蘭若生春夏
2020-09-14 17:04:52
就咁過咗一星期,雖然我同小琪表面上冇乜嘢,但經過見面時都不禁有啲尷尬。
我都冇諗過可以進展得咁快,唔通係女仔嘅感覺特別敏銳……我都冇做過啲咩,已經令小琪感覺到我想疏遠佢。
不過咁樣真係好咩?點解對件事好似冇咩幫助咁,阿怡仍然都係咁嘅態度,唔通係我諗漏咗啲乜嘢?
佢呢個人,由一開始已經係咁……好難觸摸,永遠唔知佢想點嘅,所有嘢都係佢想點就點。
壞事永遠接二連三,聽日係我最討厭嘅日子。
學校每逢過完年都會搞一次長跑,點解……點解要搞啲咁無聊嘅嘢。
啊……真係好煩好煩好煩啊,越諗我就越炆。
到咗第二朝,我去廁所嘅時候感覺到一股怪怪地嘅熱流,低頭一望,係染到紅晒嘅馬桶。
阿怡平時嘅血量都好大,通常有兩日我都會一直暈下暈下咁,但今次竟然暫時無咩唔舒服嘅感覺,如果係咁,今日個長跑就無藉口避開了。
不過至少可以直接著住PE衫返去,唔洗再著裙。
返到學校,明明已經初十六,但周圍掛滿晒紅卜卜嘅飾品,仲有人打晒鼓,搞到好似初一咁。
去到課室門口嘅時候,咁啱遇到小琪要出嚟,我就係門口同佢遇到正。
「早晨啊……阿怡。」
「早晨……」
我讓一讓開咁畀佢出嚟,佢低住頭咁就去咗廁所方向。
其實諗深一層就好似有少少奇怪,所有嘢都發生得好自然咁,雖然係我刻意同小琪保持距離,但佢亦都好似配合緊我咁。
就好似……事先知道我會咁做……
「各位同學,我地準備落去啦。」
都未返到埋位,就已經要提早落去,我只可以離遠咁見到阿怡企起身,睇佢個樣,我索性都係唔走上去,反正佢都只係會懶懶理。
只係我一直都諗唔通,點解呢件事會令佢咁介意……希望我會搵到個機會捉住佢嚟問。
女仔出發先,因為路線比較短,算係不幸中嘅大幸。
我同成班女仔係操場企埋一堆,可能因為太迫,我開始覺得有少少唔舒服,唔係好抖到氣咁。
小琪係隔離見到我咁就埋嚟問:「冇嘢吖嘛……」
「嗯,我冇乜嘢……唔係好夠瞓啫……」
估唔到咁樣佢都係咁關心我,我越嚟越覺得自己罪業深重。
大家同一時間出發,理所當然我越跑就越慢,一來係因為我討厭運動,二來其實阿怡嘅體力本身就唔係好夠。
唔經唔覺咁去到中段,原來我地已經係隊尾嘅位置,就連男仔都就快追到上嚟。
呢個時候小琪係側邊對我講:「咁我行先啦……」
我點點頭,「嗯。」
佢越過咗我之後,背影就離我越嚟越遠,最後到完全睇唔到。
我係度唔開心啲咩,本來就應該係咁,我唔可以一直畀佢關心錯人,因為我同佢本來就冇機會。
只不過,個心咁真係好唔舒服……
唔係,係成個人都好唔舒服,突然間一陣暈眩感湧咗上嚟,四圍嘅景物都好似旋轉緊咁,果然真係唔可以亂撐……
只不過真係暈得有啲誇張,非常之唔正常嗰隻,隨時可以暈咗係度,一直以嚟都未試過。
我即刻停低咗係度,不停咁喘氣,心跳雖然平穩返,但係暈眩感無消失到,仲越嚟越重。
我諗我唔得啦,連行埋搵嘢扶住嘅時間都冇,我成個身一瞬間就開始向後跌……
但係係掂到地下之前,突然間有人係後面接住咗我,佢隻手緊緊咁握實我右邊膊頭,我微微咁擰轉頭,想睇下到底係邊個。
係我!?唔係……我連意識都開始咁模糊,應該話係阿怡先啱,佢係後面追咗上嚟?
「喂你點啊?」
「唔知做咩……好暈。」我有氣冇力咁答,「扶我埋去一邊先啦……」
佢將本來握住我膊頭嘅右手慢慢移到近腰嘅位置,我以為佢要扶我起嚟,但係好快佢連左手都晾住我隻腳,我順勢就咁畀佢抱咗起嚟,而且仲要係公主抱。
「傻咗啊?你……你做乜嘢?」
「帶你返去學校。」
我不斷咁想推開佢,但根本無多餘嘅力氣,「你叫老師好唔好,呢度畀好多人望住。」
就算呢個係「我」,畀佢抱住都個感覺都係好GAY,我接受唔到……而且真係畀人望住,到底佢做乜,係咪當自己拍緊戲……
「喂啊!」
「唔好嘈,我掟你落河吖啦。」
痴線,咩人嚟㗎,一直以嚟都係完全係蠻不講理、自把自為、想點就點、懶Cool、自戀集於一身嘅怪人嚟。
「你好放開我啦,我自己行返去,我完全唔知你想點,你放開我……變態、白痴……你到底諗乜嘢。」
我一次過豁晒出去咁鬧佢,亦不停咁樣掙扎,不過因為太細聲同軟手軟腳,根本一啲用都冇。
「我鍾意你。」
「咩……你講咩話?」我以為自己聽錯。
「我話我好似鍾意你。」