春泥
2018-02-05 00:04:02
楊鳳瑤與布正麗化干戈為玉帛後,終於可以開始會議。
席間,我們相討應該在暑假期間舉行什麼活動?
我提議參加遊行,那些社運遊行有很多不同政黨參與,亦有傳媒的廣泛報導,是一個可以宣傳自強會的好機會,一群未成年的學生為一些具爭議的議題發聲,在當時沒有那麼壁壘分明的政治環境下,我們可以得到社會更大的關注與諒解,又不會被那些保皇黨與官媒鋪天蓋地去打壓,同時又給予政治冷感的同學們來個公民覺醒,我認為這是一個很好的活動。
另外,我又與阿益聯絡,為自強會有興趣習武的同學提供興趣班,以同學能夠負擔的價錢報讀。
此時,布正麗舉手道:「我有個提議啊?不如趁依個暑假,自強會搞番次BBQ大會吖!」
布正麗的建議,之前亦有會員提出過,我點頭道:「嗯,都好,自強會成立咗兩個月,好多會員互相都唔係好熟,依啲活動可以拉近大家嘅距離,令大家熟絡一啲,同埋因為出年就會考,我地中四級應該好難再聚,所以我想將個活動擴展到全校,如果有興趣參加嘅就報名,你地覺得點啊?」
管佳莉贊成道:「好啊!由各會員自己通知其他同學,有興趣就報名。」
陳依官道:「如果咁樣嘅話,隨時會有幾十人參加,我地要搵下邊啲地方可以容納到咁多人。」
管佳莉道:「咁不如去鯉魚門度假村喔?」
楊鳳瑤道:「依個提議好係好,但係應該會幾貴下。」
布正麗道:「依個問題大家唔需要擔心,我地嘅會長成皇志,之前捐咗一萬蚊入自強會,我建議動用依筆錢去資助今次嘅旅行。」
我聞言為之詫異,道:「喂!等陣先啊?我覺得啲錢唔應該咁樣用囉!」
楊鳳瑤幫腔道:「成皇志,你唔好咁小氣啦!我都覺得應該用依筆錢津貼依次活動,話晒都係自強會第一次舉辦嘅旅行活動。」
布正麗道:「成皇志,你成日話民主,嗱!我地投票決定啦!邊個贊成用依筆錢資助暑假旅行嘅,就舉手。」
布正麗率先舉手,然後管佳莉與楊鳳瑤亦舉手,陳依官瞧了瞧舉手的其他組員,再瞧了瞧我,然後亦把手舉起。
布正麗一臉得戚地道:「四比一,少數服從多數啊!主席。」