我和鄰居大姐姐的故事（24）

Push

咁老實講你擺酒店人情都可以收多啲

七百八十

其實就算唔係酒樓同酒店相比，酒樓同酒樓之間既價格都好唔同，如果要慳既話親身去睇場同講價真係唔少得。

而家最辛苦係個個星期六、日放假都要由早去到夜去港九新界唔同既酒樓現場格吓價同視察吓環境，始終要錫住個荷包仔，真係想搵到間又平又正既。

通常係我去睇先，秋兒姐姐就留響屋企照顧林太，真係我睇啱咗，我就會拎啲菜單、影下個場啲相返黎參考吓，而我老豆都會比吓意見。

老實講我對菜單又唔係好執著，有得你班仆街食仲想點撚樣？但我老豆就對魚翅同燕窩好執著，話呢兩樣嘢一定要有喎。

唉，果度又加多一兩千蚊一圍架...

不過...老豆想要就要喇...

反正我都係為佢而搞，我自己其實係prefer低調結婚就算。

最後行咗幾個星期，都終於搵到幾間啱心水，於是秋兒姐姐就搵人黎幫手照顧林太，自己就同我去睇一齊去視察現場，啱心水既會講價，然後順利既會再扑埋鎚。

最後我哋揀咗一間響尖沙咀但又唔係鬧市正中心既酒樓，旺中帶靜、價錢合適得黎交通都叫方便，環境都唔錯。

老實講，港九新界我都行勻，揀酒樓呢個過程都真係唔易。

「辛苦你喇熙熙。」簽完約比埋deposit之後，秋兒姐姐拖實我行出酒樓既時候佢柔聲道：「全部嘢都好似你搞晒添。」

「唔係吖，妳都幫手睇咗菜單，同埋一齊決定扑鎚啊，有同我一齊搞架。」

況且，個婚宴其實都係我老豆最想搞，咁身為佢個仔，就算要我負責晒所有嘢都好正常。

「咁都算？」秋兒姐姐失笑道。

「算！乜嘢唔算啊？況且妳仲要照顧埋妳媽咪，知妳辛苦架喇，我搞咪我搞囉，我哋兩個仲有分妳同我咩？」

秋兒姐姐聽到甜甜一笑，道︰「嗯…我哋兩個冇分彼此！」講完之後我感覺到佢拖住我既果隻手仲拖得實咗。

搞掂完擺酒，就到咗揀婚紗嘞。

話時話，我都係訂咗婚之後我發覺原來香港會展係成日都有婚紗展的，佢個頻率係差唔多一個月一次。

而婚紗展都唔係淨係有婚紗既展覽，其實入面就乜都有既，結婚相、擺酒、印囍貼等等。婚紗展係啲人咁樣幫佢改架啫個名，其實佢應該叫做婚展更啱。

去呢啲婚紗展都係一個上或者下晝，而且目的地得一個，唔駛好似搵酒樓果陣四圍騰，況且講到明婚紗展，咁就梗係要個女主角響現場揀架喇，所以最後秋兒姐姐就將林太交比看護睇一陣，自己就同我一齊去呢個婚紗展。

「嘩，好彩妳陪我黎婚紗展。」我拖住秋兒姐姐走入會展，見住身邊一對又一對既準新人行黎行去，續道︰「如果得我自己一個黎都真係幾柒。」

秋兒姐姐輕輕拍咗我個頭一下，道︰「講粗口！」

我伸一伸脷，然後道︰「入去囉？」

「嗯。」秋兒姐姐拖實我入會場。

一入到去，我哋就比幾個講普通話既工作人員圍住。

「搞乜啊？」本來想講搞乜撚，但秋兒姐姐響我隔離就算了。

「你們要不要來台灣拍婚紗照？」哦，原來呢啲係台灣人，似乎係特登過黎香港擺booth 。

我望一望秋兒姐姐，佢搖一搖頭，於是我代佢答道︰「不用了，謝謝。」

不過果幾個台灣佬仲鍥而不捨咁追住我哋，搞到我爭啲忍唔住想開聲屌柒佢哋。

擺脫咗佢哋之後，我留意到秋兒姐姐個樣好似諗緊嘢咁，諗得好入神。

「秋兒姐姐？」

「唔？」

「諗咩諗得咁入神啊？」我問。

秋兒姐姐微笑道︰「冇乜嘢啊。」

「真係？」我個樣應該擺到明唔係幾信。

「真係啊。」

「連我都唔講得？」

比我係咁追問既情況下，秋兒姐姐嘆咗口氣，道：「其實…我係見到啱啱果幾個台灣人問我哋去唔去台灣影婚紗相，我諗起我同你都未試過去外國旅行，所以就響度諗，如果我哋都可以去吓旅行就好喇。」

呃，我哋兩個除咗去長洲之外就真係未試過去旅行。

咁好多原因既，一來就係我哋拍拖頭幾年為咗唔好比Jonathan發現、二來林太身體唔好，我哋拍拖以黎佢都成日入醫院，唔係乳癌就係中風，佢就算出咗院秋兒姐姐都成日要陪住佢、三來就係我為咗要爭取林太認同，我畢業前後都好努力咁整靚自己張CV同賺錢，邊有時間同秋兒姐姐去旅行？

秋兒姐姐而家咁講，佢今年過埋生日就二十八歲，但係都未同過自己男朋友去旅行（甚至係未去過旅行），可能真係覺得有啲遺憾。

（待續）

push

2個人去3個人返嚟

一王兩后

唔通秋兒諗住去臺灣影婚紗相

我差啲以為講粗口嘅係秋兒

btw 樓主好耐冇見你覆cm 過得還好嗎

push

嘩⋯⋯唔經唔覺葉開熙同秋兒姐姐都咁大喇，畢竟至從葉開𤋮穩定落嚟之後，我冇再認真睇只係過下眼就算

係開始悶

七百八十一

「咁…不如我哋趁住正式結婚之前去一次旅行？」我提議道：「等妳學校放寒假既時候？我聽阿威講過，佢都成日去日本玩，仲話日本係佢家鄉咁話。我以前都去過日本比賽同試腳，雖然出去觀光既時間唔多，但係果度啲人真係好有禮貌，可以去睇吓！」

我一輪咀咁講出黎，秋兒姐姐雙眼好明顯出現咗興奮既光茫，不過好快又收儉返，微笑道︰「唔駛喇，如果我哋去咗旅行，咁邊個睇住媽咪啊？佢而家咁，我又點會可以安樂去旅行？」

「請人照顧佢一個星期咪得囉？」我提議道。

點知秋兒姐姐搖頭道︰「我唔放心交佢比人照顧咁多日。」

「其實我哋之前咪諗過會唔會送妳媽咪去老人院既？」我繼續勸佢︰「妳果陣都OK架？搵人照顧佢幾日咪差唔多？」

秋兒姐姐搖搖頭︰「唔一樣。」

「咁我哋結完婚都要渡蜜月架？咪當預演吓囉。」

「到時先算喇。」秋兒姐姐嘆咗口氣。

其實我諗秋兒姐姐就算幾識諗、就算而家已經二十七歲有咗好多人生經驗，但我諗佢點都會有想同男朋友一齊兩個人去二人世界旅行既浪漫諗法，可惜佢真係一個好孝順既人，將林太放響要照顧既第一位我都冇計。

不過…我真係好想完咗佢呢個心願。

而且…呢個都係我既心願。

遲啲喇，遲啲一定可以搵到個方法，同秋兒姐姐開開心心咁去旅行既！

我哋暫時冇再講呢個話題，把握時間響展覽廳入面左穿右插，通常經過每個booth都會拎傳單，啱既會順便入埋去傾，最後響一次展覽入面就已經揀好晒婚紗、印帖、影結婚相、book車等等既鋪頭/單位。

當然，有啲detail會可能要再去佢哋啲鋪頭或者公司跟進，但至少大致上都敲定晒所有基本嘢，再黎就係睇吓有冇啲咩地方要執漏。

婚紗展呢個概念真係唔錯，將所有嘢都集中埋一齊，可以話方便晒我哋呢啲準新人。

「咁之後，我哋係咪要搵定兄弟姊妹團？」敵開會場既時候我問秋兒姐姐。

「係啊，仲有要諗定伴郎同伴娘添。」秋兒姐

「唔...」搵邊個做我兄弟團好呢？

等我諗吓度吓先...

話時話，除咗中學時期間中會見到秋兒姐姐既朋友之外，其實我好似都唔係幾知佢身邊有咩朋友。

我知響林太中風，要長期照顧林太之前，秋兒姐姐係間中會約下朋友出黎食飯，但佢又冇帶過我去見佢啲朋友，所以頂多我淨係知道某啲人既名...

唔知...

我有冇機會見返我既「初戀」Kitty姐姐呢...？

講堅，我諗自己應該由頭到尾都冇鍾意過Kitty姐姐，但係佢畢竟係我既性愛啟蒙老師，齋講性愛既話最夾既可能真係佢，你話我有冇掛住佢？咁我話咁耐以黎我一啲都冇諗起過佢你哋都唔信喇！

不過...我唔會咁八卦去問秋兒姐姐既...一陣有啲乜嘢唔小心響結婚之前令到我同佢（甚至其他女仔）啲黑歷史爆咗出黎，真係隨時未結婚就離婚...

秋兒姐姐請邊個做姐妹我就未知，但我都係時候諗吓我請邊個做兄弟好...

講起我人生最好既朋友，應該係阿必同阿威。

阿必雖然響大學之前同我反咗面失聯幾年，但佢一直以黎都係最了解我、對我最有雷氣既朋友，失聯幾年後見返面都係一樣冇變。

而阿威？三年既戇鳩同房兼校隊隊友，係啱傾既，但如果講深厚友情既話，應該都係阿必深厚啲。

伴郎係要搵自己最friend既人…唔…咁真係非阿必呢個白卡佬莫屬！

好，就等我搵個時間約佢出黎請佢做伴郎先！

*

「Andrew，坐吖。」講嘢既人係Albert，而家我響佢既辦公室入面。

「哦。」我響佢既辦公桌前面既凳坐低咗。

今朝做做吓嘢，無端端比Albert叫咗入黎，究竟佢有咩想同我講？

「你跟咗我幾耐？」Albert問。

佢咁樣既問法，好易令人覺得我已經跟咗佢好耐咁，但實際上我只係跟咗佢半年。

「半年。」我簡潔地答。

Albert微微一笑︰「半年。」頓了一頓，又道︰「你覺得呢半年跟住我學唔學到嘢？」

「學到。」成日跟住Albert，睇佢點做嘢、點待人接物，甚至係點應付啲麻煩既下屬，係真係學到吓嘢既。

「如果你覺得要你去領導一個部門，你覺得自己得唔得？」Albert微笑住問。

我微微錯愕…

Albert既意思係…？

（待續）

做Kate嘅上司，然後...

轉正半年就做Dept Head! 熙哥咁嘅走勢，做多兩三年Albert可能成間公司交畀佢打理都未定

Albert係咪暗戀大麻熙呀？會唔會寫個番外篇Albert同大麻熙BL

push

期待

個勢似想將間公司交俾佢打理