我和鄰居大姐姐的故事（24）

冇錯阿
現實多數ceo都係會同流合污
又或者咁有心嘅ceo被啲手下橋起

除非班董事集體好唔妥班人啦

Push

能幹的秘書

呢個其實係，佢哋尤其是早期到中期，關係都似姐弟多啲

七百六十一

同Albert咁樣傾完之後，好多心入面既疑問都解開咗，於是我都伸出手黎︰「合作愉快。」

加入Albert陣營整頓公司，我隨時仲可以向食屎劉（我幫Marketing劉經理改既名）公報私仇，真係諗起都爽。

「好喇，你仲有冇其他問題問？」Albert輕鬆地問︰「問咩都得，我哋當普通傾計咁。」

我突然諗起有同事問CEO助理係咪要跟埋CEO返屋企…

屌，好撚驚喎，於是我照直咁問。

Albert哈哈大笑，道︰「乜你好想跟埋我返屋企咩？」

我搖頭道︰「我唔搞基。」

Albert笑得仲撚犀利，道︰「我都唔搞，我有老婆架。」笑完之後佢就答我問題︰「唔計等時有機會我請晒你哋黎我屋企食飯，淨係計工作上既時間既話咁梗係唔駛喇。你既副助理工作，係幫我應付公司上、工作上既嘢，我又唔係請保母或者私人助理，梗係唔駛喇。最好你哋辦公時間之內做好晒啲嘢唔駛OT添啊。」

「哦？好少見上司唔想下屬OT喎。」我有啲好奇咁問。

「我哋OT錢比得太多喇，呢個都係我其中一個改革既方向。」Albert彷彿睇穿咗我心思︰「唔係話唔可以OT，亦都唔係話OT唔比OT錢，但你都有眼見，有幾多同事真係因為有嘢做而OT？又或者特登響正常辦公時間唔做嘢，將啲嘢留到OT先黎做去呃OT錢？」

我諗起自從我加入公司之後，睇到既情況真係差唔多係咁，於是我點頭認同︰「冇錯。」

「除咗你，我都仲留意緊另外果兩個MT既情況，不過佢哋既情況同你有啲唔同，我會叫我啲心腹看著佢哋，適當時候我會提拔埋佢哋。」Albert又道︰「可以幫公司改革既新血，真係越多越好。」

「嗯。」Albert講得啱既，啲老屎忽阻住地球轉，唔加入啲新血都唔得。

「我信得過你，好好地做，好好地幫我手。」Albert道。

「好。」

「好喇，都唔阻你喇，你返落去執嘢同交接埋啲手尾先喇。」Albert向我笑道︰「聽日第一日上任我既副助理，唔好遲到啊。」

「啊，我有一件事想講定先。」我醒起林太件事，就同Albert講聲我而家既情況，同埋隨時都有突然請假既可能性。

Albert道︰「冇問題吖，佢係你女朋友既母親，你孝順埋佢認真唔話得。」

聽到Albert咁講我就放心晒，於是我都同佢道別離開行政專區。

聽日之後我就會直接跟住呢個全公司最大權力既人，佢都好有決心去改革公司，但表面睇黎佢都係一個會睇住啲細既上司，希望之後真係可以同佢好好既合作喇。

*

收工之後Kate走落黎會計部問我一唔一齊食飯，佢諗住食好小小，當慶祝下通過試用期同埋升職加薪。

「妖，妳搵妳男朋友喇。」我隨口對Kate鳩UP。

事實上我對佢既感情狀況仲係維持緊響佢同緊個有錢仔拍拖，再加埋佢釣住個初戀男朋友。不過事實上都過咗兩年幾三年，Kate咁水性揚花，換咗男朋友都唔出奇吖，係睇個有錢仔啲錢留唔留得住佢個人既啫。

「嘻嘻，仔死仔還在，我都要同我既好同事食飯維繫下感情架嘛。」Kate向我好姣咁笑咗下。

「得喇得喇，唔好姣我喇，我今晚唔得閒要去醫院探病啊。」

「咁探病之前都要食啲嘢架啫，一係我同你快食小小嘢吖？」Kate繼續問。

「都話得咯，我同妳都夠friend喇，唔駛一定要今晚食飯架喎。」我執埋個袋，向全個department道︰「多謝大家呢兩個月既指教，我走喇。」

要道別既說話其實下晝既時候都已經講完，所以同事只係坐響位度同我講拜拜，道別聲響辦公室內此起彼落，之後佢哋又繼續埋首做嘢。

冇計，會計部其實都實係加班既重災區 （佢哋真係要有嘢做，唔係呃OT錢），我可以成日都咁準時收工係因為我對會計啲嘢唔係好在行，搞到Kelvin都唔敢比啲咩太複雜既工作我做（又或者佢知我都只不過係黎實習），日日做完啲手板眼見既工夫就收得工。

Kate同我一齊行出公司門口，一路傾計吹水吹到我上巴士佢先肯走。

屌那星，巴士埋站既時候都算幾多人，樓上樓下都冇位座，我逼住要企成程車，一路企一路諗嘢。

唔…

雖然話我同Kate本身都算係朋友，但佢今日下晝開始對我好似熱情得同之前好唔同…

會唔會過火過頭啊…

唔通…佢咁樣係因為知道我調咗去行政專區，做埋CEO既副助理，可能會對CEO都有啲影響力，所以佢想用返以前用肉體上位既手段去對付我，等我響CEO面前幫佢上位？

（待續）

所以當睇到秋兒同熙熙一齊有啲唔係幾開心
佢兩個嘅相處太平淡
由小學開始每日唔係補習就係煮飯
同秋兒一齊個感覺好似同會出聲嘅忍者欣拍拖咁

呀Kate個目的都幾明顯

Push

機心女+綠茶婊

Push

七百六十二

雖然醫生早幾日先講過話林太有好轉，可能隨時都會醒返，但老實講，響我眼中望到既，林太都一樣係成身插住喉咁瞓咗響張病床度郁都唔郁，同之前都冇分別。

探完病之後，我同秋兒姐姐搭巴士返去屋邨，然後是旦搵咗一間餐廳食飯。

雖然依舊係好憂心，但可能呢段時間入面都習慣咗來來回回咁去醫院探病，至少而家秋兒姐姐個樣都冇之前咁攰，更加冇當年考教師文憑、溫書、備課、私補賺錢同探病咁多嘢逼埋一齊既時候咁憔悴。

食飯既時候，我就同秋兒姐姐講我會升職做CEO副助理，又同講返下晝Albert搵我傾計既事。

秋兒姐姐督住凍檸茶入面塊檸檬，有啲出神咁道︰「大公司啲人事關係真係複雜…」

我深表認同︰「點止複雜，已經係去到人事鬥爭既階段。」

「你自己響公司要小心啊，你咁後生就坐到呢個位，一定好多人眼紅你。」秋兒姐姐關心地道︰「工作上遇到咩困難都要同我講啊，知唔知？」

我哈哈一笑︰「放心，至少暫時唔會有啲咩事，有CEO照住我喎，邊個夠膽得罪我！」

秋兒姐姐關心地道︰「就係你咁樣諗先易出事啊，總之你唔好諗住有邊個幫你撐腰，做嘢要小心啲，同埋要比心機去做啊。」

嗯…秋兒姐姐咁講都啱，我咁得意忘形，其實好易出事，於是我答應佢︰「我知架喇。」

事實上我日後響工作上都真係遇到好多唔同既挑戰，而雖然秋兒姐姐唔係同我同一間公司做嘢，但係我都會向佢傾訴好多工作上既問題，佢都會比好多建議，等我去渡過難關。

佢比既建議更加多既係精神上、心態上既建議，佢溫柔既微笑係我做任何事情既動力，可以話做我背後既女人去支持我佢真係做得好稱職。

我哋食完飯之後我送佢返屋企，響門口時我問︰「今晚駛唔駛陪妳啊？」

「我OK啊，你今晚陪下Uncle喇，要話比佢聽你升職既好消息啊。」秋兒姐姐答道。

「嗯，咁我陪妳陪到老豆返黎我至返過去喇。」

「但係好夜架喎，你聽日係過咗試用期升職之後第一日返工，不如早啲休息喇。」秋兒姐姐柔聲道。

「咁我響妳屋企都可以休息架啫。」我左右望一望，見冇人就錫咗秋兒姐姐面豬登一啖。

秋兒姐姐甜甜一笑，道︰「你話點就點喇。」語氣都幾開心，然後有小小面紅咁講︰「不過…你真係要休息架…聽日係你新職位既新開始，一定要養足精神啊。」

我又錫多秋兒姐姐面豬登一啖，明知顧問咁笑住問︰「我唔休息可以做啲咩啫？」

秋兒姐姐輕輕拍咗我心口一下，帶啲嬌羞道︰「你心知肚明喇。」

「哈哈。」我又錫多咗佢一啖。

*

結果呢晚我真係單純咁陪秋兒姐姐瞓覺，然後等佢瞓著咗之後我就返過去屋企。返到去既時候已經差唔多十一點，但係老豆都仲未返到。

我坐咗響梳化度，望住果部壞咗十世既電視發呆。

呢段時間既經歷，尤其是見到林太突發性中風搞到而家仲昏迷不醒，令我諗多咗好多嘢。

除咗想親口同老豆講我升職既事之外，我仲有其他嘢想同佢講。

我發咗唔知幾耐吽哣，終於聽到開門聲，係老豆收工返到屋企。

我突然感到有啲啲心UP，老豆為咗維持呢個家，咁樣早出晚歸返工法返咗幾耐？

「老豆。」我響梳化上面同老豆打招呼，見到佢手上面仲拎住樓下買到既宵夜。

「熙熙？」老豆望住我，問︰「咁夜都未瞓啊？」

「係啊，等你返黎，有嘢同你講吖嘛。」

老豆放低啲宵夜響枱，同我講︰「好啊，你講吖。」再將啲宵夜從個膠袋度拎出黎，問︰「你過唔過埋黎食啊？我買咗歐伯啲生菜魚肉，好正。」

「哦，好啊，我去拎碗。」

之後我哋兩仔爺就響餐枱上面一路食宵夜一路傾。

「熙熙，你有咩想同我講？」老豆問。

「我份工過咗試用期喇，仲升埋職，有人工加。」我答。

老豆個樣好高興，讚我︰「咁叻仔啊？」

「還好喇…」我又食咗啖魚肉，沉默咗一陣，然後開口將我最想講既說話講出黎︰「老豆，既然我都過咗試用期，份工穩陣得黎又有人工加，不如你退休，唔好咁辛苦日日早出晚歸，留返啲時間響屋企享下福喇。」

（待續）

Pish

Push

真係成熟左，唔係迫到埋身先諗


不過點解唔掉左部壞電視佢

大麻熙同秋兒都係二人家庭，估計住公屋細單位，但個故講到佢兩個收入都好高（尤其係大麻熙），唔知使唔使交雙倍租呢