放學的時候,布正麗再次自作主張,說我請自強會的會員食壽司。
我不滿道:「喂!阿姐,你今日屈我請食威水飯食咗成皮幾野!我贏番嚟嗰啲差唔多無晒架喎!」
布正麗道:「你贏番嚟嗰啲係不義之財,污糟架!洗晒佢咪仲好。」
「錢邊到有分乾淨同污糟架?」
「喂!其實你扣咗幫榮仔老豆還錢嗰三十萬仲淨番幾多啊?」
我從褲袋掏出了那疊鈔票,細數道:「得番一萬蚊左右。」
驀地布正麗兩話不山說,一把從我手上奪去了那疊鈔票,然後轉身走去。
我一時間不為意,被她搶去了一萬多元,立時從後追趕。
我比她跑得快,在四樓的走廊盡頭已經追上了她。
我見她氣喘吁吁的樣子,笑道:「妳無跑開步,唔夠我快架?唔好玩啦!乖啦!快啲畀返我啦!」
布正麗喘著氣道:「依啲不義之財嚟架!一係我幫你放入自強會到做會費啦!」
「唔好玩啦!我咁辛苦先贏場波,嗰一皮野畀我紮袋啦!唔該!」
倏地,布正麗把那疊鈔票由衣領塞入去恤衫內。
我瞠目結舌道:「妳…」
布正麗挺起了胸膛,一臉得意道:「依家你攞唔到啦!」
我唬嚇道:「妳睇死我?我癲起上嚟,我唔知自己做啲咩事出嚟架!」
布正麗扠著腰,瞪大著眼睛道:「你敢。」
我舉起了發顫的手,猶豫了一會,最後還是頹然道:「又話啲錢污糟,妳又擺晌心口到。」
布正麗現出勝利者的笑容,拍了我的肩膀一下,道:「我為你好咋!你今次贏錢係好彩,唔係次次都咁好彩架!唔好再賭喇!」
我咕嚕道:「仲敢賭咩!贏嘅都畀妳幫我散晒佢,真係終極無癮喇!」