喺當年東亞地區入面比香港好景嘅只有日本,嗰陣時日本仲喺泡沫經濟嘅最高潮、憧憬住「日本世界第一」,日本發達嘅經濟水平同埋社會發展程度支撐起佢哋強大嘅娛樂文化產業,再加上日本人本身有鎖國性格,令佢哋可以抵擋香港文化傾銷之餘仲可以反過頭來傾銷返香港。
但就算係咁都好,當年嘅香港文化仍然有影響到日本嘅痕跡:譚詠麟會上紅白、張國榮會喺東京歌謠祭登台,然後當年嘅日本動漫都周不時攞香港做背景,例如《機動武鬥傳》大量加入香港電影元素,入面嘅香港首相「黃潤發」係參考《英雄本色》入面周潤發嘅造型,仲有特登寫咗廣東話插曲。
當年日本同香港文化互有攻守,雖然最後日本略勝一籌,但香港以一個城市嘅文化輸出可以去到呢個程度,已經算雖敗猶榮了。