我和鄰居大姐姐的故事（24）

Kitty終於返嚟

Kitty姐姐

八百零一

今次知道Kitty姐姐已經返咗黎定居，我忍唔住問多幾句。

秋兒姐姐奇怪地問︰「點解你好似對佢好有興趣咁既？」

「冇啊，我都叫識佢，所以咪八卦吓囉。」仆街，本來諗住打蛇隨棍上問多幾句，點知問到差啲露餡。

唔得，為咗唔好令秋兒姐姐起疑，我都係盡快轉換話題好啲，於是我問：「除咗Kitty姐姐之外，仲有冇其他姐妹我係識架？」

其實我都二十五歲，仲叫佢哋姐姐其實怪怪地。

尤其是秋兒姐姐都就快做我老婆，我係咪應該改口？

第時如果有小朋友，唔通我仲叫佢秋兒姐姐咩，到時候應該有改口做老婆或者媽咪。

不過叫咗成世，要而家即刻改口都有啲難，都係再過多排先算。

「唔...都係我啲中學朋友，可能你都知佢哋係邊個。」秋兒姐姐答，然後開始講咗幾個名出黎。

果啲名我好似聽過，又好似未聽過，大概係秋兒姐姐中學時期啲朋友喇。直至秋兒姐姐講咗其中一個名，我又呆咗一呆。

「嘉嘉。」

冇錯，果個名就係Jessica。

唔知大家仲記唔記得佢，佢係果陣秋兒姐姐幫我搵返黎，當年既黃社副社長，讀書叻既認真魔人，亦都係我曾經既數理科補習老師（嚴格啲黎講，其實佢只係以師姐既身份黎教我數理科啫，冇收錢）。

而印象最深刻…都係當年我中二果陣佢因為同當時既阿邦社長分手，跟住喪劈喪飲，搞到飲醉咗酒，搞到唔小心同咗我上床。

我又係好耐冇見過佢…估唔到佢同秋兒姐姐都仲有聯絡，而且睇黎感情仲好唔錯添。

不過有咗Kitty姐姐啱啱前車之鑑，今次我儘管心入面有啲吃驚，但係我都冇表露到出黎。

呃，至少我覺得冇喇。

「估唔到嘉嘉都係妳姐妹團之一。當年我都好感激佢幫我補數。」我道。

「係啊，我同佢響畢業之後，都仲有繼續出黎見面。」秋兒姐姐微笑道。

「妳啲姐妹團都係妳啲中學同學喎！」我道。

「係啊。」

其實有唔少人結婚應該都係搵中學同學做兄弟或者姐妹，係我中學冇乜朋友啫。

唉，又諗起淇淇。

唔好怨喇，我可以搵得返阿必同我做朋友，已經係好好架喇。

呢日我同秋兒姐姐傾咗啲籌備結婚既嘢，最後由我落煮，煮咗餐好味既比秋兒姐姐同林太食。

當然林太果啲都係流質食物好似粥咁，但我已經比心機去調味架喇，希望佢覺得OK喇。

之後夜晚，我返過對面屋企，即刻打比阿必，邀請佢做我伴郎。

呢啲嘢都係用口講有誠意啲。

「嘩，梗係冇問題喇！」阿必笑道︰「恭喜晒喎！」

「多謝。」我道︰「我仲想搵埋其他流Ｏ果陣既隊友一齊做兄弟，你覺得點？」

「哈哈，冇問題既！」

其實當年有啲青年軍隊友都已經結咗婚，不過就冇擺酒，但我都有去過觀禮。

「咁我搵日約實你哋出黎喇。」

「好！」

阿必一口就應承，所以我心情都幾好。

除咗阿必之外，我仲有五個兄弟，分別係楊舒達、賈加華、康達、熊輝同盧加顧。

其中阿必、熊輝、楊舒達同賈加華都已經踢緊職業波，有啲仲入選咗港隊，係新一代既年青港腳。

講起足球，我諗起仲要邀請文叔佢哋！

其實而家我都少咗踢波，不過都仲有同大學校隊班隊友報下啲石地聯賽，如果唔係要OT既話，我都會儘量參與，但返去屋邨球場同班騎呢阿叔就真係冇乜。

雖然閒日要返工，但好彩佢哋星期六、日都照踢，所以第二日既下晝，我就約埋阿必一齊返去屋邨球場，同佢哋聚舊兼踢返幾腳波。

阿必尋日星期六比完賽，所以今日都冇操練，就應承同我一齊黎，順便夜晚一齊去食晚餐。

「你唔驚比球會知道咩？」我問阿必，放假出黎踢石地驚唔驚。

「驚閪咩，自己出黎玩下咋嘛。」阿必笑答︰「啲大佬都成日叫我哋幫佢哋手踢西北海盃架喇，咪又係咁？」.

西北海盃係一個本地石地足球比賽既盛事，有唔同既年齡組別，同時都有好多唔同既老闆搞好多唔同既球隊去參賽，有好多職業或者前職業既球員參加，比賽質素都好高。

「佢哋啲管理都仲係咁。」

「係咁架喇，仲肯搞波咪算好囉！」阿必聳肩道，有啲無奈。

行多幾行，我哋都到咗屋邨球場。

都係一樣咁令人懷念…

（待續）

好淫亂，姊妹團連新娘，有一半係新郎食過

大麻撚姊妹團

成單嘢其實幾痴線
Kitty仲要玩到好大

大麻熙話就話細細個就已經鍾意秋兒，但個人本身就係大愛L，連秋兒身邊嘅好朋友都行過路過唔好錯過，發揚做愛行善呢個宗旨，以精液當聖水滋潤秋兒嘅好朋友（秋兒例外）

八百零二

同樣係同一班人響球場飛馳，但班騎呢阿叔既頭髮都逐漸花白了。

歲月不留人，一班騎呢大叔已經變咗騎呢阿伯。

「哦，必仔、熙熙。」坐咗響觀眾席既文叔（文伯）離遠就已經見到我哋，佢舉起手向我哋微笑揮手。

文叔都係一副踢波既裝束，但其他阿叔響球場踢緊波，佢就坐咗響一邊休息緊。

自從肺癌康復之後，佢既身體都唔算太好，但都有keep住繼續踢下波，佢話當做下運動強身健體喎，不過體力當然唔好，所以踢一陣就要抖一陣。

其實唔止文叔，其他阿叔既表現都冇以前咁勁，同埋佢哋既健康有啲都開始有小小問題，歲月催人老，「歲月」呢個神偷唔講得笑。

阿必笑騎騎咁行過去文叔度︰「文叔！我哋黎睇下您老人家！」

「屌你個仆街仔，講嘢冇喱正經！」雖然比起當年中一，阿必已經高咗唔少，但文叔都作狀拍下佢個頭，而阿必都好合作咁烏低身，笑嘻嘻咁比佢拍個頭。

「點啊？咁好黎同阿叔踢波啊？」文叔笑笑口問。

「掛住你哋吖嘛！」阿必做咗個啲囡囡嗲老豆既表情出黎，非常嘔心。

「你個死仔，咁耐都冇變過。」文叔失笑道。

「但係呢條友仲有其他嘢同你哋講。」阿必笑口噬噬咁指住我。

「哦？」

「等埋老鼠同柒頭佢哋過黎先講喇。」我道，個樣有啲唔好意思。

阿必哈哈大笑，同文叔講︰「你睇，呢條友怕醜啊！」

「妖！」

「呵呵呵，有咩要同我哋講啊？結婚啊？」文叔聽住我哋既對話笑住問。

「嘩文叔，你係先知黎架？咁都知道既？」阿必做咗個驚歎既表情。

呢下文叔先真係有啲驚奇，問我︰「我鳩UP講下架咋喎，真係架？恭喜晒喎。」

「係啊，我同秋兒姐姐結婚喇。」啊屌，比阿必講中咗，我竟然真係有啲怕醜地道。

哎，其實有乜唔係幾好意思啫？

「吓？秋兒肯同你條死靚仔結婚？」文叔有啲驚訝，然後向住球場入面其他阿叔大叫︰「喂，咪撚踢住喇！熙熙呢條死靚仔話佢要同秋兒結婚啊！」

雖然文叔把聲因為肺癌劫後餘生之後中氣冇咁足，但場上面既一班騎呢大叔同一時間停低晒腳，本身控緊波果個柒頭求撚其踢走咗個波，大叫道︰「屌，乜撚嘢話！？」然後成班一齊衝過黎。

「喂，你哋唔踢喇？」對手其中一個後生仔問。

「唔踢住喇，當我哋輸咗，再跟隊喇！」柒頭佢頭也不回咁走咗去…

成班阿叔好似痴撚咗線咁衝埋黎…

「嘩！你個死靚仔，幾撚鳩時同秋兒拍拖都唔話比我哋知架！」

「你都算鬼馬喇，收收埋埋咁耐都唔落黎話撚柒閪比我哋知！」

「熙熙你個仆街仔，落黎同我哋講聲有幾鳩難！」

「熙熙你真係唔撚夠老友喇，連我哋都唔講！」

成班阿叔七咀八舌咁你一言我一句咁，我一時之間都真係唔撚知點答好…

我從來冇同文叔佢哋講過我係同秋兒拍拖（尤其是果陣我哋要收收埋埋，越少人知越好，驚Jonathan或者林太知吖嘛。），所以佢哋而家有咁既反應其實都好正常。

「咁...我冇理由特登走落黎淨係同你哋講一句我同秋兒姐姐拍拖架啫...」我唔想解釋咁多，唯有咁答。

咁都係事實黎既，因為我真係唔會冇端端走落街，淨係同班騎呢大叔講我同秋兒姐姐拍拖。

「乜撚嘢冇理由啊！即係睇唔起我哋班老嘢啫！」

「放心喇，到時一撚定準時到！」

「你個仆街仔，到時飲酒飲撚到你破產！」

「仲叫秋兒做秋兒姐姐，就黎叫老婆喇！」

觀眾席上面突然一片囍氣洋洋既氣氛，阿必就響旁邊微笑而不言。

我諗真係得呢一刻，佢個樣先至勉強算係正正經經一啲都唔白卡。

之後，我同阿必相隔咗唔知幾耐，再一次加入班騎呢阿叔隊，踏上屋邨球場，久違地同佢哋一齊踢波。

好耐都冇簡簡單咁同班騎呢阿叔踢吓波，出一身汗。

阿必已經係港隊成員，有佢加入，大叔隊當然更加屈機喇。

有啲一齊踢街場既後生仔甚至認得出阿必，專登走埋去同佢影相，而阿必都來者不拒，總之你肯開口佢就肯成個傻佬咁笑笑口同你影相，可以話一啲架子都冇。

至於我既表現呢？

雖然已經完全比唔上阿必，但都係都叫有同啲大學同學間中踢下石地，所以都唔會話好生疏。

我哋就好似返咗以前中學果陣咁…

其實有時開心，真係可以好簡單…

（待續）

有小小暴風雨前夕味道

似喇
臨尾都要整鑊嘢佢哋兩公婆嘆下

似係Kate 會擺酒果日播扑野片

完架啦

唔係咁浪費下嘛

push