我和鄰居大姐姐的故事（24）

幾時先肯出 手呀KATE姐

唔遘甜嘅情節,
主角最後出軌發生係求婚之後, 真係完全無成長過。
成日講自己要點對秋兒好, 講一套做一套,
有得屌嗰時又扮聖人, 作為讀者又好失望。
講咁多原來求婚之後都係出軌, 想睇角色成長呢方面來講又係好失望

最好秋兒NTR返佢先公平。

Push

係劇透定你鳩估？

如果屬實嘅話，我會覺得真心白費咗成個故

鋪排咗Kate 咁耐，如果咩都無發生都好嘥

其實我覺得大麻熙出軌都唔係咩新鮮事，佢本身就係Kate所講嘅同類人，只係佢同秋兒一齊之後夾硬收埋自己呢一面，到真係有好野食送到口，佢就會現形

以下涉及劇透：

睇完劇透之後就唔洗再睇落去 一陣追到谷9氣

起碼一兩個月嘅內容

如果有東窗事發嘅內容 應該會好好睇

啲對話唔再係辛苦你喇

而係講出自己真正想要同鍾意嘅嘢

主角一直都驚秋兒知道之後就會失去佢

但佢唔講又點知秋兒接唔接受到呢

有膽出軌 無膽正面處理問題

呢啲係角色之間應該要有嘅衝突 寫咗咁耐日記 比我睇下都好

七百七十八

為咗令林太更加容易接受我同秋兒姐姐既婚事，我響正式同林太講之前自己諗咗一大堆既對白、講稿，睇吓可以點說服林太可以安心咁將秋兒姐姐既終身幸福交托比我。

以我所熟悉既林太，佢絕對係一個金錢至上既人，所以佢先會咁想秋兒姐姐嫁一個有錢既男人啫。

既然係咁，我呢篇所謂既講稿，就用咗90%既內容，去講述我而家份工係幾有前途，我而家既人工又係有幾高，之後仲有機會加到幾高咁，反而冇乜講我係有幾愛幾鍾意秋兒姐姐，變咗純粹係炫耀自己而家既事業有幾好。

咁林太應該係鍾意聽呢啲吖嘛，冇計喇。

不過就算我而家份工既人工同前途都唔錯，同果啲真正既富二代仲爭得遠，仲係住緊公屋（其實住公屋先係大贏家），所以我都唔肯定自己呢份present可唔可以說服林太交秋兒姐姐比我…

於是某一個平凡既星期六我就直接上門拜訪林太，兼同佢講呢頭婚事。

估唔到林太聽完之後，都冇乜猶豫，直接同我講︰「秋…秋兒…我交比你…」

啊？

咁順攤既？

有人講過，一個人如果經歷過生死，佢對某啲事情既執著就會放低，唔通林太就係呢種情況？

「你以為我媽咪而家係賣女啊？」今晚秋兒姐姐親自下廚，我就入去幫手，響秋兒姐姐預備緊煮餸既時候，佢笑住咁同我講。

「咁…我以為妳媽咪鍾意聽呢啲吖嘛。」我搔搔頭道。

「自從中咗風之後，媽咪個心態變咗好多喇。」秋兒姐姐一邊剪緊啲海蝦既腸一邊道︰「我覺得個轉變仲大過佢乳癌果次。」

我諗係因為始終乳癌果次雖然係病情係嚴重，但始終未去到生死呢一關，所以對林太黎講，對人生既感悟始終都係冇咁大啩？而呢次真係響鬼門關執返條命，加上自己出院之後，身體都唔係咁好，所以好多嘢，尤其係錢呢方面都睇淡咗唔少。

只要個女鍾意、只要個女幸福就可以了…

「咁我都覺得妳媽咪好似變得隨和咗。」

講句嘢都斷斷續續，應該好多戾氣先啱，但林太又唔似有啲咩怨氣。

「我諗媽咪而家只要將我交托比一個信得過又會真心對我好既人就開心架喇。」秋兒姐姐道。

「我會努力做到個咁樣既人。」

「傻熙熙，」秋兒姐姐甜笑咗一下，道：「你而家已經係喇。」

「哈哈，仲要繼續努力啊。」

之後我哋餐飯都食得幾愉快，雖然啲好餸主要都係我同秋兒姐姐食，林太淨係可以食啲流質食物，但佢都感染到我哋兩個開心既氣氛，我覺得佢食飯既精神都唔錯。

*

當然，向兩大長老稟告完婚事之後，點都要安排兩家人見面食餐飯既。

由於林太行動唔係好方便，所以我哋最後決定唔出街食，響屋企煮餐飯招呼兩老算。

老豆呢個工作狂，本來就唔係幾想請假，但畢竟係個仔結婚呢件咁重要既人生大事，響我講多幾次要求下，佢最後都好難得咁走去請假。

同我讀書既時期唔同架喇，我搵咁多錢，就算老豆冇工開，我都會養佢喇。所以而家佢打既其實可以話係風流工，其實隨時話唔撈就唔撈，惡撚過老細，你唔比我請假我就唔撚撈，吹咩？係老豆一直唔放自己假咋嘛。

真係睇見老豆都辛苦，我不知幾想佢退休，係佢覺得退休唔做嘢留響屋企就冇乜勢藝，所以唔肯退休咋嘛。

呢一餐飯最後又係響一個平凡既星期六搞，不過地點就變咗我屋企，呢餐飯既大廚都由秋兒姐姐變成我。

講起黎，老豆好似都未試過我手勢。

響開飯之前，老豆去咗秋兒姐姐屋企果邊打個招呼，不過返黎既時候面色就變得唔係幾好。

「熙熙，秋兒媽咪佢…真係憔悴咗好多。」老豆響廚房門口同我講。

其實用憔悴黎形容已經好客氣。

順帶一提，秋兒姐姐其實本身都有諗過要過黎幫手既，但今日看護冇返，掉低林太一個響屋企又唔係幾好，所以最後都係決定唔過黎，留返響自己屋企照顧返林太算。

我都同佢講，唔緊要架，我一個人煮晒有乜問題吖？我既廚藝其實已經好唔錯架喇。

啊，扯得太遠，講返老豆呢一part先。

「係啊，所以我先同你講，叫你唔好咁操勞辛苦啊。」我又勸吓老豆︰「不如退休喇。」

今次老豆冇咁抗拒，佢拍一拍自己後腦，道︰「再比我考慮多陣喇。」

（待續）

睇嚟準備開始講勸佢老竇退休

push

七百七十九

其實兩家人見面既呢餐飯就食得有啲怪怪地，林太都冇上次咁好精神，佢個樣好似好攰好頹咁。

我諗係因為佢而家深居簡出，佢個中風樣，唔計醫生、看護果啲治療同照顧佢既人之外，得秋兒姐姐同我見過。

佢唔想比其他人見到佢而家呢個就死咁既樣。

就算係未來親家，我諗佢都唔會想比我老豆見到佢咁頹既樣。

而我老豆成餐飯都唔知講咩好，想問候吓林太，但林太又唔係幾講到嘢，同埋個表情都睇得出佢唔想其他人多問，所以最後既話題又係變返講我哋既婚事。

但其實我都未係決定要點搞，但老豆就好想我哋擺酒，等佢可以請埋淨我啲親戚朋友，反而林太果面就冇乜所謂。

我諗林太都唔係太想有咁多人見到佢呢副活死人咁款既模樣…再講我其實都唔太清楚秋兒姐姐果面啲親戚多唔多，都冇乜聽佢講起過。

佢老豆就更加唔駛講，自從細細個返咗大陸包二奶最後離埋婚失咗踪之後，直到而家都冇再同佢哋兩母女聯絡過，我記得秋兒姐姐講過話林太當佢已經死咗。

老實講，其實我就真係唔太想請我既親戚，諗起表哥們細個狗眼看人底既咀臉，就真係打撚柒佢哋。不過老豆叫到喇喎…咁就算喇，作為孝順仔，應該都會順吓佢意。

「其實妳想唔想擺酒架？」我同秋兒姐姐一齊響廚房洗碗既時候我問佢。

秋兒姐姐甜甜一笑，道︰「其實我真係冇乜所謂啊。」一副「只要嫁到比你我就心滿意足其他咩都唔理」既表情。

「我其實都冇乜所謂，不過既然老豆咁想搞，我應該都會順下佢意既。」講完我都忍唔住歎咗口氣。

因為…講就咁講，其實我係一啲都唔想搞的。

好似阿威咁係咁咦註冊結婚咪幾好？

我結婚關其他人乜撚柒嘢事？

「其實如果你唔想既話可以同叔叔傾吓架喎。」秋兒姐姐道。

啊？

不愧係秋兒姐姐，一下子就睇穿咗我心底裡既諗法。

咁我都唔隱瞞嘞，我答道：「咁始終老豆佢想吖嘛。個仔結婚咁大件事喎，佢梗係想響親戚面前威吓既...所以...唉，順下佢意喇。」

我係孝順仔黎架嘛...老豆想我又滿足到既，咁我都會滿足吓佢既。

每年農曆新年既時候，佢同啲親戚都真係相處得好好，平時難得見到佢咁開心，我諗佢真係想響啲親戚面前威一次。

講起上黎我都好耐冇見大表姐，我哋私底下都少咗好多聯絡，而上幾次去拜年既時候我都唔見佢響屋企，唔知佢而家點呢？

「嗯...你點話點好喇。」秋兒姐姐甜甜一笑。

雖然自出娘胎我已經識得秋兒姐姐，而且拍咗拖都差唔多六年，但佢呢個甜美既笑我真係百看不厭。

*

既然決定咗，之後我同秋兒姐姐一有時間就會去睇啲婚宴既場所。老豆係個傳統既人，所以我都係target啲傳統少少既婚宴酒樓。

我哋都分別計咗一計要擺幾多圍，我發覺我成日話自己朋友唔太多，但計計下都有幾枱︰流Ｏ同香港青年軍、大學校隊隊友、O Camp同組、少量Hallmates，仲有而家做嘢既同事。

中學既朋友就冇架喇...阿必我都將佢分類為球會同青年軍隊友。雖然我都好想知道淇淇既近況，但係...都係唔好打搞佢好啲。

仲有其實我唔係好想請做嘢既同事，講堅我雖然後期叫收儉咗少少，但始終得罪人多，稱呼人少，啲經理級既守舊派好多都想睇我點死，但秋兒姐姐就提我最好就請喇，當係人情世故既一種。

咁老實講，CEO黨既人我諗都真係應該請既，如果請一啲唔請一啲就會好顯眼咁大細超。所以…唉，淨係公司既高層我都要擺返幾圍…

我哋上網睇過唔同既酒樓，多數都係睇啲專搞婚宴果啲，而唔係揀酒店。始終我哋雖然而家都叫有小小錢，兩個人加埋既月入都非常唔錯，但之前林太住私家醫院果度都真係用咗六位數既支出…

如果用一圍酒既價錢黎計，酒店同酒樓至少爭幾千（係至少！），響酒樓擺二、三十圍隨時可以慳返成十萬！

（待續）

其實今段情節真可以100字內寫完

可以再少啲

兩老見面傾婚禮，熙爸主張攪大佢。
熙希望完成父心願，秋兒例牌支持。
熙詳盡剖析自己個腦點諗賓客安排。

無計，要凸顯熙哥有幾孝順，過得有幾好嘛