發現身邊好多朋友計劃緊移民，其實真係好唔開心

我係由舊登過嚟連登嘅，一直都係CD-ROM，第一次發文可能1999，唔好意思。

我唔係香港出世，中學先喺大陸落嚟，第一次聽到六四呢件事嘅時候真係好震撼，亦都因為咁開始留意政治，開始每年去維園；到旺角魚蛋，自問唔係好叻嘅人，當時都有啲不解，但好快解開和理非心結，開始理解以武抗暴嘅理念。

畢業後我做到自己理想嘅工作，人工唔高，但好有意義，香港真係我嘅家，呢度有我最知心嘅朋友，最敬重嘅老師，最欣賞嘅同事，最想成為佢嘅前輩；仲有中學上體育堂要跑嘅城門河，唔開心時會搭嘅渡海小輪，仲未去得曬嘅郊野，雖然每次露營見到啲垃圾就好撚躁，但我真係好鍾意香港。

「我真係好撚鍾意香港」呢句嘢係我第一次打，因為我好驚自己並唔係真係咁鍾意，如果有一日走咗會對唔住呢句說話。

近來狀態真係好差，自問已經係好樂天嘅人，但每朝起身見到啲新聞真係好辛苦，我真係唔想走，點解要我離開自己屋企？

最近發現身邊好多人都計劃緊移民，我個心好慌，「其實會唔會得我一個咁戇鳩留低？」好難過，好想叫佢哋唔好走，但我唔敢講，點對得住人哋嘅人生？想呻呢樣嘢，但唔敢同身邊任何一個人講，因為唔想比壓力佢哋，我知離開都係一個好困難嘅決定。

但我真係唔想離開。