蘭若生春夏
2020-06-26 12:24:41
考完試之後天氣就突然涼咗好多,話晒都已經十二月中。
冬季嘅校服係一件白色恤衫配條深藍色嘅背心裙,相比起夏季薄切切嘅白色一塊布,真係好好多。
我都唔記得自己幾時開始會咁在意。
到咗對卷嗰幾日,我同阿怡一份份卷咁比較,發現大家成績都算係咁,都總算鬆咗一口氣。
「係呢,一直都係我返去屋企,你駛唔駛返去睇下。」
「唔駛啦,我冇你咁痴你阿媽,聽你講就夠。」
我即刻扁埋咗個嘴:「咩喎,痴佢好失禮咩。」
「係係,唔好意思囉。」
佢敷衍完我之後佢就話去搵Friend傾計。
因為係對卷而且就快放假嘅關係,其實呢幾日都好自由。
之後我就見到小琪,佢兩隻手縮咗入衫袖入面,細步細步好似細路仔咁行緊過嚟。
「好凍好凍啊~」
「係啊,突然好凍。」
「阿怡你唔凍咩?」
「我?OK啦。」
「畀我摸下。」
佢講完之後忽然將兩隻手伸咗出嚟,捉住我隻左手,我突然Feel到一陣冰冰涼涼嘅感覺,佢隻手真係好凍啊。
「係喎……真係好暖。」
我咁算唔算同佢拖咗手?不過我已經無以前咁緊張,仲將隻擺埋隻右手係上面。
「咁樣仲暖。」
「嘻嘻~」
望到佢嘅笑容,我突然覺得咩都冇所謂啦。
「哎也,乜兩位小姐感情咁好啊。」
阿嵐手上揸住疊通告,派到嚟我地嘅位置。