葉開葉開
2024-10-16 14:24:22
七百七十五
「吓?」我簡直唔敢相信自己既耳仔。
「聽唔到就算…」秋兒姐姐今次真係紅都面晒…
「可唔可以講多次?講多次吖!」我雙手合十請求秋兒姐姐再開金口。
秋兒姐姐見到我咁既樣、咁既動作,忍唔住噗哧一笑,道︰「我啱啱講…我都冇話唔嫁…」
啊?
咁樣秋兒姐姐算唔算應承咗同我結婚?
佢話冇話唔嫁...
咁咪即係應承咗囉!傻仔!
啊啊啊啊!
開心過東亞少盃拎神射手啊啊啊啊!
「好嘢!我女朋友話嫁比我啊!」我開心到成個人彈起黎大叫,引到餐廳啲人都望住我...
望咩啫,咁我係開心吖嘛!
「喂...熙熙...好多人望住啊...」秋兒姐姐唔止紅都面晒,佢塊臉直頭變咗紅蘋果咁款...
係喎,佢平時連響公眾場合親密小小好似攬下錫下都唔好意思,而家我咁樣響餐廳大叫,佢一定會更加尷尬...
今日仲要係元旦假期,餐廳都好多人...
「Sorry sorry...」我唔好意思咁搔一搔頭,伸一伸脷,笑道:「控制唔到自己...」
秋兒姐姐又細細聲咁講:「仲有啊...你咁叫求婚啊?戒指又冇...花又冇...」
啊...
戒指...戒指...
我響枱面拎起裝筷子果隻紙製筷子套,然後快快手將佢摺到戒指既形狀...
唔...
仲有花...花...
啊!
諗到!
我用筷子將啲未煮既血牛肉片砌咗個牛肉花出黎,雖然係有啲核突,但勉強都叫係啲花既形狀既物體...
「花啊!」
其實似血花多啲...
秋兒姐姐忍俊不禁笑咗一吓,道:「咁都得啊?」
但面上既表情完全唔覺得佢唔高興...
「嗯...咁花又有,戒指又有...」我拎住隻紙摺戒指走咗埋秋兒姐姐面前,再單膝跪咗響度:「秋兒姐姐...」我諗咗一諗,改口道:「林秋兒...我好愛好愛好愛妳,妳願意嫁比我嗎?」
事前完全係冇計劃,我就咁突然心血來潮咁響呢間日式火鍋店向秋兒姐姐姐求起婚黎。
唔…
與其話自己係心血來潮…不如話我係順住自己既心情去行事喇。
我諗秋兒姐姐真係好尷尬,但係…
「我…願意…」秋兒姐姐輕聲地道。
!!!
雖然頭先秋兒姐姐果句「冇話唔嫁」我已經知道秋兒姐姐係應承咗同我結婚,但當「我願意」呢三個字由秋兒姐姐,我真係覺得好震撼…
點形容好呢…
就好似…我由細到大,人生入面最大既願望,突然間實現咗咁!人生最大成就解鎖既果種感覺!
呢種感覺…好奇妙…
「熙熙…?」秋兒姐姐有啲尷尬咁講︰「不如…你起身先?」
啊…
我發覺自己呆咗既時候,雙眼睇嘢好似有小小濛濛地咁…
我企起身捽一捽…
係眼水…?
我…我會開心、感動到喊?
喂等陣,咁一啲都唔似我喎…
但…我又真係好開心好開心…
「熙熙…」秋兒姐姐都甜笑起黎,但眼淚同樣都係一樣止唔住咁係咁流…仲流得勁過我︰「我…我都應承咗你…你坐低食嘢先喇…」
「好!」
突然唔知邊個首先開始拍手先,然後全場既花生友就一齊拍掌,霎時間餐廳入面充斥住如雷貫耳既拍掌聲,出面等緊位啲人唔知仲以為入面係咪搞緊啲咩event…
平時我可能都唔鍾意啲人咁望住我當睇戲咁睇,但呢刻我真係太開心,我反而向呢班花生友道謝…
等啲人食完花生慢慢咁靜咗落黎之後,秋兒姐姐抹一抺眼角上面既淚水,道︰「邊有人好似你咁求婚架…」不過語氣仲依然係掩飾唔到心底入面既高興。
其實我都唔知點解會響牛肉火鍋店求婚,哈哈!
「妳應承咗就好喇!」我夾咗舊牛入口,唔知點解明明係牛肉、明明我都點咗豉油,但我食落口都覺得好甜。
秋兒姐姐係我未婚妻喇!!!!!!
「傻熙熙...」
「傻秋兒...」
我哋兩個對望一笑,心入面都有一種守得雲開見月明既感覺。
我哋一直以黎所經歷既種種考驗都係值得既...
埋單既時候,經理親自過黎找數:「恭喜你哋。」
秋兒姐姐甜甜一笑,道:「多謝。」
經理突然間拎咗兩張卡出黎,笑道:「呢兩張VIP卡當係我小小心意,埋單出示既時候可以有八折優惠!我代表餐廳恭喜兩位,希望你哋白頭到老喇,多啲黎幫襯!」
「多謝!」
其實我諗經理最尾果句先係重點,佢又真係幾識做生意,咁你送得比我又恭喜我哋,結果我哋往後既日子,有時間既話又真係會走去幫襯...
(待續)