（少甜）我同個TB交換咗身體

tui

push

lm

主角本來性別係男，而家身體係女
配小琪係同性戀定異性戀

依個Marginal Case要睇樓主點寫
咁當然現實係唔會有交換身體嘅 所以只能夠係假設性討論

但以GID嘅概念嚟睇
如果主角仍然覺得自己係男嘅 咁就只係複雜咗少少嘅異性戀
如果交換之後 主角接受自己係女性 咁係同性戀亦都無咩衝突

文呢？

唔好推會慢慢嚟

新讀者請睇呢度
因為人設同風格有改變
所以由頭改編咗少少
請由呢度開始睇

中四嗰年，有個TB坐係我前面，佢頭髮唔長唔短，皮膚又黑，個胸勁平，大家平時都叫佢做阿怡。

咁當然，大家同學一場，又唔係要同佢拍拖，我同佢都有兩句，不過就真係得兩句，開學無耐我同佢寒暄過：

「你日日都著PE衫，冇人捉咩？」

「暫時冇，希望唔會。」

「你鍾意打波㗎？」

「嗯。」

「⋯⋯」

我地多數都只係會傾一陣上咩堂之類嘅小事，佢份人好Cool，班上唔覺有咩朋友，不過更加鵪鶉嘅我實在冇咩資格咁講人。

本來學校嘅日子風平浪靜，直到有日發生咗件事。

嗰日阿怡係操場打緊波，我係佢側邊行過，佢好似無為意到我，打打下就成個身咁撞咗埋嚟，弱不禁風嘅我根本就接佢唔住，兩個人齊齊瞓咗係地。

到我張開眼嗰陣，成個人暈陀陀，全身上下有種講唔出嘅怪異感，身邊有幾個同學圍咗埋嚟：

「你地冇嘢吖嘛？」

「洗唔洗去醫療室？」

佢地講嘅嘢我完全無聽入耳，因為眼前發生嘅事令我完全唔敢相信，我竟然望到「自己」就係我眼前，就好似前面有塊鏡咁。

我個人呆晒，淨係望住前面嘅「自己」，見佢觀察咗下左手同右手，又望咗我一眼，就企咗起身，同身邊嘅同學講：「冇嘢，我地冇乜嘢。」

講完佢就捉住我隻手拉我埋去操場嘅角落。

「你係咪子明？」佢首先開口問我。

我嘅大腦呢刻終於反應過嚟：「唔通你係阿怡？」

佢點咗點頭，我先開始檢查我全身上下，確實係著緊PE衫，拍戲咩依家！竟然同個TB交換咗身體？

我地兩個返咗去課室，一前一後咁坐返對方嘅位，沉默咗好耐都無人出聲，終於我忍唔住，擰轉身細細聲咁問佢：「我地之後打算點。」

阿怡一樣好似平時咁板埋口面，不過見佢托住個頭認真諗咗陣，就同我講：「諗到辦法前，我地暫時扮住對方先。」

唉，呢個應該無辦法之中嘅辦法，始終頭先我地係樓下撞到個額頭腫晒都冇變返嚟，我唯有認同：「咁好啦……」

今日嘅堂好快就上晒，但我一隻字都冇聽入耳，我同阿怡由放學討論到日落，交換咗必要嘅資訊同手機後，就各自返咗去對方嘅屋企。

一入屋，就見到阿怡個細佬阿聰，佢係客廳打緊PS4，雖然佢仲細阿怡一年，但生得好高大個樣又好成熟，同我真係差天共地，佢一見到我，就同我講：「家姐你返嚟啦。」

突然畀佢咁問到，我細細聲回佢：「嗯……返嚟啦。」就急急腳咁返咗入房，雖然佢覺得好奇怪，不過都冇追問落去。

阿怡間房四四方方咁冇乜特別，係有啲運動用品擺係牆邊咁，我攤係張床，思考緊未來點算嘅時候，突然有人敲門：「怡，你去沖涼先啦。」原來係阿怡媽媽，我對門口嗌咗聲：「喔！」

等陣先……要沖涼？竟然無考慮過呢個問題，我急急忙打咗畀阿怡問佢點算。

「咁咪沖囉，唔通唔沖咩？」電話嘅一端冷靜咁回應。

我覺得匪夷所思：「下，你唔介意咩？」

「我都沖咗啦，你快快手沖唔好亂諗就得。」佢講完就收咗線。

就係咁，我依家幾乎一絲不掛咁企咗係鏡前……

我全身上下只剩返內衣，好緊張咁吞咗啖口水後，就拉高咗件背心，忽然意想不到嘅事發生咗，胸口彈咗兩舊肉團出嚟，原來呢一件係束胸背心，望住鏡入面呢對姊妹花，我估無C都應該有B。

我望到呆咗，因為比起其他部位，呢對長期不見天日嘅部位顯得雪白無暇，我塊面已經開始紅紅地，竟然用咁嘅方式親眼睇到女人嘅裸體，呢個時候阿聰突發係外面拍門：

「快少少啦，陣間到我啦。」

我急急忙咁應佢：「喔……得啦。」

我快快手咁涼咗個凍水涼冷靜咗一下。

食完飯我乖乖地咁坐係客廳度睇電視，以免節外生枝，好彩嘅係阿怡屋企人都唔錯，令我鬆咗口氣，雖然阿怡同我講平時唔洗點理佢地，不過佢地一家三口係飯廳嗰邊咬耳仔真係令人好在意：

「喂你睇佢，今日做咩有啲怪怪地。」首先係阿怡媽媽開口。

「係咩，差唔多啫，係咁靜㗎啦佢。」啱啱先返到嚟嘅阿怡爸爸咁講。

「唔係喎，平時佢係懶Cool咁，今日似係怕怕羞羞，換咗個人格咁。」阿聰又補多句。

死啦，唔會咁快穿煲掛，聽到佢地咁講我企咗係身，細細聲同佢地講咗句：「我返房先。」

急急腳返到入房，忽然諗到唔知阿怡嗰邊依家點樣，就Send咗Whatsapp過去問：

「喂你嗰邊點啊？」

「OK，冇乜嘢。」

話晒我媽子真係好好呃，我諗真係冇乜嘢嘅。

就係咁我同阿怡都叫順利咁渡過咗一日。

意想不到嘅係我地嘅交換並無令到生活有咩大起大落，我同阿怡傾計多咗，雖然平時都係討論我參考咗啲漫畫同電影換身嘅方法，當然無一次係成功。

阿怡變得越嚟越開朗，無再咁板口板面，後來佢同我講入咗籃球隊，間中放學會去練波，佢曬黑咗少少之餘，仲練到個身形好Fit，佢竟然係班上健談起嚟。

我就冇咩好講，無乜改變，因為我唔鍾意運動，好少出去室外，皮膚好似白咗唔少，頭髮都長咗起嚟，但性格仍然係咁鵪鶉，冇識到朋友。

有日放學，阿怡又走咗去練波，平時我都會係課室邊做功課邊等佢，當然做埋佢嗰份，再一齊走，但今日無功課，我走到窗邊望向操場，忽然想落去睇下佢練習。

我坐係觀眾席嘅一邊，望見阿怡跑跑跳跳嘅身姿，雖然本來係我嘅身體，但多咗幾分陽光嘅氣質同自信，咁啱
有幾個同班嘅女仔都坐咗係附近，我偷偷聽到佢地講嘅嘢：

「喂，你地覺唔覺莫子明好似靚仔咗咁。」

「有少少喎，以前好似薯仔咁㗎嘛。」

本來聽到應該好高興嘅說話，依家覺得心裡好不是滋味，就好似我細個睇過一集叮噹，大雄同靜香又係交換咗身體，不過大雄仍然係做乜衰乜，呢刻嘅我完全明白佢嘅心情，個天話你知一個血淋淋嘅事實，無論你變成邊個都只會係一樣。

我一邊睇練習一邊自我沉淪，察覺唔到身邊有人行緊埋嚟，一把甜美嘅聲音輕輕咁係我耳邊響起：「Hi，我可唔可以同你一齊坐啊。」

我抬頭望望，竟然係我暗戀咗好耐嘅女仔，小琪。

微風輕輕吹動小琪嘅瀏海，瀏海下係佢嗰對水汪汪嘅眼睛、白裡透紅嘅面珠，我有啲不知所措：

「好啊……隨便。」

佢微微一笑，將吹散嘅頭髮撥到耳後，坐咗埋我身邊，因為真係好近，每吋空氣都好似散發住佢淡淡嘅香味。

「你嚟睇邊個練習架？」小琪向我打開話題。

「唔係……我只係得閒嚟睇下。」

「係喎，你本來有打開籃球。」

我輕輕點咗下頭。

「點解依家冇打嘅？」小琪繼續問。

我唔知點解釋，唯有作咗個理由：「因為……想專心啲讀書。」

「喔……咁幾好吖。」

「我見你成日一個人咁，唔介意嘅，平時可以同我傾計。」講完對我笑咗笑。

我個心一下子好似得到救贖咁，小琪就好似天使，除咗佢甜美嘅笑容、可愛嘅面孔，更重要嘅，原來佢仍然係咁溫柔善良。

「好啊，多謝你。」我難掩內心嘅喜悅。

轉眼間已經就快日落，操場上各人都執緊嘢準備散去時，小琪拎出手機，同我講：「我地交換Ｗhatsapp吖。」

「好啊……」

交換完後，小琪孭起個袋，企咗起身：「時間差唔多，我要返去啦。」

「嗯，咁聽日見啦。」

「Bye Bye。」佢向我揮揮手。

我望住小琪慢慢咁離開校門，視線一刻都無移開過，個天好似畀咗個機會我去親近佢，但當我諗到自己係用緊嘅人地身份，就覺得自己有啲無恥。

呢個時候，阿怡靜靜地咁係側邊行咗埋嚟，拍咗拍我個頭：

「做咩發晒呆，望緊乜。」

「冇嘢……」

「咁我地行啦。」

「嗯。」

我孭起書包，跟住阿怡後面離開學校。

第朝起身，我眼矇矇咁望咗下手機，日歷顯示住「著校服」三個字，我先突然諗起幾個星期前學校宣布今日起嚴格執正儀容，中學就係咁，鍾意搞埋啲無謂嘢。

我即刻跳落床衝去衣櫃，係一大堆牛仔褲同T-Shirt底下終於搵到兩套壓咗係下面好耐嘅校服，我拎咗上手，條裙就好似新嘅一樣，但壓得太耐所以有明顯嘅摺痕。

我企咗係度猶疑咗一段時間，到底自己係咪真係要著，不過諗到捉到一次就一個缺點，三次就一個小過，唔洗一個月我諗應該畀人踢咗出校，唯有著上身。

企咗係塊全身鏡前，我疑惑咗一下，呢個真係我？雖然啱啱瞓醒披頭散髮咁，但阿怡五官好精緻，皮膚亦都好好，裙腳下係一對雪白嘅大腿，呢段時間嚟，原來我已經不知不覺變成咁。

另外胸前白色嘅布料底下，隱隱約約透視到入面件背心，原來白色校服係真係咁透，難怪香港啲學生妹大熱天時都成日著住件背心。

差唔多要出發，我走出大廳，淨係得阿聰一個人，佢望到我呆咗下，之後就問：「做咩著校服嘅？」

「因為……學校規定，我出去先啦。」

去到學校門口，原來已經係一遍哀號，男嘅畀人捉頭髮長、唔攝衫；女嘅畀人捉裙短，我急急腳咁係人群中穿插，陣陣涼風吹入裙底，每走一步大脾內則都會不停互相摩擦，感覺真係好奇怪。

阿怡仲未返到學校，我踏入課室嗰一刻就開始感受到好多目光，大家好似好好奇，不過我已經無理咁多，直接返埋位坐低。

坐低無幾耐，係我執緊書包嘅時候，小琪走咗嚟我身邊：「阿怡早晨啊。」

佢今日扎咗個圓碌碌嘅髻，雙手放咗係背後，微微彎低腰咁望住我。

「早晨啊。」

小琪又同我繼續講：「你著校服咁都幾好睇吖。」

「係……係咩。」畀佢咁一讚，我有啲唔知點回答，唯有讚返佢：「你頭髮都扎得好好睇。」當然，係發自內心嘅。

「嘻嘻，今朝都整咗一陣。」見佢有少少怕羞咁笑，又整理咗一下個髻，忽然間佢坐係我後面，即係阿怡個位，佢摸咗一下我今朝綁嘅馬尾：「你咁唔得架，頭髮長咗就要好好打理，我嚟幫你。」

小琪拎咗把梳出嚟，要我背對住佢，佢幫我解開馬尾之後，慢慢咁幫我將頭髮由耳根同額頭咁梳去後面，我頭皮間中會輕輕感受到佢手指嘅溫度。

「你啲頭髮好靚啊，唔乾又唔油，髮尾都冇叉開。」

「係咩……」

我依然諗唔到講咩，平時我都係就咁洗頭水洗完就算，唔識咁多，我淨係知我好享受呢刻，時間就好似停頓咗咁，每梳一下都係同佢最近嘅距離。

「搞掂啦。」

「之後你擰向我啦。」

我面對住佢，見佢細心咁用髮夾幫我將前面超長嘅劉海夾上去，我同小琪之間唔夠半個人嘅距離，佢甜美嘅外貌依舊，但多咗份認真嘅表情，我個心又再卜卜跳起嚟。

「嚟，綁好啦。」小琪拎出塊摺鏡對住我。

原本雜亂嘅頭髮綁得整整齊齊，依家就好似一個斯斯文文嘅學生妹咁。

「嘻嘻，唔錯呢。」小琪笑住咁問我。

「唔該小琪……」

上堂鐘準時係八點響起。

小琪聽到鐘聲後，執好晒梳同鏡同我講：「我返埋去先啦，陣間先傾啦。」

「嗯。」我對佢揮揮手。

係最後一刻，阿怡啱啱好入到嚟課室，佢坐埋位後，我第一時間問佢：「做咩咁遲。」

「起遲咗。」

無耐佢就留意到我今日嘅衣著同髮型，仲用手摸咗我馬尾一下：「咁樣幾好睇。」

「你讚自己？」我輕輕推開佢隻手。

「唔係，你就係你，已經係一個完全唔同嘅人嚟。」

跟住佢又繼續講：

「你有冇諗過，我地一直咁落去，唔換返嚟。」

佢突然問咗個咁嘅問題，令我措手不及。

唔錯
少甜應該會幾正

無咩進展

執哂全篇但係無進展

我企係女更衣室前，手中拎住袋PE衫，內心做緊最後嘅掙扎，對男人嚟講，呢個係夢寐以求嘅機會，可以光明正大咁入女更衣室，不過我竟然呃唔過我嘅良心。

「阿怡做咩仲唔入去？」係呢個時候，小琪突然出現咗係我隔離。

「我……」我支吾以對，講唔出口。

「嚟啦，都係同班同學啫。」小琪邊講邊推開門，佢好似誤會咗我太怕羞，最終都係畀佢拖咗入去。

入到去後我介乎一種想睇但又唔敢睇嘅狀況，我諗係男人都明，想望街上嘅女仔，但又要扮望風景咁，我一直低住頭咁行，終於因為咁唔小心撞到人。

「唔……唔好意思。」我好自然咁抬起個頭向佢道歉。

「喔，唔緊要。」原來係班長阿嵐，佢咁啱已經除低條裙，全身只剩返白色嘅胸圍同打底褲。

但係，好奇怪，點解我冇咩感覺嘅呢，我唔覺得怕羞，亦唔覺得有咩特別興奮，環視成個更衣室，大家都係光脫脫咁，但我竟然覺得好平常。

「做咩呆晒嘅？」阿嵐見我無反應關心咗我一下。

「冇……冇嘢。」

我收拾心情，走到埋佢身邊開始換衫，但我一邊換，一邊就感受到身邊有個視線。

「你白咗好多啊，點Keep㗎？」原來係阿嵐一直望住我。

「我……」因為一直縮係室內自自然然變返白，呢種說話應該點講。

可能大家見到阿嵐對我講嘢，佢地一直抑壓住嘅好奇心好似爆發晒出嚟，個個圍咗埋嚟。

「係囉，白咗好多啊。」

「頭髮長得咁靚嘅？」

佢地你一言我一語，平時同一個女仔講嘢我都唔識應付，更何況係咁多個，正當我唔知點算時，小琪拖住我隻手同大家講：「好啦好啦，唔好咁圍住人啦。」

希望有多d文

同自己扑嘢係咩感覺

男主心理上都變咗女人

依個故可能會有出乎意料嘅發展呢

重新寫過個估 不如開新post 睇咗一次舊先發現有新

如果下下都咁執設定重寫，都唔知要寫到幾時
呢個好似已經係第二個post

新讀者留名

故事正題都未入到