何晞賢
2017-09-29 18:38:22
何晞賢屋企個廁所雖然唔大,但係環境好過楊悅盈屋企嗰個好多。
佢將頭先喺床上面拎過嚟、應該係何晞賢家姐阿媛借俾佢嘅衫掛喺門後面;當佢除埋自己嗰件掛喺隔離嗰時,先發現阿媛啲衫對佢嚟講可能會有啲大件。
除咗眼鏡,打開洗手盤個水龍頭洗咗下面,然後佢望住鏡入面嘅自己,定神望咗一陣之後有種好奇怪嘅感覺:原來平時人哋睇自己、同自己對話,就係望住鏡入面呢個女仔作為對象;十幾年以前每日以第一身視點咁睇呢個世界,到頭來反而對自己個軀殼有啲陌生。
行入沖涼位,楊悅盈打開水掣,花灑啲水就由頭淋落嚟;佢合埋眼感受住啲暖水流過自己身體嘅觸覺。
頭先同何晞賢講,用愛感化Admin…
純粹係一個誇張咗嘅講法。
楊悅盈其實係希望——哪怕Admin只係一個羅彥輝嘅模擬器——都可以說服到佢唔好再殺死任何一個剩低嘅同學。
曾經都係校園欺凌嘅受害者,佢好知道嗰種係乜嘢感覺:每日至少有七八個鐘被迫同一啲自己又憎又驚嘅人困埋喺同一個地方,每一分鐘、每一秒都唔知幾時會有事發生。
但係無論如何,佢都唔會想郁手去傷害任何人;唔知自己係太過懦弱唔敢還手,定還是大過善良唔想反擊,總之就係唔會。
楊悅盈記憶中嘅羅彥輝,應該都係呢種人。
所以佢諗住自己搏一搏先。
閂咗個水,拎咗條毛巾過嚟抹。
Jessica嗰邊唔知打緊咩主意,想佢哋叫晒全部同學上去,楊悅盈去到之後會連累到其他人有危險;所以唔到最後佢都唔想咁做。
放低條毛巾換番啲乾淨衫——啲衫比佢想像中啱身——
——而且佢留意到係啲大學Ocamp Tee,原來阿媛同自己阿哥同一間學校,睇年份仲好似係同年入U。
離開廁所出番去之後,見到何晞賢瞓咗喺梳化度襟電話,同坐喺旁邊嘅家姐喺度唔知傾緊乜嘢,但係佢哋一望到佢沖完涼出嚟就收咗口。
「毛巾拎去廚房丟入洗衣機。」何晞賢指住廚房講,但係俾佢家姐「啪」一聲喺心口打咗一掌。
「仆街仔,過門都係客吖…」阿媛細細聲——雖然楊悅盈聽到——咁對佢細佬講完,就企番起身行去楊悅盈面前,拎走咗佢條毛巾行入廚房。
「唔該。」楊悅盈講咗一句之後,就喺飯枱拉咗張櫈出嚟坐低。
「使唔使煮個麵你食?」阿媛喺廚房入面問。
「好,加芝士吖。」繼續攤喺梳化度睇緊電話嘅何晞賢答。
「唔係問你呀!」阿媛有啲惡咁回應一句。
「唔該吖…」何晞賢再講咗一次。
楊悅盈今日差唔多乜都無食過,俾佢哋咁樣一講終於覺得有啲餓…佢有啲戰戰兢兢咁行入廚房,見到阿媛背對住自己喺個洗手盤前面。
「呃…姐姐?」楊悅盈嗌咗佢一聲——第一次同人哋見面就直接叫人個名好似唔太好咁。
「啊?做咩?」佢擰番轉面,對住楊悅盈笑一笑。
楊悅盈見到佢用個湯煲裝緊水,爐頭隔離放咗幾包公仔麵。
「好呀,唔該…」楊悅盈感覺到自己有啲面紅,一來怕陌生,二來佢怕阿媛唔明佢噏緊乜嘢。
「吓?」果然阿媛呆咗一呆,諗咗幾秒先明楊悅盈講緊咩,所以指一指旁邊放住嘅麵講:「哦…得喇,食得我會叫你,你出番去同何晞賢玩啦。」
「唔該…」楊悅盈講多一次就諗住出番去。
「呀,同埋唔使咁快叫我姐姐…你叫我何晞媛得架喇。」何晞媛一邊開火煲水,一邊笑笑口對住楊悅盈講:「大家差唔多年紀啫。」
——唔使咁快…?楊悅盈唔係好明咩意思,總之佢「嗯」咗一聲之後就出番去。
楊悅盈行咗去梳化嗰邊,何晞賢自動坐番起身,執開張被讓咗個位俾佢。
「今晚你瞓床,我喺廳瞓就得。」楊悅盈同何晞賢講嗰陣,諗起自己阿哥。
「唔使,我今晚無諗住瞓。」何晞賢上下打量一下楊悅盈:「啲衫啱著?」
「OK…」楊悅盈喺何晞賢旁邊拎番自己部電話:「我今晚都無諗住瞓,你將Admin轉過嚟俾我。」
「我其實唔明你想點,但係如果有咩唔妥…」何晞賢開咗個Whatsapp,一路打字一路講:「一定要話我聽…我唔想你…唔想任何人有事。」
佢打咗一句嘢俾Admin,Send咗出去之後就閂咗個Mon;相反楊悅盈就開咗個電話,打開咗Admin個Chat Box望到實一實喺度等。
「唔使咁緊張…收到Message部機自然會響。」何晞賢伸手過嚟襟熄咗楊悅盈電話個Mon:「你不如同我講下你諗住點先。」
「同Admin傾計…當佢係同學…當佢係羅彥輝咁樣。」楊悅盈望住部電話答:「一旦唔得嘅話,先至考慮Jessica嗰邊…因為我唔知佢其實想對我哋做乜。」
「如果你決定要過去,我唔知其他人會點。」何晞賢好堅決咁講:「反正我一定會陪你。」
楊悅盈點點頭,然後歎咗一口氣。