蘭若生春夏
2020-08-20 22:52:40
係商場行緊嘅時候,無意間經過塊鏡前面,我停低咗落嚟咁望咗望,手好自然咁撥鬆瀏海,之後唔知做乜對塊鏡苦笑咗一下,唉,我係度做緊乜……
就算係咁,阿怡個樣睇起嚟都笑得好甜,想像唔到而家咁同我初初識佢嗰個短頭髮戴厚框眼鏡嘅係同一個人。
不過可惜,佢唔鍾意女仔嘅打扮,而且仲鍾意女仔,更可惜嘅係,入面嘅靈魂而家竟然係我,佢應該見過自己而家呢個樣,所以先選擇戴厚框嘅平光鏡,剪咗個短短地唔起眼嘅頭髮,講嘢先會咁粗聲粗氣。
我諗對於佢嚟講,生得靚唔係值得開心嘅事,胸大係累贅,更加唔洗講每個月循例都會又痛又煩,我呢段日子都深深體會到,我咁諗諗下……突然就好似代入咗佢嘅感受。
但係佢真係生得唔差,尤其係打扮下之後,嗰日係自己屋企嘅時候,換咗家姐套衫之後,我承認真係望到入咗迷……
等等等等等!我係度諗緊乜嘢!唔好唔記得,佢性格係一個好惡劣嘅人,根本一啲都唔可愛,仲可以同我冷戰到而家……
唉,諗到呢度我又嘆咗嘆氣。
「家姐?」身後突然有人嗌咗我一下。
我擰轉頭一望,阿聰企咗係我後面。
「仲諗住你一朝早走咗去邊。」
我一時口啞啞:「我……我……Er……你出嚟做咩?」
「幫手,去超市再買啲嘢,你……做咩又剪短咗頭髮?」
「諗住就快春天……清爽啲吖嘛,哈哈。」我繼續話,「唔講啦,唔係話買嘢咩,我同你一齊。」
「但係……」
「行啦行啦。」我推郁佢背脊。
我就咁跟住阿聰後面行去超市方向,雖然平時同佢係屋企會有兩句,但唔知點解……同佢單獨咁出街突然有少少尷尬。
佢係個唔多嘢講嘅人,字字精短,唔知真Cool定假Cool,同佢家姐個性格真係有八成似。老實講,我有啲怕同呢類人相處,成日好似深藏不露咁,睇唔清佢諗緊乜。
我同阿怡兩個人性格咁大反差,呢半年嚟我諗就算佢無懷疑到乜,但按道理應該察覺到有邊度唔妥……
唔知阿怡同佢本身關係係點嘅呢?如果係好Close嘅,咁咪一早穿咗煲?可惡……咁遲先意識到呢個問題,而家咁同佢咁僵根本無機會問到……
諗諗下嘅時候終於到咗,嗯……年尾嘅超市真好係好多人,周圍都人頭湧湧咁,條龍仲長到去門口。
我問阿聰:「要買啲乜嘢?」
「紙巾……洗衣液,其餘無咩特別嘢,睇下想要啲咩買返去擺低。」
不過有咩好買呢……過年啲糖啊朱古力已經有,去拎紙巾同洗衣液嘅時候,我順便拎咗兩包棉條,唉真係好麻煩,呢啲嘢用又用得快。
講係咁講,到最後我地都係買到一車嘢,走咗去排隊。就快到畀錢嘅時候,我先見到Haagen-Dazs特價。
我望向阿聰,「可唔可以拎……」
「嗯。」
「好耶!」我手快快咁放咗上車。
到頭來我地買咗兩袋嘢同兩條紙巾,阿聰畀緊錢嘅時候,我想試下單手拎一袋,結果完全唔夠力,只可以雙手勉強抽起,雖然話有牛奶同洗衣液呢啲液體……但無理由重得咁誇張。
「陣間我拎啦,你擺低先。」
「喔……」我心有不甘咁放低。
阿聰輕鬆咁抽起咗兩袋嘢後同我講:「你拎唔拎到紙巾。」
「拎到!」我抱起咗嗰兩條紙巾係心口,至少呢啲嘢……都仲拎到,係個胸頂住咗少少。
「咁行啦。」
返去嘅路上,我又開始煩惱緊同阿怡嘅事……
「你做咩?」阿聰突然叫咗我一下。
「咩?咩做咩嘢?咪拎緊嘢行緊……」
「唔係,我係話你呢排做咩……又唔開心咁。」
乜……乜真係咁明顯咩,連唔開心都睇得出,不過細佬……同你真正嘅家姐冷戰呢種事,邊有可能講畀你聽。
「無……邊有。」
佢深呼吸咗一啖,「難得……你而家咁樣,咪好……唔好再以前咁一個人收埋收埋。」
收埋……諗返起當初阿怡,確實係成日有心事咁樣,係同我交換後先變到唔同咗……
「好唔好啊家姐。」
「好……」我唯有代阿怡答佢。
睇嚟阿聰真係好關心阿怡,但正因為咁,我嘅煩惱又多咗,而家有心事嘅人係我,責任變咗係我度咁……如果我同阿怡換返去,佢會唔會又變返以前咁又再唔開心,如果換唔返去,我無可能一世都扮阿怡,係咪應該要坦白……
至於我呢?雖然睇起嚟無可能……但我都想可以同自己鍾意嘅女仔拉埋天窗,有可愛嘅仔女……點解我會搞成咁……