我和鄰居大姐姐的故事（24）

忍唔住課左金睇哂個故 葉爸收尾好似收得有啲急

唔知係我錯覺定係點，新讀者由連登開始睇然後一邊睇留言，葉爸係唔係見太多人屌太拖太長所以就草草收左個尾咁…？
我覺得葉爸唔洗太在意人地點講，本身你打算點寫就堅持落去，呢個故一開頭真係超級正，超級精彩，超級有代入感同切身體會到熙熙既感受
但後面感覺有啲草率同無咩代入感同感情了 繼續努力呀巴打
希望幾年後又可以睇到一篇故一樣係咁用心鋪排同埋有切身感受既故

不過
後來再睇埋O Camp故，發現呢個故咁正都係因為Ocamp埋得啲伏筆回收得好到位，睇完秋兒姐姐呢個故再睇Ocamp故就會覺得:「唔怪得之個劇情會係咁啦」既感覺，好過癮，唔想熙熙年輕既故事咁快就完

劇透注意

試下唔好用到位呢D柒字

認同

熙哥反而係淆底嗰個

多謝支持！

其實都唔係既，雖然我唔否認大家既評語(無論讚定彈)都一定係會對我有影響，不過大致上我都係跟住自己個大綱去寫，可能到最尾自己寫得真係冇咁好，好多謝你話比我知，我會自己檢討下！

另外其實我都係鍾意將啲作品放響同一個世界觀入面，咁樣互動得黎除咗可以讀者一啲彩蛋同熟悉感之外，我自己都可以安排一啲我鍾意既角色出場，就好似余正熙咁，如果巴打開始咗睇阿必故，都已經開始有提過下佢響姐姐故完結咗之後係點，我自己好鍾意咁樣寫！

七百三十六

秋兒姐姐柔聲道︰「你唔駛呃我喇…我又點會唔知你受既委屈吖…唉，不過熙熙…希望你都明白…我得一個媽咪架咋…佢係由我細細個就出去賺錢、含辛茹苦咁養大我，就好似你同叔叔一樣…所以…唉…希望你唔好怪媽咪喇…」

我條氣係好唔順架喇，但秋兒姐姐用我同老豆做比喻，諗起老豆對我既恩情，我啖氣響呢一刻（呢一刻咋！）都消咗小小…

況且都係果句，同咗秋兒姐姐一齊，我就知佢孝順架喇...

「得架喇，我真係冇嘢啊。」我露出個笑容扮到冇嘢咁︰「我女朋友係一個孝順女黎，我又唔係而家先知。」

秋兒姐姐冇出聲，靜靜咁望住我雙眼，然後露出一個溫柔既微笑，道︰「嗯…咁…我哋諗下點樣安排向媽咪坦白我哋既關係喇。」

「慢慢黎喇，唔駛急。」我道︰「要循序漸進，太急可能會有反效果架。」

老實講，我就一啲都唔驚林太既，但始終要顧住秋兒姐姐，唔可以要佢難做。

萬一逼到林太要秋兒姐姐響佢同我之間二揀一，我其實真係冇百份百既信心秋兒姐姐會揀我…

我知…我知我同秋兒姐姐經歷咗好多事，雙方互相既感情都非常深厚，只係林太係秋兒姐姐親生媽媽，而且又百病纏身，我想像唔到孝順既秋兒姐姐會因為我而將林太掟埋一邊唔理…

所以都係唔好將林太逼埋牆角好啲。

「我知道架喇，我會留意下媽咪既情況，決定咩事之前都會同你講一聲。」秋兒姐姐可能係諗到如果林太真係接受我哋既關係時既情形，佢個笑容都輕鬆咗啲。

「嗯！」我點點頭，拍晒心口道︰「有嘢即管搵我傾！」

「傻熙熙。」

其實…秋兒姐姐會當我係男朋友咁向我詢問意見，我個心一樣好甜…相處咗廿幾年，通常都係佢照顧我，所以每當佢有任何事情要依靠我既時候，我係特別開心同甜蜜既。

*

雖然話係要循序漸進，但我其實都幾期待林太會接受我哋關係既果一刻。

我係唔鍾意林太，但冇辦法我係要搏取佢既歡心，鬼叫我想娶秋兒姐姐做老婆就一定要過林太呢一關咩？

我知道呢個過程係漫長既，為咗加速呢個過程，我一定要比心機響公司盡快晉升，做出啲成績出黎，等林太唔會再狗眼看人低。

正因為咁，我捱過咗落鋪期間果段返shift返到六親不認既時間，同時都同秋兒姐姐傾多咗唔少公司既事，響人事問題上面請教一啲佢既意見，所以即使我個人仲係寸寸貢，但同上司既衝突就都叫少咗啲，秋兒姐姐話忍一時風平浪靜，搞好人際關係對我第時工作上一定有幫助咁話。

之後我就調返公司會計部，但因為我根本冇會計知識同經驗，所以反而只係做啲好基本既嘢，啲同事做到踢晒腳既時候，我都唔算好幫得手，有時佢哋仲叫我唔駛OT，可以早啲返屋企添。

估唔到黎到呢個部門，我又唔駛做又唔駛參加啲咩大project，我都幾意外。

至於呢段時間入面秋兒姐姐都有同我通下風報下訊，講下佢探林太口風探成點。

不過老實講林太個反應就真係唔算好，仲反問秋兒姐姐係咪仲成日同我聯絡。

好在秋兒姐姐都預咗佢問呢啲問題，佢都諗好晒答案，話有時響屋邨甚至大廈撞到我，所以都有傾下計。

我唔知林太信幾成，但客觀咁講，我哋同秋兒姐姐就住響對面，呢幾年冇偶遇過先唔正常。

只能夠講，呢件事既進展真係唔大，唔好話幾個月得唔得，我覺得就算過多年都未必得。

不過欲速則不達，順其自然咁去鋪排都唔係一件壞事黎既，如果逼得林太太急，一陣佢做啲咩事出黎阻止我哋就真係原本係好事都變壞事嘞。

反正秋兒姐姐有咁既心，我就已經好高興喇。

至於秋兒姐姐口中所講，話林太講過話要介紹過另一個男仔比秋兒姐姐，都好好彩地冇發生到（或者係暫時未發生）。

我估唔係林太唔想介紹，係佢未搵到呢個「金龜婿」啫。

林太又唔係大富大貴，我諗佢識得呢啲富二代既機會其實都好有限，其實…我甚至乎覺得佢會識得Eddie，都可能係Jonathan當年同佢通水既時候，順便塞個Eddie黎比林太，再等林太介紹比秋兒姐姐黎破壞我哋既關係。

我雖然係鳩估，但唔係冇道理，我感覺上Eddie同Jonathan都係果啲富二代，林太又點會識到呢啲人？我諗呢兩個唯一唔同既，係Eddie真係有心發展自己既事業，而Jonathan就真係靠老豆老母既二世祖，名牌大學畢業之後借住父母既權勢玩世不恭，所以最後先會玩出火黎。

扯得太遠喇…

總之，要林太真係接受我，似乎仲有一大段日子要捱啊。

然後…我響呢間公司既兩年試用期都就唔多完結…

（待續）

明知對方冇得揀嗰時，其實盡快擊破咪仲好
然後再sell下自己career path，林太其實都好難say no

真，情侶齊心嘅，呢D老母易攪啦，不過男方無用，下下等條女自己面對，條女大膽小小又話擔心，船頭驚鬼船尾驚賊

七百三十七

不過世事就係好難預料既。

我仲記得果日我仲響公司做緊嘢，突然間我果部用極都唔壞既NＯkia突然響起黎，我拎起電話，見係秋兒姐姐打黎，心入面有啲奇怪…

秋兒姐姐好少呢個時候打比我架喎。

唔會發生咗啲咩事吓嘛？

「喂？秋兒姐姐？」我按下NＯkia上面既接聽制。

「熙熙！你而家行唔行得開啊？」秋兒姐姐急問。

「哦？咩事啊？」老實講其實我有嘢做緊，唔係咁易行得開。

「我搵唔到媽咪啊，打極比佢都冇人聽，都過咗半日，我驚佢出咗啲咩事啊，我請咗假而家趕緊返去，但你知我學校距離屋企都好遠，你公司就近好多，你可唔可以幫我返去睇一睇媽咪有冇咩事啊？」秋兒姐姐語氣都好焦急。

「唔好咁擔心，可能佢只係出咗街唔記得帶電話啫。」我安慰秋兒姐姐道。

「唔會架…佢都未試過咁樣。而且自從佢上癌症出咗事之後，身體虛弱咗好多，唔係有我陪既話佢都唔會點出街，就算出街都唔會出咁耐。」秋兒姐姐解釋道︰「點都好，慎重起見，你可唔可以搭的士幫我返去望一望，睇下媽咪有冇事啊？」

我望咗一望枱頭上面既工作，諗起自己就快過試用期，唔應該響呢個時候請假，而且呢間公司入面睇我唔順眼既人都唔少，最好唔好有位比人入。

不過…既然係秋兒姐姐有求於我，我唯有響心入面嘆咗口氣：「好喇，我同老細請個假，返去睇睇妳媽咪有冇咩事喇。」

雖然我唔想去，但為咗孝順既秋兒姐姐，我都係順下佢意喇。

唉，返到去如果林太真係生勾勾咁冇事，佢打開門見到係我，隨時又趁呢機寸鳩我、羞辱我。

「唔該晒你啊熙熙，我都搭緊的士趕緊返黎架喇，你返到去，無論媽咪有冇事都好，都麻煩你打個電話比我吖。」秋兒姐姐把聲都好焦急。

「冇問題，我而家請假先，上咗的士我send個短訊比妳喇。」

「嗯，麻煩你喇。」

我收咗線之後就同上司講咗聲話屋企人有唔舒服要請半日假，如果屋企人係冇乜事既我會返黎（屌我以前真係唔敢相信自己會咁樣講低聲下氣咁去拎假，不過現實總係會磨蝕咗我天生某啲戾氣），點知會計部個阿頭Kevin係個難得既好人，佢直接同我講請咗半日假就好好抖下，就算屋企人冇事都唔駛返黎，可以當陪下家人。

當然我響會計部唔算太多嘢幫到手又係真，咁我當然就接受佢既好意喇。

我同其他同事告別之後，拿拿淋響公司樓下截咗架的士，然後send咗個短訊比秋兒姐姐，同佢講我上咗的士，叫佢唔駛擔心。

秋兒姐姐任教既學校係非常偏僻，我諗就算真係飛的返黎，就算唔塞車至少都要起碼成粒鐘，相比之下我就近得多，就算撘巴士廿分鐘乜都搞得掂。

好快我就去到屋企樓下，入𨋢之前打比秋兒姐姐交待咗幾句，就匆匆入𨋢上樓。

去到秋兒姐姐屋企門口，我雖然猶豫咗幾秒，不過最後都係㩒咗門鐘。

事實上我已經諗定幾句對白，等林太生龍活虎咁打開門屌柒我既時候用，只不過我㩒咗成分鐘門鐘都冇人應，個情況又真係怪怪地。

根據秋兒姐姐所講，林太響癌症病好之後，其實多數都留響屋企休息，睇下電視咁，就算去街都係響屋企附近行一陣就返，要去遠小小既地方都要秋兒姐姐陪住，如果唔響屋企半日又真係好少見。

啊，唔通佢係去咗搵果個準備介紹比秋兒姐姐既果個新男性？

不過我都係隨口鳩UP，點諗都唔似吖，唔需要為咗見個女既相親對象，特登離家半日又唔聽電話吖。

唔…事有蹺蹊…我想開門入屋睇下入面係咪發生咗啲咩事，但我根本冇秋兒姐姐屋企鎖匙，又點入屋呢？

我諗我應該打比秋兒姐姐，商量下下一半到底應該點做。

點知就響呢個時候，住隔離既白師奶，我廚藝既師父，打開咗佢屋企度門，由入面走咗出黎。

「嘩熙熙，乜嘢風吹你返黎啊？唔駛返工咩？做咩響秋兒門口企咗響度啊？」白師奶一副三姑六婆既口吻問道。

「請咗假。」我答白師奶，如果唔係佢係我廚藝既師父，可能我會寸佢問關佢撚事。

「請假企響秋兒門口啊？」啊，頂妳個肺，我唔寸妳，妳既語氣反而幾寸下喎。

正當我想反問關佢撚事既時候，突然間諗到一樣嘢，於是我開口問︰「係喎白師奶，妳今朝到而家，係咪都響屋企？」

白師奶點點頭，道︰「係啊？做咩咁問啊？」

「咁妳今日有冇見過秋兒媽咪啊？」

（待續）

舊PO爆PO已完成第一次更新，下次會係第二次更新

唔通俾天收

喺廁所跌親撞到頭失救死撚咗

Push

綠茶巴

七百三十八

「芳姐？」白師奶諗咗一諗，道︰「冇啊。」

我好似都係第一次聽到有人咁叫林太個名，原來啲三姑六婆係叫佢做芳姐。

「如果Auntie佢開門出街既話，妳估妳會唔會知？」我問。

「唔…我今日成日都響屋企，而家先至出門口去買餸，好似都冇乜聽到芳姐呢度開門喎。」白師奶道︰「當然…我又唔係成日都好留心呢度既，又會去下廁所又會入廚房又會煮下飯咁，可能錯過咗啲開門聲都唔出奇。」

…

即係有機會林太根本冇出過去？

「究竟發生咩事啊？」白師奶問。

「我都唔知…妳等我一陣先，我打個電話。」

「奇奇怪怪咁…」白師奶講完呢句就冇再理我，自己走咗去㩒𨋢。

我個電話，自然係打比秋兒姐姐。

接通咗之後，我將啱啱發生既事同秋兒姐姐講咗一次。

「妳屋企冇人應門，而白師奶佢又講過聽唔到妳媽咪出過去…」我心入面有個唔係幾好既猜測︰「會唔會係妳媽咪響屋企入面出咗事？」

「咁點算啊？」秋兒姐姐急道︰「我仲未返到黎啊…點算啊熙熙…」

雖然秋兒姐姐曾經處理過林太患癌既事，但畢竟果陣第一次入係醫院係由醫院果面通知佢林太入咗醫院，即係已經有人睇住林太冇乜大礙；而第二次林太入醫既時候，秋兒姐姐係發現到林太暈咗既第一人，所以雖然嚇親，但至少佢係知道林太出咗事而即刻打三條九搵白車，做出咗最恰當既處理。

但係呢一刻唔同，秋兒姐姐係完全唔知林太而家到底發生過甚麽事，面對而家咁既情況，佢只能依靠我，所以佢先至少有地急到亂咗分寸，淨係識問我點算好。

「唔…」但妳問我點算好…我又冇妳屋企鎖匙，想入去睇下都唔得架喎…

…

我突然間諗起周芷若嫲嫲中風既時候我既處理方法…

「秋兒姐姐，不如call白車。」

「下？」

「我收咗線之後就打三條九，同佢哋講呢度既情況，等佢哋搵人黎爆開度門，睇下妳媽咪有冇事。」我道︰「如果林太冇事既，我承擔晒所有責任，比消防差佬要拉要鎖又好、比妳媽咪鬧到狗血淋頭又好，等我承受晒喇。但萬一真係有事既，可能呢個就係救妳媽咪既最重要關頭！」

秋兒姐姐諗都唔駛諗，就話︰「唔好，等我打，我係屋主個女，應該由我打呢個電話既。熙熙，咁就麻煩你留響度等啲救護員黎，我會同佢哋講我男朋友響現場等緊。」

「得架喇，我會響度睇住，唔會行開。」我向秋兒姐姐大派定心丸。

「嗯…咁拜託晒你喇，我而家打電話先。」秋兒姐姐講完呢句就急急忙忙地收咗線。

我就打開自己屋企既門口，坐咗響度。

唔駛十分鐘，甚至係更短既時間，我就聽到救護車既聲，我即刻衝入自己屋企，由窗口望落去，發覺唔止救護車，連消防車都黎埋。

有一刻我心入面諗唔知啲消防員入面會唔會有阿威份呢？呢個時候佢都出咗班喇。

不過事實上梗係唔會喇，佢都係駐守我呢頭。

我響窗口都唔係望咗好耐，就聽見呢層既升降機大堂既𨋢門打開既聲音，我即刻走返出門口。

幾個消防員響前面拎住啲我都唔知係乜嘢既工具，後面跟住幾個救護員，推住個輪椅。

帶頭既消防員見我企響度就問我︰「你就打電話果位女士既男朋友？」

我點點頭，向帶頭個消防員講述返個情︰「係啊，我女朋友係屋主個女，佢今朝返工之後搵咗佢媽咪成日都搵唔到佢，我做嘢既地方近過佢好多，所以佢叫我返黎睇下有冇事，我返到黎之後係咁㩒門鐘，又搏命拍門，但都係冇人應啊。而我問過啲鄰居，佢哋話媽咪應該成日都冇出過街，我哋驚佢自己一個出咗啲咩事，所以就打三條九救命。」

「我知架喇，你交比我哋喇。」帶頭個消防員向我道，然後係咁㩒個門鐘，一邊㩒一邊叫︰「入面有冇人啊？開門吖！我哋係消防員啊。」見㩒鐘冇反應，又係咁拍門。

「浚豪，爆門！」響門口搞咗一輪都冇反應，帶頭消防向身邊另一個睇落係佢既手下既消防員下命令。

「Yes Sir！」消防員浚豪應咗句之後就拎住手上面啲不知名用具，幾下手勢就拆鳩爛咗單位既大閘同門…

希望林太真係冇事既話唔好撚搵我晦氣…

（待續）

救命恩人，就將個女許配比熙熙啦
禮金99萬，長長久久

以佢呢啲戇鳩，佢又點會咁識做

Push

Push

Push