蘭若生春夏
2020-11-02 20:16:26
返上樓之後,我就好似一個做錯野嘅細路咁,聲都唔敢聲咁坐咗係梳化,準備面對細佬嘅質問,順便諗下有咩藉口可以瞞過去。
佢見到我咁,反而溫柔咁話:「你唔駛咁緊張喎,我又唔會同阿爸阿媽講嘅。」
「唔係啊……佢其實呢……係……總之……」我依然口疾疾咁,一句完整嘅句子都表達唔到。
細佬好似無理會我嘅狡辯,只係笑咗一笑,咁係理所當然,一男一女係情人節夜晚出嚟,仲可以係咩關係,而且個女仔仲要著得咁靚,我低頭望咗望自己而家短裙嘅衣著。
我諗唯一說服佢嘅方法,就係當面同佢講我其實唔係阿怡,但當然……咁係無可能嘅事。
可惡……而家嘅發展同我當初預想嘅越嚟越唔同,到底阿怡仲要製造幾多麻煩。
第二朝返學,我又無晒精神咁趴咗係張檯上,小琪走埋嚟拍咗拍我,「做咩吖?」
「唉,尋晚好攰。」
「嗯!?」
「嗯?」
佢瞪大咗對眼,表情好似有少少驚訝咁望住我,對眼眨下眨下咁,做咩……唔通我講錯咗啲咩?
我問佢:「你……做咩?」
小琪只係搖搖頭,「無啊,無乜野……我返位先啦。」
「喔……」
佢做咩呢……點解我身邊嘅人都好似怪怪地有咩瞞住我咁……
放學嗰陣,其實我同阿怡已經習慣各自分開返去,因為已經熟習晒,但係當我一起身嗰陣,阿怡就捉實咗我手臂。
「做咩喎?」
「星期六我地再出去多一次。」
「又嚟?」