頭先楊悅盈話如果佢死咗,就幫賴智勇Quit Group嗰陣,我已經閃過呢個念頭:佢係咪覺得自己同賴智勇就係最後兩個關鍵人物?
我唔明點解,唔明佢點得出呢個結論。
惟一肯定嘅係,佢係認真想賴智勇死:幾日前我哋仲懷疑緊Billy係關鍵人物嗰陣,楊悅盈只係好模稜兩可咁叫我幫手殺死佢;但係今次對賴智勇就係好明確咁叫我
幫佢Quit Group。
「你睇下啲Message…」楊悅盈指住羅彥輝部電話講。
我烏前少少拎咗部機埋嚟,開咗個Mon。
「我一開始以為『關鍵人物』就係欺凌者…」楊悅盈開始解釋:「直至今日Admin更新咗情況之後,證實咗唔係,然後我就一直諗…究竟係邊四個人?」
我望一望佢——當然佢喺一片漆黑入面,我只係可以向佢把聲個方向望——等佢繼續講落去。
「你喺阿輝個Whatsapp度搵女班長啲Record出嚟。」
我終於打開咗羅彥輝個Whatsapp——雖然做咗心理準備,但係見到Billy佢哋臨死前Send過嚟嘅Message,個心乸仍然咗一乸。
終於見Elaine個名,我襟入去,得一條羅彥輝喺7月21號Send俾Elaine嘅Message:
不開心…有空嗎? 10:24
呢個Message隔離有個雙藍剔,下面無任何人覆過。
我唔知Elaine同羅彥輝原來有交情,但係諗深一層都唔出奇。Elaine一向都會好似大姐姐咁主動去關懷啲唔多出聲、內向嘅同學;事實上,我就係因為咁先會同佢做咗朋友。
「睇到未?女班長第一日死;Admin話第一死咗一個關鍵人物,吻合。」楊悅盈把聲開始有啲沙,佢清一清喉嚨之後再同我講:「然後你拉低少少睇鄧鐵雄啲Record。」
我開始用手指掃個Mon嗰陣,楊悅盈叫停咗我。
「睇最後一條Message,唔好睇埋上面嗰啲…」
7月23號,羅彥輝Send咗一條Message俾鄧鐵雄,同頭先一樣,俾鄧鐵雄雙藍剔咗:
有時間嗎,想見面聊聊 13:20
「鄧鐵雄係前日同其他人一齊死,所以尋日Admin報告再有一個關鍵人物死亡,吻合。」楊悅盈窒一窒,然後深呼吸咗一啖:「到今日Admin話過,佢每日都喺度俾緊提示我哋…你有無諗起啲乜嘢?」
「佢除咗每日報告咩人死咗、點死、同埋重新講啲規則之外,唔係日日講嘅嘢都唔同?」的確,我淨係諗起呢幾樣嘢。
靜咗一陣,楊悅盈塊面忽然間喺黑暗中出現:原來佢開咗自己部電話睇緊嘢,然後就講咗兩句我哋最近每日都會睇到一次嘅嘢:
「大家好!關懷同學由Whatsapp做起!
讀後回覆是基本禮儀,已讀不回的人都去死吧!」
我個心慌咗一下,開始搵賴智勇同羅彥輝嘅Chat Record;楊悅盈見我掃緊電話,似乎已經知我意會到佢想講乜,所以今次無出聲。
羅彥輝7月21號Send俾賴智勇——然後俾佢已讀不回嘅Message——係:
上班不開心
令我想起很多事,不開心 20:48
呢個時候,我抬起頭望過楊悅盈度,正好同佢四目交投,終於留意到——原來佢流緊眼淚。
「最後…你——」
「得。」我打斷咗佢;唔知點解唔想聽到佢親口講出。
我搵咗楊悅盈同羅彥輝個Record出嚟,佢7月20號Send咗幾個Message出嚟:
在嗎? 18:34
好不開心 18:34
有空見個面嗎? 18:35
好久不見了 18:50
最近有在忙甚麼嗎? 18:51
班上的同學怎樣了 18:51
在做甚麼 19:24
回家了沒有 19:36
明天下午有沒有時間 20:12
你忙完就覆我一下吧! 20:18
能不能找天出來,我想和你聊聊天 20:49
同Elaine、鄧鐵雄同賴智勇一樣,楊悅盈啲Message全部雙藍剔;惟一分別就係楊悅盈有回覆:
OK呀,你想幾時出嚟? 13:43
但係楊悅盈覆嗰日已經係7月26號——羅彥輝自殺嘅三日後。
睇到呢度,我忍唔住望咗楊悅盈一眼。
佢眨眨眼,又有兩滴眼淚流出嚟,沿住佢面珠條淚痕滑落下巴。
「咁唔代表啲乜嘢。」我口是心非咁講咗一句——其實我心知肚明佢講嘅嘢好有可能係真——然後將羅彥輝部電話熄咗放喺書枱上面。
「咁已經好足夠…」楊悅盈講完呢句,啱啱好佢個電話Mon夠時間自動熄咗,成間房變番伸手不見五指咁黑。
「足夠咁你點解唔自己Quit咗個Group佢?」我有啲嬲。
隨手拎起其中一部電話——我都唔知究竟係我、賴智勇定係羅彥輝嗰部——隨手向楊悅盈個方向丟過去。
「你幫賴智勇Quit撚埋佢吖!咁咪搞掂囉係咪呀?」
楊悅盈無出聲——我想像到佢又開始喺度搖頭——然後我聽到佢細細聲喺度喊。
我忽然間又嬲唔落…
我摸黑爬咗上床,肩貼肩坐咗喺楊悅盈隔離。
佢挨咗落我膊頭度。
我哋兩個都無再講嘢。