（少甜）我同個TB交換咗身體

升中四嘅時候，我畀人分咗去坐課室最角落嘅位置，坐我前面嘅唔係咩靚女，而係一個TB。

可能因為坐得近，我平日有意無意都會觀察下佢，佢叫阿怡，平時戴住副黑框眼鏡，中短髮，要我形容嘅話我會話好似日本仔嗰種牛郎嘅髮型，皮膚應該仲黑過我，佢每日都只係會著體育服返學，我唯一一次見佢著校服裙就係開學嗰日。不過講咗咁多，其實我對佢唔反感，佢唔會圍威喂、周圍撩女，反而日日好安靜咁聽書，雖然說話唔多，但有時同我講嘢都幾有禮貌，應該話，佢同我係同一類人，一樣都係識唔到朋友，每日都係自己一個。

呢件事係發生係開學無幾耐之後。

嗰日我出去食完飯後返去學校，係校門就見到阿怡自己一個打緊籃球，因為想去樓梯就要經過個操場，所以我就係佢身邊行過。行行下突然「嘭」一聲，係個波撞到籃框嘅聲音，我下意識望向籃板方向，係嗰刹那，我望到個波原來已經飛緊埋嚟我呢邊，更重要係阿怡完全留意唔到我，為咗接波向後跳咗起身，當我意識到佢要撞埋嚟嘅時候，一切已經太遲了，我畀佢撞到瞓低不特止，成個人又失平衡咁瞓咗係我身上，佢嘅後腦又一下撞埋嚟我嘅額頭度，最後一刻我覺得個頭好痛，心口好重，跟住就無咗意識。

「喂喂你地醒啦？有冇事啊！」

矇矓之中我聽到唔知邊個Miss叫醒緊我，我感覺到自己訓咗係張床上，赤赤痛嘅後腦，同埋個心口好緊，就好似畀好多塊紗布包住咗咁，我當時心諗，有冇傷得咁嚴重。我坐咗起身，一開眼就見到自己係醫療室入面，床邊係班主任企咗係度，好緊張咁望住我同隔離床，我側側望咗下隔離係咪阿怡嘅時候，我見到嘅竟然係我自己。

「係鏡？」

我個心即時默念咗句。

唔係鏡，我微微抬起右手，對面並冇做同一樣嘅動作，淨係呆咗咁望住我，我即時檢查自己依家嘅狀況—上身著住鬆身嘅運動服，手雖然唔白，但皮膚仍然好細嫩，手毛幼細到睇唔到，頭髮已經長到蓋過晒耳仔，如果平時生到呢個長度，我老媽子一定會鬧我成個乞衣咁，之後就會捉住我去剪頭髮。

雖然好不可思議，但我真係同阿怡交換咗。

班主任睇見我地兩個唔出聲，於是就問

「你地兩個係咪仲有唔舒服，如果係咁我要Call白……」

「唔洗！我冇咩事……」

我立即截停咗佢。

然後我又望向「自己」嘅方向，微微搖咗搖頭，希望佢明白我嘅意思。

「冇……事啊，我都冇乜嘢。」

聽到我地嘅回答，班主任緊張嘅神情稍為放鬆咗少少，輕輕點咗下頭。

「咁就好啦，不過你地至少留係度觀察一堂先，之後真係冇事再返上去，我陣間再嚟搵你地。」

講完佢就離開咗醫療室。

關門一刻，阿怡立即向我問

「你係咪子明？」

我輕輕點咗下頭，向佢確定一下

「你係阿怡？」

佢亦點點頭回答。

我個腦即刻實咗，睇戲就睇得多，但人地永遠係同靚女交換，點解我會係同個TB交換，於是我諗方法點都要變返去

「頭先……我地係咪撞到先會搞成咁，不如我地依家試下，睇下變唔變得返去？」

阿怡若有所思咁，諗咗陣先同我講

「好。」

十分鐘後，我地個額頭撞到腫晒都係冇換返嚟，決定放棄。眼見班主任就快要返嚟確認我地嘅狀況，我隨口問咗句

「不如我地真係去醫院檢查下……」

「痴線咩你，邊個會信啊？」

問完我都覺得自己有啲蠢。

由於下晝仲有堂要上，我地討論咗陣，決定先挨過今日再講，慶幸嘅係，因為我地都冇咩朋友同冇咩人注意到，所以只要正正常常應該唔會有咩大問題。

過咗陣班主任就嚟叫我地返上去。

上到課室，已經係Lunch Time後嘅第二堂，我地兩個一踏入課室就成為咗全場嘅焦點，眾人竊竊私語，有啲又陰陰嘴咁笑，雖然聽唔清楚佢地講緊乜，不過都唔慌係咩好說話，而且我眼裡只有留意到我嘅女神，小琪。

推

做咩有兩個版本嘅
我鐘意呢個開頭多d

對比起其他人恥笑嘅目光，我更加面對唔到小琪嘅眼神，佢認真咁望住我，心底好似有說話想講咁，不過我依家唔係阿怡咩，唔通佢地有咩牙齒印？

返到埋位我淨係不停諗呢件事，突然，阿怡擰轉身敲我張檯。

「喂，坐錯位啊。」

我地兩個根本無意識到，仲一前一後咁坐返原本個位，於是急急腳咁調返啱。

好快就上埋今日最後兩堂，老實講，啱啱講咗咩我完全無聽入腦，我只係諗緊之後嘅生活要點過，等到課室嘅人走晒之後，我就同阿怡討論呢個問題。

「我屋企人會有啲煩，但你可以唔理佢地。」阿怡同我講。

我開始為佢擔心，因為我同老媽子相依為命，唔知有冇辦法呃到佢，我地交換咗好多訊息，時間已經嚟到日落，最後我地將身上嘅手機交返畀對方，有咩事就電話聯絡。

就係咁樣，今日返去嘅唔係自己嘅屋企。

都係寫呢邊，口語好寫啲

文？

Lm

lm

好有意思！推

嚟到阿怡屋企，就見到佢細佬玩緊我夢寐以求嘅PS4，阿怡話佢細佬只係中三，不過我望見佢真人好高之餘，個樣睇起嚟仲幾成熟，佢見到我返嚟後嗌咗我聲家姐，我唔想穿煲，所以淨係嗯咗一聲就返咗入房。

點知，佢間房亂到好似打完仗咁，衫褲係床上堆咗座山，啞鈴同籃球又隨地放，我嘆咗一口氣，鬼叫我今晚要瞓呢度，唯有幫佢執乾淨。

好唔容易執完，伯母就敲門入咗嚟，當佢見到間房變得乾淨企理嘅時候，驚訝到連個口合唔埋：「你平時咁污糟邋遢，今日竟然執屋？係咪發燒啊？」講完仲真係走咗過嚟摸下我額頭。為免講多錯多，我問伯母入嚟做咩，想盡早打發佢走，點知佢原來係叫我去沖涼，我有啲不知所措，所以打咗畀阿怡問點算。

「喂？要沖涼喎！點算啊！」我心急咁問佢。

「冇所謂啦，反正我都沖咗。」

「仲好細添。」

我即刻嬲嬲地，想維護最後一絲絲男人嘅尊嚴，反駁佢：「你咪又係平胸！」

「哈，睇下點。」講完呢句之後，佢就收咗線。

既然佢無所謂，咁我都豁出去，反正男人老狗有咩好睇，但我入到廁所，就發現自己錯了，當我拉高件背心嘅一刻，兩舊肉團就咁就彈咗出嚟，原來佢平時只係著住束胸背心紮住個胸，所以頭先係電話入面先咁得戚。

望住塊鏡我個心竟然開始卜卜咁跳，雖然佢皮膚其他部位曬到好黑，但胸前呢個部位因為長期包實，對比起嚟顯得雪白無暇，我越睇塊面就越嚟越紅，摸落仲有少少辣手，心諗我真係冇用，毒男十五載，竟然係用咁嘅方式望到女人嘅裸體，我望到有少少發呆，係阿怡細佬係門外敲醒咗我：「喂你快啲沖啦，一陣到我啦。」

我急急忙咁應佢：「得啦。」就快手快腳咁沖咗個凍水涼冷靜下，搽身少不免都會摸到自己，雖然觸感係好新奇，但冇咩特別舒服嘅感覺，基本上可以斷定AV裡面根本係呃人的。

沖完涼換好衫出到嚟，發現已經就快開得飯，我索性乖乖地咁坐係客廳，但部PS4就好似不停引誘緊我咁，而且阿怡細佬仲有買GTAV，我見冇嘢做，就偷偷地開咗機嚟玩。

玩玩下細佬就沖完涼走出嚟，我熄都熄唔切，見到我玩佢部機，佢就奇怪咁問我：「乜你鍾意打機嘅咩。」我一邊Save一邊答佢：「試下玩啫。」

伯父返嚟後我地就一齊食飯，途中大家都有講有笑，原來佢地一家都相處得幾融洽，睇見伯母不停咁講今日陳師奶八卦咗啲咩嘅時候，我忽然有啲掛住我老媽子，唔知依家我嗰邊點樣呢。

食完飯後我好順手咁疊埋咗啲碗筷，突然大家都冇再出聲，三個人六隻眼咁望實我，好似望見摩西分紅海咁，有啲咩神蹟顯靈，我都知道自己做錯咗嘢，即刻攤開雙手，講咗句順手啫，就拿拿臨返咗入房。

係房我仲聽到佢地係出面細細聲咁講緊乜嘢，於是我耳仔貼係門偷聽佢地討論緊啲咩。

「佢今日咁奇怪嘅，好似另一個人咁。」伯母咁講。

細佬諗都冇諗就衝口而出：「係咪識咗男朋友咋。」

之後佢地三個人就嘻嘻嘻咁偷笑，原來佢地誤會咗去第二個地方，早知唔洗扮得咁辛苦。嗰晚我真係好攰，精神上要同佢地鬥智鬥勇，所以好快就瞓著咗。

lm 有冇得加速

LM

個女仔咁睇得開嘅？

有無文？

推

文?

推

第二朝起身，因為返學路線變咗，為免遲到，我梳洗後就立即換衫出門口。

去到校門，忽然畀人叫停咗係度，以往我畀人叫停嘅原因係因為頭髮太長，估唔到今次老師走埋嚟竟然話：「你頭髮唔長唔短咁，索性留長佢啦。」

雖然我討厭剪頭髮，但個心都講咗句關你鬼事，同佢講：「校規又無話唔剪短得。」估唔到我會為LGBT平權踏出咗第一步。

「仲有，今日開始唔可以再亂著PE衫。」佢又再補充。

咁就大件事好多，唔係掛，唔通聽日開始我要著裙。

我立即跑上課室同阿怡討論呢件事。只係見佢有少少陰陰嘴笑，雖然呢個係我個樣，但真係好想打佢一拳。

「都冇辦法啦，條裙我放咗係第二格櫃。」佢開口補充。

「唔通你唔會想諗辦法換返嚟嘅咩。」我有少少嬲咁同佢講。

阿怡搖咗搖頭，表情稍為認真起嚟：「如果有辦法換返嚟，我一定會，但係……」

佢講到呢度，我開始覺得自己有少少強人所難，我連點換都唔知，拗嚟有咩用呢，望見佢有少少失落嘅樣，我反而安慰返佢轉頭：「唔緊要啦，我會慢慢搵方法。」

佢點咗下頭，開始同我討論尋晚嘅事：「你媽媽都幾好人，又安靜又溫柔。」

「你屋企人都好直率好熱情，係真係煩咗啲。」我都回應佢。

「哈哈。」阿怡認同咁笑咗聲。

正值我地呢個年紀，性情有少少改變都唔奇，雖然屋企人會察覺到，但似乎無引起咩大問題。

我同佢一人一句，就好似咩事都冇發生過咁，閒話家常。

Lm

留名，幾得意

Lm