第?節—大姐姐與遊樂場(上)
今日我著住T恤、短褲,白色嘅懶人鞋咁出門口,短褲當然唔係一般女仔著開嗰種貼身,而且露出半隻大脾,仲要極之短嘅熱褲,而係褲管超大,可以放到兩隻腳,褲腳覆蓋到半膝頭嘅短褲,果然,咁樣著先係最舒服。
阿怡第一眼見到我,就皺晒眉頭,一副難以置信嘅表情咁望住我:「哇,你搞咩呀?小學生咩!小學生而家都識襯過你。」
「你咪理,我鍾意咁樣,邊個要著嗰啲衫。」我唔服氣咁答。
「但你件T-Shirt係女裝嚟㗎喎。」
「吓!?」我低頭檢查,但無論點睇都睇唔出有咩唔妥。
「Cutting都唔同。」佢邊扯我衫袖同衫尾,「個袖闊咁多,版型又咁鬆。」
等我仲以為,只不過係大件少少嘅T-Shirt……
阿怡忍住笑,只係個用鼻吱咗一聲:「服咗你,反正今日去嘅地方你咁著又啱啱好。」
「到底你要帶我去邊?」我係車上不斷問佢,車嘅路線又係我唔熟嘅,我完全估唔到,但佢都係唔肯答。
但係當接近目的地嘅時候,我從車上大大隻嘅玻璃窗已經望到巨大嘅摩天輪、過山車、同埋纜車,原來佢要帶我嚟遊樂場。
屋企得返我同阿媽之後,我就兩年都無嚟過遊樂場玩,雖然我真係好想嚟,但係如果係同阿怡嘅話,真係可以好好享受咩。
一落地,只係係大門外嘅水池就已經感受到歡樂嘅氣氛,我地買飛入到去之後,阿怡拎住地圖問我:「去邊度先?睇熊貓?」
嚟到呢個公園,去睇熊貓好似一定例行公事一樣。
係館入面大家只係係「之」字型嘅路上咁樣迫埋一齊,後面嘅人根本唔係好睇到玻璃入面嘅畫面。
直頭終於行到去玻璃面前,呢團黑色溝白色嘅毛茸茸好似人一樣咁,肚皮向天坐係個斜坡。
佢不停將草地上嘅竹葉拎上手,用個鼻聞啊聞,然後又掟走咗,直頭搵到啱心水嘅竹葉,就兩手捉住,拎將部份嘅葉咬出嚟。
然後佢就單手揸住咬咬咬咬,用完右邊嘅牙咬就用左邊嘅牙咬,用完左邊嘅牙咬又用右邊嘅牙咬,個下巴係咁郁下郁下。
「啊……哈……」睇到呢幕嘅我忍唔住用雙手棒住塊面,「好……好得意……」
「佢食緊嘢咋喎。」阿怡有啲不解風情咁問。
我向佢反一反白眼:「行啦,後面已經郁緊。」
出嚟之後,阿怡繼續問我:「跟住去邊?上山?」
我搖搖頭,指咗指前面嘅兒童天地。
「你認真,我地唔去坐過山車?」
「我想去轉個圈先。」
細個嗰陣又唔玩得機動遊戲,除咗睇動物之外,我就只可以嚟玩呢啲細路仔嘢,當然其實有得玩我都唔敢玩機動遊戲。
呢度有火車仔,要入錢玩嘅遙控車同船,兩層樓都唔夠嘅摩天輪,呢啲簡單嘅嘢反而先係嚟呢個公園嘅回憶。
坐旋轉木馬嘅時候,阿怡好似好尷尬咁唔願坐,因為全場幾乎清一色嘅細路仔,除咗我同佢之外,仲有係我前面呢個長髮及腰嘅女仔,似乎得佢一個人玩。
玩完離開嘅時候,阿怡仲係等唔切咁講:「跟住應該上山啦啩。」
「得啦得……哎呀,Sorry……」我顧住答佢,無望到前面,撞到頭先個女仔。
佢一個轉身,長髮就隨風飄起,然後用佢巨大嘅心口對住我,當睇到佢個樣嘅時候,我就立即記起……佢係嗰日幫我洗頭嘅大姐姐!