大約一點半左右到HOSTEL
第一時間真係走去沖個涼先
一來已經一日無沖涼,癡立立好辛苦
二來真係好熱好熱,啲皮膚好乾,可以順便濕潤下都好
吐魯番最出名就係火焰山
所以沖完涼出來就問HOSTEL個人
結果個HOST話
無架
無車架
無巴士去架
要行程嘅話可以係我呢度出發一日團
share taxi 85蚊一個人
去曬成個吐魯番嘅景點
不過最快都要聽日出發
我心諗我聽日一早就898喇喎,無乜可能慢慢搭,而且大陸嘅景點唔係個個都好stunning。自己試過去一個5A級景點嘅公園,點知仲衰過九龍公園
搞完一大輪再涼翻個身之後,望一望個表已經3點。我問佢咁可以做啲咩好,佢話叫我去附近嘅吐魯番博物館「那裡也挺好玩的,可以去一下哦」
咁好啦,信佢
反正行過去都只係1公里
好熱好熱,當熱到40幾度嘅時候,身體反應已經同30度嘅濕熱一樣,汗流浹背,同宜家個天氣一樣,瞬間變落水狗 。
而且真係大晴天,遮蔭好重要,特別係入室內,如果唔係宜家先第二日就中暑會好柒
所以我加快腳步去。到達門口又係安檢,佢地仲設有閘機,要拍身分證入,我唯有show回鄉卡比佢開閘。入門口之後再去詢問處攞門票
「香港人,來旅遊的嗎?」
老實講,就算我係黎炸鳩左個博物館或者洩密,我又真係會咁坦白咩?個人估應該係可能防範外地記者採訪?早前BBC中文攝製團隊都有深入再教育營,不過都成日比人阻住曬,甚至成個採訪人地係排好劇本
不過諗多無謂,都係最好老實、平心靜氣講,否則隨便的你返去行政拘留不成問題
呢度比我嘅感覺真係好嚴。
屌 入到去 相機都費事舉起
一黎,得一層,上層裝修,但偏偏上層講得比較多歷史。有個遺址嘅頂幾靚就影左,有啲似莫高窟嘅頂咁colourful
二黎,佢地有展品係出土乾屍,我自己覺得掘翻人地出黎已經係大不敬,如果你仲影相會唔會再過份小小
Anyway 可能你話
一切為考究歷史用途
不過我自己覺得唔係太好,死者為大所以我都係無影
因為個館開放嘅展館實在太少,我好認真咁睇都睇到9個字,都真係佩服自己
但我一路都覺得,無理由呀,吐魯番最出名嘅景點就係火焰山,無咩可能無巴士去。而且依家係算係旺季+夏令,日照咁長,通常都會開放好耐,所以我決定去巴士站博一博,睇下(仲)有無巴士可以去得到。
門口棟左2條友問我去哪?我一開始以為係啲保安就如實講目的地,結果佢地只係黑車佬講返同Hostel嘅人一樣嘅嘢,唔同嘅係價錢由¥85變咗¥200。礙於佢地好似好想欄住我,我決定扮入去搵廁所先入到去
——安檢and安檢sssssssss之後——
(新疆個個人都講維吾爾語,個感覺好似去左土耳其咁,因為維吾爾語係突厥語其中一個語系嘅分支)
售票窗口嘅呀嬸話,有得買去,架車中途停火焰山,
但係無得買番。
屌呀?
20幾公里喎師父,無得翻?
佢話我需要喺落車嘅地方對面等車
等幾耐?唔知
容唔容易上車&有位?唔清楚
簡單來講 - 緣分到了,巴士自然來
不過我諗既然一場黎到
4點坐到11 12點仲悶 去啦屌 頂硬上
巴士15蚊
終點站係鄯善,離吐魯番130公里
巴士好焗,即使開左冷氣都係焗
熱空氣真係有種窒息嘅感覺
唔好中暑死呀!!!!!!!