住前面個位
起飛之後個老豆唔知鼠咗去邊，個仔瞓到死豬咁，隻腳叉埋黎我個位
周圍明明好full，真係唔知佢老豆點搵到位閃咗去。

樓主唔用南北公路去osh簡直係損失 沿途靚到一個點
不過生痔瘡又無計

去邊境最直接都係搭小巴去
始終10SOM 1蚊雞就到
唔需要用到10蚊搭的士




同上次哈薩克同吉爾吉斯接壤嘅邊境一樣
路嘅盡頭就係邊境
有種"吉爾吉斯終結於此"



好似詭修女咁唔好嚇親純粹個感覺似


呢個關口可以話係絡繹不絕
因為每日都會有大批烏茲別克Fergana嘅居民同埋Osh嘅居民往來兩邊地方經商或者購買生活所需，所以係一個超級繁忙嘅口岸，私家車同貨車都係度排長龍等過關，而我盡最後一刻上網通知老母一日之後再見因為我諗去到塔什干都差唔多夜晚

用唔曬嘅吉爾吉斯SOM可以喺關口換曬佢
我大約果一刻仲剩翻大約2500SOM就一次過換
可能有人問: 唔驚關口換比人劏咩
因為呢度唔換 入到境之後
銀行通常都只係同你換美金同歐羅
所以有咩就喺度清曬佢 而且匯率唔算低

烏茲別克貨幣名稱 都係叫做SOM
只不過此SOM不同彼SOM，價值唔同
大約係1KGS : 113-115 UZS (KG係吉,UZ係烏)
2018年嘅7月 用港紙計算就係1:1003左右嘅UZS
換而言之，UZS要換算翻做港紙直接減3個位就得
瞬間覺得唔洗再用腦！

過關嘅程序 - 必須必須SKIP曬所有人龍！
留意翻 呢度唔係做強國人啲行為打尖
而係呢2個關口每日都有大批邊境local過關
佢有兩條隊
一個就係紅色With luggage
另一個係綠色Without luggage
我心諗 with luggage 一定唔係我排哪來的自信
因為我覺得係講緊啲要申報嘅物品
我其實拖曬喼咁款點會唔係with luggage
然後我就側側膊咁樣入左去
過關最緊要有自信

過關過程大約5分鐘 好爽快
因為佢見到係外國人 又見到中文passport
就好熱情咁係咁 "你好！你好！"咁樣笑住對我
我不知所措 我淨係知想快啲過關
5分鐘就過完呢個關
佢仲親自喺位度走左出來 目送揮手
個口一路講住"你好你好"示意我可以走

輕輕鬆鬆過完吉爾吉斯邊境
吉爾吉斯 完 歷時15日
4/7/2018 - 18/7/2018

我呢度影嘅係出境之後嗰邊嘅相
所以寫著WelcomeДобро пожаловать!



下面呢個就係出境前嘅 (網上圖片)
Have a nice tripСчастливого пути!



都清楚見到我岩岩講到綠色同紅色通道
上網搵到張再清楚啲



行大約1分鐘就來到烏茲別克嘅入境位
呢到堆積嘅人，無錯係用堆積
因為在場大約200人堆左喺個鐵閘面前
就咁睇你以為 個邊境關閉左完全過唔到
啲人大大件貨，有冷氣有雪櫃咁樣準備抬翻去烏茲別克
而我一個旅行者點過
突然人群中有人發現我係外國人
好熱情咁叫我同佢行
因為佢幫我手叫個邊境人員過來幫我開門
得救了 外國人嘅待遇就係直接開門
而佢本身打算同我一齊入 因為佢做左好市民HAHA
結果佢都係俾人拒之門外

佢地排嘅counter係邊境居民counter
而外國人係有特殊待遇 所謂嘅"快捷通道"
只需要示意一下邊境人員
同埋我嗰個突出而鮮明嘅笨重行李
佢就會瞬間開閘俾你極速通過出境手續

仲好好咁安排我直接入去入境大堂打尖
成個過程大約5分鐘
我就已經出左境
根本唔洗很傻很天真咁排隊

終於到達烏茲別克！
OQ YO'L 烏茲別克文
寓意係Bon Voyage!

過關之後同吉爾吉斯造成最最最鮮明嘅對比
因為一出來就已經見到細路執垃圾
俾吉爾吉斯沙漠化 而且環境惡劣
到處都係垃圾...感受到烏茲別克真係好窮



我咁鍾意陸路過境嘅其中一個原因
就係可以親身感受真正踏入新一個國家
果種視覺同埋文化衝擊
唔講以為自己係咪踏入左北韓
之後慢慢發覺 烏茲別克真係真係好窮...

出關之後就會比一大班人圍著 係咁叫Tashkent
的確我嘅目的地係tashkent
但係上網睇人話邊境去tashkent嘅車都好貴
成100000SOM 100蚊
建議話先去邊境城市Andijon 到時再轉車去Tashkent
會平好多 (幾十蚊) 所以我直接skip曬所有Tashkent嘅人
然後搵到個問我係咪去Andijon嘅
一直重複"必甩柒!必甩柒!必甩柒!"
俄文 пятнадцать 意思係15
呢度因為方便計算 後面3個零都會省略
15000SOM會講做15 仲好 一聽就知道係幾錢
而且輕鬆兌換港幣價格 都係15蚊haha
本身諗住拗12蚊 拗唔贏 始終上網都係話15蚊
所以就乖乖地上車啦！

大約20分鐘左右先上滿人 開車
車上面幾乎全部人都係講烏茲別克話
得一個啊嬸同我講俄文 話佢地唔係好識講俄文
問我邊度來 一陣邊度落
大約10分鐘終於進入Andijon Viloyati <--Andijon地區
入市區都要過一過海關 不過就輕鬆嘅
邊境都有巴士去Andijon
不過太local同埋車牌淨係得烏茲別克文
難以明白佢目的地係寫咩



早前亦都講過 當年烏茲別克地圖不通用
講緊係Google Maps 同 2GIS 都唔work
啱啱上網試過 Google Maps宜家有記錄到塔什干交通喇
其他城市依舊完全不明...



烏茲別克嘅字體轉左幾次
1920年前都係用緊波斯體文字 姐係右至左
1926年改用拉丁字母(英文咁)
1940年蘇聯統治下改用西里爾字母(俄文果種字母)
1993年改翻用拉丁字母

所以宜家其實都仲有唔少嘅標誌
甚至報紙都係用緊西里爾字母表達烏茲別克文字
呢度就係西里爾字母版嘅Bon Voyage,都係讀Oq Yo'l

大約30分鐘之後就到達Andijon市區
於是我就隨便搵左個地點
然後再問佢邊度有 taxi to Tashkent
全車一臉疑惑，心諗點解唔係邊境上車
不過我都要啲補給嘅
於是佢就渣到去個位置同我講
呢堆都係去塔什干嘅的士佬
佢停靠嘅位置正正係Anjidon嘅巴士站
Andijon Avtovokzali
之前提及過автовокзал係汽車站(巴士)
呢度都係借用詞 所以都有小小字係睇得明 (如果你識啲啲俄文)




由Andijon去塔什干有3個options
巴士 Shared taxi 同埋火車
巴士算係最唔可靠嘅 因為中間有停站同埋班次不明
作為一個入門鐵路膠 其實都想搭
始終你搭過shared taxi就知其實長途係幾辛苦
尤其係你一個唔好彩左後座中間
真係逼死又焗死

不過好可惜 2018年Andijan啱啱先開火車站
一日去塔什干嘅車頂盡得3班車 6點 12點 3點
我去到果日咁啱得6點同3點2班車 GG
唯有搭黑的

Andijan去Tashkent全程大約350公里
中間需要行無數山路 火車亦然
所以車程來講 兩者都需要5個半鐘左右
價格方面 2018年火車價格64000SOM 64蚊
的士就45000-50000SOM 45-50蚊
而宜家火車已經升到84000-110000SOM 好貴

係附近先試下洗錢
因為暫時手上有400蚊港紙左右嘅錢
買左個Somsa (姐係samosa) 三角形酥餅
類似牛角包不過佢3個角
我用俄文問佢幾錢 佢係黑人問號
因為Andijon唔係好似Tashkent, Samarkand呢啲大城市
所以唔識俄文係好正常
用手勢佢都係唔明 結果有個後生仔識英文
幫左我解圍 之後佢同我講
Welcome to Uzbekistan
好WARM啊屌你btw個somsa 1蚊個好抵屌
之後就去超級市場買左支水上路
見到一支同葡萄適一樣design嘅汽水盜版嚴重



上車之前見到一啲相信係
好耐以前流落來嘅關卡之類嘅拱門
拱門都整到咁靚 重要係邊境城市
好難想象市中心或者景點會靚成點



所以我加緊步伐衝去的士站
初初佢一開就獅子開大口55蚊
結果我企硬45蚊 佢就同我解釋"Petrol Petrol"
屌你你做得的士司機就自己入油啦
做生意唔係要人地貼埋本俾你呀嘛
同埋上網都見到攻略話
唔洗睬佢呢啲petrol bullshit 記得企硬

於是最後45蚊成交！啟程！

我都係osh過境
我感覺係烏茲別克富裕過吉爾吉斯
第一觀感係路面
烏茲別克嘅行車路靚過吉爾吉斯好多
另外工業化方面都強過吉爾吉斯

我去嗰時仲有黑市換錢
我去到Andijon先唱som
邊境搭車去仲要比美金