有冇人對泰國歷史有興趣？

留名

樓主終於返黎啦
D中國人咁中意ff，人地寫係金到就以為人地好尊重佢地，自以為是

有文，推

響同一時間，響大城發生咗件大事。荷蘭東印度公司，為咗逼使泰王那萊容許佢地壟斷泰國既皮草貿易，用艦隊封鎖咗成條昭拍耶河。呢件事響泰國歷史書只係輕輕帶過，畢竟畀人用艦隊封鎖首都，真係奇恥大辱。

最後，荷蘭東印度公司得償所願，得到壟斷皮草貿易既權利。為咗禁止泰王走數，兼且壟斷中國貿易，荷蘭東印度公司唔准中國人登上泰國既船（如有違者，架船響公海就會被東印度公司攻擊）。最後，荷蘭東印度公司要求泰王將犯事既東印度公司職員交返畀東印度公司，唔准泰王私自處理。

當然，最後嗰條，東印度公司預咗泰王會走數。走咗數，東印度公司都吹泰王唔漲，因為東印度公司根本冇諗過同泰國打仗：一，大城唔響主要航線之上，冇乜戰略價值（所以當年西班牙冇殖民泰國就係噉解）。二，泰國有好多唔近海既腹地，東印度公司唔可以單靠船堅炮利打贏場仗。三，最重要既，同泰國打仗冇錢賺。東印度公司雖然富可敵國，但係本質上都係公司，依然想和氣生財，唔想打打殺殺。

東印度公司或者覺得自己都已經冇用槍同刀劍脅逼泰王，但係泰王梗係覺得自己好冇face，喪權辱國。

所以1666年，泰王那萊聯同法國耶穌會，響大城以北50公里既羅渦，起咗個新王宮，因為大城畀佢既心理陰影實在太大。再過多幾年，當英國同法國都響昭拍耶河口建立炮台既時候，泰王同東印度公司簽落既不平等條約，就噉無聲無息，跌落歷史既垃圾堆。





那萊王宮遺跡

有文呀，推

輕輕一推

響繼續講泰國歷史之前，我想再花篇幅講下荷蘭東印度公司。始終，泰國歷史只係泰國歷史，荷蘭東印度公司響世界史都係非常出名。

1602年，荷蘭既商人深感英國東印度公司既威脅，建立咗荷蘭東印度公司。為咗籌集初始資本，荷蘭商人決定上市集資。上市集資，係荷蘭東印度公司首創既。

既然係首創，噉邊度搵個市黎上呢？冇，於是佢地自己開咗個市，就係阿姆斯特丹證券交易所。歐洲以前就有證券交易，但係嗰D證券並唔係響專門既市場交易既，嗰D市場可能需要處理埋期貨合約，商品等等既交易，所以效率唔高。相反，阿姆斯特丹證券交易所專門做股票買賣，效率就高好多。減低咗交易所需時間，就可以做D當年荷蘭人同依家香港人都鍾意做既事：炒股。





當年嘅阿姆斯特丹證券交易所



上市集資，做完上市之後，就係集資。荷蘭東印度公司向荷蘭六個城市集資，籌得約六百四十萬荷蘭盾。一個荷蘭盾入面大概有四份一兩白銀，六百四十萬荷蘭盾即係大約一百六十萬兩。一百六十萬兩有幾多？1602年，中國仲係明朝萬曆年間，一年收入大概三四百萬兩。


咁多錢用黎做咩？征服印尼，壟斷大部分歐洲香料貿易。好多西餐香料，好似黑椒、肉豆蔻（nutmeg）等等，都係來自印尼。

想問邊到可以搵到泰國歷史書睇, 睇完巴打d文搞到好多興趣自己了解下

荷蘭東印度公司咁多錢最尾都係輸比英國東印度公司

果時炒燶股票 係邊跳樓

荷蘭東印度公司咁多錢最尾都係輸比英國東印度公司

因為呢d公司最終都係代表佢地國家

繼續

果時炒燶股票 係邊跳樓

可以跳海掛

荷蘭咁有錢，自然引起唔少人眼紅，其中一個就係法國國王，路易十四（Louis XIV of France）。

路易十四（1638 – 1715），又稱路易大王，「太陽王」，四歲即位，七十六歲駕崩，在位長達七十二年。直到而家，佢係歐洲在位時間最長既國王。

太陽王二十歲既時候，正值年少氣盛，血氣方剛既年紀，佢同法國宰相，馬扎連奴樞機主教，個外甥女拍拖。不過太陽王個老母就唔多鍾意，因為佢已經幫個仔諗好婚姻大事：太陽王要娶佢姑姐同舅父個女，即係佢表妹，瑪莉亞（Maria Theresa of Spain）。點解呢？因為父幹囉：瑪莉亞個老竇（即係太陽王個 舅父），係西班牙國王。

結果呢，響1660年前後，馬扎連奴樞機主教就要將佢外甥女瑪莉（Marie Mancini）帶走，走到意大利，將佢嫁畀一個親王，羅倫佐．高隆那（Lorenzo Onofrio Colonna）。傳説呢個親王，洞房夜之後就周圍唱佢老婆響洞房之前係處，搞到羅馬城個個都知道路易十四係冇扑過佢初戀情人。自此之後路易十四就秉承住「有食唔食，罪大惡極」既原則，佢老婆就真係慘。






Marie Mancini




Maria Theresa of Spain



總之呢，太陽王對段政治婚姻好唔滿意。當年西班牙應承落既五十萬粒金幣做嫁妝，去到西班牙國王駕崩嗰日都冇影，真係撩起咗太陽王把火。於是佢話，佢老婆瑪莉亞係西班牙國王既大女，按照比利時傳統，瑪莉亞有資格繼承比利時。比利時係瑪莉亞既財產，瑪莉亞既財產即係太陽王既財產，太陽王既財產即係法國領土，噉樣法國軍隊進駐「法國領土」比利時，西班牙人唔應該有任何意見啦！

實際上，西班牙人好有意見，於是就打仗啦，史稱「遺產戰爭」。法軍攻陷大半個比利時，但係西班牙人開始聯絡英國、荷蘭同瑞典，希望結盟打法國。

響呢個moment，荷蘭做咗一個決定，就係背棄多年既盟友法國，同西班牙結盟。真係荷蘭銀行支票！有人話，荷蘭對法國既海上活動感到擔憂，希望挫下法國既銳氣。又有人話，法國佔領比利時，荷蘭就要同法國接壤，好唔理想。

但係呢D都唔係背叛盟友既理由，尤其係一個咁強大既盟友。今次太陽王蓄勢待發都射唔出，都係因為荷蘭響背後捅一刀！太陽王心諗，當年荷蘭可以脫離西班牙獨立，都係因為法國幫拖，荷蘭呢班新教徒真係唔可信！




打完「遺產戰爭」，法國多咗淺藍灰色既領土

遺產戰爭過程。紫色係法國，深黃色係西班牙，橙色係荷蘭。

太陽王好憤怒，佢決定要打荷蘭。

首先，佢課咗好多金畀英王同瑞典國王，於是佢地放棄同荷蘭結盟。然後，佢又課咗好多金畀烈日主教。睇返上面幅圖，Maastricht 既左手邊係有一忽米黃色既地，嗰度就係烈日主教既領地啦。太陽王課咗好多金畀烈日主教，烈日主教就容許法國軍隊響佢既領地隨意走動，噉樣，太陽王就可以穿過比利時，直接攻擊荷蘭。

1672年，荷蘭史稱「災難年」（Rampjaar），荷蘭被法國打到阿媽都唔認得，荷蘭國會大議長被暴民行私刑殺死，佢既肉重被暴民燒嚟食。荷蘭國會一直阻止「橙國威廉三世」（William III of Orange）繼承荷蘭執政之位，但係「災難年」之後，荷蘭國會冇人支持，威廉三世成為荷蘭執政。

之後，神聖羅馬帝國皇帝同西班牙國王都過嚟幫拖，但係冇咩用。戰爭拉鋸咗五六年，最後威廉三世娶到約克公爵（英王個細佬）個大女，太陽王驚英國會掉轉槍頭，先肯停戰。

呢場「法荷戰爭」打完之後，個個見到太陽王畀成個西歐圍毆而不落下風，都承認法國係歐洲第一強國。冇人夠膽搞法國，實在太好啦，噉樣法國可以安安靜靜搞下經濟。

例如話，以前法國專門經營北美洲，忽略咗歐亞貿易，係咪應該急起直追呢？跟住太陽王就聽聞，有個東方既國王，對耶穌好有興趣……

lm

有文了

終於等到新文

仲有無文？樓主等你好耐