（還要走多遠）尼馬故外傳之香港殺入世界盃（2）

當佢係香港伊巴咪得
30幾歲傷膝都可以比預期中早咁多復出

性交療法

梁sir 好波！
唔洗gary 踢足 但求上過場我都滿足
睇埋gary 踢世界盃就真係完了

其實呢個時間線嘅gary幾多歲?同埋佢幫完利記拎完聯賽之後仲有冇贏到其他冠軍?

34歲

拎英超之後個段時間空白左冇寫
大家自行幻想啦

去巴塞著11號 呼應返尼馬頭

狠狠一推

聽日有文～

算你啦 落到場5分鐘就可以啦

對葡萄牙以隊長身份正選上陣，同飛兒握完手開波踢五分鐘就換走

第五十八章


五月十日，距離世界盃決賽週四十天。


「歡迎收睇球迷世界： <<香港，向世界出發>>，我係丹尼爾。」

「我係伍家謙。」

「世界盃如戰在弦，各國備戰工作進行得如火如荼，對我地黎講，當然最關心香港隊既備戰情況。」

「冇錯。首度參戰世盃既港隊，第一場比賽會係六月二十六日於阿根廷羅薩里奧出戰葡萄牙；五日之後轉往布蘭卡港迎戰洪都拉斯，相信港隊教練積sir（積甸拿克）已經積極部署呢兩場比賽。」

「講到球員，最令人期待既當然係我地既外流三子：德仔﹑發仔﹑光仔。三位小將最近狀態似乎唔錯，其中以效力鹿島鹿角既梁令德表現最為搶鏡，近五場比賽均取得入球，高踞日職射手榜第一位。」

「除左外流三子，積sir應該會繼續沿用外圍賽既骨幹。隊長翰林﹑高尼路﹑真迪歷﹑謝家豪等，如無意外會悉數入選25人大軍名單。」

「不過，球迷最關心既始終都係風之子，呢位曾經叱吒歐洲球壇既本土球王。」

「一月作客巴塞隆拿時拉傷舊患，起初被診斷需要養傷八個月既gary，經過氧氣箱治療之後，據報情況大有好轉，積sir正考慮是否將狀態不足既佢，列入世界盃大軍之中。」

「作為香港球員登陸頂級聯賽既開山祖師，每個香港球迷都希望見到gary披上港隊戰衣出戰世界盃。不過，昔日既風之子已年屆34，到底佢能否擺脫傷勢一圓世盃夢？抑或將會完全退居幕後？」

「一個月後，大家將會有答案。」



-------------------------------------------------



同日下午，美國洛杉磯。

為了積甸拿克領隊的一番話，我決定辦妥了香港的事情後，再度造訪鄧肯。並非不相信香港的物理治療師，而是鄧肯一直照料著我的傷情，最清楚我的狀況。

只見鄧肯望著我的x光片反覆檢驗，不時皺眉搔頭。



「不妨直言呀，老友。」我道。



幾個月前，我對出戰世盃已經打定輸數，哪知氧氣箱的療程卻出乎意料地有效，加上積甸拿克決意要把我徵召，使我決心要康復過來。

然而，鄧肯的表情告訴我，這是我的一廂情願。

「老實講，」鄧肯道。
「氧氣箱療程令你既肌肉組織復原得快，但你鼠蹊患處康復進度，卻依然緩慢。避重就輕既話，跑下步﹑游下水﹑什至踢下衛生波都問題不大，但要落場踢職業賽，仲要係世界盃，我絕對唔贊成。」
「繼續氧氣箱療程，有可能令我一個月後服出？」我但求一個答案。


鄧肯卻搖搖頭：
「時間太短，即使你自我感覺良好，強行復出一定會影響你長遠既健康。」




我陷入兩難局面。世界盃是每個足球員的夢想，古往今來，不少球星寧可漠視後遺症也要打止痛針上陣，最終導致傷上加傷。我自己知自己事，一把年紀積患已久，強行出戰下場只會一樣。

正如鄧肯所言，氧氣箱雖令我恢復一般運動能力，但若然入選大軍，即使不落場比賽也要參與操練，當中的強度遠超負荷水平，是我身體承受不了的，情形就如一枚在懸崖邊的雞蛋，只要輕輕一吹，便會粉身碎骨。




「總括而言，作為你既醫生，站於運動效益既立場，我絕對反對你強行出賽。」鄧肯說。
「不過，站在朋友立場，我明白世界盃對你有幾重要，應該交由你自己決定。」
「………」




我撫著腹股傷處，突然想到多年來音訊全無的李察。若他在的話，或許能研製出一種「特效復原藥物」，讓我奇蹟恢復狀態踢世盃……這當然是妄想，他已移居與世隔絕的不知名島國，或許連足球也再沒有留意。








離開鄧肯的診所的當晚徹夜難眠，又想到積甸拿克領隊那日跟我說的一番話。



「我決定將你列入決賽週大軍。」他說。
「領隊，我已經無望回復狀態，你又何必多此一舉？」我道。
「難道你唔想一嘗決賽週滋味？」
「作為足球員，有邊個唔想？」我反問。
「但天意要我喺呢個時侯受傷﹑要我退居幕後幫助新一代，倒不如將名額留俾年輕球員，毋須為我想得太多。」
「你以為我選你入伍，純粹係幫你完成夢想？」積甸拿克問。
「作為領隊，我選人只會以球隊利益為考量。冇錯，要你上陣比賽的確困難，但我需要既係你帶來既正能量。由宣佈無緣世界盃，到克服傷患奇蹟復出，正正係激勵士氣既最佳方程式。」
「我落到場既機會，少於5％。與其竊据位置，倒不如給予年輕球員機會。」我起初堅持。
「你錯了。」

「gary，你係風之子，係香港傳奇。」領隊續道。
「你既故事，陪住年輕一代成長，能夠同你一齊踢世界盃，亦係佢地既夢想。對佢地黎講，有你做後勤就等同一粒定心丸，冇一個球員會唔服。」

他頓了一頓，續道：
「況且，香港經歷過革命洗禮，此時此刻，實在好需要見到李文翰踢世界盃。你要明白，呢個唔止係球場上既事，更加係所有香港人既事。」
「領隊，想唔到你對香港都咁有感情。」我苦笑。
「教左香港隊四年，雖然我唔係香港人，但同當年kim sir一樣，我願意die for Hong Kong。」




Die for HK，一直以來都是香港足球隊專用的口號。當來自澳洲的積甸拿克也有著這份信念，作為土生土長的香港球員，我當然也願意為香港而死。

三日之後，我回到香港，一邊繼續接受氧氣箱治療，一邊加緊操起狀態。領隊已表明我在大軍中的角色，但為了激勵士氣，我更加要為年輕一輩樹立榜樣。










5月22日，我的舊東家利物浦相隔三十多年後再度成為歐洲盟主，亦代表球會賽事的終結，萬眾期待的世界盃即將開鑼。

在遙遠的日本，日職聯為遷就世界盃暫時休戰，德仔收拾細軟準備翌日返港，門鈴卻忽然響起。




叮噹！




「係妳？」德仔又驚又喜。
「意唔意外？開唔開心？」里香笑逐顏開。
「點解妳返左黎？探望你哥哥？」德仔問道。


里香搖頭：
「我哥哥去到邊都大把人跟住，連我都埋唔到佢身啦！我係黎搵你架。」
「搵我？」
「之前你喺香港發生咁大件事，我都係睇網上新聞先知悉，仲好講。」
「咁……個陣怕牽連太廣，所以我冇向任何人透露行動。」德仔道。
「你當我係朋友既話，就唔應該粒聲唔出走返去擋警棍擋子彈！擔心死我了！」里香嗔道。
「對唔住……」德仔道歉。
「依家已經雨過天晴了，完成下星期既友賽之後，我軍就會出發去阿根廷。」德仔道。
「原來如此，太好啦！」里香道。
「？」
「你需要一位跟班助手嗎？」
「跟班助手？」
「冇錯！你又唔識西班牙文，去到語言不通，我可以做你翻譯。」
「香港足總幫我地安排左翻譯，我諗唔洗……」
「點同呀？你都有自己既私人時間，行下街觀光下都要既。況且……」里香調皮地笑。
「我近排有d手頭緊，但又想去南美睇世界盃，所以……」

第五十九章


德仔忍俊不禁，兜了個大圈，原來她想自己請她一同到南美洲。



「咁就奇怪喎，」德仔道。
「妳貴為太空翼親妹，想去睇世界盃都要搵我呢個外人？」
「我先唔會求佢！」里香不屑。
「日本人一向經濟獨立，何況哥哥一直反對我花錢學外語遊歐洲，成日話女仔應該安守本份，留喺日本生活。哼，佢自己生活就多姿多彩，我就要留喺度相夫教子？」



德仔一笑，想不到太空翼貴為國際球星，卻有著日本重男輕女的迂腐思想。



「我已經請左假買左機票，聽日同你一齊返港。」
「上次喺香港玩得唔夠盡興嗎？」
「玩？no！」里香搖頭。
「做得你助手，當然要入場支持香港隊啦！」
「難道妳唔支持日本，要做『日奸』？」
「日本我當然都支持……到你真係有機會同我哥哥碰頭，我先再諗支持邊隊吧！」




這句話似乎在暗示香港出線機會微，難有機會挑戰日本，使德仔微感有氣。但他天性不記仇，在里香面前亦不敢發作。




里香笑問：
「你係『民間特首』，返到香港機場一定好多記者，唔怕俾人見到我地一齊？」
「又唔係唔見得人既野……我不嬲唔理佢地（記者）。」德仔道。
「反而係妳，體委會件事雖然解決左，但香港社會仲係好唔穩定，妳肯定要去？」
「有咩好怕？你地第一次參加世界盃，氣氛一定好好，我正想感受一下。 」
「好，明日出發。」德仔微微一笑，有里香作伴，心底還是歡喜的。




四年一度的足球氣氛蓆捲全球，不穩定的足球政治，卻不止發生於香港。

距離世界盃揭幕還有二十日，主辦國之一﹑熱門球隊阿根廷，卻在此時發生兵變。

「突發新聞：阿根廷足總今早宣佈解僱少帥莫路伊卡迪，由全無執教經驗既球王美斯，接任領隊一職。」

「是次政變既原因，相信同伊卡迪上月被爆出同國腳洛迪古斯既太太有染既性醜聞有關。事件震驚全國，舉報道，國家隊上下對領隊『師佔徒妻』既行為大感憤怒，遂向阿根廷足總迫宮，要求解僱伊卡迪，否則將集體杯葛世界盃。」

「有傳言，醜聞係由早年同伊卡迪有牙齒印既球王美斯爆出，如今美斯接掌阿根廷帥印，更加令傳聞甚囂塵上。」

「無論如何，球王即將帶領阿根廷出戰世界盃，令舉國人民引頸以待。畢竟美斯球員年代同世界盃無緣，阿根廷人自然希望佢以另一個身份，衝擊即將完成歷史任務既大力神盃。」

「當然，各國球迷亦期望美斯既阿根廷隊﹑能夠同另一球王丙朗領軍既葡萄牙隊碰頭。球員時代既瑜亮之爭屬於永恆經典，兩位球王由場上鬥到場下，本屆世界盃更加舉世矚目。」

「突發新聞報導完畢。」







兩大球王領軍出戰世盃，成為揭幕前的國際熱門話題，我們卻一於少理，專注於自己的熱身工作。

五月的最後一天，港隊於主場迎戰歐洲球隊阿爾巴尼亞，作為出發前最後一場世界盃熱身賽。

噠！

「屌！ 」




開賽十六分鐘，我軍率先被無緣世界盃的阿爾巴尼亞攻破大門，看來領隊仍須對防守工作多下功夫。

幸好，臨近正賽，一班攻擊手繼續保持佳態。





「呢邊呀！ 」
「收到！」




德仔在邊路騙過一人，大腳傳至遠柱，光仔踏順步韻凌空一射，直飛遠柱死角，於上半場完結前追成一比一。





咚咚咚……

「HONG KONG！HONG KONG！HONG KONG！ 」




雖說是熱身賽，但這是港隊出發前最後一場主場賽事，大球場繼續坐無虛席。一班小將亦沒讓球迷失望，下半場一直主導比賽，並由德仔於74分鐘射入奠勝一球，二比一勝出這場比賽。

賽後，球迷繼續留守大球場，為兩日後出征的港隊餞行。



「gary！gary！ 」



我已經不必靠拐扙行動，走到場邊跟一班熱血球迷打牙骹。他們不斷追問我的傷情﹑能否趕得及上陣等，我只是微笑不答。

港隊的另一焦點自然是德仔，除了足球之外，記者及球迷對於上星期跟他一起步出赤臘角機場的女郎，亦大感興趣。



「德仔德仔，個女仔係咪你女朋友呀？ 」
「聽講佢係日本射手太空翼既親妹喎……你地係咪行埋左呀？」
「無可奉告，多謝大家。」



對於這種八卦新聞，德仔實在厭惡之極，因此賽前特別叮囑里香避免露面。



「真係估唔到我做左你媒人。」我本想取笑德仔，見他臉現尷尬之色，遂補上一句：
「放心，我同里香只係好朋友，你唔洗驚變成另一個伊卡迪喎！ 」



德仔更加尷尬，雙頰瞬即通紅。

六月二日，赤臘角機場人頭湧湧，送行的香港球迷迫滿了整個離境大堂。港隊大軍連同職員教練四十餘人，浩浩蕩蕩的出發前往南美阿根廷。



「gary！ 」
「呢件係……」



送行的其中一位嘉賓，是新任體委會主席郭嘉亮。入閘前，他向我遞上一物，拍了一幅照片。

這是一件港隊主場球衣，背後印著G.LI－10的字樣。
















六月四日，香港隊確定25人大軍名單及號碼。

1－謝家豪GK
2－陳俊傑DF
3－胡仲光MF
4－高尼路DF
5－真迪歷DF
6－林尚偉DF
7－陳偉拿FW
8－張世濠DF
9－梁令德FW
10－李文翰MF
11－藍美聰MF
12－劉軍宜DF
13－史葛皮恩DF
14－大力士MF
15－魏超GK
16－域陀FW
17－李翰林(c)MF
18－山度士FW
19－禾哥DF
20－金默基FW
21－劉尚發MF
22－樊晉葉GK
23－李海弱MF
24－林加維MF
25－胡國洪MF

*註：GK代表門將﹑DF代表後防﹑MF代表中場﹑FW代表前鋒



－－－－－－－－－－－－－－－－－－－－－－－－－－－


待續。

25人大軍大部份人名取自歷代香港球星
大家應該估到係邊d球員