我鐘意睇電影,而咁多電影,就特別鐘情Cult片。
點解?就因為我沉醉於果種「枕頭與拳頭」的形而下所結合嘅娛樂感。
Cult片對好多只鐘情純粹悶藝電影嘅影迷嚟講,它只不過是nothing,但對我嚟講cult片係我生活所需嘅一部分,雖不至於將它比喻為糧與水,但說它是廁紙也不為過。
仲記得最初第一次接觸cult片係小學時代,亞視半夜所播嘅一套怪雞片,片名同劇情已經印象模糊到接近完全唔記得,只記得片中主角係一個思覺失調嘅男人,圍繞住佢所發生嘅事情都係怪雞非常。
當時我跟本唔知自己所睇緊嘅係cult片,只感覺到點解齣戲咁古怪嘅。
跟住若干年後嘅90年代中期,剛出來社會工作的我,第一份工就係喺旺角信和M樓賣二手LD,冇錯,係LD,年紀輕嘅朋友可能唔知係咩,LD即係LaserDisc,最初代嘅digital產品,成隻黑膠碟咁大,雙面,睇到一半嘅時候要自己反碟,好麻煩,所以後來比vcd取替。
果陣日日返工就係睇碟睇碟同睇碟,由中午12睇到夜晚9點都係不斷睇碟,份工做咗兩年左右,果1兩年所有鋪內港產片外語片熱門片冷門片我都會睇,逐漸發現咗原來好多冷門片都係好怪雞,有d劇情天馬行空到你諗都冇諗過,有d就血腥暴力到好似血漿大平賣咁。
當時「cult片」嘅個學名仲未喺香港出現,所以當時嘅電影撚賜封哩種類形片叫「怪雞片」。
後來互聯網開始發達,可以搵到嘅電影資料更多更豐富,而我終於知道自己由細到大所留意到嘅類型片叫「Cult片」。
亦知道外國cult片市場係一路奇兵,更發現喺香港70年代電影新浪潮,cult片係曾經盛行一時,打蛇,第一類型危險,女集中營,山狗,五毒,邪,……數之不盡。而好多當今影壇大導好似徐克,許安華, 牟敦芾初出道都拍嘅實驗電影依家睇返都被視為cult中經典。
Cult片看似品味低俗,血腥暴力,咸趣怪雞,但冇咗佢日常生活就會好唔慣,每次我唔開心,需要發洩,需要自我安慰,它就係我心靈雞湯。