我和鄰居大姐姐的故事（24）

加更？

𤋮𤋮喺公司俾劉經理屌
秋兒就喺屋企俾律師仔開發

兩單冇可能發生的事，你諗壞腦啦!

大乳暈美女的命運

推推推推

第一句…BL故咩

聽日！

帽事既

七百三十四

當然，響落鋪呢半年入面，我又唔係完全冇見過秋兒姐姐既，只係次數少咗好多啫。

就好似呢一日咁，我好難得咁輪到星期六放假，所以秋兒姐姐都搵咗個藉口要帶隊參加啲校際比賽，同我一齊去咗食午餐。

我哋好享受呢一刻難得既時光，響餐廳入面傾下計、互訴思念、閒話家常，就算冇身體上面既親密接觸，都已經覺得非常開心。

簡簡單單既快樂，就係咁架喇。

對住秋兒姐姐，就算係平時唔多嘢講既我，都有數不清既話題...

可能真係太耐冇面對面咁傾計...講返工、講做嘢既人際關係，甚至乎講遠小小細個時候既事都可以講成餐飯，反而秋兒姐姐就只係笑瞇瞇咁聽住，我講嘢既時間佔咗七成。

我諗我啲朋友見到有條友響女朋友面前可以咁多嘢講，唔睇個樣既話一定認唔出呢條友係我。

我哋一路傾一路食，到差唔多食完晒啲嘢既時候，坐我對面既秋兒姐姐突然開聲道：「熙熙，我考慮咗一樣嘢一段時間。」

「唔？咩事？」秋兒姐姐個樣好認真咁。

冇咩事吖嘛？

「我覺得我哋都係時候要將我哋既關係同媽咪講...你覺得點？」秋兒姐姐說道。

下？

咁突然咁講既？

「我...」我一時之間竟然反應唔切。

秋兒姐姐竟然會主動提出向林太公開我哋既關係？

秋兒姐姐望住我冇出聲，等待我既反應。

過咗半响之後，我終於開口：「好係好...但我哋唔係有好多嘢要考慮清楚先講？」

秋兒姐姐微笑住回答：「當然唔係即刻同佢講喇，要慢慢鋪排...」然後佢側頭諗咗一諗，道：「具體點樣安排我未諗到，不過大方向...我諗住響屋企放小小說話探吓媽咪口風先，時機成熟既時候我哋就響媽咪鍾意果間酒樓訂張枱同佢食飯，正正式式咁公開我哋既關係。」

「呢層我當然冇意見...但係...雖然我叫響呢間都叫出名既大公司做準管理層，但其實我而家連試用期都未過...咁...我覺得仲未可以說服到Auntie放心將妳交比我。」我嘆咗口氣，再道：「再講...佢咪好努力咁想去撮合妳同埋果個律師仔既？佢點會咁輕易就接受到我哋既關係啊？」

秋兒姐姐笑問︰「你係指Eddie？」

「係啩。」

「唔會喇。」秋兒姐姐面上掛住微笑，而且睇落笑得好開心。

「唔會？」

「記唔記得我哋上次食tea撞到佢？」

「記得。」

秋兒姐姐續道︰「我咪同佢講咗我哋之間既關係，然後又叫佢唔好話比媽咪知既？」

「係吖。」

「其實果次之後，Eddie都有聯絡過我。」秋兒姐姐說道。

我皺咗皺眉。

「你放心啊，佢唔係同我表白啊。」秋兒姐姐見到我既表情就知我諗緊咩︰「佢對我可能係有小小意思，但係佢知道我有男朋友之後就好循規蹈矩嘞。」

「條友可能係扮出黎架啫。」我有啲不屑咁講。

就好似死人Jonathan一樣，當年既教訓唔通秋兒姐姐仲唔記得？

佢隨時係響度等緊一個機會。

而且有林太幫佢撐腰，佢可以利用既機會真係唔少。

「我諗…佢唔係扮架。」秋兒姐姐微笑道：「其實果日我哋食tea撞到佢之後果晚佢就打咗比我。」

「佢同妳講咗啲咩？」雖然我話要相信秋兒姐姐，但我聽到呢度都有啲緊張起黎。

「都話唔係表白啊，唔駛皺晒眉頭咁緊張啊。」秋兒姐姐失笑道。

啊？

我有皺眉咩？

…

嗯…

我總係會比秋兒姐姐睇穿我既心情…

「咁佢講咗咩啊？」我問。

「佢同我道歉，話唔知我有男朋友，所以先會應媽咪既要求，當係相睇咁，睇下有冇機會發展，唔啱既都可以當識多個朋友。

「而且佢都好誠實咁講，佢其實出過黎幾次，覺得我個人好…嗯…好大方得體，對人有禮，所以都對我有啲好感，本身都真係諗住出多幾次食飯，試下約我出黎，睇下我有冇意思同佢發展既。」秋兒姐姐說道。

「咁我都知我女朋友好多優點既。」我笑一笑。

「你呷醋啊？」秋兒姐姐向我瞇一瞇眼，然後露出咗一個甜美既笑容。

「我自豪啫。」我笑笑。

我會唔鍾意第二啲男性對我女朋友打主意，但咁都係證明我女朋友優秀啫，我係應該要自豪唔係呷醋。

呢個都係相信女朋友既一種表現。

（待續）

唔通，秋兒比律師仔攪大個肚。。

連秋兒都開始站起來
熙哥反而無咩長進

推

永遠都係姐弟

而家急著要揾人認頭

唔想做個偉大既單親媽媽要搵人買單

以熙哥對秋兒的愛是不會介意的

要信任秋兒姐姐

七百三十五

秋兒姐姐俏皮一笑，少有地用撒嬌既語氣道︰「如果你話你會為我呷醋，可能我會開心下架。」

「好喇，咁我呷醋喇。」我開玩笑地道。

秋兒姐姐甜甜一笑，道︰「多謝。」

哈哈，咁都好多謝，秋兒姐姐真係好笑。

「咁之後呢？之後條律師仔點講？」我又急住問，想知之後Eddie講咗啲乜。

我唔係唔信秋兒姐姐，不過都好想知究竟條友講過啲咩。

「佢話其實佢每次約我出黎既時候我都拒絕，都估到我對佢冇意思，不過大時大節或者有人生日既時候，媽咪都會約埋佢出黎同我食飯，佢都冇所謂，諗住順其自然，如果後尾我對佢會改觀既都好，但就算好似而家咁只係好普通既朋友，佢都冇乜所謂。

「所以當佢得知我有男朋友，反而鬆一口氣，覺得唔駛再響我身上放咁多期望。

「當晚佢就同我講，不如之後媽咪約佢出黎食飯，佢都推辭，咁咪唔駛令我難做。

「而佢真係講得到做得到。自從果晚佢應承咗我之後，佢就真係冇再出現響我同媽咪大時大節果啲飯局入面。媽咪有次自己提起Eddie，有啲唔高興咁問我係咪同Eddie之間發生咗乜嘢事，我就只係詐傻扮懵咁詐乜都唔知。

「其實我諗媽咪真係有啲唔係幾開心，佢話我唔識得把握機會，有個好似Eddie咁好、又有事業又有錢既男仔都唔識得珍惜，佢話而家人哋走咗去嘞，又唔知益咗啲咩女仔。

「嘻，其實我由細就識得有個男仔，佢而家做咗我男朋友，呢個男仔咪仲好過Eddie一千倍、一萬倍？」秋兒姐姐講完之後甜笑住咁督咗我鼻尖一下。

呢句說話由平時甚少講甜言蜜語既秋兒姐姐口中講出黎，我個心特別甜。

我忍唔住出伸出手拖實坐我對面既秋兒姐姐，然後含情脈脈咁望住佢，佢都深情咁望返我。

我哋之間既情意盡在不言中。

「佢就係同妳講咗呢啲嘢？」我哋深情對望咗一陣之後，我開口問道。

「差唔多喇。」秋兒姐姐點點頭。

「其實呢個Eddie咁好條件，佢會唔會有其他女仔埋佢身呢？」呢個係我既疑惑…

Eddie如果只係得少少鍾意秋兒姐姐，咁響秋兒姐姐對佢既所謂「追求」冇乜反應又唔肯同佢單獨出黎約會既情況下，點解佢仲要響秋兒姐姐身上糾纏咁耐一段時間呢？我諗前前後後差唔多年幾兩年喇喎。

以佢年紀同背景事業，有需要對一個相親識既，又只係得小小好感既女仔花咁多時間咩？

唔通佢其實係好鍾意秋兒姐姐？

但另一方面你話佢呢段時間對秋兒姐姐既攻勢好猛烈？以秋兒姐姐同我講既情形黎睇又唔覺吖。

呢個Eddie係我potential既情敵黎，雖然我話相信秋兒姐姐對我既感情係點，但對呢啲咁既情敵我絕對唔可以輕敵。

就算佢而家口頭上同行動上似乎退出咗對秋兒姐姐既追求都係咁話。

冇人估到呢啲咁既有錢仔背後會有啲咩陰毛…陰謀架？

秋兒姐姐微一搖頭，道︰「咁我真係唔知佢…不過我見佢做嘢都好似好忙，或者佢係事業心重，所以先要搞到要長輩介紹女仔比佢相睇啩？」

唔…

而家想深究都深究唔到…

總之自己都要小心啲喇。

秋兒姐姐又開口道︰「仲有呢…」諗咗一諗，又細細聲道︰「媽咪話遲啲睇下有機會再介紹過另一個男仔比我識，所以…我就諗…最好諗下點樣可以早小小同媽咪提下我哋既關係。」

我笑一笑道︰「就係因為呢個原因，所以妳想同Auntie公開我哋既關係？」

秋兒姐姐微笑道︰「其一喇，我都唔想再去呢啲相親形式既飯局。」然後怔怔咁望住我，再嘆咗一口氣，道︰「最重要既係…我覺得呢兩三年真係委屈你喇。」

「啊...無啊...」我唔係呃秋兒姐姐...因為其實我都唔確定自己係咪真覺得委屈。

果種感覺與其話係委屈，不如話係唔順氣好撚嬲想打鳩林太。

大佬我果陣真係為佢個病做咗好多嘢架，而佢都知道我為佢做既呢啲嘢，但響錢既面前，佢覺得呢啲一啲都唔重要。

除此之外，又有小小唔忿氣秋兒姐姐一啲都唔反抗，好似逆來順受咁。

同埋有種無奈，因為我一早就知道秋兒姐姐好孝順唔會反抗林太，所以就算我想反抗都要顧埋秋兒姐姐感受，真係吹林太唔脹。

哈，原來我啲感受都幾複雜喎。

（待續）

150正評加更已完成，下次會係舊PO爆1001既第一次加更，多謝大家