韓國人氣綜藝節目《Running Man》(RM)早前宣佈唔會接埋,繼續由六位成員宋智孝、李光洙、金鐘國、劉在錫、HaHa、池錫辰演出。而《RM》由今個月10號開始舉行「RUNNING MAN 2017 LIVE TOUR」亞洲巡迴粉絲見面會,首場於台灣舉行,今晚就到澳門站,預計下月尾將舉行香港場。雖然今次見面會只得五位成員演出,劉在錫未有現身,不過粉絲都超級興奮,一早去到場外爭住跟海報合照。
開騷前,五位成員首先接受傳媒訪問,眾人以紅色或者金色嘅打扮現身,智孝更騷腿示人。問到首次澳門開騷,對澳門嘅第一印象,金鐘國表示:「係華麗嘅城市,好期待,好開心。」至於會唔會去澳門塔跳笨豬跳?所有男成員都表示:「接受唔到。」仲叫智孝去跳,智孝就話:「我已經試過,會推薦其他成員去。」池錫辰就推薦金鐘國,不過連「能力者」金鐘國都強烈表示唔想試。
光洙表示拍攝時曾經嚟過澳門,當然已感受到粉絲嘅熱情,希望今晚有好嘅回憶。問到智孝係咪有個人驚喜表演時,佢表示:「跟成員一齊準備咗好多,唔止個人表演,亦有跟其他成員嘅合作演出。」其他成員就大讚智孝好性感,智孝即時表現得好怕醜。
提到《RM》於台灣場扮天團BIGBANG,HaHa表示:「準備咗好多精彩環節,睇吓大家夠唔夠熱情,如果熱情我哋會好落力表演。」
問到《RM》嘅撕名牌環節好經典,今年會唔會有新環節時,池錫辰表示:「練習咗好多撕名牌,所以應該可以表現出新嘅一面,今年亦有準備新環節,希望大家期待。」
至於節目外,成員有冇私下約埋見面去玩,金鐘國答:「節目播出嘅一面就係私下嘅一面。」池錫辰跟光洙更即席跟住音樂郁身郁勢。
問到嚟緊係唔係有香港站,成員就透露:「仲傾緊,不過機率好高。」
而大陸歌手魏晨就擔任嘉賓,送花及簽名CD畀成員,魏晨表示:「今晚會唱新歌,我自己都好鐘意《RM》,係佢哋粉絲。」
http://hk.apple.nextmedia.com/enews/realtime/20170218/56322642