[校園/ 懸疑] 已讀不回死全家！（2）

而家寫緊

而家寫緊

快d 死人啦

周sir要死了

見到呢幅圖爆頭就諗起呢個故

希望推完就見到篇文

周世文老師你好
可以加入這個遊戲，是不是很興奮呢？ 22:15

周Sir收到Admin個Message嗰陣，佢覺得自己就快痴線。

佢坐喺梳化度望住個電話，唔敢相信而家自己個處境。

由細到大都想做一個春風化雨、熱血教師嘅周世文都估唔到，只係兩年時間，學校就令到自己變成一個咁嘅人。

雖然同學生關係好好，但係佢一直都嘗試只係從旁觀者角度去幫佢哋，喺學生眼中，佢可能真係一個熱血教師。

其實佢自己心知肚明，無論係學業上、感情上，甚至乎同學之間發生咩問題或者衝突，佢都一定會Keep住一個安全距離去幫佢哋處理同埋解決問題——所謂解決，一般係指息事寧人。

但係今次…喺一個會死人嘅情況之下，佢竟然被逼成為班學生嘅一份子…？

啱啱沖完涼嘅陳佩珊個頭濕濕地，淨係著住件單薄T恤喺廁所行出嚟，見到周Sir仲坐喺度煩惱緊，就行咗埋去坐喺隔離攬住佢。

「阿Sir…唔使擔心…我哋一定會無事。」陳佩珊把聲好溫柔，好好聽；感覺到佢個身、個胸壓住自己，好軟、好溫暖，聞到一陣好熟悉嘅洗頭水香味…如果係平時，周Sir會覺得自己好幸福。

「佢Send Message俾我…」佢拎咗個電話俾陳佩珊睇；陳佩珊望到個Message，好似有啲嬲、又有啲擔心咁嘅表情。

「使唔使話俾楊悅盈佢哋聽？」

周Sir有啲猶豫；楊悅盈一直因為羅彥輝件事對自己好似有啲敵意，會唔會趁呢個機會對自己做啲乜嘢？

羅彥輝欺凌事件根本就唔關佢事，因為學校有指示係要將呢啲事件——

電話震咗一下，周Sir同陳佩珊一齊望向個Mon：

溫馨提示：老師你的回覆限制時間是10分鐘 22:23

周Sir拎番部電話覆咗佢：

你係咪真係羅彥輝？
對唔住，可唔可以放過我？ 22:24

Admin好快就輸入中…：

放過你？我只是想跟你聊聊天（笑） 22:24

但如果你不想理我，可以指名一個學生把我轉移過去
但…關愛學生的老師應該做不出這種事吧？ 22:25

「快啲…快啲轉俾其他人啦。」陳佩珊皺起眉望住周Sir講；Admin果然——正如何晞賢今日講——可以透過個電話監察住佢哋，因為佢好快就Send咗個俾陳佩珊睇嘅Message過嚟：

陳佩珊，可以讓我們男人之間私下對話嗎？（笑） 22:26

陳佩珊再望一下周Sir，周Sir點點頭，之後陳佩珊就行咗入房。聽到房門閂埋咗之後，佢就問咗Admin一句：

我轉俾任何一個人都得？ 22:28

當然了！只要你指名，我就不會再煩你 22:28

——楊悅盈或者何晞賢。周Sir覺得佢兩個可以Handle到，考慮緊應該揀邊個…

要不要轉給你的陳佩珊呢？ 22:29

AI好野快啲爆個臭g頭

痴撚線！ 22:30

——中四嗰年，周世文做咗4A班班主任，第一次見到陳佩珊嗰陣，已經對佢有種好特別嘅感覺，以致佢之後不由自主咁主動接近陳佩珊，慢慢同佢產生感情，最後仲瞞住所有人變成咗情侶…

Admin繼續問佢：

想清楚了嗎？ 22:31

——同陳佩珊一齊嘅時間好開心，兩個人都好鍾意對方；周Sir知道自己一定唔會對陳佩珊做啲乜嘢。

你為了她已經賭上了自己的教師生涯
難道要連命也押上去嗎？ 22:32

——的確，如果佢哋兩個嘅關係俾人揭穿咗，陳佩珊最多只會退學，但係周Sir自己…

如果係為咗佢，我唔怕 22:33

周Sir覆完之後，忽然間對成個情況——佢加入咗已讀不回死全家呢件事——有番一絲希望，因為佢發現自己仲有一個需要保護、而自己可以不惜一切嘅人。

而且佢可以轉移Admin嘅對象唔係淨係得陳佩珊一個。

雖然好對唔住何晞賢，但係周Sir決定咗將Admin轉俾佢——因為佢一直都同楊悅盈一齊Lead住大家，一定可以應付到Admin。

——你同何晞賢Whatsapp啦，唔好

打緊呢句嘢嗰陣，Admin又Send咗一條新Message出嚟：

愛情的力量真偉大…
你確定她對你也是這樣嗎？ 22:34

你有想過她現在其實不止你一個男人嗎？ 22:34

周Sir打緊嘅嘅手指停低咗；當然佢有過呢個懷疑。喺佢（同埋好多人眼中）陳佩珊都係女神，有其他同學追佢，甚至乎佢同其他同學拍過拖，絕對唔係咩匪夷所思嘅事。

但係佢信得過陳佩珊…

你條仆街唔好亂講！ 22:35

不要動氣，我也不知道她有沒有第三者
我只是關心你而已（笑） 22:36

——無可能！周Sir心入面同自己講咗句。

女人——尤其是她這種女人，最擅長的就是操控男人來保護自己
你今天入Group後一直像個窩囊廢一樣…你覺得陳佩珊會有甚麼想法？ 22:37

——一定係佢亂講，Admin只係想令我亂諗嘢…周Sir不斷咁同自己講。

你咩意思？ 22:37

抱歉，我多言了（笑）
這些私人話題還是你們兩口子自己慢慢聊吧！ 22:39

周Sir而家思緒有啲亂——其實自從佢俾Admin Add咗入已讀不回死全家之後，全日都好不安同惶恐；佢打算快手叫Admin搵何晞賢，之後佢就自己靜靜地冷靜一下…

何晞賢…

何晞賢？

何晞賢——

佢諗起前日，當佢知道5A-6A成班番晒嚟，佢行到上課室嗰時發現班房變咗個人間地獄。

同埋，佢見到何晞賢攬住陳佩珊。

——無可能嘅…何晞賢呢種人…

你係咪想暗示陳佩珊同何晞賢…？ 22:40

正如我所說，我只是關心你而已（笑）
我甚麼都沒有暗示，甚麼都不知道啊！ 22:41

仲記得前日，就算過咗隔離課室之後，陳佩珊都一直陪住不省人事嘅何晞賢…

周Sir開始有少少沮喪，有少少嬲…

你同我講清楚 22:42

你還是趕快把我轉走吧
黑著臉的老師好恐怖（笑） 22:43

你可以經部電部睇到我哋
你睇到陳佩珊同何晞賢做過啲乜？ 22:44

甚麼都沒有做，他們倆之間比水還要清白
至於其他問題，就問你的陳佩珊寶寶吧！ 22:45

周Sir掉低咗部電話喺梳化度，個腦變番一片空白咁行向自己房打開門。

陳佩珊趴咗喺床上面，拎住部電話打緊字，見到周Sir入嚟，好以有啲狼狽咁用手揞住部電話，再對住佢微微一笑。

「做緊乜？」周Sir急步行埋去想拎佢部電話嚟睇。

「無嘢呀！」陳佩珊好似覺得勢色唔妥咁，想拎走部電話；周Sir用蠻力搶咗佢部電話過嚟。

——鎖住咗…陳佩珊部iPhone要用密碼Unlock。

「密碼係乜？」周Sir用部電話對住佢，嘗試好溫和咁問。

「痴咗線呀？俾番部機我！」陳佩珊好緊張咁爬起身，想喺周Sir手上拎番自己部機；周Sir用手臂擋住咗佢。

呢個時候，陳佩珊部電話響咗；Lock Screen彈咗個Notification出嚟：

Facebook Messenger
Hei Yin Ho has sent you a message!

——我為咗你無端端惹咗壇咁嘅嘢上身…你竟然…！

「你頭先同何晞賢傾緊計？」周Sir諗住心平氣和咁問，但係講到出口先發現自己大聲咗。

「做乜啫！同何晞賢傾計有乜問題？」陳佩珊對眼開始有啲紅，鬧番周Sir轉頭。

「幾時開始？」

「俾番部電話我！」

周Sir用力一推，將陳佩珊推番落床，騎住佢條腰壓住咗佢。

「你想點？」陳佩珊一邊掙扎一邊鬧。

周Sir嘗試拉佢隻手過嚟用指紋Unlock，但係無用。

「你俾我睇一睇你同何晞賢傾過啲乜先…」

「關你乜事！死開呀！」陳佩珊表情又驚又嬲，開始流眼淚。

——我痴線？

啪！

忍唔住用力摑咗陳佩珊一巴，當係報番今日何晞緊嗰一下嘅仇。

啪！

陳佩珊亦都好快手咁反摑咗周Sir一下。

「點解楊悅盈同何晞賢佢哋可以咁冷靜，你就成日喺度發癲！」陳佩珊對眼一邊流淚，一邊用充滿怨恨嘅眼神望住周Sir講，然後開始講啲難聽嘅說話嚟鬧佢。

忽然間覺得佢把聲又尖又煩…

——唔好再提何晞賢住…等我冷靜下先…

為咗令到陳佩珊暫時收聲，周Sir將佢個電話丟埋一邊，然後一手渣住陳佩珊條頸，另一手揞住佢個口。

——終於…

好似有效，所以周Sir索性兩隻手一齊握實陳佩珊條頸。

——終於靜番少少…

陳佩珊雙腳不斷咁踢周Sir背脊，兩隻手捉實周Sir手臂想拉開佢。

——唔好嘈我住…

周Sir雙手再出多少少力。

——你條八婆…

為左要周sir同佢條女一齊死而要admin無啦啦轉左少少性格去講大話，睇到依度有少少抽離

係文呀 殺左條臭雞去