178 Like
21 Dislike
扮工閒人
2020-06-21 21:33:31
其實咪仲好
轉圈轉圈哈姆共你
2020-06-22 08:40:21
男朋友陪女朋友睇胸圍
Karl_Franz
2020-06-22 10:55:15
屁孩開心放暑假
2020-06-22 11:11:14
仲睇緊 真係幾正
摩打炒士巴拿
2020-06-22 11:50:49
由一開始睇 期待個結局
到依家當係日常睇
都係咁正
好好睇 樓主加油
蘭若生春夏
2020-06-22 14:12:25
好快就到咗星期六,我求其著咗件白色T-Shirt同埋牛仔褲就出咗去,其實自從同佢交換咗之後,我都好少著校服以外嘅衫出街。
我喺商場等咗一陣,先至見到阿怡施施然咁行過嚟。
佢行咗過嚟之後我就抱怨咗一下:「咁遲㗎。」
「襯下衫吖嘛。」
我心諗有咩好襯,我嚟嚟去去都係得嗰幾套,不過雖然都係嗰幾件衫,但我嘅感覺睇起嚟唔同咗,可能呢個就係阿怡散發出嚟嘅氣質。
「你做咩望住我?」
「冇,行啦。」
附近都有一兩間賣底衫嘅鋪頭,不過因為係細細間嗰種,啲Sales又好得閒咁,費事咁尷尬,所以我冇入到去。
最後我哋行到去一間連門面都係粉紅色嘅衫鋪, 間嘢都幾大間而且好多人行緊,所以我就拖埋阿怡入去。
入面啲衫好多都係花花碌碌咁,一係就好多lace,我淨係行過望咗兩眼,打死我都唔會著呢啲款。
偏偏阿怡就嗌停咗我:「喂你睇下。」
佢手上拎住件吊帶嘅藍色背心,總之就係睇起嚟好可愛嘅款。
「你要唔要試下?」
「放低啦,唔啊。」
我冇佢咁好氣,繼續行入去。
好快行到入內衣區,一排排唔同嘅款式掛喺牆上,睇到人眼都花埋。
睇起嚟我好似好認真咁揀,其實只係搵緊最普通嘅款式,終於畀我搵到套上下身都係灰色, 最普通嘅款, 我拎咗上手問佢:「呢款點樣?」
「咁普通?」
「普通咪好。」
尺寸嚟講,因為我自己都好奇量過,所以揀啱Size,就拎咗去試。
出到嚟我決定買三套一樣嘅返去,就咁簡單,唔好煩咁多啦。
正當我諗緊有冇其他嘢買嘅時候,就聽到隔離兩對情侶喺度細細聲嘈緊。
「我想出去等你啫。」
「你睇人哋男朋友都喺度陪佢。」個女仔仲指咗我哋一下。
男朋友?我望左望附近都冇其他人。
我問咗問阿怡:「佢係咪講緊我地?」
佢嘆咗口氣:「你唔係咁遲鈍呀?」
我突然恍然大悟,因為我哋發生咗好多嘢,所以根本冇諗過咁仔細嘅問題。
死啦,咁我哋喺學校,會唔會畀人以為拍緊拖?
呢個時候阿怡竟然話想去一去廁所,我唯有係間舖行多陣。
行到去飾品區嘅時候,咁啱見到啲髮箍、髮夾,我見有興趣就停低睇下。
因為小琪上次幫我綁頭髮嘅時候,幫我夾頭髮嘅髮夾直接就畀咗我。
我睇到一款上面有白色花圖案嘅都幾靚,唔知會唔會襯佢,不過正常女仔點都有返十個八個,送呢啲嘢會唔會好無謂。
當我諗緊呢個問題嘅時候,突然有把熟熟地嘅聲叫咗我一下:「咦?阿怡?」
97出世(突然50歲)
2020-06-22 16:44:41
新讀者留名
轉圈轉圈哈姆共你
2020-06-22 17:25:56
小琪幫佢揀胸圍
蘭若生春夏
2020-06-22 18:26:41
「班長?」
「叫我阿嵐啦。」
真係估唔會出街都會撞到班長, 佢著咗件鬆身嘅上衣,高腰嘅淺啡色長裙,成熟得嚟又好有氣質。
「你一個人行街啊?」
「係……係啊。」
好彩阿怡去咗廁所,如果唔係真係水洗都唔清。
「你睇緊啲髮夾同橡筋?」
「嗯。」
「初中嗰陣你一直都係男仔頭,無諗過你竟然會留長頭髮。所以以為你拍拖添。」
「下……冇啊,點會喎。」
「唔係咩?你同莫子明玩得好埋喎。」
我心諗今次真係慘喇,原來真係有人咁樣覺得。
「唔係呀,我地真係Friend嚟㗎咋。」
「喔……Sorry。」
眼見阿怡就快返嚟,阿嵐又問到我口啞啞,完全進退兩難。
「唔緊要。」
「咁你慢慢睇啦,我今日行咗好耐,準備返去啦。」
「好啦,Bye Bye。」
「返學見。」
我望住阿嵐行緊去門口方向,個心不停祈求住千祈唔好撞到阿怡啊。
好彩佢走咗一陣,阿怡都仲未返嚟。
於是我揀咗幾條橡筋,就去咗睇短褲。
因為以前我好鍾意著住孖煙通週屋走,但係而家阿怡嘅睡衣條褲都係偏長,既然而家要暫時過對方嘅生活,著都要著得舒服啲。
我拎咗兩條依家啲女仔好興著嘅運動短褲,我諗應該同孖煙通差唔多。
睇睇下嘅同時,我突然畀一條連身裙吸引咗過去。
條裙只係深藍色白花紋嘅碎花裙,但唔知點解我覺得幾靚,我竟然萌生咗想試下嘅諗法。
試下好唔好呢,反正我而家係女仔,阿怡又未返嚟,唔怕啦。
仲我猶豫緊嗰陣,突然之間有人從後面拍我膊頭:「睇緊乜嘢。」
「啊!~~~」 我發出咗我人生最高頻嘅一次尖叫聲。
半間鋪嘅人都望晒嚟我地個方向。
唔使擰轉頭我都知道係邊個:「嚇死人咩。」
「你想試?」
「睇下咋,行啦我地。」
我急急拖住佢畀錢走人。
「唉。」我坐咗係商場長櫈度嘆咗一口長氣。
估唔到買次衫都可以咁多災多難,我突然醒起咗一件事。
「你頭先有冇撞到班長?」
「冇喎,做咩咁問。」
「我頭先係鋪頭撞到佢。」
「下?」
「好彩你唔係度,我決定啦,以後放假冇咩都唔再出街。」
「但係我仲諗住個個星期都要出嚟。」
「點解?」
「你仲問?就考試啦。」
轉圈轉圈哈姆共你
2020-06-22 20:25:04
以為話:仲問?同你拍拖囉
廣告(已切)
2020-06-22 20:37:26
樓主加速左
幽靈社員
2020-06-22 20:54:25
依個故開始有趣了
蘭若生春夏
2020-06-22 21:27:51
先寫咗唔夠5%……所以想快啲,浪費太多腦汁係開頭,我仲係覺得開頭寫得唔好
Karl_Franz
2020-06-22 21:30:12
通常寫得會愈來愈順既
加油
蘭若生春夏
2020-06-22 22:38:43
原來眨下眼已經11月尾,真係就快到考試。
「但係,關咩事?」
「你諗下,功課係你幫我做嘅,但考試呢?」
畀佢咁講一講,我就突然明白晒。
「我考你嘅成績,你考我嘅成績。」阿怡繼續咁講。
我突然靈機一觸:「寫對方個名咪得囉?」
佢又輕輕拍咗我個頭一下:「傻嘅,到時跟學號坐,收卷就穿煲啦。」
慘啦,真係一波未平一波又起。
最後按阿怡個意思,其實即係我地得閒就一齊溫書,最好放假都要,目的係要大家都考到差唔多分數。
「咁我地放學……」
「唔得!」我即刻叫停咗佢。
「學校啲人會睇到我地成日一齊㗎。」
「咁你要去邊……」
「去……去屋企啦。」
其實係因為,我計一計日子,已經好耐冇返到我自己嘅屋企。
雖然間中會聽阿怡話我知阿媽嘅近況,不過,我都係想親身去睇佢一次。
「好啦,咁……你食唔食雪糕。」
「嗯?你又知道我鍾意食甜嘢。」
「見你你屋企雪櫃一桶桶嘅Häagen-Dazs就知啦。」
「好啊。」
佢去買咗兩球嘅甜筒返嚟,係我最鍾意嘅抹茶同薄荷。
「你唔食?」
「我麻麻地。」
星期一放學,我就已經準備好執定晒嘢,同身後嘅阿怡講:「嚟啦,行啦。」
「乜你心急成咁。」
當然啦,久違嘅屋企,我嘅睡房,我張床,有時去咗一星期旅行都會好掛住,更何況係咁耐。
而且,我仲要去買返盒士多啤梨畀阿媽,因為佢好鍾意食。
我熟路咁行係佢前面,甚至撳埋大門密碼,不過到咗門口先發現一樣嘢。
「係喎,鎖匙係你度。」
「等陣先啦,陣間對白點講啊。」
「『Hi,姨姨,我係子明嘅同學啊,就快考試所以一齊嚟溫書。』咁樣?」
「係,咁我開門。」
熟悉嘅大廳又出現咗係我眼前,呢張梳化,呢個牆身,甚至令我有啲感動,一啲都唔誇張。
阿媽聽到聲後就係廚房問:「返嚟啦?」
阿怡好似已經習慣晒咁答:「係啊,我帶咗同學返嚟。」
佢行咗出嚟,見到佢嗰陣我個心就放心晒,一日不見如隔三秋,呢刻我就好似有幾十年冇見過佢一樣,突然Feel到一陣淚意湧上眼邊,不過我夾硬忍住,準備講出客套嘅對白。
「Hi,媽……」
轉圈轉圈哈姆共你
2020-06-23 00:08:29
原來未到5%
海明威
2020-06-23 01:35:06
好耐冇見樓主
太多
2020-06-23 02:15:32
樓主加油啊💪🏻
扮工閒人
2020-06-23 03:53:37
停得咁好
芝士生菜加芝麻
2020-06-23 21:45:37
加油!!
兒登玩膠員
2020-06-24 00:10:28
蘭若生春夏
2020-06-24 19:52:18
大……大件事,我竟然一時口快快……
我即刻收口,兩隻手掩住個嘴,不過已經太遲。
「哎也,乜咁快就咁叫啊,我地第一次見咋喎。」
佢把口咁講嘅同時,個樣完全笑到見牙唔見眼。
「唔……唔好意思,姨姨,我係子明嘅同學……嚟溫書。」
我即刻拎咗盒士多啤梨出嚟想轉移話題。
「少少心意……呢隻好大粒好甜㗎。」
「多謝,阿明連呢啲都話你知啊。」
「係……係啊。」
我用最細嘅動作係背後批咗阿怡一下。
「喔……係,我講㗎。」
我點都估唔到會有呢一日,要客客套套咁同自己阿媽講嘢。
「係呢,你叫咩名。」
「我叫……阿怡。」
「喔,阿怡,入嚟先啦。」
入到去我乖乖地咁坐咗係梳化上面,阿媽遞咗杯水畀我。
「唔該。」
「咁嘅……你地一齊咗幾耐。」
佢咁樣一問搞到我畀水濁親。
「咳……咳咳,咩……咩?我地朋友…嚟㗎。」
「真係?」
我一邊咳,一邊望住阿怡,希望佢幫下口。
「係……係啊。」
「喔……」
佢聽到之後個樣有少少失落,扁埋個嘴。
「唔好意思……誤會咗,你地慢慢溫啦。」
「好……」
由嗰日開始直到考試,幾乎每日我都返咗去屋企一轉,阿媽就同我越嚟越熟絡,係,我知咁講好奇怪,兩母子就好似重頭再認識多次咁。
今年好少落雨,唯獨今日返到學校,大家先見到個天開始黑黑地,放學嘅時候就仲想就快落咁,我地決定快手快腳行返去。
前一秒連毛毛雨都無一滴,忽然間「咋」一聲,個天好似一盤水咁倒咗落嚟,我地跑咗一段路先至去到有瓦遮頭嘅地方。
去到屋企之後,阿媽見到我哋兩個全身都濕曬,濕度真係扭得出水嗰隻, 白色嘅校服完全可以透視曬入面,我同阿怡對視咗一眼。
阿媽忽然對住佢講:「你唔好望實人地啦。」
我心諗其實你應該話嘅人係我,佢成身上下已經畀我睇曬。
佢畀咗我地一人一條毛巾,之後叫咗阿怡入房去換衫。
「你等陣,我拎佢家姐啲衫畀你換。」
佢拎左家姐套圓領白色上衫、藍色麻棉長裙畀我換。
我差唔多吹乾個頭之後,啲頭髮就叉晒起嚟,阿媽見到就過嚟幫我梳下。
「哈哈,佢家姐大個之後,都無再坐定定咁畀我整頭髮。」
「係咩……」
「依家就好似多咗個女咁。」
忽然間佢嘅語氣突然認真咗。
「其實……阿明由細到大都好內向,成日好怕羞,講嘢都細細聲,我仲擔心佢去到幾大都仲會係咁,因為屋企一直都係得我地兩個女人。」
「可能因為你嘅關係又或者到咗呢個年紀,佢突然成熟咗變咗另一個人咁。」
「不過,我覺得佢變到無咁痴我,其實有啲寂寞。」
我望住佢個表情,個心拿住拿住,原來阿媽係為我諗咗咁多同咁依賴我……
「如果可以嘅,我可以多啲上嚟……」
佢聽到我咁講又回復返開心嘅語氣。
「你地真係無拍拖?」
「真係冇啊……我地唔係嗰種關係。」
我忽然覺得後面輕飄飄咁,原來佢竟然幫我織咗條辮。
「雖然唔係好夠長,但都勉強織到,你嚟睇下阿姨手勢點。」
我行到全身鏡前,第一眼望到嘅畫面只係令我覺得……好靚啊……
轉圈轉圈哈姆共你
2020-06-24 20:04:05
嘩我好靚呀
macross
2020-06-24 21:50:11
加油哦