蘭若生春夏
2020-10-16 18:21:07
我地落樓之後,個天已經變暗咗唔少,街上嘅氣氛好似變到同日頭有啲唔同。
唔知點解今日街上好似特別多情侶,頭先落樓仲見到一個著得幾靚仔,手裡面仲有紮花嘅男仔,我估佢應該係等緊佢女朋友。
我同怡平排咁行咗一段時間,先意識到呢度離學校好近,真係隨時會遇到識嘅人。
我總於都忍唔住問佢:「你想帶我去邊度啊?」
「呢層呢,我地首先去食個飯,然後再去睇電影……」
「咩話?咁……咁同拍拖有咩分別?」
「你而家先發覺咩?如果唔係著咁靚做乜?」
有時候我真係好佩服我嘅思考速度,硬係慢半拍咁。
終於,我跟佢嚟到商場附近嘅空地,呢度嘅情侣更加多到誇張,周圍都係一對對咁拖住手行。
我個心突然覺得有啲不妙,今日應該唔會係咩日子掛,我想話伸手想去摷個褲袋,先諗起電話放咗係怡身上。
「你畀返部電話我吖。」
「點解?」
「總之畀我啦。」
我一心急,開始打算夾硬係佢身上搶過嚟,結果佢就一直係咁褪後。
呢身衣著實在令我行路都行得唔自然,再加上有少少高踭的鞋,我又再一個企唔穩,重心開始傾咗向前。
呢個時候怡先衝咗過嚟,兩隻手捉住我嘅手臂,先至無跌親,但係我成個頭就撲咗係佢嘅心口。
企穩咗之後,我第一時間就推開咗佢,但係耳仔已經開始發熱,心跳同呼吸都變到有啲急促。
我做乜嘢……點解要對住自己緊張?
怡望住我咁狼狽嘅樣,反而笑咗出聲,「好啦,唔玩啦,畀你啦。」
我一手咁搶咗過嚟,即刻解鎖睇下今日係咩日子……
「咩話!?情人節!?」
蘭若生春夏
2020-10-17 17:48:30
望見我咁大反應,怡只係緩緩咁將雙手交叉係胸前,語氣平淡咁同我講:「做咩咁驚訝?你以為我鍾意你只係講笑?」
「但係……但係,呢種日子出嚟真係有啲……」
「唔好有啲啦,行啦。」跟住佢就捉住我隻手繼續行去商場。
無辦法之下,我唯有繼續配合,因為就算佢係呃緊我都好,至少佢個人係我視線範圍之內。
跟住我同佢去咗食日式放題,戲都睇完之後,時間已經十點幾,我心諗今日終於可以結束。
經過附近嘅公園,雖然今日唔係行咗好多路,但因為唔習慣呢對鞋,隻腳都係有少少痛。
怡好似察覺到我行路唔係咁自然,就問我:「腳痛啊?」
「係……」
「去嗰邊坐陣。」
我地唔係公園入面嘅唯一兩個人,仲有好多一男一女係長凳上卿卿我我。
坐低之後,我想話伸手埋去揉下隻腳,但怡已經踎低咗係我腳邊,兩隻手開始捽我嘅腳腕。
「點樣?我係咪好好?」
「唓……唔係你畀呢對鞋我都唔會咁。」
隔咗一陣之後,對腳真係已經無咁痛,眼見時間唔早,其實差唔多已經要返去,所以我叫停咗佢,「好啦,無事啦,我地行啦。」
怡低雖然停低手,但無企返起身,只係抬起個頭望住我,語氣認真咁講:「你係咪,真係接受唔到我?」
月光照射住佢嘅面孔,雖然我仍然認得出以前呢個人係我,但感覺其實已經好陌生,佢更似係另一個男人。
唔知受荷爾蒙影響太耐,呢刻我望住佢竟然好似一個普通女仔咁,對佢有少少心動。
「你有冇諗過我地一世都可能會咁,如果咁樣,同我一齊會唔會仲好啲?」
當佢講到一世嘅時候,我就即刻好似清醒咗咁,對佢講:「講笑咩,邊有可能……」
我輕輕推開咗怡,著返對鞋企咗起身,「唔好講呢啲啦,返去啦。」
我一定係太攰個腦先會亂諗嘢,拍醒咗自己之後,怡都係堅持話要跟到我樓下,因為呢個時間附近確實好多MK。
「到啦,你返去啦。」因為真係到咗屋企附近,我好擔心有人會睇到。
「你返去考慮我講嘅嘢。」
「考盧乜嘢,我都話……冇可能鍾意自己㗎囉。」
「真係?」
怡雙手擺係我背後,慢慢咁將我拉埋前,將塊面哄埋嚟我前面,距離好近好近,準備就快鍚埋嚟,我想推開佢,但個身唔知點解郁唔到。
係嗰剎那,我地側邊傳嚟咗一把熟悉嘅聲音。
「家姐?」