最近多咗好多好多新加入既巴絲打一齊砌模型抗疫
小弟就係到講下幾種**素組**會用既工具 素組意思即係不上色
下面我好直接咁講我個人觀點 不喜勿插
先講下一把係模型界出哂名既剪鉗 神之手 SPN-120 討論度極高
優點:個人極力推介唔打磨既玩家買 減少水口發白
缺點:價錢極貴 易崩刃
神之手好處係當你貼住水口剪係極少發白 所以係極適合**不打磨人士**用
但如果你係打算打磨既 通常都預留少少水口1-2MM左右磨落去
咁呢個時候神之手係完全廢左武功 亦都用唔到佢既特性同優點 用一把普通剪鉗都搞掂
筆刀
個人上水貼先用 開包裝袋
有好多人都會用黎批水口 但極講求技巧 我唔推介新手咁做 一唔小心就見血
同埋有神之手既出現 筆刀對我黎講只係剩返鎅水貼同cut砂紙有用
Cutting Mats
用得筆刀就要買 各大SIZE自己決定 文具店12蚊店都有
模型鋪有牌子既就自己鍾意 個人覺得都係咁用 買平既就算
鑷子 直/彎
上水貼 微型控制用
打磨篇
砂紙/打磨板
平面打磨我會配合打磨板使用 可以自己用膠板配合雙面膠
如果慳錢既可以就咁剪張砂紙落黎 對摺黎三下用 咁樣唔會太軟 又有力度
市面上亦都有好多現成既打磨板同貼哂雙面貼既砂紙方便大家
以下係小弟打磨既心得
平面打磨:
田宮400號-->3m紅色海綿砂紙(superfine)-->3m藍色海綿砂紙-->3m綠色海綿砂紙
先用400號磨平水口位 再跟住紅藍綠咁去 咁你個水口位已經係好靚
如果打算上色既 磨到藍色都夠
曲面打磨:
3m紅色海綿砂紙(fine)-->3m紅色海綿砂紙(superfine)-->3m藍色海綿砂紙-->3m綠色海綿砂紙
曲面都係跟住綠藍綠咁磨落去 都係打算上色磨到藍色就夠
3m紅色海綿砂紙有唔同型號 fine係320-400號左右 superfine 500-600左右
3M砂紙鴨記10蚊有找 唔好去某D模型鋪賣廿蚊張既比人當水魚
以下再講進階少少既素組 滲線同消光
呢兩樣野真係模型界魔術 極力推介新手玩埋呢兩個step
滲線: 突出返高達/模型本身應有既線條同陰影
消光: 消除打磨後既痕跡 同埋本身模型膠件既膠質感
田宮滲線液
用法上網已經好多 睇片比較易明 所以我都唔多講
X20 滲線液溶濟/白電油
千奇千奇唔好買錯係溶水性既X20A 好多新手成日撈亂
田宮滲線液係琺瑯油 一定要用X20黎溶
用法:
用棉花棒 點少少再用紙巾印一印先好用 抹時記得輕輕力
***千萬唔好拎太多當佢水咁用 爆件唔好問點解***
如果真係好驚好驚爆件既 可以用白電油 但都唔係保證100%唔爆件 同埋好臭
消光
呢種新款水性消光係減低咗好多白化既機率 比起以前油性消光係好用好多
用法亦都同油性消光唔同 所以就去片 自己睇
https://youtu.be/OqhbetaHEwg
暫時應該都講完素組應有既工具 工具有好多唔同既用法 呢樣就等大家再自己去深究
小弟都係第一次打咁大篇文出黎 希望各位高手插細力D