蘭若生春夏
2020-05-09 21:15:38
嗰日開始我好努力咁搵有啲咩變返去嘅方法,當然網上啲嘢都係九唔搭八,但我地每日放學後都會逐一試下,該試嘅都試咗唔少,係差在未搵條樓梯一齊碌落去咁解,阿怡本身就唔多上心,依家就連我都開始慢慢放棄。
於是日復一日,我地交換後已經有兩個月,日子都尚算過得去,學校嘅生活都係咁,上堂、落堂、上堂……唯一唔同就係因為我地呢個狀況,所以我同阿怡變得好Friend,放學後大家都要走一段路先分開,而且無所不談,只係由最初研究點換返去,慢慢變咗傾啲無關痛癢嘅嘢。
先講阿怡,佢入咗籃球隊,所以有時放學佢會走咗去練波,仲曬黑咗少少,以往我排骨仔嘅身型都畀佢練到壯咗個圈。見佢同籃球隊班隊友Friend過打Band,係班上又變得健談咗,變到完全唔一樣。
而我……其實冇咩好講,完全唔鍾意運動,得閒就打機,生活同阿怡完全相反,間中照鏡睇到自己皮膚越嚟越白,頭髮已經掂到膊頭,因為我懶得剪,所以平時都係綁埋一扎就算。
朋友除咗阿怡都係零個,如果阿聰都當係,即係阿怡個細佬,咁都算係有一個,有次我見佢卡關嘅時候,幫咗佢一下,我地慢慢變成傾Game經嘅朋友,當然係旁人眼中其實係姊弟。
某一日放學,阿怡又走咗去練波,平時我會係課室邊做功課邊等佢,再一齊走,但今日無功課,我走到窗邊望向操場,心諗不如今日落去睇下佢練習都好。
我坐係觀眾席嘅一邊,望見阿怡跑跑跳跳嘅身姿,雖然本來係我嘅身體,但多咗幾分陽光嘅氣質同自信,咁啱有幾個同班嘅女仔都坐咗係附近,我偷偷聽到佢地講嘅嘢。
「喂,你地覺唔覺莫子明好似靚仔咗咁。」
「有少少喎,以前好似薯仔咁架嘛。」
本來聽到應該好高興嘅說話,依家覺得心裡好不是滋味,就好似我細個睇過一集叮噹,大雄同靜香又係交換咗身體,不過大雄仍然係做乜衰乜,呢刻嘅我完全明白佢嘅心情,個天話你知一個血淋淋嘅事實,無論你變成邊個都只會係一樣。
我一邊睇練習一邊自我沉淪,察覺唔到身邊有人行緊埋嚟,一把甜美嘅聲音輕輕咁問我:「Hi,我可唔可以同你一齊坐啊。」
我抬頭望望。
係小琪。