已讀不回死全家入面好明顯寫住佢已經Quit咗Group。
我頭先一時沖昏頭腦，一邊懷疑係咪柯志恒搞鬼，一邊又好好奇究竟佢係咪真係有方法Quit Group唔使死；所以行番出嚟嗰陣，我Cap咗張佢Quit Group嗰個Notification嘅圖，Facebook Send咗俾區家純：
Hei Yin Ho：
你講嘅Quit Group方法係真定假？ 18:33
喺我丟低啲電話叫楊悅盈佢哋通知同學嗰陣，區家純竟然問番我：
Au Stephy KS：
我Quit咗Group？ 18:34
——佢咁問得即係佢自己都唔知Quit咗；係柯志恒控制緊佢部電話？
但係點解佢仲覆到我？
Hei Yin Ho：
打俾我 18:34
然後我留咗我個手提號碼俾佢；半分鐘都唔使就有個2字頭嘅家用電話打嚟。
「喂？區家純？」我一接完個電話就問：「你真係未死？」
「係呀！你話咩我Quit咗Group？我無呀！」佢把聲好似就嚟喊出嚟咁。
「你部電話係咪喺柯志恒度？」都唔係懷疑，我幾乎肯定呢件事係事實：「佢用你部機Quit咗Group之後，引其他人跟住Quit…根本佢由頭到尾都只係想全班有咁多人死咁多人，自己做最後淨低嗰個！」
「我而家點算？」佢好慌張咁問：「我係咪會死？」
——你應該已經死咗！我心入面咁諗，但係講唔出口。
「無事架，你唔使驚。」我講完之後都有啲愧疚，因為好似俾咗個假希望佢咁樣。
區家純又講咗句唔知乜嘢，但係佢似乎已經無辦法冷靜落嚟；因為佢講嘅每一個字都帶住哭腔，我好難先聽得明佢講乜。
楊悅盈起身行咗埋嚟好似想同區家純對話咁；我已經無嘢好講，所以將個電話遞咗去楊悅盈面前。
「區家純…？你部電話喺唔喺自己度？」楊悅盈問佢。
「無呀！條仆街拎走咗呀！」區家純好激動咁爆番一句——條仆街，我哋都心知肚明係指緊柯志恒。
「千祈唔好叫佢俾番部機你…」楊悅盈語氣有啲唔肯定咁講：「你而家未死可能就係因為部機無跟身…」
「乜嘢？」區家純唔係好明楊悅盈講乜。
我都一樣，我完全唔知佢呢個結論點走出嚟。
「總之你而家無事，唔好做其他無謂嘢…」楊悅盈補充：「柯志恒同你講乜都好，唔好再信佢…」
「我唔攞番部機，如果有人Whatsapp我佢唔幫我覆我點算？」
「唔使驚…正如Quit完Group會即死，但係你而家都無事…」楊悅盈似乎想安慰佢，但係完全無效。
「你屋企有無人？不如…」我插咗句嘴：「你而家過嚟我哋度，我、楊悅盈、陳佩珊幾個都喺度。」
區家純一下Cut咗我線。
收咗線之後，我見到Admin又Send咗個Whatsapp俾我：
真是峰迴路轉呀（笑）
沒想過可以這麼精彩，一下又除掉幾個人了 18:45
我有啲忍無可忍，所以我覆咗Admin：
咁精彩你自己同佢傾撚飽佢
唔好再搵我，要搵就搵柯志恒條仆街 18:46
「部機無跟身…」陳佩珊開口問楊悅盈：「你求其噏咋係咪…？」
楊悅盈襟住自己額頭歎咗啖氣，隔一陣先答佢。
「我只係記得Jessica俾過佢部電話我睇…然後我就…」唔知係咪諗起都有啲驚，佢無講發生咗咩事：「總之…我懷疑Admin係用緊Jessica對我用嘅科技嚟、經過大家部電話嚟殺人，只不過…」
楊悅盈好似諗起啲嘢咁，忽然間兩眼一瞪。
「…只不過Intensity Tune大咗…？」
「無可能。」我唔係好明佢指乜，但係醒起一件事：「謝石俊死嗰陣…佢部電話喺允仔度架喎？」
楊悅盈搖搖頭，正想反駁——
「當時佢拎住羅彥輝部電話。」陳佩珊好似同楊悅盈諗法同步咗咁，對住我哋講。
賴智勇一直好努力咁通知、說服緊其他人唔好中伏而去Quit Group，啱啱唔知打完俾邊個之後收咗線。
「點都好！」佢大大聲講：「而家係咪叫咗區家純過嚟先會好啲？起碼我哋咁多人喺度，唔怕佢會做啲咩傻事。」
楊悅盈諗咗一諗，喺我手上拎走咗部電話。
「頭先區家純用呢個電話打嚟？」佢打開咗我個通話記錄指住最頂嗰個號碼問。
「嗯。」區家純部機喺柯志恒度，如果無估錯呢個係佢屋企電話嚟。
楊悅盈無講乜嘢，馬上襟咗「通話」打過去。
通咗…
但係無人聽…
楊悅盈有啲煩燥咁收咗線，然後再打一次過去。
「恐怕…Admin要殺某個人唔一定要經嗰個人本人部電話…」楊悅盈今次開口同我哋講佢嘅諗法：「可能只需要經已讀不回死全家入面其中一個成員部電話——」
都係無人聽；區家純唔知係咪出咗門口？
「——或者，最壞情況係，任何一部電話都可以成為Admin嘅武器…？」
唔好意思
